E Jeoba o dya̷trʼa̷ e Adán ñe e Eva mi perfectobi, dya ro nrru̱u̱bi ro mimibi texe yo paa kja ne xoñijomu̷ kʼu̷ me ma zo̷o̷. E Satanás o jñusbʼu̷ bʼechjine e Jeoba, ñe o tsjapu̷ ro mbeñeji kʼu̷ dya manda na joo e Mizhokjimi. E Adán ñe e Eva o tsjabi jama nee kʼe Diablo ngekʼua texeji ri pe̷sʼiji pekado ñe ri tu̱u̱ji

E Mizhokjimi o dyotu̷ nguenrra e Satanás, e Adán ñe e Eva. Nukʼua, nge ma e Mizhokjimi o mama ke ro nrra̷ja̷ Naja kʼu̷ ra mbotrʼu̷ e Satanás ñe ro mbosʼu̷ji yo ntee, ro ngu̷bu̷ kʼe pekado ngekʼua dya kja ra nrru̱u̱ji

E Jeoba o xipji e Abrahán ñe e David, kʼu̷ kja o pjamilia je rgui ñe̱je̱ kʼe Ntee kʼu̷ ro ne̱e̱ salvazu̷ji, kʼe Mesías, ke ra mbe̷zhi rey ra manda nrrexe yo paa

Kʼo profeta o opju̷ji kʼu̷ o xipji e Jeoba, o mamaji e Mesías ro ne̱e̱ ngu̷xku̷goji ne pekado ngekʼua dya kja ra tu̱u̱ji, xo go mamaji e Mesías ro mbe̷zhi Rey kja o Reino e Mizhokjimi. Xo ra bʼu̷bʼu̷ ntee kʼu̷ ra maa manda ko e Jesús, angezeji ra kjuatu̷ji yo chu̱ʼu̱ kʼo kjaji yo país, yo ntee dya kja ra sodyeji, dya kja ra tu̱u̱ji

E Jeoba o mama ke e Jesús mi ngeje kʼe Mesías. E Jeoba o pejñeba kja ne Xoñijomu̷ e Jesús ngekʼua ro jichi yo ntee pje ngeje kʼe Reino, ñe ro unu̷ o bida por texezgoji. Ma o nrru̱u̱ e Jesús, e Jeoba o xosu̷ ndo go yepe o mimitrjo nzakja na espíritu

E Jeoba o ñeme e Jesús ro manda ajensʼe, kʼe paakʼu̷ o mbu̷ru̷ yo nrrumu̷ kʼo na zezhi texe nu Xoñijomu̷. Akjanu ri unkʼoji nguenrra dya kja ra mezhe kʼe paa ma e Jeoba ra kjuatu̷ kʼo na sʼoo. E Jesús pjosʼu̷ o mbepji e Jeoba ngekʼua ra jichiji yo ntee pje ni mbeje o Reino Mizhokjimi

E Jeoba ra xipji o Trʼii ra manda nrrizi ajensʼe kja ne Xoñijomu̷. E Jesús ra chjotu̷ texe yo manda kja ne Xoñijomu̷, ra tsjaa ne Xoñijomu̷ me rru̷ zo̷o̷, texe yo ntee kʼu̷ kjaji kʼo nee e Jeoba dya ra pe̷sʼiji pekado. Yo ntee ra mba̱ra̱ji kʼu̷ ngextrjo e Jeoba nge kʼu̷ manda na joo, dya kja ra jñusbu̷ji bʼechjine, ra dya̷ta̷ji e Mizhokjimi texe yo paa