Nu Biblia dya ngeje pje nrre ma libro, nujnu ra tøtrʼkøji nujyo me na joo yo xitsʼkøji e Yose. (2 Timoteo 3:​16) Texe yo jñaa søø ra mbøxkʼꞹ ngekʼua ne Biblia ixi mama “Me na zɇzhi o jñaa e Mizhokjimi kʼꞹ pɇpji a mboo kja i mꞹnkʼøji” (Hebreos 4:​12) Ne libronu søø ra mbøxkʼꞹ ra jokꞹtsʼꞹ ja rgi mimi, bʼꞹbʼꞹ yeje maneras: dʼaja ra dyakʼꞹge yo consejo ja me rgi minkʼe pama pama ñe nu yeje ra mbøxkʼꞹ ri pa̱rge e Diosi ñe yo mama ra tsjaa (1 Timoteo 4:⁠8; Santiago 4:⁠8).

Unꞹ jñaa ke pjøxkꞹji pama pama. Nu Biblia xitsiji ja me rga jokꞹji yo nrrumꞹ yo ri kjogꞹji xo ñeje pje nrre ma temas.

• Ja me rgi tsa̱rge ko yo dyaja (Efesios 4:​31, 32; 5:​22, 25, 28, 33).

• Ja me rgi pjønguenrra ngekʼua dya ri ma sødye (Salmo 37:⁠8; Proverbios 17:22).

• Ja me rgi minkʼe (1 Corintios 6:​9,  10).

• Ja me rgi pɇsʼi yo ni jyonkʼꞹ (Proverbios 10:⁠4; 28:19; Efesios 4:​28). a

Dʼa chjꞹntrʼꞹ kʼꞹ kja gi trʼibi kʼꞹ menzumꞹ a Asia go unꞹbi nguenrra ke me na joo kʼo ba e̱je̱ kja nu Biblia. Janzi ga kja yo kja chjꞹntrʼꞹtrjo, me gua sʼɇzhi ro minkui na joo ñe ja me rgua zojui. Pe o mbꞹrꞹbi o tsjabi janzi ma xørgui kja nu Biblia. ¿Pje o pjechibikʼua? E Vicent kʼꞹ nge xira mama “Nu kʼo ro xørꞹ kja nu Biblia o mbøxkꞹgø ro sɇchi ko nrrexe i mꞹbʼꞹ ja ma kjaa in chjꞹntꞹgø. Ma ri kjagø ja nzi ga xørꞹ, nujyo kjakꞹbʼe me ra mⱥjⱥbʼe”. Nu o suu Annalou ixi mama ke je ga kjanu: “Ma ri xørbʼe yo ejemplos bíblicos a mbøxkꞹbʼe na punkjꞹ. Nudya ngetsʼkø dʼa suu kʼꞹ me ri tonjia xo me ri mⱥjⱥ ko nudyayo metas ke ri negobʼe”.

Pjøxkꞹji ra pa̱ra̱ji e Yose. E Vicent kʼꞹ mama ja ga kjaa o chjꞹntꞹ, xe mantrjo: “Pøkjꞹ ke ri xørgø ne Biblia ri søgø ke bʼɇxtrjo ri bʼꞹnkʼø ko e Jehová”. Nujua ñetsʼe yo jñaa ke me ni mubi: na Biblia søø ra mbøxkʼꞹge ri pa̱rge na joo e Mizhokjimi. Ma ri tsjageyo dya ngextrjo ra mbøxkʼꞹge, xo søø ri jogebi na joo ko angeze. Ñe ri pa̱rge ke kja o jña xitsiji ke xe axojñi na kjuana søø ra minkøji nrrexe yo paa (1 Timoteo 6:​19). Otrjo dʼa libro ke ra søø ra chatrʼkʼꞹgeyo.

Ma ri pjꞹrꞹ ri xørꞹ ne Biblia ñe ri tsjage pama, akjanu ri jokꞹ ja me rgi minkʼedya ñe ri pa̱rge na joo e Diosi. Bʼꞹma ri tsjage na punkjꞹ trʼønꞹ ma ri xørꞹ ne Biblia. Ma ra kjogꞹtsʼꞹ akjanu ri mbenkʼe kʼo o tsjaa dʼa funcionario etíope ke go mimi mi jingua ixi kjogꞹ dos mil kjɇɇ. Ne bʼɇzonu mi pɇsi na punkjꞹ trʼonꞹ ja ma kjaa yo Escritura. E Lipe kʼꞹ o discípulo e Jesús o tsjapꞹ trʼonꞹ kjo mi meya kʼo ma xørꞹ, angeze o nrrꞹrꞹ: “¿Ja rga søø ra pa̱ra̱gø, ma dya kjo ra jitsigø?” b. Nukʼua o jyɇzi ke e Lipe kʼꞹ me ma joo xøpꞹte ro mbøsʼꞹ. (Hechos 8:​30, 31,  34). Xo Je ga kjanu, ma gi nee ri pjechi kʼo mama ne Biblia, søø ri dyꞹʼsꞹ kja da formulario kja nu Internet jw.org o ri opjꞹ kja nu dirección nu bʼɇxtrjo, kʼꞹ mama kja nu revista. Xo ri jyodʼꞹge yo testigo e Jehová kʼua ja gi bʼꞹnkʼe o ri mage kja nu Salón del Reino. Ri xitsijme, nrreze nudya jyodʼꞹge dʼa Biblia ñe jyɇzge ke ra jokꞹtsʼꞹ ja me rgi mimi.