Ío, dyaja ra chjotꞹji ne Xoñijomꞹ, ni ra nrrɇɇ ni ra pøtꞹji. Ne Biblia jizhi ke e Dios o dyⱥtrʼⱥ ne Xoñijomꞹ ngekʼua yo ntee ro mimijiba texe yo paa.

•   “Yo na jonte ra nga̱ra̱ji kja ne xoñijoma, ñe angezeji ra mimiji texe yo paa” (Salmo 37:29).

•   “Angeze go dyⱥtrʼⱥ ne Xoñijomꞹ; dya kjo ra søø ra jñꞹnꞹ nuja bʼꞹbʼꞹ, ra bʼꞹbʼꞹtrjo texe yo paa” (Salmo 104:5).

•   “Nu Xoñijomꞹ ra sido ra bʼꞹbʼꞹ texe yo paa” (Eclesiastés 1:4).

•   “Angeze na joo ba dyⱥtrʼⱥ ne Xoñijomꞹ, ñe dya ra trjeze, Angeze pa̱ra̱ pjenga go dyⱥtrʼⱥ ne Xoñijomꞹ, go dyⱥtrʼⱥ ne Xoñijomꞹ ngekʼua ro mimi yo ntee” (Isaías 45:18).

 E Diosi dya ra jiɇzi ke yo ntee ra chjotꞹji ne Xoñijomꞹ kʼꞹ sʼokꞹji nu contaminación, yo chu̱u̱ o maxi pje na mbepji. Ne Biblia mama ke e Diosi ra “chjotꞹ yo tee ke na sʼodʼꞹji ne xoñijomꞹ” (Revelación [Apocalipsis] 11:18). ¿Ja me rga tsjapꞹ?

 E Diosi ra ngꞹꞹ texe yo gobierno yo ntee, na ngeje dya pjørꞹji ne Xoñijomꞹ, ñe o Reino a jensʼe ra mandagua (Daniel 2:44; Mateo 6:9, 10). E Jesucristo kʼꞹ nu Trʼii e Diosi nge kʼꞹ ra manda kja ne Reino (Isaías 9:6, 7). Ma go mimi kja ne Xoñijomꞹ, e Jesús o tsjapꞹ ro juɇme yo zɇzhi yo bʼꞹbʼꞹ kja ne Xoñijomꞹ (Marcos 4:35-41). Ma e Jesús ra manda kja o Reino e Diosi, ra controlao na joo texe yo kjogꞹ kja ne Xoñijomꞹ ñe texe yo elementos naturales. Ra jokꞹ na joo ne Xoñijomꞹ ngekʼua nrro ra jñetsʼe kua nzi ma kjaa kʼe jardín a Edén (Mateo 19:28; Lucas 23:43).

 Jyo. Bʼꞹbʼꞹ kʼo creojiyo na ngeje dya tendioji na joo yo ju̱sʼꞹ kja 2 Pedro 3:7, ke mama: “yo jensʼe ñe ne xoñijomꞹ tebʼeji kʼe sibi”. Ra nuji yeje ke ra mbøxkꞹgøji ra tendioji na joo pje nee ra mama yo jñayo:

1.   Kja ne Biblia, yo jñaa jensʼe, xoñijomꞹ ñe sibi pɇsʼiji nrre nʼaño significado. Nzakja, kja Génesis 11:1 mama: “Texe ne xoñijomꞹ natrjo jñaa mi ñaa”. Nuba, ne jñaa “xoñijomꞹ” nee ra mama: yo ntee yo ka̱ra̱ kja ne Xoñijomꞹ.

2.   Kja 2 Pedro capítulo 3 bʼꞹbʼꞹ janzi versículos ke pjøxkꞹji ra tendioji ne versículo 7 nuja tʼøpjꞹ yo jñaa: “yo jensʼe”, “ne xoñijomꞹ” ñe ne “sibi”. Kja yo versículos 5 y 6 nⱥdʼⱥ yo go kjogꞹ kja kʼo paa e Noé. Ne Diluvio go chjotꞹ yo ntee yo mi ka̱ra̱ kja kʼo paa, pe dya go chjotꞹ ne Xoñijomꞹ. Kʼe trʼadyebʼe go chjotꞹ kʼo ma sʼonteji, nge kʼo nee ra mamaba, ne jñaa “xoñijomꞹ” (Génesis 6:11). Xo go chjotꞹ yo “jensʼe”, nee ra mama ke go chjotꞹ kʼo ntee kʼo mi mandaji kja kʼo paa. Ngekʼo, go nrru̱ji texe yo ma sʼonteji, pe ne Xoñijomꞹ xe sido ga bʼꞹntrjo. E Noé ñe nu pjamilia go salvaji ñe ma ya bi kjogꞹ ne Diluvio o musʼꞹji o trʼiji a kjanu nrro go iji yo ntee kja ne Xoñijomꞹ (Génesis 8:15-18).

 Kʼꞹ kja ra kjogꞹ je nzakja kʼo o kjogꞹ kja ne Diluvio, ne “sibi”, ke nⱥdʼⱥ kja2 Pedro 3:7, nee ra mama ke ra chjotꞹji yo na sʼonteji, pe ne Xoñijomꞹ dya ra nguarꞹ. E Diosi o prometio “dʼadyo jensʼe ñe na dʼadyo xoñijomꞹ” “ja kʼo ra bʼꞹbʼꞹ justicia” (2 Pedro 3:13). Ne “dʼadyo xoñijomꞹ”, ngeje yo ntee ke ra minji ma ra manda nu Reino e Diosi, ke ngeje ne “dʼadyo jensʼe” o nu dʼadyo gobierno. Ma ra manda ne gobierno, texe ne Xoñijomꞹ ra mbɇzhi dʼa paraíso ke me rga zøø (Revelación 21:1-4).