Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 11:1-34
11 Mîrîrî yeꞌnen uurîya ikupî manniꞌ warantî ikupîyaꞌnîkon yuꞌse wai, îꞌ kaiꞌma Cristo nîkupîꞌpî warantî ikupî pîꞌ uukoꞌmamî yawîrî.
Îꞌ Kaiꞌma Wîriꞌsanyamîꞌ Eꞌtoꞌ Soosi Ta Yekare
2 Apîꞌnîkon atausinpan pîꞌ wai kureꞌne, maasa pra uyeseru pîꞌ, unekaremekîꞌpî pîꞌ awenpenatakon yeꞌnen. Moropai îꞌ kaiꞌma esenupaꞌpî pîꞌ ayenupaꞌpîuyaꞌnîkon yawîrî ikupî pîꞌ aakoꞌmamîkon yeꞌnen, atausinpasaꞌ sîrîrî.
3 Tîîse moro man unekaremekî ton, anepuꞌtîkon ton. Tamîꞌnawîronkon warayoꞌkon puꞌpai pe Cristo wanî. Moropai warayoꞌkon wanî tînoꞌpîkon puꞌpai pe. Moropai Paapa wanî Cristo puꞌpai pe. Mîrîrî epuꞌtîyaꞌnîkon yuꞌse wai.
4 Mîrîrî yeꞌnen ankupîkon ton ekaremekîuya sîrîrî. Warayoꞌya teepîrema yeꞌka pe, moropai Paapa maimu ekaremekî tîuya yeꞌka pe, tîpuꞌpai yaꞌsantîsaꞌ ya, mîîkîrîya Cristo, tesaꞌ pe tîweꞌsen yeppeꞌnîpî mîrîrî.
5 Tîîse wîriꞌya tîpuꞌpai yaꞌsantîsaꞌ pra awanî ya, tînyo kenan yeseru pe, mîrîrî warantî siꞌma eepîrema ya, moropai Paapa maimu ekaremekîiya ya, tesaꞌ pe tîweꞌsen, tînyo yeppeꞌnîpîiya mîrîrî. Mîrîrî warantî awanî, manniꞌ wîriꞌya tîpuꞌpai yaꞌtîsaꞌ ya, tînyo yeppeꞌnîpî manniꞌ warantî. Maasa pra pemonkonyamîꞌ esenumenka ipîꞌ see warantî, eseporo rî tîweꞌsen pe mîîkîrî wanî kaiꞌma. Mîrîrî wenai tînyo yeppeꞌnîpîiya, tîpuꞌpai yaꞌsantîsaꞌ tîuya pra awanî ya.
6 Moriya tîpuꞌpai yaꞌtîiya eꞌpai awanî, yaꞌsantî tîuya pra awanî ya, tînyo kenan yeseru yawîrî. Tîîse tîpuꞌpai yaꞌtîsaꞌ pîꞌ tîweppepî epuꞌtî wîriꞌya ya, moriya tîpuꞌpai yaꞌsantîiya eꞌpai awanî.
7 Tîîse warayoꞌya tîpuꞌpai yaꞌsantî yuꞌse awanî pepîn. Maasa pra tîwarantî mîîkîrî warayoꞌ kupîꞌpî Paapaya, tiaronkonya tapurîtoꞌpe, tînkupîꞌpî warayoꞌ wenai. Tîîse wîriꞌ konekaꞌpî Paapaya, tiaronkonya inyo yapurîtoꞌpe, inoꞌpî wenai.
8 Moropai iwenai inyo yapurî toꞌya nîrî maasa pra warayoꞌ kuꞌsaꞌ Paapaya pra man wîriꞌ winîpai, tîîse wîriꞌ kupîꞌpî Paapaya warayoꞌ winîpai.
9 Moropai warayoꞌ konekasaꞌ Paapaya pra man tînoꞌpî pîikaꞌtînen pe, tîîse wîriꞌ konekaꞌpî Paapaya inyo pîikaꞌtînen pe.
10 Mîrîrî yeꞌnen tînyo maimu pe wîriꞌ eꞌpai awanî. Tîpuꞌpai yaꞌsantî wîriꞌya ya, tîpuꞌpai pe warayoꞌ wanî ekaremekîiya. Mîrîrî eraꞌma inserîyamîꞌya tîwakîrikon pe.
11 Mîîwîni tîîse Paapa pia, saꞌnîrî toꞌ wanî ipîkku pe. Warayoꞌ wanî wîriꞌ yuꞌse moropai wîriꞌ wanî warayoꞌ yuꞌse. Tiwinsarî toꞌ koꞌmamî pepîn, tîîse saꞌnîrî toꞌ koꞌmamî.
12 Maasa pra warayoꞌ winîpai wîriꞌ konekasaꞌ Paapaya. Moropai wîriꞌ winîpai warayoꞌ esenpo emapuꞌtîꞌpîiya. Mîrîrî yeꞌnen tamîꞌnawîrî mîrîrî wanî Paapa nîkupî pe.
13 Tarîpai esenumenkatî aawarîrîꞌnîkon îꞌ wanî yairî Paapa pîꞌ wîriꞌ epîrema ya, tînyo kenan yeseru pe pra, tîpuꞌpai taꞌsantîi pra?
14 Maasa pra warayoꞌ wanî ya kusan pe ipuꞌpai, wîriꞌ pe pra siꞌma mîîkîrî eppepî maasa pra iteseru pepîn mîîtoꞌpe.
15 Tîîse wîriꞌ kusan pe ipuꞌpai wanî ya morî pe awanî. —Emaꞌnon pe awanî —taa toꞌya. Maasa pra iteseru pe itîîsaꞌ pe awanî, mîrîrî ipuꞌpai yaꞌsan warantî kusan pe aweꞌtoꞌpe.
16 Tîîse akoreꞌtaꞌnîkon anîꞌ wanî ya, —Kaane, wîriꞌ yeseru wanî tiaron pe —taiya ya, îꞌ kaiꞌma see tauya eꞌpainon? Maasa pra —Tînyo kenan yeseru pe tîpuꞌpai yaꞌsantî wîriꞌya eꞌpai man —taa annaya tamîꞌnawîronkon innape Jesus kuꞌnenan pîꞌ. Tiaron pe anîꞌ panama annaya pepîn. Moropai tamîꞌnawîronkon tiaronkon innape Jesus kuꞌnenan koreꞌta, wîriꞌsanyamîꞌ koꞌmamî mîrîrî warantî.
Entamoꞌkantoꞌ Uyepotorîkon Saꞌmanta Pîꞌ Enpenatan Pe
17 11:17,18 Tarîpai amîrîꞌnîkon anpanamapai wanî sîrîrî ayeserukon wenai. Maasa pra mîrîrî ayekarekon etaꞌpîuya moropai innape ankuꞌpîtîkon kupîꞌpîuya. Tîîse mîrîrî pîꞌ ayapurîuyaꞌnîkon pra wai, maasa pra soosi ta eeperepîtîkon kaisarî eesiyuꞌpîtîkon pîꞌ awanîkon. Mîrîrî wenai anîꞌ pîikaꞌtîyaꞌnîkon pepîn. Tîîse tiaronkon yakaꞌmayaꞌnîkon. Paapa yeseru yawîrî toꞌ koꞌmamî pepîn amîrîꞌnîkon nîkupî wenai.
18 Eraꞌmakî 11:17
19 Aꞌkî, yai pra amîrîꞌnîkon koreꞌta moro toꞌ wanî eꞌmenkaꞌsan, aweꞌpantakasaꞌkon. Moropai mîrîrî wenai tamîꞌnawîronkonya epuꞌtî, anîꞌkan wanî yairî tîweꞌsanon pe, Cristo yeseru yawîrî tîweꞌsanon pe.
20 Îꞌ pensa eeperepîkon yai entamoꞌkai, mîrîrî eeperepîtoꞌkon wanî pepîn Uyepotorîkon saꞌmantatoꞌ pîꞌ awenpenatatoꞌkon pe.
21 Maasa pra awentamoꞌkakon yai, tiwin pîꞌ siꞌma awentamoꞌkatoꞌkon yanîyaꞌnîkon taasareꞌtîi, emiꞌne tiaronkon tîîse. Moropai amîrîꞌnîkonya enîrî awukukon kureꞌne eetîmîkon pîkîrî, tiaronkon pia îꞌ tîrîyaꞌnîkon pra.
22 Mîrîrî warantî ikupîkonpa ayewîꞌkon ton pra kin nai? Ayewîꞌkon ta siꞌma awentamoꞌkakon awukukon enîrîyaꞌnîkon eꞌpainon ituꞌse awanîkon pîkîrî. Tîîse ayonpayamîꞌya eraꞌma tanne, mîrîrî warantî ikupîyaꞌnîkon ya, Paapa pemonkonoyamîꞌ innape Jesus kuꞌnenan yewanmîrîyaꞌnîkon esepuꞌtî mîrîrî. Moropai manniꞌkan saꞌne îꞌ ton pra tîweꞌsanon inkamoro yeppeꞌnîpîyaꞌnîkon mîrîrî. Mîrîrî kupîyaꞌnîkon wenai îꞌ kaiꞌma tauya eꞌpainon apîꞌnîkon? Ayapurîuyaꞌnîkon kaꞌrî mîrîrî pîꞌ? Kaane mîrîrî pîꞌ ayapurîuyaꞌnîkon pra wai.
23 Maasa pra sîrîrî Uyepotorîya uyenupatoꞌ uupia intîrîꞌpî mîrîrî ekaremekîꞌpîuya apîꞌnîkon. Uyepotorîkon Jesus yapisî toꞌya yai, mîîkîrîya trigo puusaꞌ yapisîꞌpî moropai eepîremaꞌpî Paapa pîꞌ. —Morî pe anna yuu ton tîrî pîꞌ nai —taꞌpîiya.
24 Mîrîrî taasaꞌ tîuya tîpo, mîrîrî trigo puusaꞌ pîrikkaꞌpîiya moropai taꞌpîiya: —Sîrîrî wanî sîrîrî uyesaꞌ warantî, maasa pra sîrîrî uyesaꞌ tîrîuya sîrîrî, uusaꞌmanta amîrîꞌnîkon ton pe. Mîrîrî yeꞌnen sîrîrî yaꞌtî uusaꞌmanta pîꞌ awenpenatakon pe.
25 Mîrîrî warantî nîrî tîwentamoꞌkakon tîpo, pisa yapisîꞌpîiya moropai taꞌpîiya: —Sîrîrî uva yekku wanî umînî warantî. Maasa pra uusaꞌmantatoꞌ wanî amenan pe îꞌ kaiꞌma Paapa yarakkîrî pemonkonyamîꞌ esetatoꞌ pe. Moropai îꞌ kaiꞌma tîpemonkono pe Paapaya pemonkonyamîꞌ kupî sîrîrî umînî wenai —taꞌpîiya. —Sîrîrî enîꞌkî, moropai enîrî pîꞌ akoꞌmantî, amîrîꞌnîkon ton pe ikuꞌsauꞌya pîꞌ awenpenatakonpa.
26 Mîrîrî yeꞌnen sîrîrî yakuyaꞌnîkon kaisarî moropai uva yekku enîrîyaꞌnîkon kaisarî Jesus iipî pîkîrî, aasaꞌmantaꞌpî pîꞌ awenpenatakon ekaremekîiya mîrîrî.
27 Mîrîrî yeꞌnen seꞌ tapairî anîꞌya trigo puusaꞌ yaku ya, moropai imînî pe uva yekku enîrîiya ya, yairî pra awanî. Imakuiꞌpî kupîiya, tîmîrî ton pe Uyepotorîkon saꞌmantatoꞌ yapurîiya pepîn.
28 Mîrîrî namai Uyepotorîkon winîpainon trigo puusaꞌ yaku rawîrî, moropai uva yekku enîrî rawîrî, tiwin pîꞌ siꞌma îꞌ uurîꞌnîkon nîkupîꞌpî yakoꞌmenka eꞌpai awanî. Moropai mîrîrî ekoneka eꞌpai awanî, morî pe eꞌnîtoꞌpe Paapa yarakkîrî. Mîrîrî tîpo yaku moropai enîrî.
29 Maasa pra uurîꞌnîkon ton pe Jesus saꞌmantaꞌpî pîꞌ teesenumenkai pra, anîꞌya trigo puusaꞌ yaku ya, yakuiya seꞌ tapairî. Moropai mîrîrî uva yekku enîrîiya seꞌ tapairî. Moropai mîrîrî wenai mîîkîrî tarumaꞌtî Paapaya.
30 Mîrîrî warantî enîꞌsaꞌyaꞌnîkon yeꞌnen, amîrîꞌnîkon koreꞌta tuꞌke priꞌya pra awanîkon moropai aꞌtuꞌmîra awanîkon. Moropai tiaronkon saꞌmantaꞌpî mîrîrî wenai.
31 Mîrîrî namai uurîꞌnîkon eseraꞌma eꞌpai awanî, uyeserukon yakoꞌmenka eꞌpai awanî, îꞌ ton pra esepuꞌnîtoꞌpe esenumenkantoꞌ yaꞌ. Mîrîrî warantî eꞌnî ya, Paapaya uurîꞌnîkon tarumaꞌtî pepîn.
32 Tîîse mîrîrî warantî imakuiꞌpî pe eꞌnî yeꞌnen, Uyepotorîkonya uurîꞌnîkon tarumaꞌtî mîrîrî uyeserukon rumakatoꞌpe, imakuiꞌpî kuꞌnenan pokonpe uurîꞌnîkon yenumî tîuya namai apoꞌ yaꞌ.
33 Mîrîrî yeꞌnen uyonpayamîꞌ, îꞌ pensa eeperepîkon ya, Uyepotorîkon saꞌmantatoꞌ pîꞌ tîwenpenatai awentamoꞌkatoꞌkon pîꞌ, tiaronkon nîmîꞌtî toꞌ pokonpe awentamoꞌkakonpa.
34 Tîîse anîꞌ wanî ya emiꞌne akoreꞌtaꞌnîkon, mîîkîrî entamoꞌka eꞌpai awanî tewîꞌ ta, eeperepîkon rawîrî, Paapaya atarumatîkon namai. Mîrîrî pîꞌ neken tauya sîrîrî. Tiaron moro man eseurîmatoꞌ, tîîse akoreꞌtaꞌnîkon erepansaꞌ yai, mîrîrî pîꞌ ayeurîmauyaꞌnîkon.
