DYA bʼꞹbʼꞹ na ndajñijñi o na religión ke yo ntee dya kjaji oración. Zø naño kʼua øtꞹji: kja nitsjimi, kja sinagoga, kja yo mezquita, kja yo pagodas ñe kja yo santuario. Xo naño kʼo pɇsʼiji ma kjaji oración: yo rosario, yo devocionario, yo icono, yo alfombra, yo tablilla ñe yo cilindro ja ju̱s’ꞹ yo oración, pe zø natrjo ntee o ma janziji, nza texe kjaji oración.

Kja trjexe ne xoñijomꞹ ngextrjo yo ntee kjaji oración, nukʼo ñetse ke dya ri dyotrjobi ko yo xo pɇsʼi o zakꞹ kja ne xoñijomꞹ. Nzakja yo añimale, xo ni jyongꞹzꞹji ra ñonꞹji, ra siji nrreje ñe ra tsjonsʼꞹ in jñꞹji. Xo muxkꞹgøji, ri teji ñe ri tu̱gøji (Eclesiastés 3:19). Pe ngextrjo yo ntee kjaji oración. ¿Pjenga?

Na nge ni jyongꞹzꞹji. Ne oración pjøxkꞹji ra jodʼꞹji kʼo dya søø ri janrraji kʼo bʼꞹbʼꞹ ajensʼe; søø ra manji ke akjanu ri jodʼꞹji yo ngeje sagrado ñe daja ke dya søø ra nrru̱u̱. Ne Biblia mama ke o dyⱥkⱥzꞹji akjanu ngekʼua ra nee ra pa̱ra̱ji ja ga ngejeyo (Eclesiastés 3:11). E Jesús o mama akjaba: “Ka̱ra̱ o ntee kʼo pa̱ra̱ kʼꞹ dya ni mubiji, y ni jyodʼꞹji Mizhokjimi kʼꞹ ra mbøsʼꞹji” (Mateo 5:3).

Kʼo ntee ri jonkʼøji kjo ra matrʼꞹji, nge akjanu bʼꞹbʼꞹ na punkjꞹ kʼua ja matrʼꞹji yo ntee ñe pje pɇsʼiji ma kjaji oración. Bʼꞹbʼꞹ janzi ntee ke nee ra zøji na joo kja o mꞹbʼꞹji, xo jonji kjo ra mbøsʼꞹji. Pe ¿kjo dya kjuana ke ma yo ntee me jodʼꞹtsjɇjiyo, dya ga zøji na joo? Kʼo ntee dya nda ri zɇzhiji ñe dabaditrjo ri tu̱ji, dya søø ra pa̱ra̱ji texe kʼo kjaa. Ngextrjo daja kʼꞹ dya ra ndu̱u̱, ke me pa̱rtjo na punkjꞹ ñe ke me na zɇzhi søø ra dyakʼøji kʼo ni jyongꞹzꞹji. Pe ¿pje nge kʼo kjakꞹji ke ra nee ra kjaji oración?

¿Kjo gui kjogꞹge ndumꞹ ñe dya go bʼꞹbʼꞹ kjo ro jitsʼi ja rgui jokꞹge nu ma mi jyodʼꞹtsʼꞹ? ¿A gui kjogꞹ yo paa ke mi nesta kjo ro juentskʼe ma bo nrru̱u̱ da in pjamilia, o mi nesta kjo ro xitsʼi na jñaa ja rgui jokꞹ na ndumꞹ ke me ma sʼɇzhi, o kjo ro perdonaotsʼꞹ ma pje bi tsjaa kʼꞹ na sʼoo ñe me ma ꞹꞹ i mꞹbʼꞹ?

Ne Biblia mama ke søø ra kjaji oración ma ra kjogꞹji akjanu. Xo jitskʼøji na joo ja rga kjaji oración, ñe junsʼꞹnu kʼo oración ke o tsjaji kʼo bʼɇzo ñe kʼo nrrinxꞹ ke mi matʼꞹjikjimi mi jingua nge ro zøji na joo, ja rgo jokꞹji o ndumꞹ, ñe ro pombꞹji o nzhubꞹji ma o tsjaji na sʼoo, xo o pjechiji kʼo mi nee ro mba̱ra̱ji (Salmo 23:3; 71:21; Daniel 9:4, 5, 19; Habacuc 1:3).

Ma mi kjaji oración, mi bʼꞹbʼꞹ daja ke ma dyotrjobi texe. Nde mi pa̱ra̱ji na joo ke mi bʼꞹbʼꞹ daja ke mi ⱥrⱥ ma mi zopjꞹji, zø dya mi søø ro jñanrrajikʼꞹ, mi øtꞹji. Ñe yo padya dya nde pa̱ra̱jiyo. Angezeji mi pa̱ra̱ji na joo kjo nge kʼꞹ ro dyøtʼꞹji.