E Jehová o dyⱥtrʼⱥ e Eva ngekʼua ro mimibi e Adán (Génesis 2:21, 22).

Ma e Jehová o dyⱥtrʼⱥ e Adán ñe e Eva, dya mi pɇsʼibi pekado, dya mi kjijñibi kʼo na sʼoo. Me ma joo jaba dyⱥtrʼⱥ Mizhokjimikʼo, dya mi sodyebi.

O ñeme e Adán ñe e Eva ro mimibi kja kʼe jardín Edén, me ma zøtrjo kʼe jardín. E Jehová bi ngama na punkjꞹ añimale, o ñeme na punkjꞹ zaʼa kʼo mi kisʼi na punkjꞹ pje ro ziji, ja nrre mi bʼꞹgꞹ nrrareje kʼo me ma zøtrjo.

E Jehová mi zopjꞹ mi xipji pje ro tsjabi. Ma e Adán ñe Eva ro tsjabi kʼo mi mama e Mizhokjimi, dya ro nrru̱bi; ro mimibi nrrexe yo paa kja ne Xoñijomꞹ.

E Jehová ya bi mama: Dya ri sii ne lulu kʼo kisʼi kja ne zaʼa, ma ri sii ri chu̱ge.

Na anxe kʼꞹ mi bʼꞹbʼꞹ ajensʼe dya go dyⱥtⱥ e Jehová o tsjaa kʼo na sʼoo. Kʼe anxe ngeje e Satanás ñe Diablo.

E Satanás dya mi nee ke e Adán ñe e Eva ro dyⱥtⱥbi e Jehová. Ngekʼua o tsjapꞹ ro ñaa na kʼijmi. Kʼe kʼijmi o xipji e Eva: Ma ri sii ne lulu dya ri chu̱u̱, ri chjenkje nzakja e Mizhokjimi. Ga kjanu ba jiotrʼꞹ e Eva, dya ma kjuana kʼo bi mama e Satanás (Génesis 3:1-5).