Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 15:1-58
15 Uyonpayamîꞌ, Cristo yekare ekaremekîuya sîrîrî apîꞌnîkon, manniꞌ ekaremekîuya neꞌtîkini moropai manniꞌ innape eꞌpîikaꞌtîntoꞌ yekare kupî pîꞌ aakoꞌmamîkon manniꞌ.
2 Mîrîrî itekare wenai amîrîꞌnîkon eꞌpîikaꞌtî, innape ikupî pîꞌ aakoꞌmamîkon ya. Tîîse manniꞌ unekaremekîꞌpî wanî ya, seruꞌ pe, aweꞌpîikaꞌtîkon pepîn. Îꞌ pe pra rî innape ikuꞌtoꞌyaꞌnîkon wanî eꞌpainon.
3 Tîîse useruku pepîn, maasa pra îꞌ uurî esenupaꞌpî moropai unepuꞌtîꞌpî pîꞌ amîrîꞌnîkon yenupaꞌpîuya itekare ipîkku pe tîweꞌsen pîꞌ. Mîrîrî wanî Cristo saꞌmantaꞌpî yekare pe. Mîîkîrî saꞌmantaꞌpî imakuiꞌpî unkupîꞌpîkon moꞌkapa kaiꞌma. Mîrîrî warantî aweꞌmenukasaꞌ Paapa maimuya taasaꞌ yawîrî.
4 Mîîkîrî saꞌmantasaꞌ tîpo yuꞌnaꞌtîꞌpî toꞌya uuruwai yaꞌ. Moropai aakoꞌmamîꞌpî eseurîwîꞌne wei kaisarî. Mîrîrî tîpo aweꞌmîꞌsaꞌkaꞌpî isaꞌmantaꞌsan koreꞌta pai, Paapa maimuya taasaꞌ yawîrî.
5 Moropai tîweꞌmîꞌsaꞌka tîpo, eꞌmaiꞌ pe eesenpoꞌpî Pedro pia. Moropai mîrîrî tîpo tiaronkon tînaipontîꞌsan pia eesenpoꞌpî. Eraꞌmaꞌpî toꞌya.
6 Moropai inîꞌrî eesenpoꞌpî mararonkon pepîn 500 yentainokon tapurînenan pia. Mîrîrî yai tuꞌkankonya eraꞌmaꞌpî. Sîrîrîpe tuꞌkankon toꞌ yonparîꞌsankon saꞌmantasaꞌ pra man, sîrîrî tîpose enen toꞌ koꞌmamî, tîîse tiaronkon toꞌ yonparîꞌsan saꞌmantasaꞌ sîrîrî.
7 Moropai inkamoroya eraꞌmasaꞌ tîpo, eesenpoꞌpî Tiago pia tiwinsarî tîîse. Moropai maasa panpîꞌ inîꞌrî eesenpoꞌpî tamîꞌnawîronkon tînaipontîꞌsan pia.
8 Tamîꞌnawîronkon pia teesenpo tîpo, tiwinkanoꞌpî pe uupia eesenpoꞌpî, inîmîkîuya pra tîîse. Maasa teesenpotoꞌ weiyu erepamî pra tîîse, more esenpo warantî eesenpoꞌpî uupia, anîꞌya inîmîkî pra tîîse.
9 Maasa pra uurî saꞌne wanî Cristo naipontîꞌsan warantî pra, tîîse toꞌ maꞌre wanî, toꞌ kaisarî eꞌkupî eserîke pra wai. Maasa pra uurî wanî yapurînenan tarumaꞌtîtîpon pe. Mîrîrî yeꞌnen Cristo naipontîꞌpî pe uyesatî toꞌya pepîn eꞌpainon.
10 Mîîwîni tîîse Paapaya utarumaꞌtî pra awanîꞌpî tîîse upîikaꞌtîꞌpîiya morî pe. Moropai tiaron, uyeseru ton itîrîꞌpîiya, morî pe tîweꞌtoꞌ yawîrî. Moropai uyaipontîꞌpîiya esenyakaꞌmatoꞌpe Cristo naipontîꞌsan warantî. Esenyakaꞌma pra uukoꞌmamî pra wanîꞌpî. Tîîse esenyakaꞌmasaꞌ wai tamîꞌnawîronkon Cristo naipontîꞌsan yentai. Tîîse uuwarîrî ikupîuya pepîn. Tîîse Paapaya ikupîꞌpî, tîmeruntîri tîrîꞌpîiya uupia, esenyakaꞌmatoꞌpe ituꞌse tîwanî yeꞌnen.
11 Sîrîrî epuꞌtî, itekare unekaremekîꞌpî wanî tiaronkon Cristo naipontîꞌsan nekaremekîꞌpî warantî. Mîrîrî yeꞌnen uurîya itekare ekaremeꞌsaꞌ ya, inkamoroya ekaremeꞌsaꞌ ya, mîrîrî rî itekare wanî. Moropai ipîkku pe panpîꞌ mîrîrî kupîꞌpîyaꞌnîkon innape.
Uurîꞌnîkon Eꞌmîꞌsaꞌkatoꞌ Yekare
12 Sîrîrî itekare anna nekaremekîꞌpî wanî Cristo eꞌmîꞌsaꞌkaꞌpî ekaremeꞌnen pe. Mîrîrî yeꞌnen oꞌnon yeꞌka pe tiaronkonya taa: —Isaꞌmantaꞌsan eꞌmîꞌsaꞌka pepîn?
13 Maasa esenumenkatî. Isaꞌmantaꞌsan eꞌmîꞌsaꞌka pepîn kaiꞌma eesenumenkakon ya, moriya Cristo eꞌmîꞌsaꞌkasaꞌ pepîn eꞌpainon.
14 Moropai Cristo eꞌmîꞌsaꞌkasaꞌ pra awanî ya, ipîꞌ anna eseurîmatoꞌ wanî eꞌpainon îꞌ pe pra rî. Moropai innape ikuꞌtoꞌyaꞌnîkon wanî eꞌpainon, îꞌ pe pra rî.
15 Moropai mîrîrî warantî seruꞌ pe anna eseurîma eꞌpainon Paapa winîkîi, maasa pra Cristo pîmîꞌsaꞌkaꞌpî Paapaya taa annaya yeꞌnen. Innape see isaꞌmantaꞌsan eꞌmîꞌsaꞌka pra awanî ya, Paapaya Cristo pîmîꞌsaꞌkaꞌpî pepîn eꞌpainon.
16 Innape isaꞌmantaꞌsan eꞌmîꞌsaꞌka pepîn kaiꞌma eesenumenkakon ya, Cristo nîrî eꞌmîꞌsaꞌkaꞌpî pepîn eꞌpainon.
17 Mîrîrî warantî Cristo eꞌmîꞌsaꞌkasaꞌ pra awanî ya, innape ikuꞌtoꞌyakon wanî îꞌ pe pra rî, amakuyikon yapai amoꞌkasaiꞌya pepîn eꞌpainon. Tîîse aakoꞌmamîkon eꞌpainon imakuiꞌpî ankupîꞌpîkon yarakkîrî.
18 Innape mîrîrî wanî ya, mîrîrî warantî nîrî ayonpayamîꞌkon isaꞌmantaꞌsan innape Cristo kuꞌnenan koꞌmamî eꞌpainon aatakaꞌmaꞌsan pe ipatîkarî.
19 Innape Cristo kupî ya, morî intîrî yapisî sîrîrî, tarî enen eꞌnî tanne. Tîîse sîrîrî neken yapisî ya, mararî pra esewankonoꞌman eꞌpainon, tamîꞌnawîronkon pemonkonyamîꞌ esewankonoꞌma yentai. Maasa pra iwinîpai ipatîkaron koꞌmannîtoꞌ yapisî kaiꞌma, esenkuꞌtîꞌnîꞌpî eꞌpainon.
20 Tîîse mîrîrî warantî pra awanî, maasa pra innape Cristo eꞌmîꞌsaꞌkaꞌpî wanî. Eꞌmaiꞌ pe aweꞌmîꞌsaꞌkasaꞌ yeꞌnen, epuꞌtîꞌnîkon iteꞌmaꞌpî pîꞌ eꞌmîꞌsaꞌkan, ipatîkarî koꞌmannîtoꞌpe yarakkîrî.
21 Maasa pra tiwinan warayoꞌ Adão nurîꞌtîya imakuiꞌpî kupîꞌpî wenai tamîꞌnawîronkon wanî tîîsaꞌmantasanon pe. Mîrîrî warantî nîrî tiwinan warayoꞌ Cristo eꞌmîꞌsaꞌkaꞌpî wenai, tamîꞌnawîronkon isaꞌmantaꞌsan eꞌmîꞌsaꞌka pe man.
22 See warantî awanî: Paapa maimu yawîrî pra Adão nurîꞌtî wanî yeꞌnen, tamîꞌnawîronkon uurîꞌnîkon tîpayanîꞌsan saꞌmanta emapuꞌtîꞌpîiya. Mîrîrî warantî Paapa maimu yawîrî Cristo koꞌmamîꞌpî yeꞌnen, tamîꞌnawîronkon uurîꞌnîkon tîpemonkonoyamîꞌ eꞌmîꞌsaꞌka ipatîkarî koꞌmantoꞌpe emapuꞌtîꞌpî Cristoya.
23 Tîîse uurîꞌnîkonya inîmîkî eꞌpai awanî. Maasa pra eꞌmaiꞌ pe Cristo eꞌmîꞌsaꞌkaꞌpî tamîꞌnawîronkon eꞌmîꞌsaꞌka rawîrî. Mîrîrî tîpo inîmîkî pîꞌ koꞌmannî îꞌ pensa Cristo iipî yai, ipemonkonoyamîꞌ eꞌmîꞌsaꞌkatoꞌ weiyu eseporî.
24 Mîrîrî tîpo sîrîrî pata yaretîꞌka Cristoya weiyu erepamî. Mîrîrî yai tamîꞌnawîronkon ipîkku pe tîweꞌsanon, moropai meruntî ke tîweꞌsanon, taataipontîsanon, teeseraꞌmasanon moropai teeseraꞌmasanon pepîn yaretîꞌkaiya. Moropai tamîꞌnawîronkon rumakaiya tîyun Paapa yenyaꞌ, toꞌ esaꞌ pe aweꞌtoꞌpe.
25 Maasa pra tamîꞌnawîronkon esaꞌ pe Cristo koꞌmamî eꞌpai awanî, tamîꞌnawîronkon iteyatonon yaretîꞌka Paapaya pîkîrî.
26 Tamîꞌnawîron imakuiꞌpî yaretîꞌka tîuya tîpo, saꞌmantantoꞌ, ituꞌse Paapa eꞌtoꞌ pepîn, inewanmarî yaretîꞌkaiya pe man.
27 Maasa pra Paapa maimu eꞌmenukasaꞌ yawîrî taasaiꞌya man:—Paapaya tamîꞌnawîronkon esaꞌ pe Cristo kupî pe man toꞌ koꞌmannîꞌnen pe aweꞌtoꞌpe
—taasaiꞌya man. Tamîꞌnawîron yentai Cristo ena taasaꞌ Paapaya ya, ikupîiya tîîse tentai Cristo ena pepîn taasaiꞌya pra awanî. Maasa pra mîîkîrî Paapaya ikupîꞌpî tamîꞌnawîronkon esaꞌ pe.
28 Tamîꞌnawîronkon esaꞌ pe Cristo ena yai, mîîkîrî eturumaka Paapa yenyaꞌ tesaꞌ pe aweꞌtoꞌpe. Manniꞌ Paapa ipîkku pe Cristo kupîtîpon tiaronkon yentai. Mîrîrî yai Paapa ena kupî sîrîrî tamîꞌnawîronkon esaꞌ pe.
29 Tarîpai isaꞌmantaꞌsan eꞌmîꞌsaꞌka pra awanî pîꞌ eesenumenkakon ya, ayekaranmapouyaꞌnîkon. Îꞌ ton pe pemonkonyamîꞌ esenpatakonaꞌpî tonpayamîꞌ, isaꞌmantaꞌsan ton pe? Îꞌ pe pra rî awanî eꞌpainon.
30 Moropai anna kanan, îꞌ ton pe see anna esenyakaꞌma koꞌmannîpî, anna moron tepuꞌse? Isaꞌmantaꞌsan eꞌmîꞌsaꞌka pepîn epuꞌtî ya, îꞌ pe pra rî awanî eꞌpainon.
31 Tîîse uyonpayamîꞌ, uurî tamîꞌnawîron eꞌtarumaꞌtîtoꞌ yapîtanîpîuya sîrîrî wei kaisarî. Useruku pepîn. Uyepotorîkon Jesus Cristo pemonkono pe awanîkon wenai, innape ayapurîuyaꞌnîkon warantî, innape awanî sîrîrî.
32 Aꞌkî, tarî uurî esenyakaꞌma koꞌmannîpî Éfeso po. Mararî pra tewaiꞌse kaikusi yarakkîrî teepîsen kaisarî. Tîîse mîrîrî kupîuya ya, tarî neken sîrîrî non po morî pe uukoꞌmantoꞌpe, îꞌ eporîuya pepîn eꞌpainon. Innape see isaꞌmantaꞌsan eꞌmîꞌsaꞌka pepîn taꞌnîkon ya, moriya taa eꞌpainon:Entamoꞌkanpaiꞌnîkon moropai uwukukon enîꞌpaiꞌnîkon.Maasa pra penane saꞌmantan pe man
taa eꞌpainon. Tîîse mîrîrî taa eserîke pra man maasa pra isaꞌmantaꞌsan eꞌmîꞌsaꞌka kupî sîrîrî.
33 Mîrîrî yeꞌnen teesenkuꞌtîi pra eꞌtî. Ayonpakon imakuiꞌpî kuꞌnen wenairî tuutîi, ayeserukon morî pe aweꞌtoꞌkon kîꞌmaꞌtanîꞌtî.
34 Tîîse morî pe aakoꞌmamîkon yuwatî yairî. Imakuiꞌpî kuꞌtoꞌyaꞌnîkon mîꞌpannîꞌtî. Akoreꞌtaꞌnîkon tiaronkon man, Paapa epuꞌnenan pepîn. Sîrîrî tauya sîrîrî, ayonpayamîꞌya Paapa yeseru epuꞌtî pepîn pîꞌ aweppepîkon eꞌpai man.
Îꞌ Kaiꞌma Uyesaꞌkon Eꞌmîꞌsaꞌkatoꞌ Yekare
35 Yai pra tiaronya ekaranmapo, îꞌ yeꞌka pe see isaꞌmantaꞌsan eꞌmîꞌsaꞌka eꞌpainon, toꞌ piꞌpî, toꞌ esaꞌ kataꞌpî tanne? Tîîse îꞌ yeꞌka pe toꞌ esaꞌ wanî kupî sîrîrî? taiya.
36 Pakko amîrî. Paapaya isaꞌmantaꞌsan pîmîꞌsaꞌka pepîn kaiꞌma eesenumenka. Aꞌkî, îꞌ enaꞌpî pîmîyaꞌnîkon ya, mîrîrî aroꞌta pepîn eꞌpainon non ke yaꞌsiꞌsaꞌyaꞌnîkon pra awanî ya.
37 Maasa pra anpîmîkon wanî trigo enaꞌpî pe. Mîrîrî warantî pra awanî ya, îꞌ rî enaꞌpî pe tiwin mîrikkî. Mîrîrî pîmîyaꞌnîkon itenaꞌpî pe, iteꞌyeꞌ pe pra tîîse.
38 Tîîse Paapaya mîrîrî îꞌ rî enaꞌpî pînsaꞌ yaroꞌtannîpî, iteꞌyeꞌ ton pe, ituꞌse tîwanî pîkîrî. Maasa pra itîrîiya siꞌta tiwin pîꞌ ikaisarî iteꞌyeꞌ ton.
39 Moropai tamîꞌnawîronkon enenankon pemonkonyamîꞌ moropai kamoyamîꞌ pun wanî toꞌ kaisarî siꞌta. Pemonkon pun wanî kamo pun warantî pra. Kamo pun wanî toron pun warantî pra. Moropai toron pun wanî moroꞌyamîꞌ pun warantî pra. Moropai moroꞌ pun wanî tiaron pe rî. Mîrîrî yeꞌnen tamîꞌnawîrî siꞌta toꞌ pun wanî.
40 Tamîꞌnawîrî sîrîrî non ponkon wanî morî pe. Moropai moro man nîrî kaꞌ ponkon. Inkamoro wanî nîrî morî pe tîîse non ponkon warantî pra. Tiaron pe toꞌ wanî.
41 Aꞌkî, wei yaꞌkaru moro man iponaron pata weiyuꞌmaiya morî pe, kapoiya iweiyuꞌmasaꞌ warantî pra. Moropai kapoi yaꞌkaru moro man nîrî, pata yaꞌkaruꞌmaiya sirikkîyamîꞌya yaꞌkaruꞌma warantî pra. Moropai sirikkîyamîꞌ yaꞌkaru nîrî moro man tiaron pe yaꞌkaruꞌmanen. Inkamoro nîrî yaꞌkaru moro man tiwin pîꞌ toꞌ kaisarî eꞌwarainon pepîn, tîîse siꞌtaꞌnon tiwin pîꞌ toꞌ tîîse.
42 Mîrîrî warantî nîrî isaꞌmantaꞌsan eꞌmîꞌsaꞌka yai awanî. Maasa pra isaꞌmantaꞌpî yuꞌnaꞌtîsaꞌ ya, itesaꞌrîꞌpî wanî tîîsaꞌmantasen pe. Tîîse îꞌ pensa aweꞌmîꞌsaꞌka ya, aweꞌmîꞌsaꞌka inîꞌ aasaꞌmanta ton pe pra. Maasa pra tiaron pe itesaꞌ wanî kupî sîrîrî tîîsaꞌmantasen pe pra.
43 Moropai isaꞌmantaꞌpî esaꞌrîꞌpî tarî yuꞌnaꞌtîsaꞌ ya, nura pe awanî, moropai aꞌtuꞌmîra awanî. Tîîse manniꞌ yai, Paapaya iꞌmîꞌsaꞌka yai, itesaꞌ wanî morî pe puꞌkuru, meruntî ke puꞌkuru awanî pe man.
44 Moropai tarî yuꞌnaꞌtîsaꞌ ya tarîron pe neken awanî. Tîîse iꞌmîꞌsaꞌka tîuya yai, Paapaya itîrî itesaꞌ ton ipatîkarî kaꞌ po tîîkoꞌmansen tîrîiya.
Inna seruꞌ pepîn tarî awanî non po tîîkoꞌmansen esaꞌ wanî ya, moriya kaꞌ po nîrî awanî, kaꞌ po tîîkoꞌmansen esaꞌ moro man.
45 Maasa pra Paapa maimu eꞌmenukasaꞌya taasaꞌ man:—Eꞌmaiꞌnon warayoꞌ Adão nurîꞌtî konekaꞌpî Paapaya tarîron tîîkoꞌmansen pe
—taasaiꞌya man. Tîîse ikînnîꞌnon warayoꞌ Cristo pîmîꞌsaꞌkaꞌpî Paapaya, ipatîkarî aakoꞌmantoꞌpe. Mîrîrî ipatîkarî toꞌ koꞌmantoꞌ ton tîrîiya tîpemonkonoyamîꞌ pia.
46 Mîrîrî yeꞌnen eꞌmaiꞌ pe kaꞌ poinon uyesaꞌkon ton tîîsaiꞌya pra man. Tîîse sîrîrî non po tîîkoꞌmansen uyesaꞌkon ton itîrîꞌpîiya. Moropai maasa uyesaꞌkon ton, kaꞌ po tîîkoꞌmansen tîrîiya pe man.
47 Eꞌmaiꞌnon warayoꞌ Adão nurîꞌtî konekaꞌpî Paapaya non yaꞌpunuꞌpî ke. Tîîse kaꞌ poinon, ikînnîꞌnon warayoꞌ Cristo pîmîꞌsaꞌkaꞌpîiya. Moropai tiaron itesaꞌ ton tîrîꞌpîiya, kaꞌ po tîîkoꞌmansen pe.
48 Manniꞌkan tarî tîîkoꞌmansenon wanî manniꞌ warayoꞌ non yaꞌpunuꞌpî konekasaꞌ warantî. Tîîse manniꞌkan kaꞌ po aakoꞌmamî tonkon wanî, manniꞌ kaꞌ poi iipîꞌpî warantî.
49 Uyesaꞌkon wanî sîrîrî tarî tîîkoꞌmansen Adão esaꞌ warantî. Mîrîrî warantî nîrî eꞌmîꞌsaꞌkan ya, amenan pe uyesaꞌkon wanî pe man, kaꞌ poi iipîꞌpî Cristo esaꞌ warantî.
50 Uyonpayamîꞌ, sîrîrî ankapai eꞌtoꞌ puꞌkuru tauya sîrîrî apîꞌnîkon. Tarî tîîkoꞌmansen uyesaꞌkon yarakkîrî siꞌma kaꞌ pona ikoꞌmanse wîtîn eserîke pra man. Maasa pra uyesaꞌkon tîîsaꞌmantasen koꞌmamî pepîn ipatîkarî Paapa pia.
51 Maasa unekaremekî etatî, morî pe tepuꞌsen pepîn pîꞌ eseurîma. Tamîꞌnawîronkon uurîꞌnîkon saꞌmanta pepîn kupî sîrîrî. Tîîse tiwin wei tiwinarî tamîꞌnawîronkon esaꞌ etinyakaꞌma pe man.
52 Kaꞌneꞌ pe uyenukonya pîriu taa manniꞌ warantî, tiwinkanoꞌpî pe tîsinarîkon yeꞌnunpa inserîya pe, isaꞌmantaꞌsan eꞌmîꞌsaꞌka pe man, inîꞌrî aasaꞌmantaton pe pra. Mîrîrî yai tamîꞌnawîrî uurîꞌnîkon etinyakaꞌma pe man.
53 Maasa pra sîrîrî uyesaꞌkon tîîkatasen etinyakaꞌma eꞌpai man, tîîkatasen pe pra. Moropai tîîsaꞌmantasen etinyakaꞌma eꞌpai man, tîîsaꞌmantasen pe pra.
54 Mîrîrî yeꞌnen uyesaꞌkon tîîkatasen etinyakaꞌma yai tîîkatasen pe pra, moropai tîîsaꞌmantasen etinyakaꞌma yai tîîsaꞌmantasen pe pra, îꞌ kaiꞌma Paapa maimu eꞌmenukasaꞌya taasaꞌ yawîrî aweꞌkupî mîrîrî.
55 Saꞌmantantoꞌ pîꞌ eranneꞌ pe pra man,maasa pra aataretîꞌkasaꞌ man.Pemonkonyamîꞌ enasaꞌ mantîîsaꞌmantasanon pe pra,saꞌmantantoꞌ yentai toꞌ enasaꞌ yeꞌnen
taasaiꞌya man.
56 Saꞌmantantoꞌ pîꞌ eranneꞌ pe eꞌnî imakuiꞌpî unkupîꞌpîkon wenai, maasa pra Paapaya utarumatîkon, tîmaimu yawîrî pra eꞌnî yeꞌnen.
57 Tîîse Uyepotorîkon Jesus Cristo nîkupîꞌpî wenai, saꞌmantan pîꞌ eranneꞌ pe pra eꞌnî, maasa pra Paapaya utarumaꞌtîkon pepîn. Mîrîrî yeꞌnen —Morî pe puꞌkuru man —taa pîꞌ koꞌmannî Paapa pîꞌ.
58 Mîrîrî yeꞌnen uyonpayamîꞌ, innape ikupî pîꞌ akoꞌmantî, tîwî tîkuꞌse pra. Meruntî ke akoꞌmantî. Uyepotorîkon esenyakaꞌmatoꞌ pîꞌ eesenyakaꞌmakon pîꞌ akoꞌmantî tîrumakai pra. Maasa pra epuꞌtî pîꞌ naatîi Uyepotorîkon ton pe eesenyakaꞌmakon ya, îꞌ pe pra rî eesenyakaꞌmatoꞌkon wanî pepîn.
