Julio: Bʼemi me ri mⱥkjø ma ri ñagøbi kʼo mama ne Biblia, Ernesto. a ¿Gi mbeñe ke bi tsjakʼꞹ dʼa trʼønꞹ, o Reino e Mizhokjimi? Bi xitsʼi ke mi nee rgui pa̱rge, pje kjaa jizhiji yo testigo e Jehová ke go mbꞹrꞹ go manda kja k’e kjɇɇ 1914.

Ernesto: Ja̱a̱, nge kʼo ro xørgø kja in revistaji, ke nu Reino e Diosi go mbꞹrꞹ go manda kja ne kjɇɇ 1914, i ro pɇskø dʼa trʼønꞹ. Nutsʼkeji gi mangeji ke texe yo i jizhigeji je bʼꞹbʼꞹ kja nu Jñakjimi.

Julio: Ja̱a̱, je akjanu texeji.

Ernesto: A ro xørgø texe ne Biblia, i dya ro tøtrʼꞹgø kʼe kjɇɇ. I ro kichʼikʼua kja Internet i ro jodʼꞹ “1914” kja dʼa Biblia en línea, i dya pje ro tøtrꞹ.

Julio: Me ti mⱥkjo ke a bi xørge texe ne Jñakjimi, ñetsʼe ke me gi nege ne Jñakjimi.

Ernesto: Ja̱a̱, ri mangø ke nge ne libro nu mazi na joo.

Julio: Nge kʼo xo ri mangø. I me na joo ke i kjaapꞹge nguenda, ma gi xørꞹ ri chøtr’ꞹ kʼo gi nee ri pa̱ra̱. Akjanu mama nu Jñakjimi ke ni jyodʼꞹ ra kjaaji: ra jodʼꞹji kʼo bʼemi na kjuana. b ¡I me na joo ke na kjaageyo!

Ernesto: Pøkjꞹ, Julio. Ja̱a̱ ri kjaagøyo nange ri nee ra pa̱rgø. Nzakja, ro jodʼꞹ nu kjɇɇ 1914 kja ne libro nu rna xørꞹbi i ro tøtrꞹ kʼꞹ mama ke​ mi bʼꞹbʼꞹ na trjaxiza ke me ma nrra̱a̱ i eñe go dyokʼꞹji i nakʼua go yepe go trʼeʼe... O je akjanu kʼo ro xørꞹ.

Julio: A, ja̱a̱ na kjuana. Nge nu profecía kja nu capítulo 4 de Daniel. Nujnu mama ke e Nabucodonosor go nginchʼi dʼa trʼi̱ji̱, angeze mi nge nu rey a Babilonia.

Ernesto: Na mejmekʼo, nukʼo me ro xørꞹ. Nange dya ro meya pje nee ra mama i pje pɇsʼi nguenda o pje jñekjui ko 1914 nu Reino de Dios.

Julio: Dya nrrumꞹ, ni ri e Daniel ke go dyopjꞹ kʼe profecía, angeze dya go søø go meya pje mi nee ro mamakʼo.

Ernesto: ¿Na mejme?

Julio: Ja̱a̱. Jñanrraba kja ne Jñakjimi, yo junsʼꞹ kja Daniel 12:8: “Ro ⱥrgø, i dya ro søø ro meya.”

Ernesto: O, dya ngextrjozgø dya ro meya. Ay, dya kjaa nrra ri søøgø na sʼoodya.

Julio: ¿I pa̱rge pje kjaa e Daniel dya go tendio? Nange e Mizhokjimi dyabʼe mi nee ke ro meyaji. Nudya a sⱥjⱥ yo paa ke søø ra meyaji texe kʼo go dyopjꞹji kja kʼe profecía.

Ernesto: ¿A, na kjuana?

Julio: Ja̱a̱, chjaa yo mama kja ne versículo 9: “Tsʼazⱥyo, tsʼobʼꞹ na joo ngekʼua dya kjo ra jñanrra asta ma ra sⱥjⱥ yo paa ma ra nguarꞹ yo na sʼoo”. Janzi gi unꞹ nguenda, ne profecía ro søø ro meyaji ma ro sⱥjⱥ kʼo paa ma a ra nguarꞹ texe yo na sʼoo. Texe yo rna kjogꞹjidya ixi ñetsʼe ke ri bʼꞹnji kja kʼo pakʼo. Texeyo ra nuji mazi axojñi kja ne libro nu rna xørꞹbidya. c

Ernesto: ¿Søø ri xitsi pje nee ra mama ne profecía?

Julio: Ra nuxa kjo ra søø.

Julio: Otrʼꞹ ra nubi kʼo go nginchʼi kʼe rey Nabucodonosor, i nakʼua ra nubi kʼo nee ra mama. ¿Ja gi ñuu?

Ernesto: Me na joma.

Julio: E Nabucodonosor go nginchʼi na trjaxiza ke me ma nrra̱a̱ i mi sⱥtrʼⱥ asta jensʼe. Kja kʼe trʼi̱ji̱, go dyⱥrⱥ dʼa anxe ke je mi ñeje kja Mizhokjimi ke go mama dyechʼi k’e trjaxiza. Kʼo go ngentrjo nge o jñꞹrꞹ ñe kʼo nu dyꞹꞹ. I bo kjogꞹ janzi paa ke bo nge “yencho tiempos” i nakʼua kʼe xiza bo yepe go trʼeʼe. d Ne profecía otrʼꞹ bo zⱥdʼⱥ ko e Nabucodonosor. Angeze mi nge nu rey kʼꞹ me ma nojo​; je mi chjenjui kʼe xiza ke je mi zⱥtrʼⱥ asta jensʼe.​ I chjenjui ke ro dyokʼꞹji, ma go jyɇzi go manda i go kjogꞹ kʼo “yencho tiempos”. ¿Gi mbeñe pje nee ra mamakʼo?

Ernesto: Mmm... Iyo, dya kja ri mbenkʼø.

Julio: Ne Biblia mama ke go mbɇzhi loko, i eñe go ngejme akjanu yencho kjɇɇ, o kʼo nee ra mama “yencho tiempos”. Kʼo nee ro mama nge ke dya kja go søø go manda. Nakʼua, ma go kjogꞹ kʼo pakʼo, go nrrꞹmbʼeñe na yeje i go yepe go manda. e

Ernesto: Mi na joo, nzakjakʼꞹ arna meya. Nadya, texedyayo ¿jaga jñekjui ko nu Reino e Mizhokjimi i ñe kʼe kjɇɇ 1914?

Julio: Kʼo ra mbøxkʼꞹ ri meya na joo nge ke ri pa̱ra̱, ke ne profecía go cumple ye vez. Kʼꞹ otrʼꞹ, nge ma e Nabucodonosor go jyɇzi go manda nzakja dʼa rey. I kʼꞹ na yeje, nge ma e Mizhokjimi dya kja go ñʼeme dʼa rey kja ne xoñijomꞹ. I nujnu nge nu ni jñekjui ko o Reino e Mizhokjimi.

Ernesto: ¿Ja gi pa̱rge ke go cumple na yeje ne profecía?

Julio: Ra pjꞹrꞹbi, kja ne profecía bʼꞹbʼꞹ kʼo søø ra mbøxkꞹbi ra meyabi. Kja Daniel 4:​17 mama kja ne profecía ke ngekʼua texe yo ka̱ra̱ji ra mba̱ra̱ji ke “e Mizhokjimi kʼꞹ Me Na Nojo nge kʼꞹ Mero Manda kja yo ntee, ñe unꞹ ra manda kʼe ntee kʼꞹ nee angeze”. ¿Bi unꞹ nguenda kʼo mama “kʼꞹ mero manda kja yo ntee”?

Ernesto: Ja̱a̱, nuba mama ke “kʼꞹ Me Na Nojo nge kʼꞹ mero manda kja yo ntee”.

Julio: ¿Kjo nge “kʼꞹ Me Na Nojo”?

Ernesto: Pos e Mizhokjimi. ¿O iyo?

Julio: Ja̱a̱, na kjuana. Ixi ñetsʼe kʼe ne profecía dyaxi mi pɇsʼi rgo nutrjo ko e Nabucodonosor. Xo mi jñekjui ro nuu ko “o reino ke manda yo ntee”​ kʼo nee ra mama, nge o Reino e Mizhokjimi ke ra manda kja texe yo ntee. Ma ra nubi yo contexto kja ne profecía mazi ra meyabi na joo yo ri xitsi.

Ernesto: Na joma, xi ri xitsima.

Julio: Kja ne libro de Daniel me nⱥdʼⱥ, nⱥdʼⱥ ma ra manda o Reino e Mizhokjimi, mama ke: e Jehová o ñʼesʼe e Jesucristo ke nge nu ra manda kja o Reino e Mizhokjimi. ¿Gi nee ke ra nubi dʼa ejemplo? Je bʼꞹbʼꞹ ye capítulo anrrꞹbʼꞹ. Ke nge kja Daniel 2:​44 ra otrʼkʼꞹ ri xørge.

Ernesto: Ja̱a̱. Mama akjaba: “Ma xe ri manda kʼo rey kʼo, e Mizhokjimi ajensʼe ra ñʼesʼe naja kʼꞹ ra manda kja o reino, dya ra nguarꞹ rga manda. Kʼe reino ra chjotꞹ texe kʼo dyaja reino. Dya kjo xe ra bʼꞹbʼꞹ kʼꞹ ra manda, ngextjo o Reino Mizhokjimi ra manda”.

Julio: Mi na joo. ¿Søø ri mange ke kja ne versículo na nⱥdʼⱥ o Reino e Mizhokjimi?

Ernesto: Mmm... Bʼa̱tʼꞹ, dyabʼe ri søø ra meya.

Julio: Kja ne versículo mama ke o Reino e Mizhokjimi “dya ra nguarꞹ rga manda”; o kʼo nee ra mama, nge ra manda texe yo paa. ¿Bʼꞹbʼꞹ daja ke søø ra manda kja o reino ke dya ra nguarꞹ kʼꞹ dya ri ngeje e Mizhokjimi?

Ernesto: Iyo, dya kjo xi bʼꞹbʼꞹ.

Julio: Ja̱a̱ na kjuana, nudya ra nubi xi dʼa profecía ke xi mama pje ra tsjaa nu Reino e Diosi. Nujnu junsʼꞹ kja Daniel 7:​13, 14. Nujnu mama ke bʼꞹbʼꞹ daja ke ra nge rey, jñanrra yo mamaba: “Kjanu e Tita o ñʼeme ro manda kja o reino ngekʼua nrrexe yo ntee kja yo jñiñi ñe kja yo nrrajñiñi zø pje ma jñaa mi ñaji ra dyⱥtⱥji ñe ra tsjaaji kʼo mama angeze. Dya ra nguarꞹ rga manda ra mezhe nrrexe yo paa, ñe dya kjo ra chjotꞹ o reino.” Kja yo versículo ke ro xørꞹbi, bʼꞹbʼꞹba kʼo a rgua jñabi.

Ernesto: Ja̱a̱ yepe ga mamaba dʼa reino.

Julio: Ja̱a̱, i dya bʼꞹbʼꞹ dʼa rey ke ri chjenjui. Ma ri jñanrra mama ke søø ra manda kja “texe yo jñiñi, i dya ngextjo janzi jñiñi i trexe kja yo nrrajñiñi kja texe ne xoñijomꞹ i janzi ga ñaji”. Kʼo nee ra mama nge ke ra manda kja texe ne xoñijomꞹ.

Ernesto: Dya rgua nugø, na kjuana. Je mama akjanu.

Julio: I xørꞹ na yeje yo mamaba: “Dya ra nguarꞹ rga manda. Ra mezhe nrrexe yo paa ñe dya kjo ra chjotꞹ o reino”. ¿Eko na kjuana ke kja ne versículo ixi chjenjui kʼo mama kja Daniel 2:​44, ke kja ro xørꞹbi?

Ernesto: Ja̱a̱, ixi chjenjui.

Julio: Me na joo, ra yepe ra nubi kʼo a ro jñabi. Kja nu profecía de nu capítulo 4 de Daniel jitsiji ke “e Mizhokjimi nge nu manda kja texe yo ntee”. Kja ne profecía ixi ñetsʼe ke xo ro cumple kja kʼe dʼaja kʼꞹ mazi rgua nojo ke e Nabucodonosor. Ngekʼua kja ne libro de Daniel ri tøtrʼꞹji yo profecía ke nⱥdʼⱥji o Reino e Mizhokjimi ro mbꞹrꞹ i ro manda ko e Jesús. Texe yo profecía kja ne capítulo 4 de Daniel nⱥdʼⱥji o Reino e Mizhokjimi. O ¿ja gi ñuge?

Ernesto: A, ja̱a̱ a ro meya. Kʼo dya xi ri meya, pje nee ra nubi ko e 1914 yo.

Julio: Na jotrjo, nudya ra yepe ra nubi kjo bo nge kʼe rey Nabucodonosor. Ro manji kja kʼe otrʼꞹ cumplimiento de nu profecía, kʼe trjaxiza bo nge e Nabucodonosor, i bo nguarꞹ in reinado ma go dyokʼꞹji kʼe trjaxiza, i bo kjogꞹ yencho​tiempos. I e Nabucodonosor go mbɇzhi loko. I ma go kjogꞹ k’o tiempos, angeze bo yepe go trjꞹmbʼeñe i bo yepe go manda kja o reino. I kja nu yeje cumplimiento, e Mizhokjimi dya kjaa kjo xi go ñʼeme ro manda kja o Reino,​nujyo dya nee ra mama ke e Mizhokjimi dya mi pjechi ra manda.

Ernesto: ¿Ja ga kjaa? Dya ri søø ra meya

Julio: Meya na joo, mi jingua k’o rey a Israel mi manji ke mi chjenjui ke mi jurꞹji “kja o trono e Jehová”. f K’o nee ra mama nge ma mi manda k’o rey a Israel, ixi mi chjenjui ke Mizhokjimi nge k’ꞹ mi manda. Nangeje o bʼꞹbʼꞹ na punkjꞹ kʼo rey a Israel ke dya go dyⱥtⱥji e Jehová, i ñe na punkjꞹ kʼo israelita dya xo go dyⱥtⱥji. Ngekʼua e Mizhokjimi go jyɇzi ke k’o Babilonio ro ma chjotꞹji k’o rey a Israel kja kʼe kjɇɇ 607 ma dyabʼe ma e̱je̱ e Cristo, ndizi kʼe kjɇɇ ixi chenjui ke dya kja go jyɇzi d’a rey e Mizhokjimi a Jerusalén ke je mi nge kʼe nrrajñiñi nuja mi bʼꞹbʼꞹ o Reino e Diosi. Ngekʼua akjanu søø ra manji ke ndizima, e Mizhokjimi dya kjaa go ñʼeme kjo ro manda kja ne xoñijomꞹ. ¿A na meya na joo astadyaba?

Ernesto: Ja̱a̱, arna meya.

Julio: Yo yencho tiempos go mbꞹrꞹ kja kʼe kjɇɇ 607 ma dyabʼe ma e̱je̱ e Jesús. Ndizi kʼo pakʼo, nge ma e Mizhokjimi dya kjaa go ñʼeme dʼa rey. I ma go nguarꞹ kʼo kjɇɇkʼo e Mizhokjimi go yepe go ñʼeme dʼa nandyo rey​i nange dya kja bo nge kja ne xoñijomꞹ, ya bo nge ajensʼe. Xo kʼo dyaja profecía kʼo a ro xørꞹbi kja Daniel, xo go cumpleji ma ro nguarꞹ kʼo yencho tiempos. Ngekʼua, nudya bʼꞹbʼꞹ dʼa trʼønꞹ, ¿jingua ro nguarꞹ kʼo yencho tiempos? Ma ra pa̱ra̱jikʼo a søø ra meyabi jingua go mbꞹrꞹ o manda o Reino e Diosi.

Ernesto: Jyɇzgi ra xitsi,​bo nge kja kʼe kjɇɇ 1914.

Julio: ¡A, ja̱a̱! Je akjanu Ernesto, ya bi meya.

Ernesto: ¿I jarga pa̱ra̱ji ke, bʼemi bo nge kʼe kjɇɇkʼꞹ?

Julio: Ma bo e̱je̱ e Jesús kja ne xoñijomꞹ, angeze bo mama ke kʼo yencho tiempos dyabʼe mi kjuarꞹkʼo. g Ngekʼua arna meyabi ke yo yencho tiempos go mbꞹrꞹji na punkjꞹ kjɇɇ anrrꞹbʼꞹ ma dyabʼe ma e̱je̱ e Cristo, i ma go e̱je̱, i ma go nrru̱u̱, i go maa a jensʼe xi mi bʼɇzhi na punkjꞹ kjɇɇ ke ro cumplekʼo. Ngekʼua, i mbeñe ke ro xørꞹbi kʼo mama kja nu profecía a Daniel, ke bo mama ke texekʼo, ro søø ro meyaji “asta ma ra sⱥjⱥ yo paa ma ra nguarꞹ yo na sʼoo”. h Ngekʼua ma a ro nguarꞹ kʼe siglo XlX, janzi ntee ke bʼemi mi nee ro mba̱ra̱ji kʼo mama nu Jñakjimi go nee ro xørꞹji ngekʼua akjanu ro søø ro meyaji na jokʼo, i xo ñe janzi kʼo profecía. I akjanu jmanchʼa jmanchʼa go mbꞹrꞹ go meyaji kʼo mi nee ro mama kʼo yencho tiempos ke ro nguarꞹ kja kʼe kjɇɇ 1914. Texe kʼo a kjogꞹ i ñe yo na kjogꞹ, ixi ñetsʼe ke kja kʼe kjɇɇ 1914 go mbꞹrꞹ go manda o Reino e Mizhokjimi ajensʼe. Ngekʼua a go mbꞹrꞹ nu kʼo xiji, período del tiempo del fin o yo paa ke nge ma e Mizhokjimi ra chjotꞹ yo na sʼoo kja ne xoñijomꞹ. Ernesto, ri pa̱rgø ke na punkjꞹ yo jñaa yo a ro nubi, i bʼꞹma dya søø ri meya na joo.

Ernesto: ¡Uy, ja̱a̱! Ni jyodʼꞹ ra yepe ra yepe ra xørꞹ ngekʼua ra meya na joo.

Julio: Ja̱a̱, na kjuana. Xo ñezgø me go metsʼɇ ro søø ro meyagø. Ri tenkʼø ke texe yo a ro jñabidya, ra søø ra mbøxkʼꞹ ngekʼua ri meya texe yo ri jizhigøjme yo testigo de Jehová, ke o Reino e Mizhokjimi jizhi kja ne Jñakjimi.

Ernesto: Ja̱a̱ na kjuana je akjanu. Nutsʼkʼø me ri mⱥkjo ri janrra ke nutsʼkeji me gi creogeji texe yo mama ne jñakjimi.

Julio: Ri negø ke xo ñetsʼkʼe ri pɇskʼe kʼe confianza. Nzakja a ro jitsʼi, na punkjꞹ yo a ro jñabi, i ri pa̱rgø ke dya søø ri meya na joo dabadijiyo i bʼꞹma gi pɇskʼe na punkjꞹ trʼønꞹ. Nzakja, a ro manji ke yo siete tiempos go mbꞹrꞹji kja kʼe kjɇɇ 607 ma dyabʼe ma e̱je̱ e Cristo i nujyo pɇski ra nuu ko o Reino e Diosi. I ¿pje kja ri mangøjme ke ro nguarꞹji yo siete tiempos kja nu kjɇɇ 1914? i

Ernesto: Ja̱a̱, nge yo ri yembeñe dya ri søø ra meya na joo.

Julio: Ne Jñakjimi nge nu pjøxkꞹji ngekʼua ra pa̱ra̱ji janzi go mezhe yo yencho tiempo. ¿Gi nege ke dʼa nu paa xi ra ñabiyo? j

Ernesto: Ja̱a̱, na joo. Ra tepkʼe.