1. ¿Kjo nge kʼꞹ pjøxkꞹji ra pɇsʼiji fe?

 Ke ra enchʼeji kja in mꞹbʼꞹji e Jehová ngeje na cualidad ke me na mubi, pe dya texe yo ntee søø ra pɇsʼinu (2 Tes. 3:⁠2). Ne Biblia mama: “Mizhokjimi [unꞹgeji] nzi dajatsʼꞹgeji ke ri ejmeji” (Romanos 12:⁠3; Gál. 5:22). Ngekʼua trjexe kʼo ri pɇsʼiji fe ni jyodʼꞹ ra unꞹji na punkjꞹ pøjø e Jehová.

2, 3. a) ¿Pje nge kʼo me na joo ke søø ra pɇsʼiji yo ri enchʼeji kja in mꞹbʼꞹji e Jehová? b) ¿Pje ma trʼønꞹ ra trjꞹrꞹji?

² E Jesucristo go mama ke o Tara ajensʼe ñumbꞹ o mꞹbʼꞹ yo ntee ngekʼua ra chɇzhiji a jmii angeze, pe ngextrjo ma ra ejmeji o Trʼii, Jesucristo (Juan 6:​44, 65). E Jehová søø ra pongꞹzꞹji kʼo dya joo ro kjagøji ma ra pɇsʼiji fe e Jesús, akjanu søø ra jogøji e Jehová texe yo paa (Rom. 6:23). Dya pje ro kjagøji ngekʼua angeze ra mbøxkꞹji akjanu, nangeje ri tu̱sʼkʼøji nzhꞹbʼꞹ ngextrjo rga tenkʼøji ke ra tu̱gøji (Sal. 103:10). Pe e Jehová o jñanrra kja in mꞹbʼꞹji kʼo søø ra kjaji ngekʼua o juentskʼøji, kjanu o tsjapꞹ ke o Jñaa angeze ro dʼagꞹ kja in mꞹbʼꞹji. Nukʼua ro pjꞹrꞹji ro enchʼeji kja in mꞹbʼꞹji e Jesús ñe akjanu ra søø ra minji texe yo paa kja ne xoñijomꞹ ke me rga zøø ( xørꞹ 1 Juan 4:9, 10).

³ Pe, ¿pje ngeje nu fe? ¿Ngextrjo ngeje ke ra pa̱ra̱ji kʼo ra tsjaa e Jehová axojñi? Ñe, kʼo mazi na mubi, ¿pje ra kjagøji ngekʼua ra ñetse ke ri pɇskʼøji fe?

4. Ke ra pɇsʼkøji fe, ¿ngextrjo nge ke ra pa̱rgøji e Jehová? Mange jaga kjayo.

⁴ Ke ra pɇskʼøji fe dya ngextrjo nge ke ra pa̱rgøji kʼo ra tsjaa e Diosi. Na ntee ke na kjuana pɇsʼi fe kjaa kʼo nee angeze. Ma ra ejmeji ke e Tsʼitajensʼe o pejñe e Jesús ngekʼua ra salvazꞹji, ra nⱥdʼⱥjikʼo yo ntee. Nu apóstol Pablo go mama: “Ma na kjuana ri mangeji ke e Jesucristo nge in Jmugeji y ma na kjuana in ejmeji kja in mꞹbʼꞹji Mizhokjimi o xøsꞹ ma o ndu̱u̱, ra jokꞹtsʼꞹji in mꞹbʼꞹma nangeje ma ri ñenchʼe in mꞹbʼꞹji e Cristo [...] dya ri tsjeji ri mangeji e Cristo nge in Jmugeji” (Rom. 10:​9, 10; 2 Cor. 4:13).

5. a)¿Pjekja me na mubi ra pjørꞹji in fe? b) ¿Pjexk’ø ra kjaji ngekʼua sido ra ñemeji e Jehová? Mange na ejemplo.

⁵ Ngekʼua, ma ri negøji ra minji texe yo paa kja ne xoñijomꞹ ma me rga zøø, ni jyodʼꞹ ra enchʼeji kja in mꞹbʼꞹji e Jehová ñe ra kjaji kʼua ja nzi ga mama angeze. Nzakja na nrrⱥjnⱥ ke ni jyodʼꞹ ra xispiji nrreje, xo akjanu ni jyodʼꞹ ra pjørꞹji in fe ngekʼua mazi ra zɇzhi (Luc. 22:32; Heb. 3:12). Ma ra xispiji nrreje yo nrrⱥjnⱥ ra teji ñe ra mbesʼe o tsʼirⱥjnⱥ, pe ma dya ra kjapꞹji akjanu ra dyotrʼꞹ ñe ra trjeze. Xo akjanu ma dya ra pjørꞹji in fe ra jyɇziji ra kjaji kʼo mama e Jehová ñe dya kja ra ejmeji angeze. Ngekʼua me na mubi ra pjørꞹji ñe “ra sido ra ñemeji Mizhokjimi” (2 Tes. 1:⁠3; Tito 2:⁠2).

6. Nzi ga mama Hebreos 11:⁠1, ¿pje ni jyodʼꞹ ra tsjaa na ntee ke pɇsʼi fe?

⁶ Kja Hebreos 11:⁠1 ( xørꞹge), ri tøtrʼꞹji kʼo mama ne Biblia pje ngeje nu fe. Nujnꞹ mama ke nu fe ñetse ma 1) “dya [ri] yembeñe[ji] ra zⱥdʼⱥ yo ri tebeji”, ke e Jehová ra kjuatꞹ texe yo na sʼoo ñe ke ra minkʼøji kja ne xoñijomꞹ ke me rga zøø. 2) Ma ra pa̱ra̱ji ke “bʼemi bʼꞹbʼꞹ” yo dya bʼe ri jandaji. Kja ne versículo nu jñaa griega ke nee ra mama “bʼemi bʼꞹbʼꞹ”, ñetse ke na kjuana bʼꞹbʼꞹ yo dya søø ri jandaji nzakja e Jehová, e Jesucristo, yo anxe ñe o Reino e Mizhokjimi (Heb. 11:⁠3). Ma ra kreoji ke na kjuana ra zⱥdʼⱥ kʼo mama e Jehová ñe ri kreoji ke na kjuana bʼꞹbʼꞹ yo dya søø ri janrraji, ra minji ja nzi ga mama e Jehová. Pe ma dya ra kjaji akjanu, dya kjuana ke ri pɇskøji fe.

7. ¿Pje jitskʼøji o trjꞹrꞹ e Noé pje ra kjaji ngekʼua ra ñetse ke ri pɇskʼøji fe? Jñanrra nu dibujo ke kuatrʼꞹ kja nu página 26.

⁷ Kja Hebreos 11:⁠7 junsʼꞹ pje go tsjaa e Noé ke go ñetse mi enchʼe kja o mꞹbʼꞹ e Jehová, mama: “Mizhokjimi o zøpjꞹ e Noé o xipji ke ro pejñe na trjadyebʼe ro chjotꞹ texe kʼo ntee. Zø nunca mi janda akjanu kʼo pakʼo, pero e Noé o kreo kʼꞹ bi mama Mizhokjimi. O zu̱pꞹkʼua kʼo jñakʼo, go dyⱥtⱥkʼua na [arca]. Ngekʼua dya ndu̱u̱ e Noé kja kʼe trjadyebʼe, ni ri nge [o pjamilia]” . E Noé o jyⱥbʼⱥ na arca ke me na nojo nangeje mi pɇsʼi fe. Kʼo ntee ke bʼextrjo mi bꞹnjinu bʼꞹma mi dyønꞹji e Noé pjenga mi jyⱥbʼⱥ na arca. ¿Pje go nrrꞹrꞹ e Noé? ¿go xipjiji ke dya pje mi jyodʼꞹ ro mba̱ra̱ji? Iyo, angeze mi pɇsʼi fe ñe dya mi su̱u̱ ngekʼua go xipji texe yo ntee ke a mi bʼɇxtrjo tsʼike ma e Jehová ro dyotꞹ nguenda yo ntee, bʼꞹma e Noé go xipji yo ntee kʼo e Jehová a bi xipji: “Ya ro mama ra chjøtꞹ texe yo ntee yo ka̱ra̱ kja ne xoñijomꞹ, nangeje kjaji na punkjꞹ kʼo na sʼoo, me potꞹ ga chu̱ji ko o dyojui. [...] Ra pejñe na trʼadyebʼe ra nizhi nrreje ne xoñijomꞹ ngekʼua ra nrru̱ji texe yo ka̱ra̱ji kja ne xoñijomꞹ, ja̱a̱ texe yo pɇsʼi bida ra ndu̱ji”. Pe e Noé xo bo xipji yo ntee kʼo a bi mama e Jehová ke ro ngichiji kja nu arca ngekʼua dya ro ndu̱ji. Ñe “mi xipji kʼo ntee ro jyɇziji kʼo na sʼoo, ro tsjaji kʼo na joo”, o tsjaa akjanu nange mi pɇsʼi fe (Gén. 6:13, 17, 18; 2 Ped. 2:⁠5).

8. Kja ne Biblia, ¿pje go dyopjꞹ nu discípulo Santiago pje ngeje nu fe kꞹ na kjuana)

⁸ Bʼꞹma e Santiago o dyopjꞹ o carta ma e Pablo kja bi dyopjꞹ pje ngeje nu fe. Nzakja e Pablo, e Santiago xo go mama ke na ntee ke pɇsʼi fe dya ngextrjo ra kreo, xo ni jyodʼꞹ pje kʼo ra tsjaa. Angeze go dyopju: “Nutskʼeji in xitskʼøji kʼꞹ in ejmeji. Pero, ¿ja rga ñetse ma dya ri tsjaji kʼo na joo? Nuzgø ra kjagø kʼo na joo ngekʼua ra ñetse kʼꞹ ri enchʼe in mꞹnkʼø Mizhokjimi” (Sant. 2:18). Xo go dyopjꞹ pjekja dya chjenjui ke ngextrjo ra kreoji ñe ke bʼemi ra pɇsʼiji fe kʼꞹ na kjuana, go mama ke yo demonio kreoji ke bʼꞹbʼꞹ Mizhokjimi pe dya pɇsʼiji fe nangeje dya nee ra dyⱥtⱥji angeze (Sant. 2:​19, 20). Nukʼua e Santiago o pezhe ke na bʼɇzo kʼꞹ go mimi mi jingua ñe mi pɇsʼi na fe kʼꞹ na kjuana. Go mama: “¿Kjo dya i mbeñeji ke e Diosi go mama ke e Abrahán mi ngeje justo nange go dyⱥtⱥ angeze ma o mbⱥspⱥ e Isaac kja nu altar e Yosi? O fe go ñetse nange go tsjaa kʼo go mama e Jehová akjanu o fe me go zɇzhi”. Kjanu o dyopjꞹ pjekja na ntee ke pɇsʼi fe ni jyodʼꞹ ra dyⱥtⱥ e Jehová, go mama: “Nzakja na ntee ke dya kja kosʼꞹ o jñꞹꞹ nange a go nrru̱u̱, xo da ntee ke dya kjaa kʼo mama e Jehová dya pɇsʼi fe” (Sant. 2:​21-23, 26).

9, 10. ¿Ja ga mbøxkꞹji kʼo go mama e apóstol Juan ngekʼua ra pa̱ra̱ji ja rga minkʼøji ma ra enchʼeji kja in mꞹbʼꞹji e Jehová ñe e Jesús?

⁹ Ma ya bi kjogꞹ jñii décadas ke e Santiago go dyopjꞹkʼo, nu apóstol Juan go dyopjꞹ o Evangelio ñe jñii cartas. ¿Mi tendio angeze ja ma kjaa nu fe cristiana kʼua ja nzi mi tendioji yo dyaja bʼɇzo ke xo go dyopjꞹji ne Biblia? Ma e Juan go dyopjꞹ pje ngeje nu fe, go jñusʼꞹ nu jñaa ke kja hebreo nee ra mama “ñenchʼe o mꞹbʼꞹ“.

¹⁰ E Juan xo go mama: “Nu kʼꞹ enchʼe o mꞹbʼꞹ e Jesucristo o Tʼii e Mizhokjimi, ra bʼꞹbʼꞹtjo, dya ra ndu̱u̱. Nu kʼꞹ dya enchʼe o mꞹbʼꞹ kʼꞹ nu Tʼii Mizhokjimi, ra ndu̱u̱, dya ra bʼꞹbʼꞹ. Mizhokjimi ꞹmbꞹkʼꞹ“ (Juan 3:36). Ma ri nee ra pɇskʼøji na fe ke na kjuana ni jyodʼꞹ ra ⱥtⱥji kʼo go mama e Cristo. E Juan o dyopjꞹ na punkjꞹ bes kʼo go mama e Jesús, ke texe yo paa ni jyodʼꞹ ra ñetse ke ri pɇsiji fe (Juan 3:16; 6:​29, 40; 11:25, 26;14:1, 12).

11. ¿Ja rga ñetse ke ri unꞹji pøjø e Jehová nange o jitsʼkʼøji kʼo na kjuana?

¹¹ Ri unꞹji pøjø e Jehová ke dakøji o zɇzhi ngekʼua ra pa̱ra̱ji kʼo na kjuana ñe ra enchʼeji kja in mꞹbʼꞹji yo dʼadyo jñaa ke ba e̱je̱ kja ne Biblia, ¿eko ja̱a̱? ( Xørꞹ Lucas 10:21). Pama pama ra unꞹji pøjø e Jehová nange go pejñe o Trʼii, “nu Agente Principal ke Pjøxkꞹji sido ra ejmeji“ ngekʼua ra chɇzhiji ko angeze (Heb. 12:⁠2). Ma ri nuji me na mubi kʼo o tsjaa e Jehová, ra kjaji oración ñe ra xørꞹji ne Biblia ngekʼua ra zɇzhi in ejmeji (Efes. 6:18; 1 Ped. 2:⁠2).

12. ¿Ja rga ñetse ke ri pɇskʼøji fe?

¹² Sido ra enchʼeji kja in mꞹbʼꞹji kʼo ra tsjaa e Jehová axojñi, ma ra kjajiyo yo ntee ra chunꞹji nguenrra ke bʼemi ri ejmegøjiyo. Xo ri nⱥdʼⱥji o Reino e Diosi ñe ri kjajme discípulos. Akjanu, “ra pjøsʼꞹji texe yo nin minteji. [Pe] kʼo xenda ra pjøskʼøji nge yo mi kjuarmagøji yo enchʼe o mꞹbʼꞹ e Cristo” (Gal. 6:10). E Pablo go xipji janzi kjuarma: “Nutsʼkʼeji kʼua ja nzi ma kjatsʼꞹji, dya kja kjatskʼejidyanu. Na ngeje i jyɇzgeji kʼo na sʼoo”. Ma ra potpꞹji ngueda yo jñaa, dya ra kjaji yo na sʼoo ñe akjanu dya ra jɇziji ra pɇsʼiji fe (Col. 3:​5, 8-10).

13. a)¿Pjenga me ni mubi ra pɇsʼiji fe e Tsʼitajensʼe? b) ¿Pjekja me na mubi nu fe ngekʼua xi ra chɇzhiji a jmii e Diosi?

¹³ O Jñaa e Diosi mama: “Na ntee, ma dya ra ñenchʼe o mꞹbʼꞹ Mizhokjimi, nuʼma, dya søø Mizhokjimi ra mⱥpⱥma kʼe ntee. Nangeje ma kjo kʼo nee ra chɇzhi a jmii Mizhokjimi, ni jyodʼꞹ ra jñuntʼꞹ o mꞹbʼꞹ kʼꞹ bʼꞹbʼꞹtjo Mizhokjimi. Xo ni jyodʼꞹ ra jñuntʼꞹ o mꞹbʼꞹ, ma ra jyodʼꞹ Mizhokjimi ko texe o mꞹbʼꞹ, Mizhokjimi ra unꞹ kʼꞹ rgi mba̱ra̱ ja ga kjaa angeze, y ra recibidokʼꞹ” (Heb. 11:⁠6). Xo ne Biblia mama ke ma ri nee ra mⱥpⱥji e Jehová“ dya kja ra minkʼøji nzi rma minkʼøji ma dya mi pa̱rgøji Mizhokjimi nangeje a ro ejmejidya angeze” (Heb. 6:1). Yo ri matrʼꞹji e Jehová me ni jyodʼꞹ xe ra pɇsʼiji yo dyaja cualidad ngekʼua ra zɇzhi in fe, akjanu “Mizhokjimi me [ra] sʼiya[zꞹ]ji” (xørꞹ 2 Pedro 1:​5-7; Jud. 20, 21).

14, 15. Me ni jyodʼꞹ ra pɇsʼiji fe Mizhokjimi, pe ¿pjenga mazi na mubi ra sʼiyaji angeze?

¹⁴ Yo cristiano ke o dyopjꞹji ne Biblia go jñu̱sʼꞹji na punkjꞹ bes nu jñaa fe, akjanu ñetse ke me ni mubi nu cualidad. Ni ri na cualidad nⱥdʼⱥ na punkju bes kja ne Biblia nzakja nu fe. ¿Nee ra mamayo ke na cristiano ngextrjo ni jyodʼꞹ ra pɇsʼi fe?

¹⁵ E Pablo go mama ke ma ri nee ra pɇsʼkøji fe me ni mubi ra sʼiyaji yo ntee, nangeje go dyopjꞹ: “Zø xi ro ejme na joo Mizhokjimi, ngekʼua ro søø ro xipji yo tʼeje: “Chjansaji ga manu” ro empji, nukʼua ro ndansʼaji; pero ma dya ro sʼiya yo nin mintegøji, dya pje rbi mubizgøma” (1 Cor. 13:⁠2). Ma o dyonꞹji e Jesús pje ma mandamiento mazi nda na mubi, angeze go ndꞹrꞹ ke kʼo xenda na mubi nge ke ra sʼiyaji Mizhokjimi (Mat. 22:​35-40). Pa ra ejmeji e Jehová, me ni jyodʼꞹ ra sʼiyaji angeze ñe xo ni jyodʼꞹ ra pɇsʼiji yo dyaja cualidad ke me ni mubi. Ne Biblia mama ke ma ri sʼiyaji e Palesito ajensʼe, ri kreoji kʼo mama angeze ra tsjaa, xo ri pɇsʼiji fe kʼo mama angeze kja ne Biblia (1 Cor. 13:4, 7).

16, 17. a) ¿Ja ga ñetse kja ne Biblia ke me ni mubi nu fe ñe nu sʼiya? b) ¿Pje ma cualidad nge kʼꞹ ra mezhe texe yo paa?

¹⁶ Kʼo go dyopjꞹji yo escrituras griegas cristianas ma mi jñusʼꞹji nu fe xo mi jñꞹsʼꞹji nu sʼiya, nujyo mi ñetse ke me na mubi ra pɇsʼiji yo yeje cualidad. E Pablo go dyopjꞹ ke me na joo “mꞹ ya ri jyɇgøji ne tʼezi kja in chjimigøji nzakja dʼaja xondaro, nee ra mama kʼꞹ ya ri ejmegøji na joo, ñe xo ri sʼiyagøji texe yo ntee” (1 Tes. 5:⁠8). Xo e apóstol Pedro go mama: “In neji e Jesucristo zø dya i jñandaji. Zø dya xo in jandajidya, pero in enchʼe in mꞹbʼꞹji” (1 Ped. 1:⁠8). Xo akjanu e Santiago go xipji yo cristiano ke ro moji ajensʼe: “Pero Mizhokjimi o juajnꞹ na punkjꞹ angezeji. Angeze enchʼe o mꞹbʼꞹji e Jesucristo, ngekʼua me ni mubidya a jmii. Y xe ra chʼunꞹji kʼꞹ me ni mubi; ra chʼunꞹ ra zⱥtʼⱥji nu ja manda Mizhokjimi. Nge kʼꞹ o mama Mizhokjimi ra unꞹ kʼo ejme ñe neji angeze” (Sant. 2:⁠5). Xo akjanu e Juan o mama “Nu kʼo o mandamiento nge kʼꞹ ra enchʼe in mꞹbʼꞹgøji e Jesucristo kʼꞹ o Tʼii, ñe ra pøtꞹ rga sʼiyaji yo mi kjuarmaji” (1 Juan 3:23).

¹⁷ Zø me na mubi ra pɇskøji fe, ma e Jehová ra tsjaa texe yo a go mama ñe ra bʼꞹnji kja nu dadyo xoñijomꞹ, dya kja xe ra pɇskøji fe kʼo ra kjogꞹ a ma xojñi. Pe ma ra bʼꞹnjinu kja nu dadyo xoñijomꞹ, xi ra sʼiyaji e Jehová texe yo paa ñe xi ra sʼiyaji yo in minteji. Ngekʼua e Pablo go dyopjꞹ: “Nudya nu kʼꞹ ni jyonkʼeji ngeje: Kʼꞹ ri ñejmegeji, ri chebʼegeji jmanchʼa, ñeje kʼꞹ ri sʼiyageji texe yo ntee. Nzajñiyo xo ni jyodʼꞹ. Dʼaja kʼꞹ xenda na nojo ngeje kʼe sʼiya” (1 Cor. 13:13).

18, 19. Yo padya, ¿ja ga ñetse ke ri pɇskʼøji fe, ñe kjo nge kʼꞹ pjøxkꞹjiyo?

¹⁸ Yo paa ke ri ka̱ra̱jidya, o jñiñi e Jehová pɇsʼiji fe kja o Reino e Mizhokjimi ke o ñeme ajensʼe. Nange nge akjanu, kja texe ne xoñijomꞹ yo padya a kjogꞹtrjo 8 millón yo ntee ke ka̱ra̱ji kja nu paraiso espiritual. Kja nu paraíso, Mizhokjimi unꞹ o zɇzhi yo ntee ngekʼua søø ra pɇsʼiji yo cualidad ke me na joo (Gál. 5:​22, 23). Nujyo ñetse ke yo cristiano kʼꞹ na kjuana bʼemi ejmeji e Jehová ñe potka sʼiyaji.

¹⁹ Texeyo dya nge yo ntee ke na kjaji, ngeje e Jehová ke tsjapꞹ ke ra minji akjanu. Nu kʼo tsjapꞹ ke yo ntee ra mba̱ra̱ji e Jehová, “ngeje na señal ke ra mezhe texe yo paa” (Is. 55:13). E Pablo xo go mama: ”ngeje Mizhokjimi kʼꞹ o ngꞹxkʼꞹgeji kʼua ja ma sʼoo. Na ngeje in ejmegeji na joo, ñe xo o dyakꞹtjoji” (Efes. 2:⁠8). Nu paraiso espiritual xi ra bʼꞹbʼꞹ jesta ma texe yo ntee ra ngeji perfecto, ra mⱥji rga minji ñe ra joji ko e Jehová nangeje ra tsjaji kʼua ja nzi ga mama angeze.