Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 10:1-33
10 Uyonpayamîꞌ, awenpenatakon yuꞌse wanî sîrîrî penaronkon utamokon rîꞌsan manniꞌkan Judeuyamîꞌ, Moisés nurîꞌtî pîkîrî itîꞌsan yarakkîrî eꞌkupîꞌpî pîꞌ. Inkamoro yarîꞌpî Paapaya tamîꞌnawîrî katupuru wenairî moropai inkamoro rukkuꞌnîpîꞌpî Paapaya tamîꞌnawîrî kureꞌnan pîrana, suuyu iteseꞌ arakkita pîꞌ, tîmeruntîri ke.
2 Mîrîrî warantî tamîꞌnawîronkon inkamoro esenpatakonaꞌpî Moisés wenairî toꞌ wîtîtoꞌpe, Cristo wenairî wîtîntoꞌpe esenpatakonan warantî. Maasa pra katupuru, Paapa winîpainon wenairî toꞌ wîtî yeꞌnen, moropai pîrana arakkita pîꞌ toꞌ wîtî yeꞌnen, Moisés wenairî toꞌ wîtîꞌpî ipemonkono pe.
3 Moropai inkamoroya tamîꞌnawîrî siꞌma Paapa nîtîrîꞌpî yekkari wanî enapîꞌpî keren po.
4 Moropai inkamoroya tamîꞌnawîrî siꞌma tîwukukon pe Paapa nîtîrîꞌpî enîrîꞌpî tîꞌ yai. Manniꞌ tîꞌ wanîꞌpî Cristo warantî, maasa pra mîîkîrîya inkamoro koꞌmannîpîꞌpî.
5 Mîrîrî warantî tamîꞌnawîronkon koꞌmannîpîꞌpî Paapaya. Teuren mîîwîni tîîse tuꞌkankon wanîꞌpî Paapa maimu yawîrî pra. Mîrîrî wenai, Paapaya toꞌ tîꞌka pinunpaꞌpî keren poro.
6 Tarîpai seeniꞌ tamîꞌnawîron eꞌkupîꞌpî pîꞌ esenumenkan eꞌpai man, penaronkon pemonkonyamîꞌ wanîꞌpî warantî uurîꞌnîkon wanî namai, imakuiꞌpî yuꞌse eꞌnî namai.
7 Mîrîrî yeꞌnen miaꞌ ke ikonekasaꞌ kîsapurîtî, penaronkonya yapurîꞌpî warantî pra. Maasa pra aweꞌmenukasaꞌ man Paapa kaaretarî po. Taawon see warantî:—Inkamoro Paapa pemonkonoyamîꞌ ereutasaꞌ entamoꞌkantoꞌ pîꞌ,moropai tekkarikon yonpaꞌpî toꞌya.Moropai tîwukukon enîrîꞌpî toꞌya.Moropai mîrîrî tîpo, inkamoro mananuꞌpî taatausinpai.Mîrîrî kupîꞌpî toꞌya miaꞌ ke ikonekasaꞌ yapurîkonpa
—taasaiꞌya man.
8 Mîrîrî warantî nîrî seꞌ tapairî wîriꞌsanyamîꞌ yarakkîrî eꞌnî eꞌpai pra man, pena ikupîꞌpî toꞌya warantî. Pena mîrîrî kuꞌsaꞌ toꞌya wenai, tuꞌke 23.000 kaisarî pemonkonyamîꞌ wîꞌpî Paapaya tiwin wei tîîse.
9 Mîrîrî warantî penaronkonya Paapa yonpaꞌpî warantî, Cristo yonpapai pra man. Maasa pra pena mîrîrî warantî Paapa yonpasaꞌ toꞌya wenai, îkîiyamîꞌ tîrîꞌpî Paapaya toꞌ yeꞌkapîꞌtoꞌpe toꞌya, moropai toꞌ eꞌtîꞌkaꞌpî.
10 Mîrîrî yeꞌnen amîrîꞌnîkonya ayesanonkon, Cristo nîtîrîꞌpî yasiꞌsirunpa eꞌpai pra man, penaronkonya tesanonkon Paapa nîtîrîꞌpî yasiꞌsirunpaꞌpî warantî. Moropai mîrîrî wenai Paapaya inserî yarimaꞌpî toꞌ tîꞌkai.
11 Tamîꞌnawîrî sîrîrî eꞌkupîꞌpî utamokon penaronkon yarakkîrî. Mîrîrî wanî uurîꞌnîkon nepuꞌtî ton pe sîrîrîpe, îꞌ kaiꞌma Paapaya ikupî tîmaimu yawîrî pra tîîkoꞌmansenon yarakkîrî. Moropai mîrîrî menukaꞌpî penaronkonya, sîrîrîpe uurîꞌnîkon pîꞌ ekaremeꞌnen pe, sîrîrî pankon tîîkoꞌmansenon. Maasa pra uurîꞌnîkon koꞌmantoꞌ man pata ataretîꞌka kupî tanne.
12 Mîrîrî yeꞌnen anîꞌ esenumenka ya yairî tîwanî kaiꞌma, meruntî ke tîwanî pîꞌ, aka, mîîkîrî yeꞌka esenumî, Paapa piapai aatarima. Mîrîrî namai, tîwarî mîîkîrî koꞌmamî eꞌpai awanî, imakuiꞌpî kupî tîuya namai.
13 Imakuiꞌpî ankuꞌpai tamîꞌnawîronkon pemonkonyamîꞌ eꞌtoꞌ, mîrîrî rî erepamî sîrîrî aponaꞌnîkon. Tîîse ayentainokon awanî tîrî Paapaya pepîn. Maasa pra taasaꞌ tîuya yawîrî ikupîiya. Imakuiꞌpî yapîtanîpîkonpa meruntî tîrîiya aapiaꞌnîkon, imakuiꞌpî kupîyaꞌnîkon namai.
14 Mîrîrî yeꞌnen uyonpayamîꞌ uwakîrikon puꞌkuru miaꞌ ke ikonekasaꞌ kîsapurîtî.
15 Sîrîrî eseurîmatoꞌ, epuꞌnenan pîꞌ eseurîma sîrîrî, amîrîꞌnîkon pîꞌ. Mîrîrî yeꞌnen eseurîmatoꞌ pîꞌ esenumenkatî, yairî, yairî pra ikupîyaꞌnîkon pîꞌ.
16 Cristo saꞌmantaꞌpî pîꞌ enpenatatî. Uurîꞌnîkon ton pe tîmînî kansaiꞌya pîꞌ enpenatan, mîrîrî uwukukon enîrî yai. Moropai trigo puusaꞌ yakuꞌnîkon yai, uurîꞌnîkon yarakkîrî Cristo koꞌmamî, maasa pra uurîꞌnîkon ton pe tîîsaꞌmantasaꞌ wenai. Ipemonkono pe eꞌnî eesepuꞌtî, mîrîrî wenai.
17 Teuren arinîke eꞌnî tanne, mîrîrî tiwinan trigo puusaꞌ pîrikkapîꞌsaꞌ yaku uurîꞌnîkonya, tiwin pîꞌ siꞌma. Moropai mîrîrî yaꞌsaꞌ wenai, tiwin eꞌnî ipemonkono pe esepuꞌtî.
18 Maasa enpenatatî Judeuyamîꞌ pîꞌ manniꞌkan Paapa yapurîkonpa toꞌ nîpoꞌtî yonpa yaanenan pîꞌ. Mîrîrî yanî toꞌya wenai, inkamoro pia Paapa koꞌmamî tîpemonkono pe toꞌ kupî tîuya yeꞌnen.
19 Îꞌ ankapai wanî epuꞌtî pîꞌ naatî mîrîrî yekare pîꞌ? Mîrîrî miaꞌ ke ikonekasaꞌ pia toꞌ narîꞌpî entamoꞌkantoꞌ wanî tiaron pe? Kaane, entamoꞌkantoꞌ rî wanî. Mîrîrî miaꞌ ke ikonekasaꞌ wanî toꞌ yepotorî pe puꞌkuru?
20 Kaane, mîrîrî pîꞌ eseurîma pepîn sîrîrî. Tîîse tauya manniꞌkan pîꞌ miaꞌ ke ikonekasaꞌ yapurînenanya tînpoꞌtîkon yarî kinî imakuiꞌsan oꞌmaꞌkon pia, makui poitîrîtonon pia, Paapa puꞌkuru pia pra. Inkamoro wanî esenkuꞌtîsaꞌkon pe. Mîrîrî yeꞌnen mîrîrî yeꞌka kuꞌnenan koreꞌta awanîkon yuꞌse pra wai. Inkamoro yeꞌkakon, makui poitîrîtonon yarakkîrî aakoꞌmamîkon yuꞌse pra wai.
21 Mîrîrî warantî siꞌma Cristo saꞌmantaꞌpî pîꞌ enpenatan pe tenîꞌsen enîrî yeꞌka pe, makui poitîrîtonon pia toꞌ narîꞌpî pîꞌ entamoꞌkan eserîke pra man. Mîrîrî wenai asakîꞌne yapurî eꞌpai pra man.
22 Mîrîrî kupîꞌnîkon ya, Uyepotorîkon ekoreꞌma yuꞌse eꞌnî mîrîrî? Mîrîrî kupîꞌnîkon wenai Uyepotorîkon yentai meruntî ke eꞌnî kaiꞌma eꞌnî mîrîrî?
23 Tiaronkonya taa: —“Mîrîrî kîꞌkuꞌtî”, taa Paapaya pra awanî ya, îꞌ ituꞌse eꞌnîtoꞌ kupî uurîꞌnîkonya îꞌ waniꞌ pra —taa toꞌya. Inna seruꞌ pepîn. Tamîꞌnawîrî tîkuꞌsen wanî morî pe, îꞌ ankuꞌpai eꞌnîtoꞌ kupî, tîîse mîrîrî tamîꞌnawîron unkupîkon wanî pepîn morî pe, tiaronkon pîikaꞌtîiya pra awanî ya.
24 Mîrîrî yeꞌnen anîꞌya ituꞌse tîweꞌtoꞌ yawîrî ikupî eꞌpai pra man. Tîîse tiaronkon pîikaꞌtîtoꞌpe ikupî eꞌpai man.
25 Mîrîrî yeꞌnen tamîꞌnawîrî tansen, toꞌ eꞌrepatoꞌ yennayaꞌnîkon ya, yennatî anîꞌ tekaranmapoi pra. Miaꞌ ke ikonekasaꞌ itîîsaꞌ mîrîrî? tîkai pra yennatî. Mîrîrî wanî imakuiꞌpî pe awanî kaiꞌma teesenumenkai pra yennayaꞌnîkon.
26 Anîꞌ yekaranmapoyaꞌnîkon pepîn maasa pra Paapa maimuya taasaꞌ man—Sîrîrî pata esaꞌ pe, moropai tamîꞌnawîrî sîrîrî pata po tîîkoꞌmansen esaꞌ pe Uyepotorîkon wanî
—taasaiꞌya man.
27 Aꞌkî, pemonkon, innape Jesus kuꞌnen pepînya ayetakon ya, tewîꞌ ta ipîkîrî attî ya entamoꞌkai, tamîꞌnawîrî intîrî aapia yonpakî, îꞌ waniꞌ pra. —Oꞌnon pata pai seeniꞌ eporî pîꞌ nan? —taa eꞌpai pra man. Yairî, yairî pra yanîyaꞌnîkon epuꞌtîkonpa, anîꞌ kîsekaranmapotî.
28 Tîîse mîrîrî tanne, tiaronya taa ya apîꞌ: —Seeniꞌ entamoꞌkantoꞌ wanî morî pe pra, maasa pra miaꞌ ke ikonekasaꞌ pia yaasaꞌ sîrîrî —taiya ya apîꞌ, mîrîrî yanîya eꞌpai pra man. Maasa pra mîrîrî yansaꞌ ya, imakuiꞌpî pe awanî kaiꞌma tiaron esenumenka. Moropai mîrîrî teesenumenkatoꞌ yawîrî pra ikupîiya emapuꞌtîya namai, mîrîrî kîsanîi.
29 Amîrî pia imakuiꞌpî pe awanî pepîn, tîîse mîîkîrî pia imakuiꞌpî pe awanî. Mîrîrî yeꞌnen mîîkîrî esenumenka wenai, mîrîrî yanîya pepîn. Maasa pra —Îꞌ waniꞌ awanî pepîn mîrîrî yanîuya ya —eesenumenka ya, îꞌ waniꞌ kin awanî yeꞌnen tiaronya unkupî ton ekaremekî eꞌpainon, teesenumenka yawîrî?
30 Morî pe man Paapa, taasauꞌya tanne uyekkari pîꞌ tîîse, îꞌ waniꞌ kin awanî yeꞌnen mîrîrî pîꞌ tiaronkon woꞌmaꞌta?
31 Mîrîrî pîꞌ tauya sîrîrî. Îꞌ amîrîꞌnîkon nenapî moropai aninnîrîkon, tamîꞌnawîrî îꞌ kupîyaꞌnîkon manniꞌ, mîrîrî kuꞌtî Paapa yapurîtoꞌpe tiaronkonya, ankupîkon eraꞌmasaꞌ tîuyaꞌnîkon ya.
32 Tiaronkon maꞌnîpanen pe pra akoꞌmantî, innape Jesus kuꞌtoꞌpe toꞌya, manniꞌkan Judeuyamîꞌya ikuꞌtoꞌpe, moropai Judeuyamîꞌ pepînya nîrî, moropai aꞌtuꞌmînankon innape Jesus kuꞌnenan koꞌmantoꞌpe inîꞌ panpîꞌ Paapa maimu yawîrî.
33 Mîrîrî kuꞌtî, uurîya ikupî manniꞌ warantî. Tîwakîrikon pe ukuꞌtoꞌpe tamîꞌnawîronkonya tamîꞌnawîrî îꞌ kupîuya. Mîrîrî kupîuya upîꞌrî esenumenka wenai pra, tîîse tamîꞌnawîronkon eꞌpîikaꞌtî yuꞌse wanî yeꞌnen.
