Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 3:1-23
3 Tîîse uyonpayamîꞌ, amîrîꞌnîkon yarakkîrî eseurîma eserîke pra awanîꞌpî Morî Yekaton Wannî yarakkîrî tîweꞌsanon yarakkîrî eseurîma warantî. Sîrîrî pata po tîîkoꞌmansenon pemonkonyamîꞌ yarakkîrî eseurîma warantî amîrîꞌnîkon pîꞌ eseurîma eꞌpai awanîꞌpî. Maasa pra moreyamîꞌya îꞌ epuꞌtî pra warantî awanîkon sîrîrî tîpose. Îꞌ yairî awanî epuꞌtîyaꞌnîkon pepîn, îꞌ kaiꞌma Cristo maimu yawîrî aakoꞌmamîkon epuꞌtîyaꞌnîkon pepîn.
2 Cristo nekaremekîꞌpî manniꞌ saꞌme pra tîweꞌsen pîꞌ neken ayenupaꞌpîuyaꞌnîkon. Saꞌman panpîꞌ pîꞌ ayenupaꞌpîuyaꞌnîkon pîn, maasa pra epuꞌtîyaꞌnîkon pra awanîꞌpîkon, more warantî. Manniꞌ more, manaꞌ pîꞌ tîweꞌsenya neken manaꞌ yuꞌna, maasa tekkari yonpaiya pra awanî. Tîîse sîrîrî tîpose mîrîrî warantî aakoꞌmamîkon, epuꞌtîyaꞌnîkon pra.
3 Maasa pra amîrîꞌnîkon koꞌmamî sîrîrî ituꞌse aweꞌtoꞌkon yawîrî, ituꞌse Morî Yekaton Wannî eꞌtoꞌ yawîrî pra. Aakoꞌmamîkon aakinmuwakon pîꞌ moropai eesiyuꞌpîtîkon pîꞌ. Mîrîrî warantî aakoꞌmamîkon ya, eesepuꞌtî, ituꞌse aweꞌtoꞌkon yawîrî aakoꞌmamîkon. Moropai manniꞌkan pemonkonyamîꞌ, sîrîrî pata po tîîkoꞌmansenon koꞌmamî warantî aakoꞌmamîkon.
4 Maasa pra taapîtîyaꞌnîkon: —Uurî Paulo nekaremekîꞌpî yawîron, moropai tiaronya taa manniꞌ: —Uurî Apolo nekaremekîꞌpî yawîron. Mîrîrî taayaꞌnîkon ya, ayeserukon wanî mîrîrî Paapa epuꞌnenan pepîn yeseru warantî.
5 Anîꞌ pe mîîkîrî Apolo wanî? Moropai anîꞌ pe uurî, Paulo wanî? Ipîkku pe anna wanî pepîn, anapurîkon ton. Tîîse anna wanî Paapa poitîrîtonon pe neken. Mîrîrî yeꞌnen Uyepotorîkon maimu ekaremekî annaya yai, innape ikupîꞌpîyaꞌnîkon. Mîrîrî kupî annaya tiwin pîꞌ anna kaisarî siꞌma, maasa pra anna nîkupîton siꞌta taasaꞌ Uyepotorîkonya yeꞌnen.
6 Manniꞌ warayoꞌya tînpîmî pîmî warantî Paapa maimu ekaremekîꞌpîuya apîꞌnîkon. Moropai mîîkîrî warayoꞌ nîpîmîꞌpî yamannîꞌpîtî tiaron warayoꞌya aaroꞌtatoꞌpe warantî, Apoloya amîrîꞌnîkon yenupaꞌpî. Tîîse inkamoro ipîmîꞌtîponoꞌsanya yaroꞌtannîpî pepîn. Tîîse Paapaya neken yaroꞌtannîpî. Mîrîrî warantî nîrî amîrîꞌnîkon innape ikuꞌtoꞌ kupî Paapaya kureꞌne, annaya ikupî pepîn.
7 Mîrîrî yeꞌnen manniꞌ warayoꞌ ipîmîtîponoꞌpî moropai yamannîꞌpîtîponoꞌpî wanî pepîn mîrîrî ipîkku pe, tîîse yarentanîpîtîpon, Paapa wanî mîrîrî ipîkku pe.
8 Mîrîrî yeꞌnen inkamoro esenyakaꞌmaꞌsan ipîmî pîꞌ moropai yamannîꞌpîtî pîꞌ inkamoro wanî seꞌ kaisarî maasa pra toꞌ esenyakaꞌmasaꞌ yeꞌnen saꞌnîrî. Ipîmîtîpon wanî aaroꞌta yuꞌse, yamannîꞌpîꞌnen wanî aarenta yuꞌse. Mîrîrî yeꞌnen teesenyakaꞌmaꞌpîkon yepeꞌpî yapisî toꞌya tiwin pîꞌ tîkaisarîꞌnîkon teesenyakaꞌmaꞌpîkon pîkîrî.
9 Mîrîrî warantî anna wanî. Maasa pra uurî moropai Apolo yarakkîrî anna wanî teesenyakaꞌmasanon pe Paapa yarakkîrî. Moropai amîrîꞌnîkon wanî Paapa umîri pe warantî teesenyakaꞌmasanon esenyakaꞌmatoꞌpe akoreꞌtaꞌnîkon.
Moropai amîrîꞌnîkon wanî tewîꞌ pe Paapa nîkonekakon warantî.
10 Mîrîrî yeꞌnen uurî wanî wîttî koneka pîꞌ teesenyakaꞌmasen warantî. Wîttî konekanenya yapîtanîꞌnen ton saꞌman tîrî. Manniꞌ warantî uurîya itekare Cristo yekare ekaremekî akoreꞌtaꞌnîkon innape ikupîkonpa. Mîrîrî konekaꞌpîuya epeꞌmîra uupia Paapa nîtîrîꞌpî ke ikonekaꞌpîuya. Uyeꞌmaꞌpî pîꞌ tiaronkonya ikoneka. Mîrîrî yeꞌnen tîwarî tiaronkonya ikoneka eꞌpai awanî, morî pe ikonekakonpa ayenupaꞌpîuyaꞌnîkon yawîrî.
11 Maasa pra aasîrî Paapaya Jesus Cristo tîrîꞌpî. Wîttî konekanenya saꞌman tîrîꞌpî iteꞌseꞌ ton warantî, Paapaya itîrîꞌpî uyeꞌseꞌkon pe aweꞌtoꞌpe. Anîꞌya tiaron tîrî eserîke pra awanî, uyapîtanîꞌnenkon ton. Mîrîrî warantî tiaron yekare pîꞌ ayenupakon toꞌya eserîke pra awanî.
12 Moropai Paapa poitîrîtonon esenyakaꞌma koꞌmannîpî mîrîrî pîꞌ. Pemonkonyamîꞌ yenupa toꞌya, wîttî konekanenanya wîttî koneka warantî. Morî pe tiaronkonya wîttî koneka ourokon ke, moropai pratakon ke, moropai morîkon tîꞌkon ke. Mîrîrî wanî ipatîkarî tîîkoꞌmansen pe. Tîîse mîrîrîkon pona tiaronkonya ikoneka seꞌ tapairî, yeikon ke, moropai parîꞌkon ke, kuwai yarekon ke. Tîîse mîrîrî eseraꞌma kupî sîrîrî tiwin wei, tîîkoꞌmansen pe pra awanî.
13 Îꞌ pensa tuipî yai, Cristoya epuꞌtî kupî sîrîrî, îꞌ yeꞌka wanî saꞌman pe tîweꞌsen pe. Tiwin pîꞌ toꞌ kaisarî aronne eeseraꞌma. Maasa pra apoꞌ ke Cristoya yarannîpî tîuya yai, anîꞌya pemonkonyamîꞌ yenupa yairî, epuꞌtîiya apoꞌ ke, yairon aramî pepîn. Tîîse yei, parîꞌ, kuwai yare aramî. Mîrîrî warantî awanî Paapa pemonkonoyamîꞌya yenupatoꞌ pe, yairî pra tîweꞌsen pe.
14 Tîîse anîꞌya mîrîrî saꞌman pona wîttî konekasaꞌ ya, morî tîîkoꞌmansen ke, mîrîrî inkonekaꞌpî yarannîpî apoꞌya pepîn.
15 Tîîse tîîkoꞌmansen pepîn ke inkonekaꞌpî aramî tamîꞌnawîrî. Mîrîrî yeꞌnen eesenyakaꞌmaꞌpî yepeꞌpî tîrî Paapaya pepîn, maasa pra yairî ikonekasaiꞌya pra awanî yeꞌnen. Mîîkîrî wanî pe man, tewîꞌ aramî tanne, inamai warayoꞌ epaꞌka warantî. Îꞌ ton pra tîwanî yeꞌka pe aweꞌpîikaꞌtî. Mîrîrî warantî mîîkîrî eꞌpîikaꞌtî, îꞌ yapisî pra Paapa winîpai.
16 Itewîꞌ pe Paapa koꞌmantoꞌpe awanîkon epuꞌtîyaꞌnîkon pra naatî? Morî Yekaton Wannî koꞌmamî amîrîꞌnîkon yaꞌ itewîꞌ pe awanîkon yeꞌnen.
17 Mîrîrî yeꞌnen anîꞌya Paapa yewîꞌ tarumaꞌtî ya, mîîkîrî tarumaꞌtî Paapaya kupî sîrîrî. Yairî pra ipemonkonoyamîꞌ yenupaiya yeꞌnen, mîîkîrî seruꞌyeꞌ pe tîweꞌsen tarumaꞌtî Paapaya mararî pra. Maasa pra Paapa yewîꞌ mîrîrî morî inmoꞌkaꞌpî imakuiꞌsan koreꞌtapai. Amîrîꞌnîkon, Paapa yewîꞌ pe tîweꞌsanon wanî inmoꞌkaꞌsan pe tîmîrî ton pe.
18 Anîꞌ esenkuꞌtî eꞌpai pra man. Akoreꞌtaꞌnîkon epuꞌnen pe tîwanî kaiꞌma tîweꞌsen pîꞌ tauya sîrîrî. Maasa pra mîîkîrî esenkuꞌtîsaꞌ mîrîrî. Mîîkîrîya epuꞌnen pe tîweꞌtoꞌ yenumî eꞌpai awanî. Tiaronkon pia mîîkîrî ena eꞌpai awanî epuꞌnen pe pra, pakko pe tîweꞌsen warantî. Mîrîrî warantî neken epuꞌnen pe puꞌkuru awanî, epuꞌnen pe Paapa wanî warantî.
19 Manniꞌ epuꞌnen pe tîweꞌsen wanî ya teseru pîꞌ neken, mîîkîrî eraꞌma Paapaya îꞌ pe pra rî. Mîrîrî warantî aweꞌmenukasaꞌ wanîꞌpî pena:Paapaya inkamoro epuꞌnenan pe tîweꞌkuꞌsanon nepuꞌtî yenpo îꞌ pe pra rî. Toꞌ esenumenkatoꞌ wenai, toꞌ yeseru wenai, aronne eeseraꞌma yairî pra toꞌ wanî
taasaiꞌya wanîꞌpî.
20 Moropai inîꞌrî aweꞌmenukasaꞌ wanîꞌpî see warantî:Inkamoro yeꞌkakon ipîkkukon pe tîweꞌsanon esenumenkatoꞌ wanî îꞌ pe pra rî epuꞌtî Uyepotorîkonya
taasaiꞌya man.
21 Mîrîrî yeꞌnen pemonkon piapai îꞌ yuwayaꞌnîkon eꞌpai pra awanîkon, apîikaꞌtîiyaꞌnîkon. Tamîꞌnawîron tîîsaꞌ Paapaya îꞌ ton pra awanîkon namai.
22 Moropai insamoro Apolo, Pedro, uurî, anna wanî apîikaꞌtînenkon ton pe anna yapurîkonpa pra. Moropai aakoꞌmantoꞌkon wanî iwinîpainon pe. Moropai saꞌmantantoꞌ wanî Paapa nîtîrîꞌpî pe, tîîpia amîrîꞌnîkon koꞌmantoꞌpe ipatîkarî. Sîrîrî aweꞌkupî manniꞌ amîrîꞌnîkon yarakkîrî, moropai maasa aweꞌkupî ton, mîrîrî wanî tamîꞌnawîrî amîrîꞌnîkon ton pe itîrîꞌpîiya. Tamîꞌnawîrî sîrîrî tîrîꞌpîiya, aweꞌpîikaꞌtîtoꞌkon ton.
23 Moropai amîrîꞌnîkon wanî Cristo pemonkono pe, mîîkîrî poitîrîtonon pe. Moropai Cristo wanî Paapa narimaꞌpî pe, tamîꞌnawîronkon esaꞌ pe aweꞌtoꞌpe.
