Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 4:1-21
4 Amîrîꞌnîkonya anna epuꞌtî yuꞌse anna wanî Cristo poitîrîtonon pe. Anîꞌkan nepuꞌtî pîn imaimu ekaremeꞌnenan pe anna wanî Cristo maimu pe. Mîrîrî epuꞌtîyaꞌnîkon yuꞌse anna wanî.
2 Sîrîrî warantî yairî Paapa poitîrî pe tîweꞌsen wanî eꞌpai awanî tepotorî ton pe. Mîîkîrî pia yairon pe awanî imaimu yawîrî awanî yeꞌnen.
3 Tîîse amîrîꞌnîkon koreꞌta tiaronkonya taa ya upîꞌ: —Yairon mîîkîrî îꞌ kupîtîpon pepîn —taayaꞌnîkon ya eesenumenkatoꞌkon yawîrî, îꞌ pe pra rî see, epuꞌtîyaꞌnîkon pra awanî yeꞌnen. Mîrîrî warantî uurîya taa ya upîꞌrî: —Morî uurî —tauya ya, îꞌ pe pra rî awanî, maasa pra epuꞌtîuya pra awanî yeꞌnen.
4 Yairî pra îꞌ kuꞌsauꞌya pra wai, teuren tamîꞌnawîrî epuꞌtîuya pra wai. Yai pra îꞌ kuꞌsauꞌya wai unepuꞌtî pepîn. Tîîse anîꞌya uyepuꞌtî, Uyepotorîkonya neken epuꞌtî. Mîrîrî yeꞌnen mîîkîrîya neken taa upîꞌ, yairî pra awanî, yairî awanî.
5 Mîrîrî yeꞌnen mîrîrî warantî kîkatî tiaronkon nîkonekaꞌpî pîꞌ, maasa mîrîrî weiyu erepamî pra tîîse. Tîîse Uyepotorîkonya mîrîrî taa weiyu erepamî nîmîꞌtî. Mîîkîrîya neken yenpo kupî sîrîrî, unepuꞌtîꞌpîkon pepîn. Moropai mîîkîrîya îꞌ kaiꞌma uyewankon yaꞌ esenumenkaꞌnîꞌpî yenpo. Mîrîrî yai, tiwin pîꞌ eꞌnî tanne, Paapaya uyapurîkon kupî sîrîrî unkupîꞌpîkon pîkîrî.
6 Uyonpayamîꞌ, eseurîma sîrîrî uurî pîꞌ moropai Apolo pîꞌ eesenupakonpa, îꞌ kaiꞌma tiaron pemonkon yapurîyaꞌnîkon ya yai, tiwinan yapurîkonpa pra. Maasa pra anîꞌ yeseru wanî morî pe epuꞌtoꞌpeꞌnîkon, taasaꞌ Paapaya man mîîtoꞌpe. Imaimu eꞌmenukasaꞌ wenai epuꞌtîꞌnîkon, anîꞌ esenumenkatoꞌ wenai pra, îꞌ rî tiaron wenai pra. Mîrîrî yeꞌnen mîrîrî yawîrî ikuꞌtî. Mîrîrî Paapa maimu yawîrî awanîkon ya, tiwin Cristo naipontîꞌpî kupîyaꞌnîkon pepîn tiaronkonya ikupî yentai.
7 Mîrîrî warantî awanîpa anîꞌya kin ipîkku pe akupîꞌpî tiaronkon yentai? Paapaya itîîsaꞌ pra nai, mîrîrî aapia manniꞌ tamîꞌnawîrî? Tîîse îꞌ waniꞌ awanî yeꞌnen ipîkku pe aatapurîkon aawarîronkon pe tîweꞌkuꞌse. Paapa nîtîrîꞌpî pe pra tîkuꞌse aatapurîkon.
8 Aapiaꞌnîkon tamîꞌnawîron epuꞌnen esaꞌ pe awanîkon kaiꞌma tîîse îꞌ ton pra siꞌma, pakko pe eenasaꞌkon man. —Ipîkkukon pe tamîꞌnawîrî epuꞌnen tîîsaꞌ Paapaya anna pia —taayaꞌnîkon. Moropai tîwî anna, Cristo naipontîꞌsan kupîꞌpîyaꞌnîkon, anna maimu yawîrî pra awanîkon. Tiaronkon esaꞌ pe aweꞌkupîꞌpîkon reiyamîꞌ pe. Mîrîrî warantî awanîkon ya, ayarakkîrîꞌnîkon anna nîrî wanî eꞌpainon, reiyamîꞌ pe. Tîîse mîrîrî warantî awanî pepîn.
9 Maasa pra uupia Paapaya manniꞌkan pemonkonyamîꞌ tewanmarîꞌsenon pataꞌseꞌ yaꞌ anna tînaipontîꞌsan tîrîꞌpî. Mîrîrî yeꞌnen anna wanî warayoꞌkon manniꞌkan pemonkon wîîtîponoꞌsan warantî aasaꞌmanta ton pe tamîꞌnawîronkonya eraꞌma tanne. Mîrîrî warantî anna wanî, pemonkonyamîꞌya moropai inserîyamîꞌya nîrî eraꞌma tanne.
10 Cristo wenai epuꞌnen pe anna eꞌtoꞌ tarîron rumakaꞌpî annaya imaimu ekaremeꞌtoꞌpe annaya kaiꞌma. Mîrîrî wenai pakko pe warantî anna wanî sîrîrî. Tîîse amîrîꞌnîkon kaane, epuꞌnen pe aweꞌkupîkon Cristo pemonkono pe awanîkon yeꞌnen. Tîîse anna wanî aꞌtuꞌmîra tîweꞌsanon pe, anna maimu pîinama pra anîꞌya eꞌpai awanî. Tîîse amîrîꞌnîkon eꞌkupî meruntî ke, ipîkku pe amaimukon wanî. Moropai anna wanî tamîꞌnawîronkon newanmîrîkon pe. Tîîse amîrîꞌnîkon eꞌkupî tamîꞌnawîronkon napurîkon pe. Mîrîrî warantî eesenumenkakon anna pîꞌ.
11 Tîîse îꞌ kaiꞌma awanî anna yarakkîrî ekaremekîuya sîrîrî. Sîrîrî tîpose anna eꞌtarumaꞌtî koꞌmannîꞌsaꞌ man. Emiꞌnan pîꞌ moropai tuna aninnîpai anna eꞌtoꞌ pîꞌ. Anna pon ton pra mararon yeꞌrî saꞌne, anna pon pe tîîse. Anna poꞌpîtî toꞌya. Moropai morî pe anna koꞌmamî pataꞌseꞌ ton pra anna wanî.
12 Moropai anna esenyakaꞌmapîtî taapîꞌkaꞌse mararî pra, anna yekkari yonpatoꞌpe annaya kaiꞌma. Mîrîrî yai anna winîkîi imakuiꞌpî pe teeseurîmasanon pîꞌ, morî pe anna wanî toꞌ winîkîi. Mîrîrî warantî anna tarumaꞌtî toꞌya tanne, yapîtanîpî annaya, anna ekoreꞌma pra.
13 Anna pîꞌ toꞌ woꞌmaꞌta yai, toꞌ maimu yuuku annaya morî pe, îri pe pra. Mîîwîni tîîse anna kupî toꞌya nura emurukuntîsaꞌ poro pona tîpaꞌsen warantî. Moropai sîrîrî tîpose anna wanî toꞌ pia nura warantî.
14 Tîîse mîrîrî warantî amîrîꞌnîkon yeppeꞌnîꞌtoꞌpeuya imenukauya pepîn tîîse ayunkon pe ayenupatoꞌpîuyaꞌnîkon unmukuyamîꞌ warantî awanîkon yeꞌnen.
15 Innape Jesus kupîꞌpîyaꞌnîkon pata pai tuꞌkankon ayenupatonkonya ayenupaꞌsaꞌkon tanne, tîîse ayunkon epuꞌtîyaꞌnîkon eꞌpai awanî tiwin. Uurî neken wanî ayunkon pe, maasa pra eꞌmaiꞌ pe Jesus Cristo yekare ekaremekîꞌpîuya apîꞌnîkon innape ikupîkonpa.
16 Mîrîrî yeꞌnen uyeseru warantî ayeserukon yuꞌse wanî.
17 Mîrîrî wenai, uwakîri unmu Timóteo yarimauya sîrîrî aapiaꞌnîkon. Mîîkîrî wanî unmu pe innape Jesus kupîtîpon pe moropai yairon pe awanî yeꞌnen. Mîîkîrî yarimauya apîikaꞌtîiꞌnîkon, attîtoꞌpe ayenpenatanîꞌseꞌnîkon uyeseru unkupî kupîkonpa. Îꞌ kaiꞌma Cristo yekare pîꞌ pemonkonyamîꞌ yenupauya tamîꞌnawîronkon soosikon tapîꞌ ekaremeꞌnen pe yarimauya.
18 Tiaronkon wanî amîrîꞌnîkon koreꞌta mîî pe, innape akoreꞌtaꞌnîkon uutî pepîn kaiꞌma.
19 Tîîse ituꞌse Uyepotorîkon wanî ya, uutî kaꞌneꞌ pe amîrîꞌnîkon eraꞌmapîꞌse. Mîrîrî yai erepansaꞌ pe inkamoro mîî pe tîweꞌsanon epuꞌtîuya. Îꞌ kupî toꞌya teeseurîmakon yawîrî epuꞌtîuya, îꞌ tîkuꞌse pra, tîmaimukon pe neken toꞌ eseurîma koꞌmannîpî epuꞌtîuya.
20 Maasa pra uyesaꞌkon pe Paapa ena ya, umaimukon ke neken eseurîman pepîn mîrîrî, tîîse imeruntîri wenai Cristo maimu yawîrî koꞌmannî, morî tîkuꞌse.
21 Mîrîrî yeꞌnen uuipî yai oꞌnon yeꞌka pe uuipî yuꞌse awanîkon? Ayakoꞌmenkauyaꞌnîkon teekoreꞌmai kaꞌrî uuipî yuꞌse awanîkon, umaimu yawîrî pra awanîkon yeꞌnen? Morî pe kaꞌrî uuipî yuꞌse awanîkon, umaimu yawîrî awanîkon yeꞌnen?
