Ro tegø kja kʼe ciudad ke ni chju̱u̱ Puerto Limón, kja lado este de Costa Rica. Mi jyotre o ñejebi jñii trʼii ñe ts’icha xuntrʼi, mi ngezgø kʼa yenchokʼo. Pe mi tagø o nrru̱u̱ ma mi ɇnkʼø ocho kjɇɇ, ngekʼua ngextrjo mi nanagø o chɇzhgøjme.

Nrreze ma kja mi tsʼikʼe me mi gustazꞹ yo deporte, pe kꞹ nrra mi gustazꞹ ngeje ne béisbol. Ma mi trʼii, ro kichkʼø kja na equipo y mi eñegø kja nʼa liga no profesional. Ya ma mi ɇnkʼø 20 kjɇɇ, dʼa bʼɇzo kʼꞹ xiji cazatalentos o mbitazꞹ ro eñegø ko nʼa equipo profesional a Nicaragua. Pe, kja kʼo paa mi pjørꞹgø in nana, na ngeje mi sødye, ngekʼua dya mi nee ro ma minkʼø a Nicaragua. Ngekʼo dya ro sⱥkjø kʼe oferta. Ma o kjogꞹ yo paa, xe nʼaja cazatalentos o mbitazꞹ ro eñegø ko nu equipo nacional de béisbol de Costa Rica, kja kʼe equipo ngextrjo mi eñeji jugadores ke bi juajnꞹji kja yo equipos no profesionales. Nudya ro mangø ke ja̱a̱. Ro eñegø ko nu equipo nacional nrreze ne kjɇɇ 1949 jesta ne kjɇɇ1952 ñe ro ma eñegø a Cuba, a México ñe a Nicaragua. Mi ngezgø kʼe defensor de base, me mi pjechkʼø ro eñegø kja kʼe posición. Ro sotꞹgø 17 partidos seguidos kua dya ro kjagø ni ri nʼa error. Me mi gustazꞹ ke yo ntee ro mapjꞹji in chju̱gø.

Pe, ro pjꞹrꞹ ro kjagø kʼo na sʼoo. Zø mi ñʼekjø i novia, mi tsja̱kjø nrrinxu. Xo mi sigø na punkjꞹ alcohol. Nʼa nu paa, me ro ti̱ʼi̱gø ke ya mꞹ go jyasʼꞹ, dya rmi mbenkʼø ja ba sⱥtrʼⱥ in nzumꞹ. Xo, mi kjagø apuestas ma mi eñegø dominó ñe mi to̱magø billetes de lotería.

Kja kʼo paa mi nankʼø o tsjaa testigo de Jehová. Angeze mi nee ro jitsi kʼo mi creo, pe dya ro kjapkʼø nguendakʼo na ngeje ngextrjo mi nee ro eñegø béisbol. Ma mi kjagø entrenamiento, exe mi jyombeñe kʼe hora ma ro sigø xɇdyi. Me mi gustazꞹ ne béisbol. Ngextrjo mi nee ro kjagøkʼo.

Pe ma mi ɇnkʼø 29 kjɇɇ, ro pɇskʼø dʼa lesión grave ma rmi nee ro sꞹrꞹ nu bola kja dʼa partido. O jozꞹ, pe pɇskʼi ro jɇzigø nu liga profesional. Dya ro jɇzigø nu béisbol, na ngeje bɇxtrjo in nzumꞹ mi ungø entrenamiento janzi jugadores ke mi eñeji kja dʼa liga no profesional.

Kja kʼe kjɇɇ 1957, ro magø kja dʼa asamblea ke u tsjaji yo testigo e Jehová kja dʼaja estadio kua bi eñegø béisbol. Ma ro bʼꞹnkʼønu, me ro kjentrjogø ma ro unkʼø nguenda ke yo Testigo mi pøtma respetaoji, dya nzakja kʼo ntee kʼo pøjinu ma eñeji béisbol. Ngekʼo ro nee ro xørꞹgø ne Biblia ko yo Testigo ñe ro magø kja yo reuniones ke kjaji.

Me go zichʼi in mꞹbʼꞹ kʼo ro pjechkʼø kja ne Biblia. Nzakja, e Jesús o mama ke kja yo paa yo rni nguarꞹ o discípulo ro nⱥnji nu Reino e Diosi kja texe ne xoñijomꞹ (Mateo 24:14). Xo ro pjechkʼø ke yo cristianos kʼo nan kjuana dya trjo̱ji merio ma kjaji o predicación. E Jesús o manda: “O chʼatrʼkʼꞹtrjoji, ri chʼunkʼeji gratis” (Mateo 10:⁠8).

Otrʼꞹ mi xørꞹgø kʼo jizhi ne Biblia, kja rru̱ mi janrragø kʼo mi kjaji yo testigo e Jehová. Ro unkʼø nguenda ke me kjꞹbʼꞹji o kuɇji ngekʼua ra nⱥdʼⱥji o Reino e Diosi kja texe ne xoñijomꞹ. Xo ro unkʼø nguenda ke angezeji ngeji generosos nzi go jichʼi e Jesús yo mi sꞹtꞹji. Ngekʼua ma ro xørgø yo tʼøpjꞹ kja Marcos 10:21 ja mama ne invitación ke o tsjaa e Jesús: “Ri ñe̱kje ri sꞹtrʼkꞹgø”, ro nee ro kjagø testigo e Jehová.

Kja kʼo paa, me ma sʼɇzhi ro kjagø kʼo na joo. Nzakja, mi pɇsʼigø dʼa “número de la suerte ñe texe yo ngoʼo kʼe número nge kꞹ mi kjapꞹgø apuesta kja nu lotería nacional. Pe kja ne Biblia ro pjechi ke e Diosi dya nuu na joo yo ntee ke matrʼꞹji nu e “diosi de la Buena Suerte” ni yo ngeji codiciosos (Isaías 65:11; Colosenses 3:⁠5). Ngekʼo, ro jɇzigøyo. Pe, ¡mi “número de la suerte” go nrro̱jo̱ kʼa otrʼꞹ nrromingo mꞹ ya bi jɇzi ro eñegø lotería! Yo ntee me go burlazꞹji na ngeje dya rbi eñegø ke ngoʼo y pje nrre go xitskøji ngekʼua nrro ro eñegø, pe dya ro kjagøkʼo. Nrreze k’e paa dyakja ro kjagø apuesta.

A mi pɇsʼigø nu “nueva personalidad” cristiana, nukʼua, ro kjogø xe dʼaja prueba kʼe paa ma ro kjibʼigø kja nrreje kja dʼa asamblea de yo testigo e Jehová (Efesios 4:24). Kʼe xo̱mꞹ, ma ro nzhogꞹgø kja kʼe hotel nu ja mi oxꞹgø, a trji kja in cuarto a mi tepketrjo in exnoviagø. Go xitskø: “Kjimi, Sammy, mɇɇ a mboo, ri negø ra obʼꞹbi”. Nrrajme ro xipji: “¡Jyo!”. Ro mbembe ke a rmi minkʼø nzi ga jizhi ne Biblia (1 Corintios 6:18). “¡¿Pje i mange?!”, o mamꞹ. Angeze dya mi nuu na mubi kʼo mama ne Biblia, nzakja, ne inmoralidad sexual ñe me mi xitskø ke nrro ro kjagøbʼe noviobʼe. Dya ro kjapkʼø nguenda, ro kjichkʼø kja in cuarto ñe ro kjotrkʼø nu ngoxtrji ko llave. Nudya, me ri mⱥkjø, na ngeje nrreze mꞹ ro kjagø Testigo kja kʼe kjɇɇ 1958, a ri minkʼø nzi ga jizhi ne Biblia.

Ni jyodꞹ ro øpjꞹgø dʼa libro mꞹ ro nee ro pɇzhkʼø texe yo beneficio ke ri pɇsʼigø na ngeje ri ⱥtkʼø kʼo mama ne Biblia. Nudya, bʼɇmi ri ñʼekjø amigo, in vida pɇsʼi dʼa propósito ke ni mubi ñe me ri mⱥkjø.

Xi ri eñegø béisbol, pe bʼꞹbʼꞹ kʼo nrra ri kjapꞹgø ni mubi. Mi jingua mi pɇsʼigø prestigio ñe dinero, pe dya nrra ga mezheyo. Kʼo ja̱a̱ ra mezhe, ngeje ke ra jogø ko e Diosi ñe yo in kjuarmagø. Ne Biblia mamꞹ: “Ñe, ne xoñijomꞹ ya ni matrjo, xo ñe texe yo neji yo ntee, pe kʼꞹ kjaa kʼo nee e Diosi ra mimi texe yo paa” (1 Juan 2:17). Kꞹ ri pɇpigø e Jehová ñe ke ri bʼꞹnkʼø kja o menzumꞹ, nge kʼo nrra gustazꞹ ra kjagø. Kja in vida, ¡nujyo ngejyo nrra ni mubizꞹ!