Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 13:1-13
13 Tamîꞌnawîronkon pemonkonyamîꞌ maimu kupîuya ya morî pe, moropai inserîyamîꞌ maimu nîrî kupîuya ya, tîîse eꞌsaꞌnamatoꞌ ton pra awanî ya, îꞌ pe pra rî awanî eꞌpainon. Îꞌ rî tauya ya, tauya seꞌ tapairî, turun turun taawon warantî, maasa pra tiaron yeurîmauya umaimu ke neken, mîîkîrî tîsaꞌnamai pra.
2 Moropai uurîya morî pe Paapa maimu ekaremekî ya, tamîꞌnawîronkon pemonkonyamîꞌ pîꞌ epuꞌnen pe wanî yeꞌnen, moropai tamîꞌnawîron epuꞌtîuya ya, anîꞌ nepuꞌtî pepîn, tîîse Paapa nepuꞌtî epuꞌtîuya ya, moropai kureꞌne innape ikupîuya wenai wîꞌ moꞌtanîpîuya ya, ipataꞌseꞌ yapai tiaron pata pona, tîîse eꞌsaꞌnamatoꞌ ton pra awanî ya tiaronkon yarakkîrî îꞌ pe pra rî uurî wanî.
3 Moropai tamîꞌnawîrî uyemanne pe tîweꞌsen tîrîuya ya, tîweꞌtarumaꞌtîsanon pia toꞌ pîikaꞌtîtoꞌpeuya, moropai Paapa esenyakaꞌmatoꞌ wenai uusaꞌmantatoꞌpe eturumaka ya, upoꞌtîtoꞌpe toꞌya, tîîse eꞌsaꞌnamatoꞌ ton pra siꞌma mîrîrî kupîuya ya, îꞌ pe pra rî awanî. Îꞌ eporîuya pepîn mîrîrî wenai.
4 Maasa pra eꞌsaꞌnamantoꞌ wanî teekoreꞌmasen pe pra, morî pe awanî. Moropai eꞌsaꞌnamantoꞌ wanî ikinmuwanî emapuꞌtînen pe pra. Moropai mîî pe eꞌnî emapuꞌtînen pepîn, tiaronkon yentai atapurîn emapuꞌtînen pepîn.
5 Eꞌsaꞌnamantoꞌ yarakkîrî eꞌnî ya, tiaronkon tînamai pra eseurîman pepîn. Moropai uuwarîrîꞌnîkon neken esenumenkan pepîn tîîse tiaronkon pîꞌ nîrî enpenatan. Atatasiꞌsirunpai pra eꞌnî pepîn, tiaronkon kupî pepîn uyewanmakon pe, uwinîkîꞌnîkon toꞌ nîkupîꞌpî wenai, tîîse toꞌ saꞌnama.
6 Eꞌsaꞌnamantoꞌ yarakkîrî tîweꞌsen pemonkon atausinpa pepîn imakuiꞌpî pîꞌ. Tîîse aatausinpa yairon pîꞌ.
7 Pemonkon tonpa saꞌnamanen koꞌmamî pepîn teesewankonoꞌmai tonpa pîꞌ. Tîîse innape ikupî pîꞌ aakoꞌmamî. Tîwîrî mîîkîrîya morî kupî nîmîkî pîꞌ aakoꞌmamî teesetaꞌkai pra. Tamîꞌnawîrî yapîtanîpîiya.
8 Sîrîrî eꞌsaꞌnamantoꞌ wanî ipatîkarî tîîkoꞌmansen pe taataretîꞌkasen pe pra. Tîîse mîrîrî warantî pra Morî Yekaton Wannî nîtîrî wanî. Maasa pra Paapa maimu ekaremeꞌnenanya ekaremekî yaretîꞌka. Tamîꞌnawîrî îꞌ eꞌkupî toꞌ nekaremekîꞌpî eꞌkuꞌsaꞌ wanî. Moropai tiaronkon maikon kuꞌnenan nîkupî ataretîꞌka. Inîꞌrî toꞌ eseurîma pepîn tiaronkon mai pe. Moropai Morî Yekaton Wannî epuꞌnen ke tiaronkon panama anîꞌya ya, maasa mîrîrî toꞌ esenyakaꞌmatoꞌ ataretîꞌka. Inîꞌrî tiaronkon yenupa toꞌya pepîn.
9 Maasa pra see warantî awanî sîrîrî. Sîrîrî tîpose Paapa winîpainon epuꞌnen wanî tamîꞌnawîrî pra, mîî pîkîrî neken epuꞌtî. Mîrîrî yeꞌnen Paapa yeseru pîꞌ pemonkonyamîꞌ yenupa mararî, eꞌtoꞌ yawîrî pra.
10 Tîîse îꞌ pensa Cristo erepamî yai sîrîrî non pona, awanî kupî sîrîrî eꞌtoꞌ yawîrî, mîî pîkîrî pra tîîkoꞌmansen pe. Mîrîrî yai mîî pîkîrî tîweꞌsen pîꞌ eseurîman pepîn, inîꞌrî yapurî pepîn.
11 Aꞌkî, see warantî awanî: Pena more pe wanî yai, eseurîmatoꞌ eꞌpîtîꞌpî more eseurîmatoꞌ warantî. Moropai esenumenkatoꞌ eꞌpîtîꞌpî more esenumenkatoꞌ warantî. Tarîpai sîrîrîpe uutoꞌpansaꞌ yeꞌnen, inîꞌrî more esenumenka warantî esenumenka pra wai. Maasa pra inîꞌ panpîꞌ epuꞌtîuya yeꞌnen.
12 Tîîse sîrîrî tîpose tamîꞌnawîrî epuꞌtî pepîn, îꞌ kaiꞌma Paapa yeseru wanî. Ipoiꞌpî wanamari yaꞌ eseraꞌman warantî awanî, maasa pra mararî, iwaikkatoi pe eseraꞌman. Sîrîrîpe mararî epuꞌtîuya, tîîse mîrîrî yai eꞌtoꞌ yawîrî epuꞌtîuya, tamîꞌnawîrî uyepuꞌtî Paapaya warantî.
13 Tîîse sîrîrî tîpose Morî Yekaton Wannî nîtîrîꞌpî, unkupîkon ton pe koꞌmamî sîrîrî. Innape ikupî pîꞌ koꞌmannî eꞌpai awanî. Moropai iwinîpai tamîꞌnawîrî morî intîrî yapisî nîmîkî pîꞌ koꞌmannî eꞌpai awanî. Moropai tiaronkon saꞌnama pîꞌ koꞌmannî eꞌpai awanî. Moropai mîrîrî koreꞌta eꞌsaꞌnamantoꞌ wanî ipîkku pe, tiaronkon yentai.
