MBITAJI KJO NEE RA PɆPJI KJA NE ASAMBLEA. Ma i nee ri pɇpjige kja ne asamblea, ri ma tsjaa trʼønꞹ kja nu Departamento kʼꞹ mama: Kʼo gi nee ri pa̱ra̱, ñe nu ja Zojnꞹji kʼo nee ra pɇpji kja asamblea.

PJE KʼO I BʼɆZHI. Ma pje kʼo ri chøtrʼꞹ, ri ma sogꞹ kja nu departamento kʼꞹ mama: Pje kʼo i bʼɇzhi. Ma pje kʼo i bʼɇzhi, ri ma tsjaa trʼønꞹ ma bʼꞹbʼꞹnu. Ma bi chøtrʼꞹ dʼa tsʼitrʼi kʼꞹ go bʼɇzhi, ri ma sogꞹnu. Nu departamento dya ñʼemeji ra mbørꞹ yo tsʼitrʼi, na pjeste ri pjørꞹji na joo in chʼiji yo jñii paa yo ra jmurꞹji.

PJØXKʼꞸJI MA I SØDYɆ. Dya ri jyombeñe ke nu departamento pjøsʼꞹ ngextrjo kʼo unꞹ o ngijeme kʼꞹ me na sʼɇzhi kja ne asamblea.

RI UNꞸ MERIO KO TEXE IN MꞸBʼꞸ. Ya go sʼodʼꞹji na punkjꞹ merio para ke ro rentaji yo trjujnꞹ nu ja ri mimiji, nu bʼizhi ñe yo pantalla nu ja ri janrraji yo video, xo bʼꞹbʼꞹ na punkjꞹ bʼɇpji para ke ro tsjaji ne asamblea ñe ra trjansi e Jehová. Ko yo merio yo ri unꞹji ri kjotrʼꞹji texe yo ro sʼodꞹji, ñe ri pjøsʼꞹji o bʼɇpji e Jehová kʼꞹ na kjaji kja texe ne xoñijomꞹ. Ma nutsʼkʼe gi nee ri unꞹ merio, kja ne asamblea bʼꞹbʼꞹ na punkjꞹ yo tsʼicaja yo kuatrʼꞹ dʼa letrero, je ri ma jñuntrʼꞹ kʼo merio ke i nee. Xo søø ri unꞹge merio kja Internet kja donate.pr418.com. Ri dʼakꞹjme na pøjø ke i juntrʼꞹji merio kja yo tsʼicaja. Nu Cuerpo Gobernante dʼakʼꞹji na punkjꞹ pøjø ke i jñuntrʼꞹji merio kja yo tsʼicaja kʼua ja ni mbedye kja in mꞹnkʼeji, akjanu xe ra jichiji yo ntee o Reino Mizhokjimi.

YO RA JUIBʼIJI KJA NRREJE. Ra ma mimiji a jmii nu plataforma, nange nge yo trjujnꞹ yo o juajnꞹji para ke ra mimiji yo ra juibʼiji kja nrreje. Ra ma mimijinu nu xabaro ma xo̱rꞹ ante ke ra unꞹji nu discurso. Nrrexe yo ra juibʼiji kja nrreje ra nganaji dʼa toalla, ñe ra xampjaji o bʼitu kʼꞹ ra jyeji kʼe paa.

YO TRJUJNꞸ. Ri tʼekjañomꞹ yo kjuarma ñe yo kju̱ʼu̱. Dya ri jyombeñe ke ngextrjo ri xo̱kꞹ yo trjujnꞹ ja ra mimi in pjamilia, kʼo poji kja in carro ñe ma i poji yo ntee yo i jichi kʼo mama ne Biblia. Dya pje ri tsa̱sʼa̱ kja yo trjujnꞹ ma dya kjo ra miminu.

YO XITSʼI JA RI MIMI. Angezeji ra mbøxkʼꞹji. Ri tsjage kʼo ra xitsʼiji, nzakja ma ra xitsʼiji ja ri sogꞹ in carro, ma ra xitsʼiji ja nge nu ri nzhodʼꞹ ñe ja ri ma mimi.

Nu skuela ja jichiji yo Precursor ra Nⱥdʼⱥji o Reino e Mizhokjimi Yo precursor yo ɇdyiji 23 a 65 kjɇɇ kʼꞹ nee ra moji na je̱ʼe̱ nu ja ra ma jichiji yo ntee, zojnꞹji ra jmurꞹji nu nrromgo ma nzhⱥʼⱥ. Kja nu plataforma ra manji nu hora kʼꞹ ra mbꞹrꞹ ñe ja ra jmurꞹji.