Yo ri Testigojme e Jehová ko in pjamiliajme ñe yo in mintejme ri kjapꞹjme nguenda ra mimijme na joo. Ri pa̱rgojme ke me na mubi nu pjamilia,nange ri pa̱ra̱jme ke nge e Diosi nu go dyⱥtrʼⱥ (Génesis 2:​21-​24; Efesios 3:​14, 15). Kja nu Jñakjimi junsʼꞹ yo consejo ke ni jyodʼꞹji yo a chjꞹntꞹ ñe texe yo bʼedyi, ngekʼua me rga mⱥjⱥ rga mimiji na joo kja texe ne xoñijomꞹ.

 Nu kʼo ri kjajme nge kʼo mama nu jñaa e Yose,pjøxkꞹjme yo xira ñe yo suu ngekʼua ra mimiji na joo ñe ra jichiji na joo yo in chʼiji. (Proverbios 31:10-​31; Efesios 5:⁠22–​6:4; 1 Timoteo 5:8). Xo nu Jñaa e Yose soo ra mbøsʼꞹ yo pjamilia ke pesʹiji nandyo religión (1 Pedro 3:​1, 2). Nudya ra nuji kʼo mama dʼa xira ñe dʼa suu ma o tsjaji Testigo e Jehová:

•   “Kʹo ñanto kjɇɇ ke a mi ɇdyibʼe ma ro chjꞹtʼꞹbʹe, texe yo paa mi chu̱gøbʼe,dya ma joo ma søgøbʹe. Ma i sugo e Ivete bo nge testigo e Jehová, me mi sʼiyazꞹ dya kja mi ꞹdʼꞹ me ma jontre. Texe kʼo go tsjaa o mbøxkꞹbʼe ngekʼua dya kja ro jyambꞹbʹe.”​(Clauir, de Brasil)

•   “Ma in xirago e Chansa o mbꞹrꞹ o xørꞹ nu Jñakjimi ko yo testigo e Jehová, dya mi sⱥnpⱥgokʹo me mi ꞹnbꞹgo, mi kjijñigø ke angezeji mi jyambꞹji yo pjamilia. Nudya me ri mⱥkjø rga minkø ko in xira i ri pa̱rgo ke o mbøxkꞹbʼe nu o Jñaa e Yose.”​(Agness, de Zambia)

 Ma ri pa nⱥdʼⱥji nu Jñakjimi, ri jichkʼøjme yo i mintegøjme ke nu Jñaa e Yose søø ra mbøsʼꞹji ngekʼua ra mⱥji ko in pjamilia ma ra neji ra tsjaji kʼo mamaba:

•   Jyodʼꞹ na xira o dʼa suu ke rga jonte

•   Sɇchi yo nrrumꞹ nu otrʼꞹ kjɇɇ ma a bi chjꞹntꞹbi

•   Ri jobi na joo ko ni toʼo ñe ni nzha̱ʼa̱

•   Pjechi ja rgi sʹodʹꞹ in merio

•   Dya ri chjⱥmaji

•   Pjechi ri pongatrjo

•   Guɇnchʼi yo in chʼii

 Bʼꞹma ja̱a̱. Kja kʼe kjɇɇ 1998 nu empresa de investigación Sofres o mama ke 1 de cada 20 kjo a bi chjꞹntꞹ ma nu xira o nu suu o tsjaa testigo e Jehová o mbɇsʼiji na punkjꞹ nrrumꞹ ma o potrjꞹ nu religión.

 E Jesús go mama ke nukʼo kjaa jaga nee angeze xo ra mbɇsʼiji nrrumꞹ ko yo in pjamilia. (Mateo 10:32-​36) Nu historiador Will Durant o mama ke kʼo paa ma mi manda kʼo romano, eñe “kʼo cristiano mi pesʹiji nu sʼokꞹ ke mi jyambꞹji kʼo pjamilia”. a Yo padya, bʼꞹnkʹo xo manji ke yo testigo e Jehová jyambꞹji yo pjamilia. ¿Kjo na kjuana ke yo testigo e Jehová kjajiyo?

 Ma nu Tribunal Europeo de yo Derechos Humanos o mama ke dya ngextjo yo testigo e Jehová pesʹi nrrumu ma yo janzi nu pjamilia potꞹji nu religión, xo go mama ke ma yo bʼedyi ke dya ngeji testigo e Jehová ꞹmbꞹji ma dʼa pjamilia juajnꞹtsjɇ pje ma religión ra pɇsʼiji, xo nu Tribunal go mama ke akjanu pesʹiji nrrumu nzakja ko nandyo religión“. b Zø je ga kjanu yo testigo e Jehová kjapꞹ nguenda ga mimi ja ga mama nu Jñakjimi nzakja yo junsʼꞹ kja Romanos 12:17, 18: “Ma kjo kʼo ra tsjakʼꞹji na sʼoo, dya ri nzhopkeji. . . . kʹꞹ ri tsjaji, mimiji na joo a jmii yo ntee.”​

 Yo ri testigojme e Jehová ri kjapꞹjme nguenda yo mama nu Jñaa e Yose ke “ngextjo søø ra chjꞹtʼꞹji ko yo ⱥtpⱥ o Jñaa e Mizhokjimi” kʼo nee ra mama: Nijyodʼꞹ ra chjꞹtʼꞹji ko nujyo enchʼe o mꞹbʼꞹ e Diosi ngextjo yo in dyoji testigo e Jehová. (1 Corintios 7:​39) Yo mamaba e Mizhokjimi me pjøxkꞹji. Nzakja na artículo ke go mbedye kja nu revista Journal of Marriage and Family kja ne kjɇɇ 2010 mi mama:”Ma dʼa bʼɇzo o dʼa nrrinxu kʹꞹ potka ngijñibi kja o religión mazi mimibi na joo. c

 Zø yo testigo e Jehová dyakjo xipjiji ra jyɇziji nu xira o nu suu ma pesʹiji nandyo religión. Nu Jñakjimi mama: “Nutskʹɇji kjuarma, ma dya kreo Mizhokjimi yo nin sugeji, pero ma nee angezeji xe ri minkʼeji kʼo, dya ri jyambꞹgeji ma kʼo. Xo ñetsʹkʹeji hermana ma dya ejme Mizhokjimi yo ni xirageji, pero ma nee angezeji xe ri minkʼeji kʼo, dya xo ri jyambꞹgeji ma kʼo” (1 Corintios 7:​12, 13). Nuzgojme xo ri kjagøjme ga kjanu.