NE BIBLIA dya mama ke e Tsʼitajensʼe ngextrjo ra dyⱥrⱥ yo oración ma ra bobʼꞹji o ma ra nrriñijomꞹji, dya xo mama pje ma jñaa ra xipjiji e Diosi, ja nzi na kjaji yo naño religión. Ne Biblia xitsʼkʼøji pje ngeje kʼo xe nda na mubi ma ra kjaji oración.

Ne Biblia nⱥdʼⱥ ja mi kjaji kʼo ntee ma mi øtꞹjikjimi, mama ke naño ja mi bʼꞹnji ñe mi bobʼꞹji o mi mimiji. Ma mi øtꞹji e Tsʼitajensʼe, mi bʼꞹbʼꞹ paa ke mi ñaji amboo kja o mꞹbʼꞹji ñe mi bʼꞹbʼꞹ paa ke mi ñaji na jensʼe. Xo mi bʼꞹbʼꞹ kʼo mi nⱥsʼⱥji ajensʼe ma mi øtꞹji e Yose, xo kʼo nrre kʼo ntee mi nrriñijomꞹji ñe mi nuji a jomꞹ. Kja ne Biblia dya junsʼꞹ ke o nrriñijomꞹji a jmii yo imagen, ñe dya mi tsjajaji rosario ni mi yepeji oración ke mi junsʼꞹ kja na xiskuama ma mi nee ro dyøtꞹjikjimi. Ngextrjo mi xipjiji e Mizhokjimi kʼo mi søji kja o mꞹbʼꞹji. ¿Pjenga e Yose mi nuu na joo ma mi zopjꞹji akjanu?

Nzakja ya ro pjechiji, angezeji ngextrjo mi øtꞹji e Mizhokjimi Jehová. Pe xo na mubi kʼo mama kja 1 Juan 5:14: “Dya ra su̱ji rga øtꞹji Mizhokjimi. Nange ma ra øtꞹji ja kʼo nzi ga nee angeze, ri pa̱ra̱gøji ra dyⱥtkⱥji”. Ngekʼua ma pje ra øtꞹji, ra pjotpꞹji nguenda janzi ga nee e Mizhokjimi. ¿Pje nee ra mamayo?

Ma ri nee ra øtꞹji e Yose kʼua ja nzi ga nee angeze, otrʼꞹ ra pa̱rgøji pje kʼo nee. Me ni jyodʼꞹ ra xørꞹji ne Biblia ngekʼua ra pa̱rgøji na joo ja ga nee e Tsʼitajensʼe ke ra mimiji, zø dya søø ra pa̱ra̱ji texe yo jñaa yo junsʼꞹnu (Mateo 7:21-23). Yo ri xørꞹji kja ne Biblia ra mbøxkꞹji ma ra kjaji oración.

Xo ñeje, ma ri pa̱rgøji na joo ja ga ngeje e Jehová ñe pje kʼo nee ke ra kjaji, mazi ra kreoji angeze. Nuyo me ni mubi ngekʼua ra dyⱥrⱥ kʼo ri xik’øji, e Jesús bo mama: ”Texe kʼo pje nde ri dyøtꞹji Mizhokjimi, ma ri jñuntʼꞹ[ji] in mꞹnkʼeji kʼꞹ ra dyⱥtʼkʼejikʼꞹ, nde ra chʼakʼeji kʼua ja nzi gui dyøtꞹji” (Mateo 21:22). Ri kreogøji e Yose zø dya ri janrraji: e Jesús bo mama ke bʼꞹbʼꞹ na punkjꞹ ke ri janrraji ngekʼua ra kreoji ke bʼꞹbʼꞹ e Diosi (Hebreos 11:1). Na kjuana ke dya søø ra jandaji e Jehová, pe kja ne Biblia junsʼꞹ na punkjꞹ ke kjakꞹji ra kreoji ke na kjuana bʼꞹbʼꞹ, ñe søø ra nrrꞹrꞹ kʼo ri øtꞹji. Angeze dya xicha ma ra øtꞹji ke ra mbøxkꞹji ra pɇsʼiji fe; na ngeje dakꞹji texe kʼo ni jyongꞹji ma ri øtꞹgøji (Lucas 17:5; Santiago 1:17).

Pe xi bʼꞹbʼꞹ kʼo me na mubi ngekʼua e Diosi ra dyⱥrⱥ kʼo ri øtꞹji, e Jesús bo mama: “Dya kjo søø ra chɇzhi a jmii mi Tatagø ma dya ra pjøsʼꞹgø” (Juan 14:6, TNM). Nujyo nee ra mama ke dya søø ra chɇzhiji e Diosi ma dya ra pɇspiji nguenda e Jesús. Ngekʼua e Jesús bo jichi o discípulo ke ma ro dyøtꞹji e Yose, ro dyøtꞹji kja o trju̱u̱ angeze (Juan 14:13; 15:16). Nudyama, ma ra øtꞹji e Yose kja o trju̱u̱ e Jesús, dya nee ra mama ke ra øtꞹji e Jesús. Nu kʼo nee ra mama, nge ke ra pjøtpꞹji nguenda ke ngextrjo kja o trju̱u̱ e Jesús søø ra øtꞹji e Mizhokjimi Jehová ke ngeje perfecto ñe santo.

Na paa, na discípulo o xipji e Jesús: “I jmutsʼꞹgøjme, [...] ri jitskʼøjme ja rga øtkʼøjme Mizhokjimi” (Lucas 11:1) Angezeji a mi pa̱ra̱ji ja rgua dyøtꞹji e Diosi ngekʼua, ¿pje mi nee ro mba̱ra̱ji? Kʼo mi nee ro mba̱ra̱ji nge ja rgua dyøtꞹji e Mizhokjimi ñe pje ro manji ma ro dyøtꞹji.