Go muxkʼꞹgøji a Santo Domingo kja ne capital nu a República Dominicana; ngezgø nu xokoyon kja in bʼedyi ke ri nziojme. In tatagøjme mi jꞹꞹ na punkjꞹ merio i mi pjechi na punkjꞹ i mi neeji ke pje nrre ro pjexigøjme. O kjogꞹ nziyo kjɇɇ ma dyebʼe mi muxkʼꞹgøji, go mba̱ra̱ji kʼo misionero kja nu religión mormona i me go ngentrjikʼua, nange mi ñetse ke me ma jonteji, i mi jotrjo ma jieji o bʼituji. Dya nrraa o mezhe ma in bʼedyigø bo nge yo otrʼꞹ go pjɇzhiji mormon kja nu Iglesia de Jesucristo de los Santos de los Últimos Días kja nu República Dominicana.

Me mi pjøxtegø kja kʼe templo, i kʼo mazi mi nugo na joo, nge ke mi jitsʼijme̱ jargua mimijme̱ na joo ko in bʼedyijme̱. Me mi chalagø ke mi ngezgø mormón i mi nee ro pjɇzhigø misionero mormón.

Ma ro søtꞹ 18 kjɇɇ, in pjamilia o ma mimiji a Estados Unidos, nange mi neeji ke ro kichʼigø kja universidad ke mazi rgua joo. O kjogꞹkʼua dʼa kjɇɇ, ma go ma ngichkijme̱ in tsʼimo o in tío ke ngeji testigo e Jehová, bi ñe̱je̱ji a Florida kja dʼa trjajmurkjimi i go mbitazꞹjme̱ i ro mojme. Kʼo mazi ro nugø na joo nge ke trʼexeji mi jodʼꞹji yo texto kja nu Jñaa e Yose i mi ꞹzʼꞹji nota, ngekʼua ro orꞹgø dʼa xiskuama ngekʼua xo ro opjꞹgø kʼo ma manji.

Ma o nguarꞹ kʼe trjajmurkjimi, kʼo in tsʼiji o xitsʼi ke mi nee ro mbøxkꞹji ngekʼua ro pa̱rgø na joo o Jñaa e Mizhokjimi, nange mi nee ro pjɇzhigø misionero mormon. Ngekʼua ro xikʼo ke ja̱a̱, na ngeje mazi mi pa̱rxtrjogø nu skuama mormon ke nu Jñaa e Yose.

Ma o nzhogꞹbi kja in nzumꞹbi sido mi zokꞹbi kja in teléfono i mi xørꞹjme̱ ne Biblia. Mi xitsʼibʼe ke ro nuu na joo kʼo mi kreogø, kjo mejme mi junsʼꞹ kja nu Biblia. Ngekʼua ro unꞹtsʼɇnguendagø yo na kjuana.

Mi kreogø ke mi mejme texe kʼo mi jizhi in religióngø, zø dya mi pa̱rgø kʼo ma kjuana kʼo mi jitsʼijme kjo mi bʼꞹbʼꞹ kja nu jñaa e Yose. Mi zizigø o mbʼenki dʼa skuama ¡Despertad! 8 de Noviembre de 1995, ke ⱥtrʼⱥ yo testigo e Jehová, ke ma e̱je̱ yeje artículo ke mi mama kʼo mi kreo kʼo mormonismo. Mi ro kentrjokʼua ma ro unꞹ nguenda ke dya mi pa̱rgø na joo trexe kʼo mi jizhiji kja in templo, nukʼua ro jodʼꞹgø kja nu sitio oficial yo mormon kjo ma kjuana kʼo mi mama nu skuama ¡Despertad!, ix ma kjuanakʼo. I ma ro magø kja kʼe museo mormon kja nu estado de Utah xi ro tøtrʼꞹgø na punkjꞹ prueba ke je ma kjanu.

Xo mi kreogø ke nu Jñaa e Yose i nu skuama mormon ix mi chjetrjui. Ma bʼemi ro pjꞹrꞹgø ro xørꞹgø ne Biblia ro unꞹ nguenda ke dya mi chjetrjui. Nzakja kʼo mama ne Jñakjimi kja Ezequiel 18:4 ke mama ke nu alma trʼu̱u̱. I nu xiskuama Mormón mama kja Alma 42:9 ke nu alma dya søø ra ndu̱u̱.

Dya mi ngextrjo kʼo doctrina, xo mi kjaakji ro yembeñe kʼo mi manji ke mazi ma joo in jñiñiji kʼo mormon. Nzakja kʼe jardín Edén bo bʼꞹbʼꞹ kja nu jñiñi ke ni chju̱u̱ Jackson (ke bʼꞹbʼꞹ a Misuri, Estados Unidos). Xo ñe, kʼo profeta kja kʼe templo manji, “ma ra manda o Reino e Mizhokjimi eñe nu bandera a Estados Unidos me ri chala rga juana nu ja jnꞹzʼꞹ nu bandera i dya kjo pje ra tsjapꞹ nange texe rga libreji i texe rga chjentrji ko in derecho”.

Me ro øntsʼɇgø pje ro kjogꞹ ko in nrrajñiñigø​ñe yo dyaja trʼajñiñi​ ma ro kjogꞹkʼo. Dʼa nu nzhⱥʼⱥ go zokʼꞹ kja teléfono dʼa ntee ke ma xampa ngekʼua ro nge misionero i ro xipji kʼo ma kjinkjo. “Ngekʼua ro ønꞹ: nutsʼkʼe ngetsʼkʼe mormon, ma ro kjogꞹ dʼa trjachu̱ʼu̱ kja i jñiñige ko dʼa nrrajñiñi ke xo ri ngeji mormon, ¿rgui chu̱ʼu̱ge ko kʼo dyaja mormon i rgui pøtrʼꞹkʼo?”. Ixkʼo mama ke ja̱a̱. I xi ro kjapꞹ nguenda ma kʼo mi jizhiji ma kjuana o iyo i ro ønꞹ kʼo pje nrre mi pjezhi kja in templogø, ma go bʼꞹbʼꞹ kʼo dya mi pa̱ra̱ji pje kjaa mi kjaajikʼo go xitsʼiji ke mi nge dʼa misterio, nange ro zⱥdʼⱥ nu paa ke ro pa̱ra̱jikʼo.

Dya ro søøgø na joo ko kʼo go xitsʼiji. I ro pjꞹrꞹ ro kjinkjo, pje kjaa ri neegø ra pjɇzhigø misionero mormon. I ro unꞹ nguenda ke kʼo mi nee ro kjaagø ngextrjo søø ro pjøstegø yo ntee janzi ga tsjaji yo dyaja, xo nrre mi neegø ro pjɇzhigø na nojo nzakjaa yo dyaja ntee. Ro unꞹ nguenda ke dya mi pjechigø na joo kjo mi nge e Mizhokjimi. Zø a rgua xørgø na punkjꞹ o jñaa e Mizhokjimi, dya nrra mi kjapꞹ na joo nguenda nu Biblia. Dya xo mi pa̱rgø pje mi nee ro tsjapꞹ e Yose ne xoñijomꞹ ñeje yo ntee.

Ma ro xørꞹgø ne Biblia ko yo testigo e Jehová ro pjechigø na punkjꞹ, nzakja: nu trju̱u̱ e Mizhokjimi, pje kjogꞹzꞹji ma ra tu̱ji, nu kʼo ra tsjaa e Jesús kja nu Reino e Mizhokjimi... Akjanu ro pa̱rgo ke me na mubi nu Jñakjimi, ¡i me mi neegø ro xikø kʼo dyaja trʹee texe kʼo ya rgua pjechigø! A mi pa̱rgø ke e Mizhokjimi ixi bʼꞹbʼꞹ, i nudya a ri søø ra jñagøbʼe ko e Mizhokjimi nzikja ma ri jñabʼe ko in jobigø. Ngekʼua nu paa 12 de Julio kja nu kjɇɇ 2004, o juinkʼiji kja nrreje i ro pjɇzhgø testigo e Jehová i o kjogꞹ ñanrro zana i ro pjɇzhgø evangelizador de tiempo completo.

Ro pɇpji tsʼicha kjɇɇ kja nu sede mundial de los testigos de Jehová, en Brooklyn (Nueva York). Me ti mⱥkjø ngekʼo ro pjøxte ro dyⱥtrʼⱥji biblias ñe yo dyaja skuankjimi ngekʼua yo ntee kja texe ne Xoñijomꞹ søø ra pa̱ra̱ji nu Reino e Yose. Me ti mⱥkjødya ngekʼo ri pjøxkø i minte a mba̱ra̱ji Mizhokjimi.