Yo jyoo ñe yo jñꞹꞹ ra potka ñaji ko yo o trʼii ngekʼua ra mba̱ra̱ji na joo pje kjijñiji ñe pje bʼꞹbʼꞹ kja o mꞹbʼꞹ.

Bʼꞹma na sʼɇzhi ri ñabi na joo ko in tjat’i maxke in tjarixꞹ. Na skuama Tu no me escuchas, yo no te entiendo mama ja rgua zøʼø na jyotrʼe. Mama ke ma kja mi tsʼikʼe yo trʼii ñe yo xutrʼi, mi kosꞹji o jyoo ñe o jñꞹꞹ texe kʼo mi kjogꞹji nu paa. Pe ma ya teji, dya kja nee ra ngosꞹji nu kʼo kjogꞹji, dya kja manji pje kʼo kjijñiji, o pje kʼo søji. Ngekʼua yo jyoo ñe yo jñꞹꞹ dya kja unꞹji nguenrra texe kʼo kjogꞹ kja o zakʼꞹ. Bʼꞹma gi kjijñi ke na joo akjanu, pe dya na kjuana: nge ma me ni jyodʼꞹ ri ñageji ko yo in chʼii.

Dyⱥrⱥ in chʼii ma angeze nee ra ñaa. Ñage ko yo in chʼii zø me na xomꞹ ri tsjaa.

“Bʼꞹma gi nee ri mange: ʼ¡Ro bʼꞹnkøbi trjexe nu paa, ñe nudya, ¿kja gi nee ri ñaa?!ʼ. Pe, ¡dya ri xicha ma in chʼii nee ra xits’i pje k’o zøʼø kja o mꞹbʼꞹ! ¿Kjo dya nge kʼo ri negøji texe yo tata?” (Lisa).

“Ma ya xomꞹ tsʼi ri nee ra i̱kjo, pe ri unkʼø nguenrra ke mazi ri ñagø na joo ko yo in chʼii ma ya nrrexomꞹ” (Herbert).

NE BIBLIA JIZHI: “Dya ri tsjijñiji ngextjo kjo i̱n pɇʼskʼeji derecho kʼꞹ pje ri tsjaji; xo ri tsjinkjeji yo nin​kjuarmaji” (1 Corintios 10:24).

Dya nrre naño ri tsjijñi ma zokʼꞹ in chʼii. Na jyoo o mama: “Bʼꞹbʼꞹ paa ke ma yo in chʼii na zokꞹ, pje nde naño ri kjinkʼø. Na kjuana ke ma kjogꞹ akjanu, angezeji unꞹji nguenrra”.

Ma xo kjogꞹtsʼꞹ akjanu, juɇchʼe nu televisión, xo ri jyɇzi ni teléfono. Dyⱥrⱥ na joo pje kʼo na xitsʼi ni chʼii, akjanu ra ñetse ke me na mubi kʼo kjijñi ñe kʼo søø kja o mꞹbʼꞹ, zø gi mange ke dya na sʼɇzhi yo ndumꞹ ke pɇsʼi.

“Me ni jyodʼꞹ ke yo in chʼii ra mba̱ra̱ji ke me na mubi kʼo kjijñiji ñe kʼo søji. Ma dya ra mba̱ra̱jiyo, dya pje ra xitsʼi ja ga zøji o ra jyodʼꞹji kʼua nanguarꞹ kjo ra mbøsʼꞹji” (Maranda).

“Dya ri mbekuɇ ma in chʼii ra mama na jñaa ke dya ga joo” (Anthony).

NE BIBLIA JIZHI: “Pjøtpꞹji na punkjꞹ nguenda ri dyⱥrⱥji na joo” (Lucas 8:18)

Jyodʼꞹ jangua søø ri ñageji na joo. Bʼꞹbʼꞹ paa ma yo trʼii na joo nee ra ñaji ko o jyoo o nu jñꞹꞹ ma nzhodʼꞹtrjoji o ma ya na soyaji na ndajme.

“Nutskʼøjme ri ñagøjme na joo ko yo in chʼigøjme ma ri pokjøjme kja carro. Nda ri ñagøjme na joo ma natjo ri minkʼøjme ke nange mꞹ ra tsʼinchʼi a jmii” (Nicole).

Ma ri ñonkʼeji xo me na joo ngekʼua ri ñageji.

“Ma ri ñonꞹjme ma xomꞹ, texe​ri pezhejme kʼo na joo ro kjogꞹjme kʼe paa, xo ñeje kʼo dya ga joo. Nujyo pjøxkꞹjme nange ri unkʼøjme nguenrra ke dya ri bʼꞹntsjɇjme ma ri kjogꞹjme ndumꞹ” (Robin).

NE BIBLIA JIZHI: “Ri xiʼtskʼøji ri dyⱥrⱥji na joo [...] dya tsʼi rgi chjꞹnrꞹji” (Santiago 1:19).