Ro chegø a Acul, dʼa jñiñi ke bʼꞹbʼꞹ na je̱e̱ kja yo trʼeje a oeste a Guatemala. In bʼɇdyi nge yo xiji ixiles, ke nge ntrʼee indígena ke bi ñe̱je̱ de yo maya. Ro pjechigø ro ñaa ja ga ñaa in bʼɇdyi xo ri ñagø ñangixtrano. Ro chegø ma mi bʼꞹbʼꞹ dʼa me nrra sʼoo chu̱ʼu̱ ke o mezhe 36 kjɇɇ. Kja nu chu̱ʼu̱ bo nrru̱ji na punkjꞹ ixiles.

Ma mi ɇdyigø nzijo kjɇɇ, in kjuarmagø ke mi ɇdyi yencho kjɇɇ bo eñe ko dʼa granada ke bo pjⱥjnⱥ. Ngekʼua, ro kejme ngoro ñe in kjuarma bo nrru̱u̱. Nudyama ro maa mimigø kja dʼa ngumꞹ nu ja mimi yo ngoro kja nu trʼajñiñi a Guatemala, nujnu ro pjechi ro zopjꞹ braille. Dya mi pa̱rgø pjenga yo ntrʼee de nu ngumꞹ dya mi neji ke rgo ñagø ko yo dyaja tsʼitrʼi ñe in dyoji dya mi nee ro zokꞹgøji. Trenxe yo paa mi bʼꞹntsjɇgø, mi trebʼegø yo yeje zana ma mi søø ro maa nugø in mama, ke me mi netsʼɇgø. Pe angeze bo nrru̱u̱ ma mi ɇdyigø 10 kjɇɇ. Me po zichʼi in mꞹbʼꞹgø, ro bʼɇzhigø in mamagø ke mi nge nu ntrʼee nu me mi sʼiyagø.

Ma mi ɇdyigø 11 kjɇɇ, ro nzhogø kja in jñinkʼø, ro maa mimi ko in jekjuarma ñe nu pjamilia. Angezeji o dyakøji kʼo mi jyodʼꞹgø, pe dya mi pa̱rji ja ma søʼø in mꞹbʼꞹgø. Mi bʼꞹbʼꞹ o paa ma mi mbɇkuɇgø i me mi kjapꞹ trʼønꞹ e Yose, mi mapjꞹgø: “¿Pjenga bo nrru̱u̱ in mama? ¿Pjenga ri ngorogø?”. Yo ntrʼee mi mama ke trenxe yo mi kjogø je akjanu mi nee e Yose. Nutsʼkʼø ro mbeñegø ke e Yose dya ma jontrʼe. Ma rgo søø, rgo pøtrʼꞹtsjɇgø.

Pje nrre mi søø ro tsjakøji nangeje mi ngorogø. Ma kja mi tsʼikegø mi bʼꞹbʼꞹ kjo o tsjakø go obʼꞹbʼe na punkjꞹ paa. Dya kjo ro xikʼø yo o tsjakøji, mi mbeñegø ke dya kjo mi nee ro mba̱ra̱ yo mi kjogø. Yo ntrʼee dya mi nee ro zokꞹgø. Me mi nzhoxꞹgø i dya mi nee ro bʼꞹbʼꞹgø ko yo ntrʼee, dya mi confiaogø ni ri dʼa ntee.

Ma mi ɇdyigø 13 kjɇɇ, dʼa chjꞹntrʼꞹ ke mi testigo e Jehová bo ñaa ko nutsʼkʼø ma mi ñonꞹgø kja colegio. Dʼa maestra ke mi juentskʼø o xipjibi ro zenguazꞹgø. Angezegui bo mangui ke nu Biblia mama ke ra sⱥjⱥ nu paa ma yo ngoro nrro ra jñanrraji ñe ke yo ya nrru̱u̱ ra nankji na yeje (Isaías 35:⁠5; Juan 5:​28, 29). Mi nee ro dyⱥrⱥ kʼo mi mangui, pe mi su̱gø rgo trjꞹrꞹ. Zø dya nrra mi ñagø, angezegui mi zokꞹgøgui na joo, mi kjingøbi ngekʼo ro jitsi yo mama nu Biblia. Angezegui mi nzhongui 10 kilometro (6 millas) kja yo trʼeje jesta ra sⱥtrʼⱥ kja in jñinkʼø.

In kjuarmagø o xitskʼø ke angezegui dya mi jꞹgui mechi pe mi jegui na joo bʼitu. Angezebi me mi netskʼøbi ñe mi dakʼøbi o regalo. Ro ungø nguenrra ke mi ngegui cristiano ke nan kjuana, ke o tsjagui o sacrificio por nutskʼø.

Ro zopjꞹgø nu Biblia ko yo skuama kja braille. Mi meyagø na joo kʼo mi pjechigø, pe bʼꞹnkʼo dya mi bʼꞹbʼꞹgø de acuerdo. Dya mi creogø na joo ke e Yose me mi netsʼɇgø i ke ro bʼꞹbʼꞹ ntee ke xo ro nezgøji. Ro meyagø pjenga angeze jɇzi ke ra kjogꞹ yo na sʼoo, dya rmi janrragø nzikja dʼa papa ke me sʼiya yo o trʼii. *

Tsʼike tsʼike, ro pjechigø yo mama nu Biblia i ro potꞹgø in meñe. Ro pjechi ke e Diosi me sichʼi kja o mꞹbʼꞹ ma janrra ke ri supjreji. Ma janrra ja ga supjreo yo in bʼɇpji, angeze mama: “Ri nugø ke me supjre in jñiñigø [...;] ri unkʼø nguenda texe yo na kjogꞹji” (Éxodo 3:⁠7). Ma ro unkʼø nguenrra ke­e Jehová me nezgøji, ro juajnꞹgø ra kjagø kʼo nee angeze. Kja nu kjɇɇ 1998 ro kinkʼø kja nrreje i ro pjɇzhgø testigo e Jehová.

Ma o kjogꞹ dʼa kjɇɇ, ro kjagø dʼa curso pa yo ntee ngoro kja nu trʼajñiñi a Escuintla. Mi bʼꞹbʼꞹ dʼa kjuarma de dʼa congregación de nu jñiñi ke o mba̱ra̱ ke dya mi søø ro magø kja yo reunión a Acul, nangeje mi ma je̱e̱ i bʼꞹbʼꞹ o trʼeje, nge nu ñʼii ke mi nzhodꞹgui yo kjuarma ke bo jitskʼøgui nu Biblia. Ne kjuarma bo mbøxkꞹgø, bo chøtrʼꞹ dʼa pjamilia testigo ke o dyakꞹgø ja ra oxꞹ i bo mbøxkꞹgø ro magø kja reunión. Jesta nu padyayo, me pjøkꞹgøji.

Søø ra pechkʼeji na punkjꞹ ja gua mbøxkꞹgø yo kjuarma. Ri pa̱rgø na joo ke ma ri bʼꞹbʼꞹgø ko yo testigo e Jehová ri bʼꞹbʼꞹgø ko yo cristiano me nan kjuana (Juan 13:​34, 35).

Dya kja ri søgø ke dya na muguizgø, nudya in vida pɇsʼi dʼa propósito. Dya ri mbeñegø na punkjꞹ ke dya søø ri janrragø, ri pjøsʼꞹgø nrro dyaja ntrʼee ngekʼua ra mba̱rji yo mama nu Biblia. Ngetskʼø dʼa bɇzo ke otrʼꞹ kja congregación ñe ri ungø jñaa kja yo congregación yo dya na je̱e̱. Ri unꞹgø discurso nu ja pejñi na punkjꞹ ntee ke nee ra pjechi de nu Biblia.

Kja nu kjɇɇ 2010, ro magø kja nu Escuela de Entrenamiento Ministerial (nudya ni chju̱u̱ Escuela para Evangelizadores del Reino) a El Salvador. Nu escuela bo jitskʼø ja rga pjøsʼꞹ na joo in kjuarma. Ko yo ro pjechi kja nu escuela ro nugø ke me na muguisgø i ke e Jehová me mi nezgø, angeze søø ra usoa dʼa ntrʼee pa ra tsjaa kʼo nee.

E Jesucristo bo mama: “Xenda ri mⱥkeji ma ri unꞹji, ke na nge ma ra chʼakʼꞹji” (Hechos 20:35). Nudya me ri mⱥkjø, nudya ri søgø ke søø ri pjøsʼꞹgø yo dyaja.