Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 2:1-16
2 Uyonpayamîꞌ, akoreꞌtaꞌnîkon wanî yai, tiaronkon yentai epuꞌnen pe wanî pîꞌ eseurîmasaꞌ pra wai. Moropai tuꞌke mai pîꞌ eseurîmasaꞌ pra wai. Tîîse yairon Paapa nekaremekîꞌpî pîꞌ eseurîmaꞌpî apîꞌnîkon.
2 Maasa pra akoreꞌtaꞌnîkon wanî yai, tamîꞌnawîron esenumenkatoꞌ kupîꞌpîuya uuwanmîra. Tîîse uurîꞌnîkon ton pe pîikaꞌtîtoꞌpe Cristoya pakîꞌnan po tîîsaꞌmantaꞌpî pîꞌ neken eseurîmatoꞌpe kaiꞌma esenumenkaꞌpî.
3 Amîrîꞌnîkon koreꞌta uutîsaꞌ yai, aꞌtuꞌmîra wanîꞌpî. Eranneꞌ pe wanîꞌpî amîrîꞌnîkon pîꞌ, mararî pra eꞌkîkîꞌmaꞌpî.
4 Mîrîrî itekare ayenupaꞌpîuyaꞌnîkon. Mîrîrî eꞌsaꞌ pra man morî pe umaimu wanî wenai pra, moropai epuꞌnen pe wanî wenai pra. Tîîse akoreꞌtakon meruntîkon Morî Yekaton Wannî nîkupîꞌpî eraꞌmaꞌpîyaꞌnîkon, anîꞌ nîkupî eserîkan pepîn. Mîrîrî wenai epuꞌtîꞌpîyaꞌnîkon, yairî unekaremekîꞌpî wanî.
5 Mîrîrî yeꞌnen innape ikuꞌtoꞌyaꞌnîkon wanî pepîn, epuꞌnen pe pemonkon eꞌtoꞌ wenai pra, tîîse Paapa meruntîri wenai innape ikuꞌsaꞌyaꞌnîkon.
Paapa Wanî Epuꞌnen Pe
Ekaremekî Cristo Naipontîꞌsanya
6 Tîîse Paapa maimu yawîronkon koreꞌta wanî yai, epuꞌnen pe Paapa nekaremekîꞌpî wanî pîꞌ ekaremekî annaya. Tîîse eseurîmatoꞌ wanî pepîn sîrîrî non ponkon nepuꞌtî pîꞌ pra moropai manniꞌkan pemonkonyamîꞌ esanon pe tîweꞌsanon nepuꞌtî pîꞌ pra, manniꞌkan ipatîkarî pemonkonyamîꞌ esaꞌ pe tîîkoꞌmansenon pepîn.
7 Tîîse mîrîrî unekaremekî wanî Paapa winîpainon pe, pemonkonyamîꞌya epuꞌtî pepîn, Paapa nenomîꞌpî pe awanî. Mîrîrî Cristo saꞌmantaꞌpî wenai pemonkonyamîꞌ pîikaꞌtî tîuya pîꞌ Paapa esenumenkaꞌpî pena, tîwarantî morî pe uurîꞌnîkon eꞌtoꞌpe. Pena eesenumenkaꞌpî maasa sîrîrî pata koneka tîuya rawîrî.
8 Pemonkonyamîꞌ esanon pe tîweꞌsanon, sîrîrî non ponkonya mîrîrî epuꞌtî pra awanîꞌpî. Sîrîrî epuꞌsaꞌ tîuyaꞌnîkon ya, mîîkîrî ipîkku, pata esaꞌ pe tîweꞌsen, tepotorîkon winîpainon pokapîtîꞌpî toꞌya pepîn eꞌpainon pakîꞌnan pona.
9 Mîrîrî warantî Paapa maimu eꞌmenukasaꞌya taasaꞌ:Paapaya îꞌ konekaꞌpî manniꞌkan tapurînenan ton pe,anîꞌya eraꞌmasaꞌ pra man sîrîrî tîpose.Moropai etasaiꞌya pra man.Mîrîrî pîꞌ eesenumenkasaꞌ pra man tiwin kin
taasaiꞌya man.
10 Tîîse Paapaya uurîꞌnîkonya epuꞌtî emapuꞌtîꞌpî, Morî Yekaton Wannî winîpai. Mîîkîrî Morî Yekaton Wannîya tamîꞌnawîrî Paapa esenumenkatoꞌ epuꞌtî. Mîrîrî uurîꞌnîkon nepuꞌtî pepîn epuꞌtîiya tamîꞌnawîrî.
11 Anîꞌya pemonkon esenumenkatoꞌ epuꞌtî pepîn, tîîse tîîwarîrî eesepuꞌtî. Mîrîrî warantî Paapa esenumenkatoꞌ epuꞌtî anîꞌya eserîke pra awanî. Tîîse Morî Yekaton Wannîya neken tamîꞌnawîrî epuꞌtî.
12 Uurîꞌnîkon esenumenka pepîn tarî non po tîîkoꞌmansenon Paapa epuꞌnenan pepîn esenumenka warantî. Maasa pra inkamoro winîpai uurîꞌnîkon esenumenkatoꞌ wanî pepîn. Tîîse Morî Yekaton Wannî Paapa winîpainonya uurîꞌnîkon esenumenka emapuꞌtî tamîꞌnawîron Paapa nîtîrîꞌpî pîꞌ uupiaꞌnîkon, ituꞌse tîwanî yeꞌnen.
13 Mîrîrî yeꞌnen mîî pe anna eseurîma pepîn, anîꞌya anna yenupaꞌpî yawîrî. Tîîse yairon pîꞌ anna eseurîma Morî Yekaton Wannîya anna yenupaꞌpî yawîrî. Mîrîrî yawîrî Paapa esenumenkatoꞌ ekaremekî annaya, anna yenupaꞌpî Morî Yekaton Wannîya yawîrî.
14 Tîîse manniꞌ pemonkon, Morî Yekaton Wannî yapisîtîpon pepîn, mîîkîrî wanî iipiapainon anetapai pra. Îꞌ kaiꞌma see Morî Yekaton Wannîya yenupatoꞌ epuꞌtîiya eserîke pra awanî. Maasa pra Morî Yekaton Wannî wenai neken pemonkonya epuꞌtî mîrîrî.
15 Tîîse manniꞌ pemonkon, manniꞌ Morî Yekaton Wannî yarakkîrî tîweꞌsen, mîîkîrî atakoꞌmenka tamîꞌnawîron tîweꞌkuꞌsen pîꞌ, maasa pra Morî Yekaton Wannîya epuꞌtîiya emapuꞌtîsaꞌ. Tîîse mîîkîrî Morî Yekaton Wannî yarakkîrî tîweꞌsen pîꞌ anîꞌ atakoꞌmenka eserîke pra awanî.
16 Mîrîrî warantî Paapa maimu eꞌmenukasaꞌya taasaꞌ man. See warantî taiya:Anîꞌya Uyepotorîkon esenumenkatoꞌ epuꞌtî pepîn.Anîꞌya Uyepotorîkon panama pepîn
taasaiꞌya man. Tîîse uurîꞌnîkon esenumenka Cristo esenumenkatoꞌ warantî.
