1. ¿Kjo nge kʼꞹ søø ra xitsʼkøji ja rga matrʼꞹji Mizhokjimi?

NA PUNKJꞸ religión manji ke jizhiji kʼo na kjuana ja ga kjaa Mizhokjimi. Pe dya nge ga kjanu, nange yo religión nʼaño ga jizhiji ja ga kjaa Mizhokjimi ñe ja rga matrʼꞹji angeze. ¿Ja rga pa̱rgøji ja ga nee e Mizhokjimi kʼꞹ ra matrʼꞹji? Ngextrjo e Jehová søø ra xitsʼkøji ja rga matrʼꞹji angeze.

2. ¿Ja rgi pa̱rge ja ga nee e Mizhokjimi ri matrʼꞹ?

² E Jehová go dyakꞹji ne Biblia ngekʼua ra pa̱rgøji na joo ja rga matrʼꞹji angeze. Ni jyodʼꞹ ri xørꞹ ne Biblia ngekʼua ra mbøxkʼꞹ e Jehová ri meya na joo yo ri xørꞹ ga kjanu ri minkʼe na joo (Isaías 48:17).

3. ¿Pje nee Mizhokjimi ra kjagøji?

³ Bʼꞹbʼꞹ ntee kʼo manji ke e Mizhokjimi sⱥjⱥ texe yo kjaa yo religión, pe dya nge kʼo go mama e Jesús. Angeze go mama ga kjaba: “Na punkjꞹ kʼo ra xitsʼkø: ‘Nutsʼkʼe in Jmutsʼꞹgø’ ra ñenzgøji. Pero dya texeji ra kjogꞹji kʼua ja manda Mizhokjimi. Kʼo ra kjogꞹnu, ngextjo kʼo ra tsjaa kʼua ja nzi ga nee kʼꞹ mi Tatagø kʼꞹ bʼꞹbʼꞹ ajensʼe”. Ngekʼua ni jyodʼꞹ kʼꞹ ra pjechiji pje mama Mizhokjimi ñe ra kjaji yo ra pjechiji. Me na joo ma ra kjaji ga kjanu nangeje e Jesús go mama ke yo ntee yo dya ⱥtⱥ Mizhokjimi ‘kjaji yo na sʼoo’ (Mateo 7:21-23).

4. ¿Pje go mama e Jesús ro tsjaa yo ntee yo ⱥtⱥ Mizhokjimi?

⁴ E Jesús go mama kʼꞹ ma ra kjaji kʼo mama Mizhokjimi, ra tøtrʼꞹji nrrumꞹ. E Jesús go mama: “Ri tsjogꞹji kja kʼe ngoxtrʼi kʼꞹ sʼichʼi, nangeje na mbⱥtrʼⱥ nu ngoxtrʼi ñe nu ñʼii nu ja paa na punkjꞹ ntee kʼo ra nrru̱u̱; kja kʼe ñʼii ñe kʼe  ngoxtrʼi kʼꞹ sʼichʼi janzitrjo ntee panu, nujyo ra mimiji nrrexe yo paa” (Mateo 7:13, 14, TNM). Nu ñʼii kʼꞹ sʼichʼi nge yo pa̱ra̱ji ja rga matrʼꞹji Mizhokjimi ñe ra mimiji texe yo paa. Kʼe ñʼii kʼꞹ na mbⱥtrʼⱥ nge yo dya matrʼꞹ Mizhokjimi ja ga mama angeze, kʼo nzhodʼꞹnu ra nrru̱ji. Pe e Jehová dya nee ke yo ntee ra nrru̱ji, angeze nee ke nrrexe yo ntee ra mba̱ra̱ji angeze (2 Pedro 3:9, TNM).

5. ¿Ja rga pa̱rgøji kjo nge kʼo matrʼꞹ Mizhokjimi ja ga nee angeze?

⁵ E Jesús go mama ja rgua pa̱rgøji kjo nge kʼo matrʼꞹji Mizhokjimi ja ga mama angeze. Søø ra pa̱rgøji ma ra xørꞹji kʼo kreoji ñe kʼo kjaji yo ntee. Angeze go mama: “Kʼꞹ rgi pa̱ra̱geji kʼo xøpꞹte, ri ꞹnkʼeji nguenda ja ga mimikʼo”. Ñe xo go mama kʼꞹ “je xo ga kjatjonu texe o zaʼa kʼo na joo, kisʼi kʼo na joo” (Mateo 7:16, 17). Nujyo dya nee ra mama ke kʼo matrʼꞹji Mizhokjimi dya kjaji kʼo na sʼoo. Pe kʼo ntee kʼo pɇpi Mizhokjimi dya jɇzi ga tsjaji kʼo na joo. Ra nuji pje ra mbøxkꞹji ra pa̱ra̱ji kjo nge kʼo matrʼꞹji Mizhokjimi ja ga nee angeze.

6, 7. ¿Pjenga ni jyodʼꞹ ra jichiji yo ntee yo mama ne Biblia? ¿Pje go tsjaa e Jesús ngekʼua xo ra kjagøji?

⁶ Ni jyodʼꞹ ra jizhiji yo mama ne Biblia. Ne Biblia mama ga kjaba: “Texe kʼo o dyopjꞹ o jñaa Mizhokjimi, nge o [e]spíritu Mizhokjimi o ñʼꞹnbꞹ o mꞹbʼꞹji o dyopjꞹji. Me ni mubi o jñaa Mizhokjimi para ra jichkʼøji yo ntee kʼꞹ na kjuana ja ga kjaa Mizhokjimi, ñe ja rga pjønguendaji kja kʼo dya kjuana. Me xo ni mubi o jñaa Mizhokjimi para ra zopjꞹji kʼo kjaa na sʼoo, ngekʼua ra jyɇzijikʼo, ra tsjaji kʼo na joo. Me xo ni mubi para ra jichiji pje ni mbe kʼo na joo kʼo ra tsjaji. Mizhokjimi o dyakꞹji o jñaa, ngekʼua nutsʼkøji o tʼizgøji ra kjaji texe kʼua ja nzi ga nee angeze kʼo na joo” (2 Timoteo 3:16, 17). E apóstol Pablo go xipji kʼo ntee kʼo mi ⱥtⱥ e Jesús ga kjaba: “Ma ro xitsʼkʼøjme o jñaa Mizhokjimi,  dya bi dyⱥrⱥtjoji nzakja ma ri nge o jñaa yo ntee. Pero bi jyɇziji o zichʼi in mꞹbʼꞹji nangeje bi ꞹnkʼeji nguenda kʼꞹ ngeje o jñaa Mizhokjimi. Y ix na kjuana ngeje o jñaa angezekʼꞹ” (1 Tesalonicenses 2:13). Kʼo na kjuana matrʼꞹ Mizhokjimi kjaji yo mama ne Biblia, dya kjaji yo manji yo ntee ñe dya kjaji ja ga tsjaa yo ntee yo dya matrʼꞹ Mizhokjimi.

⁷ Texe kʼo o jizhi e Jesús mi mama kja o jñaa Mizhokjimi (xørꞹ Juan 17:17, NTD). Angeze mi jichi kʼo mi junsʼꞹ kja o jñaa Mizhokjimi (Mateo 4:4, 7, 10). Kʼo na kjuana pɇpi Mizhokjimi, kjaji ja ba tsjaa e Jesús ñe jichiji yo ntee yo ba e̱je̱ kja ne Biblia.

8. ¿Ja ba jitsʼkøji e Jesús ngekʼua ra matrʼꞹji e Jehová?

⁸ Ngextrjo e Jehová ra matrʼꞹji. Kja Salmo 83:18 mama ga kjaba: “Ni chju̱tsʼkʼe Jehová, ixi ngextrjotsʼkʼe me na notsʼkʼe kja texe ne xoñijomꞹ”. E Jesús mi nee ke kʼo ntee ro mba̱ra̱ji ja ga kjaa e Mizhokjimi ñe go jichi kʼo ntee o trju̱u̱ Mizhokjimi (xørꞹ Juan 17:6, NTD). E Jesús go mama ga kjaba: “Ra ndꞹñijomꞹjme ra matʼꞹjme Mizhokjimi [Jehová] kʼꞹ nge in Jmuji. Y ngextjo angeze ra pɇpijme” (Mateo 4:10). Texe yo pɇpi Mizhokjimi kjaji kʼua ja nzi go tsjaa e Jesús, jichiji yo ntee o Jñaa Mizhokjimi. Ngextrjo e Jehová ra matrʼꞹji, ra jichiji yo ntee o trju̱u̱ angeze ñe pje ra tsjaa ngekʼua ra mbøxkꞹji.

9, 10. ¿Pje ri kjaji ngekʼua ri potka sʼiyaji?

⁹ Ni jyodʼꞹ ra sʼiyaji yo ntee ko texe in mꞹbʼꞹji. E Jesús go xipji o discípulo ro potka sʼiyaji (xørꞹ Juan 13:35). Ri kjajiyo zø nrre nʼaño ri menzumꞹji ñe ja ga mimiji, zø ri jꞹ̱ji merio o dya pje ri pɇsʼiji. Texezꞹji ri potka sʼiyaji in kjuarmaji ñe in kju̱ji, nzakja na pjamilia (Colosenses 3:14). Dya ri poo kjaa chu̱ʼu̱ ngekʼua ra pøtrʼꞹji yo ntee. Kja ne Biblia mama ga kjaba: “Ngekʼua rga pa̱ra̱gøji kjo nge o tʼii Mizhokjimi, ñe kjo nge o tʼii kʼꞹ dya joo. Ma kjo kʼo dya kjaa kʼo na joo, ñe ma dya xo sʼiya o kjuarma, nuʼma, dya nge o tʼii Mizhokjimimakʼꞹ”. Ne Biblia xo mama: “Ni jyodʼꞹ ra potka  sʼiyaji. Dya ra kjaji kʼua ja nzi ba tsjaa e Caín. Nukʼꞹ, o tsjaa kʼo na sʼoo kʼo o bʼɇpji e Satanás kʼꞹ dya joo, o mbøtʼꞹ kʼꞹ o kjuarma” (1 Juan 3:10-12; 4:20, 21).

¹⁰ Ri xo̱kꞹji nrrajme ngekʼua ri pjøsʼꞹji in dyokjøji, ri unꞹji kʼo ni jyodʼꞹji ñe ma søxiji ri zɇtsʼpiji o mꞹbʼꞹ (Hebreos 10:24, 25). Xo “Ni jyodʼꞹ ra pjøsʼꞹji texe yo nin mintegøji” (Gálatas 6:10).

11. ¿Pjenga ni jyodʼꞹ ra kjaji yo mama e Jesús?

¹¹ Ra ejmegøji ke e Mizhokjimi go pejñe e Jesús ngekʼua ro ngꞹxkꞹji. Kja ne Biblia mama: “Otjo xe naja kʼꞹ ra jokꞹzꞹ in mꞹbʼꞹji kʼo na sʼoo; ngextjo e Jesucristo. Dya kjo xe ra ndⱥjⱥ Mizhokjimi ra e̱ salbazꞹji; ngextjo e Jesús” (Hechos 4:12). Kja nu xørꞹ 5 ro pjechiji ke e Jehová go pejñe e Jesús kja ne xoñijomꞹ ngekʼua go nrru̱u̱ ba ngꞹxkꞹji in nzhubꞹji yo ri ⱥtⱥji Mizhokjimi (Mateo 20:28). E Jehová go ñʼeme e Jesús kja nu Reino ngekʼua ra manda kja ne xoñijomꞹ. Ngekʼua ne Biblia mama ke ni jyodʼꞹ ra kjaji yo mama e Jesús ga kjanu ra søø ra mimiji ndexe yo paa (xørꞹ Juan 3:36).

12. ¿Pjenga dya ri kichkʼøji kja política?

¹² Dya ra kichkʼøji kja política. E Jesús dya go ngichi kja política. Ma nu bʼɇzo kʼꞹ mi chju̱u̱ Pilato ma jꞹmpꞹ nguenrra e Jesús, angeze go xipji: “In reino dya tsjaba kja ne xoñijoma” (xørꞹ Juan 18:36, TNM). * Nzakja e Jesús ri ejmegøji ke o Reino Mizhokjimi kʼꞹ bʼꞹbʼꞹ ajensʼe ra mbøxkꞹji, ngekʼua zø ja ri menzumꞹji dya ri kichkʼøji kja política. Pe ne Biblia xitsʼkøji: “Ni jyodʼꞹ ri dyⱥtⱥji yo pje pjɇzhi”, yo pje pjɇzhi nge yo manda kja ne xoñijomꞹ (Romanos 13:1). Nu ja ri menzumꞹji ri ⱥtⱥgøji yo ntee yo manda. Pe ma ra xitsʼkøji ra kjaji kʼo dya nee e Mizhokjimi, ra  kjagøji nzakja kʼo apostole kʼo go manji: “Xenda ni jyodʼꞹ ra ⱥtⱥjme Mizhokjimi kʼꞹ manda ke na ngeje yo bʼɇzo” (Hechos 5:29, TNM; Marcos 12:17).

13. ¿Pje ri jichiji yo ntee ke ra tsjaa o Reino Mizhokjimi?

¹³ Ri ejmegøji ke ngextjo o Reino Mizhokjimi ra jokꞹ texe yo ndumꞹ kja ne xoñijomꞹ. E Jesús go mama ke “ra jichiji pje ra tsjaa nu Reino Mizhokjimi” kja texe ne xoñijomꞹ (xørꞹ Mateo 24:14, TNM). * Yo manda dya søø mbøxkꞹji kʼua ja nzi ra tsjaa o Reino Mizhokjimi (Salmo 146:3). E Jesús o mama ke ro øtꞹji ro ne̱ manda o Reino Mizhokjimi, angeze go mama: “Penkejme in reino ngekʼo nrrexe yo ka̱ra̱ ajensʼe ñe kja ne xoñijomꞹ ra dyⱥtkʼⱥji” (Mateo 6:10, TNM). Ne Biblia mama ke o Reino Mizhokjimi ra chjotꞹ texe yo ntee yo manda ñe “ngextrjo o reino Mizhokjimi ra manda” (Daniel 2:44).

14. Pje i mange, ¿kjo nge yo na kjuana matrʼꞹ Mizhokjimi?

¹⁴ Nudya ke gi pa̱rge texe yo ya ro xørꞹji, søø ri mange: “¿Kjo nge yo jichi kʼo mama ne Biblia? ¿Kjo nge yo jichi yo ntee o trju̱u̱ Mizhokjimi? ¿Kjo nge yo na kjuana sʼiya yo dyaja ñe ejmeji ke Mizhokjimi go pejñe e Jesús ro ne̱e̱ ngꞹxkꞹji? ¿Kjo nge yo dya kichʼi kja política? ¿Kjo nge yo jichi yo ntee ke ngextrjo o Reino Mizhokjimi søø ra jokꞹ yo nrrumꞹ?” Ngextrjo yo testigo e Jehová kjajiyo (Isaías 43:10-12).

15. ¿Pje ra kjaji ma ri negøji ke e Mizhokjimi ra nuu na joo ja rga matrʼꞹji?

¹⁵ Dya ngextrjo ra ejmeji ke bʼꞹbʼꞹ Mizhokjimi, nange je xo ga kjanu ga tsjaa yo demonio, pe dya ⱥtⱥjikʼꞹ (Santiago 2:19). Ma ri negøji ke e Mizhokjimi ra nuu na joo ja rga  matrʼꞹji, ni jyodʼꞹ ra kjaji kʼo mandazꞹji ñe dya xo ra ejmetrjoji ke bʼꞹbʼꞹ angeze.

16. ¿Pjenga ra pedyeji kja religión kʼꞹ dya ga kjuana?

¹⁶ Ma ri negøji ke e Mizhokjimi ra nuu na joo kʼo ri kjaji, ni jyodʼꞹ ra pedyeji kja religión kʼꞹ jizhi kʼo dya ga kjuana. E Isaías go mama: “Gi bʼꞹnkʼeji a nrree angezeji ix ti pedyeji, dya ri pørꞹji” (Isaías 52:11; 2 Corintios 6:17). Ngekʼua ni jyodʼꞹ kʼꞹ dya ra kjaji nza kja yo religión kʼo dya ga kjuana.

17, 18. ¿Pje nge “ne ndajñiñi a Babilonia” ñe pjenga ni jyodʼꞹ ri jyɇzi yo religión yo dya ga kjuana?

¹⁷ ¿Pje kjaa yo religión yo dya ga kjuana? Dya jichiji kʼo mama ne Biblia kʼꞹ na kjuana ja rga matrʼꞹji Mizhokjimi. Kja ne Biblia mama ke yo religión yo dya ga kjuana ngeje “ne ndajñiñi a Babilonia” (Apocalipsis 17:5). ¿Pjenga? Kja kʼo paa e Noé go ñe̱je̱ na trʼadyebʼe, ma go kjogꞹ kʼo paa go bʼꞹbʼꞹ na ndajñiñi kʼꞹ mi chju̱u̱ Babilonia, nunu mi jichiji kʼo ntee na punkjꞹ kʼo dya ma kjuana. Texe kʼo mi jichijinu xo go tsjaji kja texe ne xoñijomꞹ. Kʼo ntee kʼo mi bʼꞹnji a Babilonia mi xørpꞹji mizhokjimi nzakja na trinidad. Yo padya, na punkjꞹ religión xo jichiji ke e Mizhokjimi ngeje na Trinidad, pe kja ne Biblia mama ke bʼꞹbʼꞹ natrjo Mizhokjimi kʼꞹ na kjuana, nukʼꞹ ni chju̱u̱ Jehová ñe o trʼii kʼꞹ ngeje e Jesús (Juan 17:3). Kʼo ntee kʼo mi bʼꞹbʼꞹ a Babilonia xo mi ejmeji ke bʼꞹbʼꞹ kʼo pedyezꞹji ma ri tu̱ji kʼꞹ xi ga mimi ñe ga maa a linpjiernu nu ja ra supjre. Pe dya ga kjuanakʼo (jñanrra nu nota 14 kja nu página 213, nu nota 17 kja nu página 214 ñe nu nota 18 kja nu página 215).

¹⁸ E Mizhokjimi go mama ke dya kja ra mezhe ma ra kjuatꞹ texe yo religión yo dya ga kjuana (Apocalipsis 18:8). ¿Gi ꞹnkʼe nguenrra pjenga ni jyodʼꞹ ri jyɇzi yo religión yo dya ga kjuana? E Mizhokjimi Jehová nee kʼꞹ nutsʼkʼe ri jyɇzi nu religión kʼꞹ dya ga kjuana ante kʼꞹ ra sⱥjⱥ nu paa ma dya kja ra søø (Apocalipsis 18:4).

19. ¿Ja rga mbøxkʼꞹ e Jehová ma ri tsjage yo mama?

 ¹⁹ Ma ri jyɇzi yo religión yo dya ga kjuana ñe ri tsjage yo mama e Jehová, yo ntee yo i jogebi o in pjamilia dya ra meyaji pjenga gi jyɇzi nu religión, ñe bʼꞹma pje nrre ra tsjakʼꞹji ngekʼua dya ri søge na joo. Pe e Jehová dya ra jyɇtsʼkʼi, ra mbøxkʼꞹ. Nutsʼkʼe søø ra ngetsʼkʼe dʼaja o ntee Mizhokjimi, søø ri dyokjeji na punkjꞹ ntee ke ngeji nzakja na pjamilia ke me potka sʼiyaji ñe ri søø ri mimi texe yo paa kja nu dʼadyo xoñijomꞹ kʼꞹ me rga zøø (Marcos 10:28-30). Bʼꞹma yo ntee yo i jogebi ñe in pjamilia dya neji kʼꞹ ri tsjage kʼo mama e Jehová, pe ma ra kjogꞹ yo paa bʼꞹma ra nee ra xørꞹji ne Biblia.

20. ¿Pjenga me na joo ke ra matrʼꞹji Mizhokjimi kʼua ja nzi ga mama?

²⁰ Dya kja ra mezhe ma e Mizhokjimi ra kjuatꞹ kʼo na sʼoo ñe o Reino ra manda kja ne xoñijomꞹ ndeze ajensʼe (2 Pedro 3:9, 13, TNM). ¡Me rga joo ma ra zⱥdʼⱥkʼo! Texe yo ntee ra matrʼꞹji e Jehová ñe ra kjaji kʼua ja nzi ga nee angeze. Nudya nge yo paa ke ra jodʼꞹji Mizhokjimi ñe ra matrʼꞹji kʼua ja nzi ga mama angeze.