Kja ne Biblia, dya dʼatrjo kua tʼøpjꞹ ke e Jesús nge “o Trʼii e Mizhokjimi” (Juan 1:49). Ne jñaa “Trʼii e Mizhokjimi” nee ra mama ke e Diosi nge kʼꞹ o dyⱥtrʼⱥ nrrexe ñe nge kua ni ñe̱je̱ ne vida, nukʼo nee ra mama ke angeze xo go dyⱥtrʼⱥ e Jesús (Salmo 36:9; Revelación [Apocalipsis] 4:11). Ne Biblia mama kꞹ e Diosi ngeje dʼa Tata pe dya jizhi ke je nzakja yo jyotre.

 Ne Biblia xo mama ke yo anxe ngeje “yo trʼii e Yose nu nan kjuana” (Job 1:6). Xo ñeje, mama ke nu otrʼꞹ bʼɇzo, e Adán, mi ngeje “trʼii e Mizhokjimi” (Lucas 3:38). Pero ne Biblia jizhi ke e Jesús ngeje nu trʼii Mizhokjimi kꞹ xenrra ni mubi na ngeje nge kʼꞹ otrʼꞹ go dyⱥtrʼⱥ ñe ngeje nu trʼii kʼꞹ natrjo na ngeje go dyⱥtrʼⱥtsjɇ.

•  ¿E Jesús go mimi a jensʼe ante ke ro jmusʼꞹji kja ne xoñijomꞹ?

•  ¿Pje mi pjɇzhi a jensʼe e Jesús ante ke ro e̱je̱ kja ne xoñijomꞹ?

 Ja̱a̱. Ante ke ro jmusʼꞹji kja ne xoñijomꞹ, mi ngeje dʼaja espíritu a jensʼe. O mamꞹtsjɇ ke bi “dyagꞹ a jensʼe” (Juan 6:38; 8:23).

 E Jesús nge kʼꞹ otrʼꞹ o dyⱥtrʼa e Mizhokjimi. Ngekʼua ne Biblia mama:

•   “otrʼꞹ go dyⱥtrʼⱥ e Jesucristo ma dya bʼ e mi trʼⱥtrʼⱥ e jensʼe ñe ne xoñijomꞹ” (Colosenses 1:15).

•   Angeze ngeje “kʼꞹ otrʼꞹ go dyⱥtrʼⱥ” e Mizhokjimi (Apocalipsis 3:14).

 E Jesús o cumple kʼe profecía kʼꞹ bi nⱥdʼⱥ “nukʼꞹ ix mi bʼꞹbʼꞹ mi jingua” ñe ya bi mezhe yo kjɇɇ kʼꞹ bʼꞹbʼꞹkʼꞹ (Miqueas 5:2; Mateo 2:4-6).

 Angeze mi kjaa bʼɇpji kꞹ me ma mubi a jensʼe. E Jesús go mamꞹkʼo ma go dyøtꞹ e Diosi: “[...] in Tatazꞹgø, dyakꞹgø ne gloria kꞹ rmi pɇsʼigø ma rmi bʼꞹnkʼø in jmige ma dya bʼe mi trʼⱥtrʼⱥ ne xoñijomꞹ” (Juan 17:5).

 Go mbøsʼꞹ nu Tata ro dyⱥtrʼⱥ texe. E Jesús go pɇpji ko e Diosi “nzakja dʼa obrero experto” (Proverbios 8:30). Ne Biblia mama: “Angeze go mbøsʼꞹ Mizhokjimi ngekʼua o dyⱥtrʼⱥ nrrexe kʼo bʼꞹbʼꞹ a jensʼe ñe nrrexe kʼo bʼꞹbʼꞹ kja ne xoñijomꞹ” (Colosenses 1:16).

 E Diosi o dyⱥtrʼⱥ mediante e Jesús nrrexe yo bʼꞹbʼꞹ, nzakja yo anxe ñe ne universo (Revelación 5:11). Kʼo go tsjabi e Diosi ñe e Jesús je nzakja kʼo kjabi dʼa arquitecto ñe dʼa constructor. Ne arquitecto ⱥtrʼⱥ ne diseño ñe ne constructor ra ngꞹsʼꞹ kʼe ngumꞹ.

 Mi nge kʼe Jñaa. Ne Biblia mama ke ma mi bʼꞹbʼꞹ a jensʼe e Jesús mi xiji “kʼe Jñaa” (Juan 1:1). Nujyo nee ra mama ke e Diosi o mbejñe o trʼii ngekʼua ro xipji yo anxe pje xkʼo ro tsjaji.

 E Jesús xo mi xipji kʼo nte pje ro tsjaji. Bʼꞹma, e Jehová go ñaa mediante kʼe Jñaa, kꞹ ngeje, e Jesús, kja kʼe jardín a Edén ma go xipji e Adán ñe e Eva pje ro tsjabi (Génesis 2:16, 17). Bʼꞹmꞹ e Jesús ximi nge kʼe anxe ke go zidyi kʼo israelita ma go nzhodʼꞹji kja kʼe ma jyadʼꞹ ñe ro pjønguenrraji ro dyⱥtⱥji o jñaa (Éxodo 23:20-23). a