Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 14:1-40
14 Mîrîrî yeꞌnen uyonpayamîꞌ, kureꞌne aweꞌsaꞌnamakon eꞌpai awanî. Moropai mîrîrî Morî Yekaton Wannî nîtîrîkon yuwayaꞌnîkon eꞌpai awanî. Tîîse mîrîrî koreꞌta pemonkonyamîꞌ pîꞌ Paapa maimu ekaremekî yuwayaꞌnîkon eꞌpai awanî. Mîrîrî yuꞌse awanîkon eꞌpai awanî inîꞌ panpîꞌ, tiaron yuwayaꞌnîkon yentai.
2 Maasa pra anîꞌ eseurîma ya tîkuꞌsen pepîn mai ta, mîîkîrî eseurîma mîrîrî Paapa pîꞌ neken, pemonkonyamîꞌ pîꞌ pra. Tîîse eeseurîma tekaton ke neken, yairon anîꞌ nepuꞌtî pepîn pîꞌ. Mîrîrî yeꞌnen anîꞌya eeseurîmatoꞌ epuꞌtî pepîn.
3 Tîîse anîꞌya Paapa maimu ekaremekî ya, ekaremekîiya pemonkonyamîꞌ ton pe, toꞌ pîikaꞌtîtoꞌ ton pe, toꞌ meruntîtannîꞌtoꞌpe moropai meruntî ke toꞌ eꞌtoꞌpe.
4 Tîîse anîꞌ teeseurîmasen wanî ya tîkuꞌsen pepîn mai ta, mîîkîrî eꞌpîikaꞌtî tîîwarîrî. Tîîse anîꞌya Paapa maimu ekaremekî ya, mîîkîrîya tamîꞌnawîronkon innape Jesus kuꞌnenan pîikaꞌtî.
5 Tamîꞌnawîronkon amîrîꞌnîkonya tîkuꞌsen pepîn mai kupî yuꞌse wai seruꞌ pepîn. Tîîse mîrîrî yentai Paapa maimu ekaremekîyaꞌnîkon yuꞌse wai. Maasa pra anîꞌya Paapa maimu ekaremekî ya, mîîkîrî wanî mîrîrî manniꞌ mai tîkuꞌsen pepîn kuꞌnen yentai, tamîꞌnawîronkonya imaimu eta warantî pra. Tîîse anîꞌya mîrîrî imaimu ekaremeꞌsaꞌ ya tiaronkonya epuꞌtoꞌpe, mîrîrî warantî nîrî tamîꞌnawîronkon innape Jesus kuꞌnenan pîikaꞌtîiya eꞌpainon.
6 Mîrîrî yeꞌnen uyonpayamîꞌ, îꞌ pensa akoreꞌtaꞌnîkon erepansaꞌ eseurîma ya tîkuꞌsen pepîn mai ta epuꞌtîyaꞌnîkon eꞌpainon? Kaane, epuꞌtîyaꞌnîkon pepîn. Tîîse epuꞌtîyaꞌnîkon eꞌpainon Paapaya itîîsaꞌ ya eseurîmatoꞌpe amîrîꞌnîkon pîꞌ epuꞌnen tîîsaꞌ Paapaya ya, tîmaimu îꞌ eꞌkupî ekaremeꞌtoꞌpeuya. Amîrîꞌnîkon yenupatoꞌpeuya itîîsaiꞌya ya, mîrîrî epuꞌtîyaꞌnîkon eꞌpainon.
7 Mîrîrî warantî nîrî toꞌ waiyi teꞌnunpasen flauta wanî, moropai harpa. Yeꞌnunpanenya yeꞌnunpa îꞌ kupî tîuyaꞌnîkon epuꞌtoꞌpe etanenanya. Tîîse aronne yeꞌnunpaiya pra awanî ya, oꞌnon yeꞌka pe mîrîrî epuꞌtî toꞌya eꞌpainon? Epuꞌtî toꞌya pepîn.
8 Aꞌkî, suraraya tîsinarî yeꞌnunpa ya, tonpayamîꞌ ekonekatoꞌpe yeꞌnunpaiya. Tîîse morî pe aronne yeꞌnunpaiya pra awanî ya, itonpayamîꞌ ekoneka pepîn eꞌpainon epîi tuutîkonpa.
9 Mîrîrî warantî nîrî amîrîꞌnîkon eseurîmatoꞌ wanî. Tiaronkonya îꞌ taatoꞌyaꞌnîkon pe awanî epuꞌtî pepîn, maasa pra tiaron mai ta eeseurîmakon yeꞌnen. Mîrîrî amaimu eta toꞌya pepîn tiwin kin. Mîrîrî yeꞌnen eeseurîmatoꞌkon wanî îꞌ pe pra rî anîꞌya epuꞌtî pepîn.
10 Inna seruꞌ pepîn, tuꞌke mai man sîrîrî non po seꞌ kaisaron pepîn. Tîîse tiwin pîꞌ siꞌma ikuꞌnenanya tîmaimukon epuꞌtî.
11 Tîîse uurîya tiaron maimu eta ya, îꞌ taatoꞌpe epuꞌtîuya pepîn, umaimu pe pra awanî yeꞌnen. Moropai mîrîrî warantî nîrî mai kuꞌnenya umaimu epuꞌtî pepîn. Mîrîrî yeꞌnen kaꞌran pe awanî upîꞌ, tiaron pe awanî umaimu etaiya pra awanî yeꞌnen.
12 Moriya mîrîrî Morî Yekaton Wannî nîtîrî yuꞌse awanîkon ya, yuwatî, tamîꞌnawîronkon innape Jesus kuꞌnenan pîikaꞌtîtoꞌkon ton.
13 Mîrîrî yuꞌse awanîkon yeꞌnen, anîꞌ wanî ya teeseurîmasen tîkuꞌsen pepîn mai ta, mîîkîrîya esatî eꞌpai awanî Paapa pîꞌ, mîrîrî mai tînkupî ekaremeꞌtoiꞌya ton tîîtoꞌpeiya, pemonkonyamîꞌya epuꞌtoꞌpe.
14 Aꞌkî, uurî epîrema ya tiaron mai ta, uyekaton ke epîrema, tîîse mîrîrî mai pîꞌ esenumenka pra, îꞌ taatoꞌpe awanî.
15 Mîrîrî yeꞌnen îꞌ kupîuya eꞌpai man? Saꞌnîrî ikupîuya, epîrema eꞌpai man tîkuꞌsen pepîn mai ta uyekaton ke, moropai umaimu ta nîrî epîrema epuꞌtîiꞌma esenumenkatoꞌ yaꞌ. Mîrîrî warantî eserenka tîkuꞌsen pepîn mai ta uyekaton ke, moropai umaimu ta nîrî eserenka epuꞌtîiꞌma.
16 Maasa pra tîkuꞌsen pepîn mai ta eepîremakon ya ayekatonkon ke, oꞌnon yeꞌka pe tiaron pemonkonya eepîrematoꞌkon epuꞌtî, amaimukon epuꞌtî tîuya warantî pra? Mîrîrî yeꞌnen —Mîrîrî warantî morî amîrî, Paapa —taiya pepîn, eepîrematoꞌkon eta tîuya yai, îꞌ taayaꞌnîkon pe epuꞌtî tîuya pra tîwanî yeꞌnen.
17 Teuren eepîremakon tanne morî pe tîîse, amaimukon etanen eꞌpîikaꞌtî eserîke pra awanî, maasa pra amaimukon epuꞌtî tîuya warantî pra.
18 —Morî pe man, Paapa —tauya Paapa pîꞌ. Maasa pra tîîkuꞌsen pepîn mai ta epîrema yeꞌnen, amîrîꞌnîkon yentai mai kuꞌnen uurî.
19 Tîîse soosi ta innape Jesus kuꞌnenan epereꞌsaꞌ yai, mararî, miaꞌtaikinan mai ke neken toꞌ anenupapai wai toꞌ maimu ta, tuꞌkan 10.000 kaisarî mai ke, tiaron mai tîpuꞌsen pepîn ta toꞌ yenupauya yentai. Maasa pra îꞌ taatoꞌpe umaimu wanî epuꞌtî toꞌya yuꞌse wanî yeꞌnen.
20 Uyonpayamîꞌ, mîrîrî Morî Yekaton Wannî nîtîrîkon pîꞌ moreyamîꞌ warantî teesenumenkai pra eꞌtî. Tîîse eesenumenkakon yuꞌse wai aꞌyekeꞌton pe tîweꞌsen pemonkon esenumenka warantî tepuꞌse. Tîîse imakuiꞌpî ankupîkon pîꞌ more pe awanîkon yuꞌse wai mîrîrî tepuꞌse pra. Tuꞌke mai, tepuꞌsen pepîn ke eeseurîmakon yeꞌnen, kureꞌne Paapa wakîri pe awanîkon kaiꞌma teesenumenkai pra eꞌtî.
21 Maasa pra Paapa maimu eꞌmenukasaꞌ man, taasaiꞌya man see warantî:—Insamoro upemonkonoyamîꞌ pîꞌ eseurîma taasaꞌ Paapaya man.Eseurîma pe wai pemonkonyamîꞌ kaꞌran pe tîweꞌsanon winîpaitîmaimukon kuꞌnenan winîpai.Tîîse mîrîrî warantî eseurîma tanne,upemonkonoyamîꞌ koꞌmamî umaimu tîpîinamai pra
—taasaiꞌya man, tîmaimu yawîronkon pepîn pîꞌ.
22 Mîrîrî yeꞌnen epuꞌtîꞌnîkon, tîkuꞌsen pepîn mai kuꞌtoꞌ tîrî Morî Yekaton Wannîya manniꞌkan Paapa maimu yawîronkon pepîn netaton pe, moropai tîkupîꞌpîkon pîꞌ toꞌ esenumenkatoꞌpe. Mîrîrî wanî pepîn imaimu yawîronkon ton pe. Tîîse Paapa maimu ekaremeꞌtoꞌpe toꞌya Morî Yekaton Wannîya itîrîꞌpî, innape Cristo kuꞌnenan pia, iwakîri pe tîwanîkon epuꞌtoꞌpe toꞌya. Tîîse innape Paapa kuꞌnenan pepîn pia itîîsaiꞌya pra man.
23 Esenumenkatî maasa. Tamîꞌnawîronkon innape Jesus kuꞌnenan eseurîma ya tîkuꞌsen pepîn mai ta, moropai pemonkonyamîꞌ erepamî akoreꞌtaꞌnîkon, Paapa epuꞌnenan pepîn. Mîîwîni pra awanî ya tiaron erepamî Morî Yekaton Wannî nîtîrîꞌpî pîꞌ esenupaꞌpî pepîn. Mîrîrî mai tîkuꞌsen pepîn ta eeseurîmakon eta tîuyaꞌnîkon ya, inkamoroya taa eserîke wanî apîꞌnîkon: —Ayawîꞌpankon inkamoro —taa eserîke awanî apîꞌnîkon, amaimukon epuꞌtî toꞌya pra awanî yeꞌnen.
24 Tîîse tamîꞌnawîrî amîrîꞌnîkonya Paapa maimu ekaremekî ya aronne, moropai akoreꞌtaꞌnîkon pemonkon erepamî Paapa epuꞌnen pepîn mîîwîni pra awanî ya tiaron Morî Yekaton Wannî nîtîrîꞌpî pîꞌ esenupaꞌpî pepîn pemonkon erepamî ya, inkamoroya amaimukon eta, moropai toꞌ esenumenka mîrîrî tînetaꞌpîkon pîꞌ, imakuiꞌpî pe tîwanîkon pîꞌ. Mîrîrî yeꞌnen innape awanî kupî toꞌya, yairon pe awanî epuꞌtî tîuyaꞌnîkon yeꞌnen.
25 Mîrîrî wenai inkamoro yeseru imakuiꞌpî pe tîweꞌsen yenpo Paapaya. Moropai inkamoro eꞌsekunka Paapa yapurîkonpa. Taa toꞌya: —Yairî puꞌkuru see Paapa man amîrîꞌnîkon pia —taa toꞌya.
Îꞌ Kaiꞌma Soosi Ta Eꞌnî Yeseru
26 Uyonpayamîꞌ, tamîꞌnawîrî eseurîmaꞌpî seeniꞌ. Îꞌ ankapai uurî eꞌtoꞌ wanî sîrîrî see warantî: Aꞌkî, soosi ta eemurukuntîkon yai Paapa yapurîi, tiwin uyonpakon moro awanî teeserenkasen. Moropai tiaron moro awanî yenupaton. Moropai tiaron moro wanî tîpîꞌ Paapa nekaremekîꞌpî anekaremeꞌpainon. Moropai tiaron moro wanî itekare anekaremeꞌpainon tîkuꞌsen pepîn mai ta. Moropai tiaron moro awanî tîkuꞌsen pepîn mai ta mîîkîrî nekaremekîꞌpî itekare anekaremeꞌpai tîweꞌsen îꞌ taasaꞌ maiya epuꞌtoꞌpe. Tamîꞌnawîrî mîrîrîkon kupî eꞌpai awanî tiaronkon innape Jesus kuꞌnenan pîikaꞌtîtoꞌ ton pe.
27 Aꞌkî, akoreꞌtaꞌnîkon tiaronkon teeseurîmasanon tîkuꞌsen pepîn mai ta wanî ya, inkamoro eseurîma eꞌpai man asakîꞌne eseurîwîꞌne kaisarî neken, tamîꞌnawîronkon eseurîma pra. Tîîse toꞌ eseurîma eꞌpai awanî eseꞌyeꞌmaꞌpî pîꞌ. Moropai tamîꞌnawîronkonya epuꞌtoꞌpe, îꞌ taasaꞌ mîrîrî maiya ekaremeꞌnenya ekaremekî eꞌpai awanî, tîîpia Morî Yekaton Wannî nîtîrîꞌpî wenai.
28 Tîîse îꞌ taatoꞌpe mîrîrî maiya ekaremeꞌnen pe pra awanî ya, toꞌ eseurîma eꞌpai pra awanî, tîîse tîîwarîrîꞌnîkon neken Paapa yarakkîrî toꞌ eseurîma eꞌpai awanî tewankon yaꞌ.
29 Asakîꞌnankon eseurîwîꞌnankonya itekare ekaremekî eꞌpai man. Moropai tiaronkonya toꞌ nekaremekî itekare eta eꞌpai man.
30 Mîrîrî toꞌ eseurîma tanne, Paapaya tekare ekaremekî ya, tiaron akoreꞌtawon pia, mîîkîrî eꞌmaiꞌ pe teeseurîmasen tîꞌnapamî eꞌpai man, tiaron eseurîma etapa.
31 Mîrîrî warantî tiwin pîꞌ siꞌma eeseurîmakon eꞌpai man. Mîrîrî wenai tamîꞌnawîronkonya epuꞌtoꞌpe moropai epuꞌsaꞌ tîuyaꞌnîkon wenai, inîꞌ panpîꞌ Paapa maimu yawîrî toꞌ koꞌmantoꞌpe tîrumakai pra.
32 Teeseurîmasen itekare Morî Yekaton Wannî nîtîrîꞌpî pîꞌ mîîkîrî atîꞌnapamî eserîke awanî, tiaron teeseurîmasen pataꞌseꞌ ton pe.
33 Maasa pra seꞌ tapairî eseurîman yuꞌse pra Paapa man, tiaronkon yakaꞌma yeꞌka pe. Tîîse morî pe eseurîman yuꞌse awanî, eꞌtoꞌ yawîrî eꞌnîtoꞌpe.
34 Tamîꞌnawîronkon Paapa pemonkonyamîꞌ yenupaꞌpîuya warantî ayenupauyaꞌnîkon. Wîriꞌsanyamîꞌ wanî eꞌpai awanî tîîtîꞌnapanse soosi ta. Maasa pra soosi ta inkamoro eseurîma tîrî annaya pepîn. Tîîse tînyokon maimu yawîrî toꞌ wanî eꞌpai awanî, pena Moisés nurîꞌtîya yenupatoꞌ yawîrî.
35 Îꞌ rî anekaranmapopai tîwanîkon ya, tînyokon pîꞌ ekaranmapo toꞌya eꞌpai awanî tewîꞌ ta siꞌma, soosi ta pra. Maasa pra soosi ta wîriꞌ eseurîma eꞌpai pra man, uurîꞌnîkon yeppeꞌnîpîiya namai.
36 Sîrîrî tauya manniꞌ amîrîꞌnîkon pîꞌ kupîyaꞌnîkon pra kenantî innape? Amîrîꞌnîkon pîꞌ neken Paapa yekare ekaremekîꞌpî toꞌya kaiꞌma eesenumenkakon? Kaane, tiaronkon pîꞌ nîrî ekaremekîꞌpî toꞌya.
37 Aꞌkî, anîꞌ esenumenka ya Paapa maimu ekaremeꞌnen pe tîwanî pîꞌ, Morî Yekaton Wannî nîtîrîꞌpî kuꞌnen pe tîwanî pîꞌ. Mîîkîrîya yairî seeniꞌ unmenukaꞌpî wanî epuꞌtî eꞌpai man, maasa pra umaimu pepîn sîrîrî, tîîse Uyepotorîkon maimu.
38 Tîîse anîꞌya unekaremekîꞌpî pîinama pra awanî ya, mîîkîrî maimu nîrî kîꞌpîinamatîi.
39 Mîrîrî yeꞌnen uyonpayamîꞌ Paapa maimu ekaremekîyaꞌnîkon yuwatî. Tîîse tîkuꞌsen pepîn mai kuꞌnen pîꞌ eeseurîma eꞌpai pra man kîkatî.
40 Tîîse tamîꞌnawîrî morî pe eꞌtoꞌ yawîrî mîrîrî ayeserukon kuꞌtî soosi ta, seꞌ tapairon pe pra.
