Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 12:1-31
12 Uyonpayamîꞌ, eseurîma sîrîrî îꞌ kaiꞌma Morî Yekaton Wannî nîtîrî pîꞌ esenyakaꞌmantoꞌpe Paapa tonpe. Mîrîrî epuꞌtîyaꞌnîkon yuꞌse wai.
2 Maasa pra pena Paapa epuꞌtîyaꞌnîkon pra awanîkon yai, miaꞌ ke ikonekasaꞌ eseurîmakoi pepîn yapurîꞌpîyaꞌnîkon teesenkuꞌtîi.
3 Mîrîrî yeꞌnen epuꞌtîyaꞌnîkon yuꞌse wai, îꞌ wanî Paapa eseurîma Morî Yekaton Wannî wenai. Moropai mîrîrî wanî pra awanî ya, îꞌ wanî tiaron eseurîma. Sîrîrî warantî epuꞌtîyaꞌnîkon: Morî Yekaton Wannî maimu pe anîꞌ eseurîma ya, eeseurîma pepîn: —Jesus tarumaꞌtîtî —taiya pepîn, maasa pra Morî Yekaton Wannî wanî yeꞌnen iipia. Moropai Morî Yekaton Wannî ton pînya —Uyepotorî pe Jesus wanî —taa pepîn, maasa pra iipia Morî Yekaton Wannî ton pra awanî yeꞌnen.
4 Morî Yekaton Wannî nîtîrî yeseru wanî tuꞌke. Tîîse tamîꞌnawîrî mîrîrî tîrîtîpon wanî tiwin.
5 Mîrîrî intîrîꞌpî esenyakaꞌmantoꞌ yeseru wanî mîrîrî tuꞌke, tîîse mîîkîrî uyepotorîkon wanî tiwin.
6 Tiwin pîꞌ eꞌnî tanne, esenyakaꞌman epuꞌnen pe Morî Yekaton Wannî nîtîrî ke. Tîîse tiwinan Paapaya uurîꞌnîkon yenyakaꞌma tiwin pîꞌ eꞌnî tanne esenyakaꞌmantoꞌ kuꞌtoꞌpe.
7 Mîrîrî yeꞌnen eesepuꞌtî, anîꞌ pia Morî Yekaton Wannî wanî iteseru wenai. Maasa pra îꞌ rî kupîiya, ikupîiya tamîꞌnawîronkon pîikaꞌtîtoꞌpe. Mîrîrî ton pe Paapaya itîrîꞌpî tiwin pîꞌ uurîꞌnîkon kaisarî.
8 See warantî ikupîiya: Tiwinan pia epuꞌnen pe aweꞌtoꞌ ton tîrîiya, tiaronkon yeurîmatoꞌpeiya Paapa yeseru pîꞌ. Moropai tiaron pia itîrîiya pakko pepîn eeseurîmatoꞌpe, Paapa maimu pîꞌ pemonkonyamîꞌya epuꞌtoꞌpe îꞌ kaiꞌma tîpîikaꞌtîkon Paapaya.
9 Mîîkîrî Morî Yekaton Wannîya itîrî tiaron pia innape tîkuꞌtoiꞌya ton, eepîrematoꞌpe. Moropai tînesatî yapisî tîuya epuꞌtîiya. Moropai tiaron pia meruntî tîrîiya priꞌyawonkon pepîn yepiꞌtîtoꞌpeiya.
10 Moropai tiaron pia meruntî tîrîiya ikupî eserîkan pepîn kuꞌtoꞌpeiya. Moropai tiaron pia itîrîiya itekare Paapa winîpainon ekaremeꞌtoꞌpeiya tiaronkon pîꞌ. Moropai tiaron pia epuꞌnen tîrîiya mîrîrî itekare tîwinîpaino pe awanî epuꞌtoꞌpeiya, moropai tiaron winîpaino pe awanî epuꞌtoꞌpeiya nîrî, Morî Yekaton Wannî winîpaino pe pra. Moropai tiaron pia itîrîiya tiaronkon maikon kuꞌtoꞌpeiya toꞌ maimu tepuꞌse pra. Moropai tiaron pia itîrîiya, mîrîrî yeꞌka tiaronkon maikon ekaremeꞌtoꞌpeiya, îꞌ taasaꞌ mîrîrî maiya ekaremeꞌtoꞌpeiya.
11 Tamîꞌnawîrî mîrîrîkon wanî mîîkîrî Morî Yekaton Wannî nîkupî pe. Mîîkîrîya itîrî siꞌta tiwin pîꞌ eꞌnî tanne, ituꞌse tîwanî pîkîrî.
Tiwin Uyesaꞌkon Tîîse Tuꞌke Iwaikkatoi Wanî
12 Mîrîrî warantî ikupîiya, maasa pra Cristo yarakkîrî uurîꞌnîkon eꞌtoꞌ wanî pemonkon esaꞌ warantî. Tiwin pemonkon esaꞌ tîîse tuꞌke itemanne wanî iꞌpukon, moropai itenyakon, itenukon mîrîrîkon wanî tuꞌke. Mîrîrî tîîse tuꞌke tiwinan pemonkon pe awanî. Mîrîrî warantî uurîꞌnîkon wanî, Cristo esaꞌ pe.
13 Tamîꞌnawîronkon uurîꞌnîkon Judeuyamîꞌ, moropai Judeuyamîꞌ pepîn moropai itesaꞌ pînon moropai tesaꞌ kenankon wanî tiwin. Maasa pra uurîꞌnîkon yenpatakona tîuya yai Morî Yekaton Wannîya uurîꞌnîkon kupîꞌpî tiwin, uyesaꞌkon pe aweꞌtoꞌpe. Mîîkîrî Morî Yekaton Wannî tîrîꞌpî Paapaya tiwin pîꞌ eꞌnî tanne uurîꞌnîkon pia aakoꞌmantoꞌpe uyarakkîrîꞌnîkon.
14 Aꞌkî, pemonkon esaꞌ wanî pepîn iwaikkatoi pe ikuꞌsaꞌ pe. Tîîse awanî tamîꞌnawîrî itemanne wanî yarakkîrî.
15 Mîrîrî warantî tîîse iꞌpuya taa ya: —Îꞌ waniꞌ awanî yeꞌnen itenya pe pra uurî wanîꞌpî? Ipîꞌ eꞌpai pra wai —taiya eserîke pra awanî. Maasa pra iwaikkatoi pe tîwanî yeꞌnen, ipoi eemoꞌka eserîke pra awanî.
16 Moropai ipanaya taa ya: —Îꞌ waniꞌ awanî yeꞌnen itenu pe pra uurî wanîꞌpî? Mîrîrî yeꞌnen emoꞌka sîrîrî ipoi —taiya eserîke pra awanî, iwaikkatoi pe tîwanî yeꞌnen.
17 Tîîse tamîꞌnawîrî itenu pe awanî ya, oꞌnon yeꞌka pe îꞌ rî eta uurîꞌnîkonya eꞌpainon? Moropai tamîꞌnawîrî ipana pe awanî ya, îꞌ kaiꞌma îꞌ puꞌnîku eꞌpainon? Îꞌ puꞌnîku pepîn.
18 Tîîse Paapaya tiwin pîꞌ eꞌnî tanne ipataꞌseꞌkon yaꞌ itîrîꞌpî uyesaꞌkon pîꞌ ituꞌse tîwanî yawîrî.
19 Tîîse tamîꞌnawîrî tiwin eꞌpai itemanne wanî ya, itesaꞌ ton pra awanî eꞌpainon.
20 Tîîse tiwin pra, tuꞌke itemanne awanî tîîse, tiwin itesaꞌ awanî.
21 Mîrîrî yeꞌnen itenuya taa eserîke pra awanî itenya pîꞌ: —Ayuꞌse pra wai —taiya eserîke pra awanî. Moropai ipuꞌpaiya taa eserîke pra awanî iꞌpu pîꞌ: —Ayuꞌse pra wai —taiya eserîke pra awanî.
22 Maasa pra mîrîrî aꞌtuꞌmîra panpîꞌ tîweꞌsen temanne yuꞌse uyesaꞌkon wanî.
23 Moropai mîrîrî îꞌ pe pra rî awanî kaiꞌma esenumenkantoꞌ teuren tîîse mîrîrî wakîma eꞌpai awanî. Moropai mîrîrî napontî morî pe eꞌnîtoꞌpe. Moropai iwaikkatoikon imakuiꞌpî pe panpîꞌ tîweꞌsen mîrîrî yenomî eꞌpai awanî, tiaronkonya eraꞌma namai.
24 Tîîse tiaronkon morîkon panpîꞌ kupî pepîn mîrîrî warantî. Mîrîrî warantî Paapaya tuꞌke siꞌta ikupîꞌpî uyemannekon ton. Mîrîrî yeꞌnen morî pe tîweꞌsen yenomî pepîn, tîîse imakuiꞌpî panpîꞌ tîweꞌsen mîrîrî yenomî eꞌpai awanî.
25 Mîrîrî warantî ikupîiya, mîrîrî uyesaꞌkon yemanne esenyakaꞌmantoꞌpe tîmurukun pe, îꞌ iwaikkatoi eꞌtarumaꞌtî namai, tîîse morî pe, eꞌtoꞌ yawîrî koꞌmannîtoꞌpe.
26 Mîrîrî yeꞌnen tiwin iwaikkatoiya tîmoron epuꞌtî ya, tamîꞌnawîrî uyesaꞌkonya epuꞌtî ikaisarî. Mîîwîni pra awanî ya, morî pe tiaron iwaikkatoi yapurî anîꞌya ya, tamîꞌnawîrî uyesaꞌkon yapurîiya nîrî.
27 Mîrîrî warantî tiwin pîꞌ eꞌnî tanne, uurîꞌnîkon wanî sîrîrî Cristo esaꞌ pe. Iwaikkatoi pe eꞌnî sîrîrî.
28 Mîrîrî yeꞌnen Paapaya tîpemonkonoyamîꞌ tîrîꞌpî toꞌ pataꞌseꞌkon yaꞌ tonpayamîꞌ koreꞌta toꞌ esenyakaꞌmatoꞌpe. Eꞌmaiꞌ pe tînaipontîkon ton tîrîꞌpîiya toꞌ pataꞌseꞌ yaꞌ. Moropai toꞌ yeꞌmaꞌpî pîꞌ tîmaimu ekaremeꞌnenan tîrîꞌpîiya. Moropai inkamoro yeꞌmaꞌpî pîꞌ pemonkonyamîꞌ yenupanenan. Moropai mîrîrî tîpo tîkuꞌsen pepîn kuꞌnenan. Moropai mîrîrî tîpo priꞌyawonkon pepîn yepiꞌtînenan. Moropai tiaronkon pîikaꞌtînenankon. Moropai tiaronkon yeꞌmaiꞌnorî tonkon. Moropai tiaronkon maikon kuꞌnenan tonkon, ipîꞌ teesenupai pra. Tamîꞌnawîrî inkamoro tîrîꞌpîiya tîpemonkonoyamîꞌ koreꞌta soosi ta toꞌ esenyakaꞌmatoꞌpe.
29 Tîîse inkamoro wanî pepîn tamîꞌnawîrî taipontîsanon pe. Moropai Paapa maimu ekaremeꞌnenan pe tamîꞌnawîronkon wanî pepîn. Moropai pemonkonyamîꞌ yenupanenan pe tamîꞌnawîronkon wanî pepîn. Moropai tamîꞌnawîronkonya tîkuꞌsen pepîn kupî pepîn.
30 Moropai tamîꞌnawîronkonya priꞌya pra tîweꞌsanon yepiꞌtî pepîn. Moropai tamîꞌnawîronkonya tiaron maikon kupî pepîn teesenupai pra ipîꞌ. Moropai tamîꞌnawîronkonya îꞌ taasaꞌ mîrîrî tiaronkon maikonya ekaremekî pepîn.
31 Tîîse morî panpîꞌ Morî Yekaton Wannî nîtîrî yuꞌse eꞌtî, mîrîrî yapisîkonpa.
Tarîpai mîrîrî warantî aakoꞌmamîkon tanne, ipîkku panpîꞌ ankupîkon ton ekaremekîuya sîrîrî.
