Ixi kjogꞹ setecientos cincuenta idioma kʼꞹ ri opjꞹjme skuama ngekʼua ra “zopjꞹ[jme] texe yo ntee” o Jñaa Mizhokjimi “zo pje ma jñiñi kʼꞹ [...] menzumꞹji, zo pje ma rasaji, zo pje ma jñaa [...] ñaji” (Apocalipsis 14:6). ¿Ja ga kjagojme kʼe bʼɇpji kʼꞹ na sʼɇzhi? Kja nrrexe nu Xoñijomꞹ bʼꞹbʼꞹ kjuarma kʼꞹ opjꞹji skuama, xo bʼꞹbʼꞹ kʼo dya jɇzi ga pɇpji e Jehová, nujyo nge kʼo traductor kʼꞹ opjꞹji yo skuama kja pje nrre ma idioma kʼꞹ ñaji. Texe yo na kjaji kʼe bʼɇpji ngeji testigo e Jehová.

Otrʼꞹ opjꞹji yo skuama kja idioma inglés. Kʼe Cuerpo Gobernante bʼꞹbʼꞹ a Nueva York (Estados Unidos), xo bʼꞹbʼꞹnu kʼe Departamento nu ja opjꞹji yo skuama. Kʼe Cuerpo Gobernante nuu kʼe bʼɇpji kʼꞹ kjaji yo kjuarma yo opjꞹji yo skuama. Kʼe departamento nuu ja rga tsjaji ne bʼɇpji kʼo kjajinu ñe kʼo kjaji kja yo sucursal nu ja bʼꞹbʼꞹ kjuarma kʼꞹ opjꞹji skuama. Angezeji opjꞹji ja ga minji yo ntee nu ja menzumꞹji, pje kjajinu ñe pje kjogꞹnu. Akjaba, yo skuama kʼꞹ opjꞹji søø ra mbøsʼꞹ yo ntee zo nrre nʼaño menzumꞹji.

Penpeji yo skuama yo traductor. Ma go nguarꞹji go dyopjꞹji yo skuama, mꞹ na joo kʼo go dyopjꞹji, kʼe Cuerpo Gobernante unꞹ sjɇtsi ra jñusʼꞹjikʼo kja yo skuama. Kjanu penpeji yo skuama yo traductor kʼꞹ ka̱ra̱ji kja texe ne Xoñijomꞹ zo me na je̱e̱ ja ni bʼꞹnji, kʼe skuama ra zⱥtrʼⱥ kja o computadora yo traductor. Kʼua ja nzi ga mama kja inglés, angezeji opjꞹji kja o idioma ke ñaji, xo juajnꞹji na joo yo jñaa kʼꞹ ra tendioji yo ntee kʼꞹ ñaji kʼe idioma (Eclesiastés 12:10).

Yo computadora pjøsʼꞹji yo traductor ra tsjaji dabadiji yo bʼɇpji. Yo computadora dya kjaji kʼo bʼɇpji kʼꞹ kjaji yo traductor ñe dya søø ra dyopjꞹji skuama nzakja na ntee. Pe yo programa kʼꞹ pɇsʼiji yo computadora pjøsʼꞹji yo traductor ngekʼua ra tsjaji na joo o bʼɇpji. Yo ri testigojme e Jehová ro kjagojme na programa kja computadora ke ni chju̱u̱ Sistema Electrónico de Edición Plurilingüe (yo sigla kja inglés ngeje MEPS). Ko kʼe programa søø ra dyopjꞹji kja na punkjꞹ idioma yo letra ñe yo símbolo ko yo rretrato kʼꞹ ra kuatrʼꞹji kja yo xiskuama. Nukʼua ra mbenpeji kja yo imprenta.

¿Pjekja ri kjajme ne bʼɇpji ko texe in mꞹbʼꞹjme zo dya na punkjꞹ ntee ñaji yo idioma ke ri opjꞹjme kja yo skuama? Nange e Jehová nee ke “ra [salbaji] [...] texe yo ntee, ra mba̱ra̱ji kʼꞹ na kjuana” (1 Timoteo 2:3, 4).

• ¿Ja ga tsjaji yo skuama kʼꞹ pjongꞹji yo testigo e Jehová?

• ¿Pjenga ri opjꞹjme skuama kja na punkjꞹ idioma kʼꞹ ñaji yo ntee?