Kja ne Biblia mama ke kja yo congregación bʼꞹbʼꞹ kjuarma kʼo otrʼꞹ axojñi xo bʼꞹbʼꞹ kjuarma kʼo pjøsʼꞹ yo otrʼꞹ axojñi (Filipenses 1:1, TNM). Kja yo congregación bʼꞹbʼꞹ na punkjꞹ kjuarma kʼꞹ pjøsʼꞹji yo otrʼꞹ axojñi, ¿pje ma bʼɇpji kjaji nu ja ri jmurgojme?

Pjøsʼꞹji yo kjuarma kʼꞹ otrʼꞹ axojñi. Angezeji kjaji kʼo mama ne Biblia xo kjaji na joo kʼo xipjiji yo kjuarma kʼꞹ otrʼꞹ axojñi. Bʼꞹnkʼo kja trʼii ñe kʼo ya paleji. Kʼo kjuarma kʼꞹ otrʼꞹ axojñi xipjiji pje ma bʼɇpji ra tsjaji nu ja jmurꞹji. Ga kjaba kʼo kjuarma kʼꞹ otrʼꞹ axojñi søø ra mbørꞹji ñe ra jichiji na joo yo ntee nu ja jmurꞹji.

Kʼo kjaji angezeji pjøxkꞹjme na punkjꞹ. Ma ri pɇsʼijme reunión, yo kjuarma kʼo pjøsʼꞹ yo kjuarma kʼꞹ otrʼꞹ axojñi zenguaji yo ntee ñe xipjiji ja ra mimiji, chjꞹtʼꞹji nu bʼizhi ngekʼua ra zꞹnꞹ, unꞹji o xiskuama yo kjuarma nzakja yo revista ñe yo libro. Chjꞹma chjꞹma pezheji yo merio ke ri jutrʼꞹjme kja yo tsʼicaja ma ri jmurgojme, xo manji ja ra zopjꞹjme yo ntee ra jichijme kʼo mama ne Biblia. Xo nuji pje bʼɇxtrjo ngekʼua ra ndomꞹji, jokꞹji kʼo sʼodʼꞹ kja kʼe ngumꞹ nu ja ri jmurꞹjme. Xo pjøsʼꞹji yo tsʼipale ñe yo tsʼimale. Yo kjuarma janrraji ja ga pɇpjiji kʼo kjuarma kʼꞹ pjøsʼꞹji yo otrʼꞹ axojñi ngekʼua me nejikʼo (1 Timoteo 3:13).

Angezeji kjaji ja ga nee e Jehová, ga kjaba jitsʼkojme ja rga mimijme. Mꞹ bʼꞹbʼꞹ na kjuarma kʼꞹ kjaa ja ga mama ne Biblia, nge angeze ke ra juajnꞹji ra mbøsʼꞹ yo kjuarma kʼꞹ otrʼꞹ axojñi. Ma kjogꞹji axojñi kja plataforma jitsʼkojme jñaa kʼꞹ pjøxkꞹjme na punkjꞹ. Angezeji jichiji yo ntee kʼo mama ne Biblia. Me ri mⱥkjojme ma ri janrrajmekʼo, ngekʼua ri nee ra kjagojme kʼua ja ga tsjaji. Angezeji pjøxkꞹjme ngekʼua ra ka̱rgojme na joo ñe dya ra kjagojme chu̱ʼu̱ ko in dyokjojme (Efesios 4:16, TNM). Ma ra kjogꞹ yo paa, nujyo kjuarma søø ra tsjaji nzakja yo kjuarma kʼꞹ otrʼꞹ axojñi.

• ¿Ja ga kjaa yo kjuarma kʼꞹ pjøsʼꞹji yo otrʼꞹ axojñi?

• ¿Pje ma bʼɇpji kjaji yo kjuarma kʼꞹ pjøsʼꞹji yo otrʼꞹ axojñi?