Julio: Kjimi Ernesto, me ri mⱥkjo ri yepe ri jantrʼkʼa. Me ri søgø na joo ma rgua eko chjꞹma chjꞹma i ra ñabi kʼo mama ne Biblia. a ¿Ja bi jyasʼꞹ?

Ernesto: Ri bʼꞹntrjo na joo, pøkjꞹ.

Julio: A, mi na joo. Mi chjꞹꞹ ke ro na kjinkʼi, gi mbeñe ke ro ñabi pje kja yo testigo e Jehová manji ke ya go mbꞹrꞹ o Reino e Mizhokjimi ra manda ndizi kʼe kjɇɇ 1914. b Ro nubi kja nu capítulo 4 kja nu libro de Daniel, pjøxkꞹji ra mbeñejikʼo. ¿Gi mbeñe pje nge?

Ernesto: Ja̱a̱, kʼo go nginchʼi kʼe rey Nabucodonosor.

Julio: Ja̱a̱, na kjuana. Go nginchʼi ke go jñanrra na trjaxiza ke me ma nrra̱a̱ i mi sⱥtrʼⱥ asta jensʼe. Ma, ma kjinchʼi, go dyⱥrⱥ dʼa anxe ke je mi ñeje kja e Mizhokjimi ke go mama dyechʼi kʼe trjaxiza. Kʼo go ngentrjo nge o dyꞹꞹ ñe kʼꞹ nu jñu̱rꞹ, i bo kjogꞹ janzi paa kʼo xiji “yencho tiempos” i nakʼua kʼe xiza bo yepe go trʼeʼe. c Xo ro nubi ke kʼe profecía pɇsʼi yeje cumplimiento. ¿Gi mbeñe kʼꞹ otrʼꞹ cumplimiento?

Ernesto: Nge kʼo bo kjogꞹ e Nabucodonosor, ¿eko ja̱a̱? Go pjezhi loko i go kjogꞹ akjanu yencho kjɇɇ.

Julio: Ja̱a̱ akjanu. Angeze bo pjezhi loko i dya kjaa bo søø go manda nzakja dʼa rey. I nu segundo cumplimiento de yo siete tiempos ngema e Mizhokjimi dya kjaa go ñʼeme dʼa rey ke ro manda kja ne xoñijomꞹ. I bo mbꞹrꞹ ma kʼe Jerusalen bo chjotꞹji kja kʼe kjɇɇ 607 ma dyabʼe ma e̱je̱ e Cristo. Ndizi kʼo pakʼo, dya kjaa go bʼꞹbʼꞹ dʼa rey kja ne xoñijomꞹ ke ro ñʼeme e Jehová. I ma go nguarꞹ kʼo pakʼo, e Mizhokjimi go yepe go ñʼeme dʼa dʼadyo rey​i nudya bo nge ajensʼe. Ma ro nguarꞹ kʼo yencho tiempos, i go mbꞹrꞹ go manda o Reino e Mizhokjimi ajensʼe. Nudya, a ro nubi jingua go mbꞹrꞹ kʼo yencho tiempo. I nudya ra nubi janzi kjɇɇ bo kjogꞹ ma ro mbꞹrꞹ ro manda o Reino e­Mizhokjimi. ¿A na meya?

Ernesto: Ja̱a̱, arna mbeñe kʼo ro ñabi mi chjꞹꞹ.

Julio: Me na joo. Ra nubima janzi kjɇɇ go mezhe kʼo yencho tiempos. Nuzgø xo ro yepe ro nuu ma rma e̱kjø ngekʼua dya ra jyombeñe texeyo. Ra kjapꞹ nguenrra i ra xitsi jarga kjaa.

Ernesto: Na joo.

Julio: Kʼꞹ otr’ꞹ cumplimiento ko e Nabuchodonosor, yencho tiempos go mezhe yencho kjɇɇ. Nu segundo cumplimiento ko o Reino e Mizhokjimi, mazi go mezhe na punkjꞹ.

Ernesto: ¿I jagi pa̱rgedyakʼo?

Julio: Ra pjꞹrꞹbi, kʼo yencho tiempos go mbꞹrꞹji kja nu kjɇɇ 607 ma dyabʼe ma e̱je̱ e Cristo. Ma kʼe Jerusalen bo chjotꞹji, i ma ra pezheji ndizi kʼe pakʼꞹ kʼo yencho kjɇɇ, ra sⱥtrʼⱥji kja nu kjɇɇ 600 ma dyabʼe ma e̱je̱ e Cristo. I kja kʼe kjɇɇ, dya pje o kjogꞹ kʼo ro pɇsʼi nguenda ko nu Reino e Mizhokjimi. Nakʼua, gi mbeñe kʼo a rgua nubi, ke ma go e̱je̱ e Jesús kja ne xoñijomꞹ go kjogꞹ na punkjꞹ siglos, i angeze bo mama kʼe kʼo yencho tiempos dyabʼe mi kjuarꞹkʼo.

Ernesto: Ja̱a̱, a ri mbentrjokʼo.

Julio: Ja̱a̱, nuba yencho tiempos dya nge yencho kjɇɇ, nge na punkjꞹ kjɇɇ.

Ernesto: ¿Mazi na punkjꞹ? ¿Janzi kjɇɇma?

Julio: Kja nu libro de Revelación o Apocalipsis, bʼꞹbʼꞹ dʼa profecía ke jñetrkjui ko e Daniel i nujyo ra mbøxkꞹbi ra meyabi yo yencho tiempos. Kja ne profecía mama ke jñii tiempos i medio ixi ngeji 1,260 días. d I ma ra pezheji​ nu doble, a sotʼꞹ yo yencho tiempos⁠ ke ixi ngeji 2,520 días. ¿Abi meyayo?

Ernesto: Ja̱a̱. Nange, dyabʼe ri søø ri meya pjekja i mangeji ke o Reino e Mizhokjimi bo mbꞹrꞹ kja nu kjɇɇ 1914.

Julio: Na joo, nudya ra nubi janzi profecía ke mama nu Biblia, dʼa paa mama ke chjenjui dʼa kjɇɇ. e Ma jega akjanu, yo siete tiempos o yo 2,520 paa, ngeji 2,520 kjɇɇ. I ma ra pjꞹrꞹji ra pezheji yo 2,520 kjɇɇ ndizi kʼe kjɇɇ 607 ma dyabʼe ma e̱je̱ e Cristo, ke nge ma go mbꞹrꞹ yo siete tiempos, ra sⱥtrʼⱥji kja kʼe kjɇɇ 1914. f Ngekʼua kja kʼe kjɇɇ 1914, søø ra manji ke nge ma go nguarꞹ yo siete tiempos, i e Diosi go ñʼesʼe e Jesús Rey kja o Reino e Mizhokjimi. Ngekʼua, kja kʼe kjɇɇ 1914, go mbꞹrꞹ go kjogꞹ​ kʼo nrrumꞹ ñe texe kʼo mama nu Jñakjimi ke ro kjogꞹ kja yo paa ma ra nguarꞹ texe yo na sʼoo.

Ernesto: ¿I pje kʼo ra kjogꞹ?

Julio: kja Mateo 24:7 e Jesús go profetizao kʼo ro kjogꞹ ma ro mbꞹrꞹ ro manda ndizi ajensʼe. Mama: “Yo país ra chu̱ji ko yo ñaja país, kʼo rey ra chu̱ji ko kʼo ñaja rey, na punkjꞹ kʼua ja ra supjreji o trjijmi ñe kʼua ja ra mbii na zɇzhi ne xoñijomꞹ”. ¿Bi jñanrra? Jesús go mama ke ro bʼꞹbʼꞹ trjijmi ñe ro mbii ne xoñijomꞹ. ¿Dya ngejyo na kjogꞹ yo paa yo ri ka̱ra̱ji kja ne xoñijomꞹ ndizi kʼe kjɇɇ?

Ernesto: J̱a̱a̱, na kjuana.

Julio: E Jesús xo go mama ke ro bʼꞹbʼꞹ na punkjꞹ chu̱ʼu̱. I kja ne libro de Revelación go mama ke dya ro nge chu̱ʼu̱ kja datrjo jñiñi ro nge dʼa trjachu̱ʼu̱ kja trexe yo trʼajñiñi kja ne xoñijomꞹ g ¿Gi mbeñe jingua go mbꞹrꞹ nu Primera Guerra Mundial?

Ernesto: Kja 1914. Ja̱a̱, nge kʼe kjɇɇ ma nutsʼkeji i manji ke e Jesús go mbꞹrꞹ go manda. I dyaxi rgua kjinkjo ke jerguakjanu.

Julio: Mejme, ma ri unꞹji nguenda ke ni mebi nu profecía ​de yo siete tiempos i ñe ne profecía ma ra nguarꞹ yo na sʼoo, ​yo testigo de Jehová ri mangøjme ke kja kʼe kjɇɇ 1914 e Jesús go mbꞹrꞹ go manda ndeze ajensʼe i ndizima, a ri bʼꞹnji kja yo paa ma ra nguarꞹ yo na sʼoo. h

Ernesto: Xi rna kjijñi, ngekʼua ra søø ra meya na jooyo.

Julio: A na joo. Xo ñezgø ma ro pjꞹrꞹgø dya mi søø ro meya dabadiji. Nudya ri tenkʼø ke go mbøxkꞹ ri meyage na joo kʼo ro ñabi, zø ne Biblia dya nⱥdʼⱥ ne kjɇɇ 1914 yo testigo de Jehová ri meyajme ke e Jesús go mbꞹrꞹ go manda kja kʼe kjɇɇ. Xo ri tebʼe ke bi unꞹ nguenda ke yo testigo de Jehová kʼo ri kreojme, kʼo ri jizhijme, je ni ñe̱je̱ kja ne Biblia.

Ernesto: Jaa, me na joo rga søgø, ma ri unꞹ nguenda​ ke nuts’k’e texe yo i jitsʼi je junsʼꞹ kja ne Biblia. Zø pje ma trʼønꞹ ri kjakʼꞹ, nutsʹkʹe dya gi mama “Nutsʼkø ri kreogø” o “Ri mangø”. Texe kʼo gi mange junsʼꞹ kja ne Biblia. Pe ri mangø ¿pjekjaa me na zɇzhi ra meyaji? ¿Pje kjaa e Diosi dya go jñusʼꞹ ke e Jesús ro nge rey kja ne kjɇɇ 1914?

Julio: Mi na joo ne trʼønꞹ Ernesto. ¿Gi pa̱rge pje kjaa e Diosi go tsjaa akjanu? o ¿Pje kjaa ni jyodʼꞹ ra xampaji ngekʼua søø ra meyaji? ¿Gi nee ke ra jñabik’o ra chjꞹꞹ?

Ernesto: Ja̱a̱ na jotrjo, ra tepkʼe.