Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 5:1-13
5 Akoreꞌtaꞌnîkon imakuiꞌpî kureꞌnan eꞌkupî koꞌmannîpî yekare eta pîꞌ wai. Inkamoro Paapa epuꞌnenan pepînya mîrîrî yeꞌka kupî pepîn eꞌpainon. Tîîse eta pîꞌ wai warayoꞌ wanî akoreꞌtaꞌnîkon tîyun noꞌpî tîmamaikîrî yarakkîrî tîweꞌsen.
2 Tîîse oꞌnon yeꞌka pe mîrîrî yeꞌka eꞌkupî tanne akoreꞌtaꞌnîkon mîî pe awanîkon kaiꞌma awanîkon? Mîrîrî yeꞌka eꞌkuꞌsaꞌ pîꞌ aweppepîkon pra awanîkon. Teesewankonoꞌmai eꞌtî mîrîrî pîꞌ, ayonpakon saꞌmantasaꞌ pîꞌ eesewankonoꞌmakon warantî. Mîîkîrî warayoꞌ mîrîrî imakuiꞌpî kupîtîpon, mîîkîrî yenpaꞌkatî akoreꞌtapaiꞌnîkon.
3 Uurî wai tarî akoreꞌtaꞌnîkon pra miarî ayarakkîrîꞌnîkon eseurîmatoꞌpe. Tîîse apokonpeꞌnîkon wanî sîrîrî esenumenkatoꞌ ke îꞌ kaiꞌma eꞌkupîꞌpî akoreꞌtaꞌnîkon pîꞌ esenumenka yeꞌnen. Cristo naipontîꞌpî pe wanî yeꞌnen, uurî esenumenkasaꞌ wai îꞌ kupî eꞌpai awanî pîꞌ mîîkîrî yarakkîrî, Uyepotorîkon Jesus maimu pe mîîkîrî warayoꞌ, imakuiꞌpî kupîtîpon yenpaꞌka eꞌpai awanî.
4 Mîrîrî yeꞌnen îꞌ pensa eemurukuntîkon yai, akoreꞌtaꞌnîkon nîrî eꞌpai wai esenumenkatoꞌ ke. Uyepotorîkon Jesus Cristo wanî nîrî akoreꞌtaꞌnîkon.
5 Mîîkîrî meruntîri yai mîîkîrî warayoꞌ imakuiꞌpî kupîtîpon rumakatî Makui yenyaꞌ, itarumaꞌtîtoꞌpeiya inkupîꞌpî wenai. Mîrîrî wenai tîweꞌtarumaꞌtî epuꞌtî tîuya ya, awenpenatatoꞌpe imakuiꞌpî tînkupîꞌpî rumaka pîꞌ. Mîrîrî warantî neken awenpenatasaꞌ ya, Uyepotorîkonya pîikaꞌtî tuipî weiyu yaino ton pe.
6 Mîrîrî yeꞌka pîꞌ mîî pe awanîkon eꞌpai pra man. Maasa epuꞌtîyaꞌnîkon eꞌpai man. Mararon isaꞌmotoꞌ wanî ya, kîsereꞌna koreꞌta, tamîꞌnawîrî isaꞌmoiya eꞌpainon. Mîrîrî warantî imakuiꞌpî kuꞌsaꞌ tiwinanya ya, tamîꞌnawîronkon amîrîꞌnîkon tarumaꞌtîiya.
7 Mîrîrî yeꞌnen mîrîrî imakuiꞌpî pe tîweꞌsen yenpaꞌkatî akoreꞌtapaiꞌnîkon imakuiꞌpî ton pra, morî pe awanîkonpa. Mîrîrî warantî ikuꞌtî, Judeuyamîꞌya ikuꞌpîtîꞌpî warantî. Tewîꞌkon tapai isaꞌmotoꞌ moꞌkaꞌpî toꞌya moropai carneiro more wîꞌpî toꞌya, festa pîꞌ toꞌ eꞌtoꞌpe. Maasa pra toꞌ enpenatapîtîꞌpî îꞌ pensa tesanonkon piapai teepaꞌkatoꞌkon pîꞌ. Mîrîrî pîꞌ toꞌ atausinpaꞌpî kureꞌne. Moropai manniꞌ carneiro more wîîsaꞌ wanî warantî, Cristo wîîsaꞌ wanîꞌpî uurîꞌnîkon moꞌkapa kaiꞌma imakuiꞌpî piapai.
8 Mîrîrî yeꞌnen uurîꞌnîkon koreꞌtapai imakuiꞌpî yenpaꞌkanpaiꞌnîkon, morî pe atausinpantoꞌpe, amenan koꞌmannîtoꞌ pîꞌ. Cristo, uurîꞌnîkon ton pe aasaꞌmantaꞌpî manniꞌ pîꞌ enpenatan pe yapurîpaiꞌnîkon man, imakuiꞌpî ton pra siꞌma. Tîîse penaron imakuiꞌpî uyeserukon tîrumakai, yairon pe puꞌkuru siꞌma yapurîpaiꞌnîkon man.
9 Manniꞌ tiaron kaareta menukaꞌpîuya aapiaꞌnîkon taꞌpîuya apîꞌnîkon, manniꞌkan nura kuꞌnenan, seꞌ tapairî wîriꞌsanyamîꞌ yarakkîrî, warayoꞌ yarakkîrî tîweꞌsanon pokonpe awanîkon namai.
10 Mîrîrî taꞌpîuya, tîîse manniꞌkan Paapa epuꞌnenan pepîn piapai aatarimakonpa taasauꞌya pra wai. Inkamoro wanî imakuiꞌpî kuꞌnenan pe, seꞌ tapairî wîriꞌ yarakkîrî tîweꞌsanon pe. Moropai tonpakon winîpai îꞌ yuꞌse teesekaꞌnunkasanon pe, moropai amaꞌyeꞌkon pe tîweꞌsanon pe, moropai miaꞌ ke ikonekasaꞌ yapurînenan pe. Inkamoro pîꞌ eseurîmasaꞌ pra wai toꞌ koreꞌta koꞌmannî namai. Maasa pra inkamoro koreꞌtapai atariman ya, sîrîrî non yapai epaꞌkan eꞌpainon, saꞌmantan eꞌpainon inkamoro pokonpe eꞌnî namai.
11 Tîîse tauya manniꞌ apîꞌnîkon. Manniꞌ ayonpakon, innape Jesus kuꞌnen taiya manniꞌ, tîîse teseru tîîse yairî pra. Iteseru wanî wîriꞌsanyamîꞌ yarakkîrî tîweꞌsen pe, moropai tiaronkon winîpai îꞌ yuꞌse tîweꞌsen pe kureꞌne, moropai miaꞌ ke ikonekasaꞌ yapurînen pe, moropai teetînsen pe, moropai imakuiꞌpî pe tiaronkon winîkîi teeseurîmasen pe, moropai amaꞌyeꞌ pe tîweꞌsen pe. Mîîkîrî yeꞌka ayonpakon yarakkîrî awanîkon eserîke pra naatîi. Ipokonpe siꞌma ayekkarikon yonpayaꞌnîkon eserîke pra naatîi. Atarimatî iipiapai.
12 5:12,13 Uurîya Paapa epuꞌnenan pepînon yeseru yakoꞌmenka eserîke pra man, tîîse Paapaya neken inkamoro yeꞌkakon yakoꞌmenka. Tîîse amîrîꞌnîkonya ayonpakon, innape Jesus kuꞌnenan yeseru yakoꞌmenka eꞌpai awanî. Maasa pra mîrîrî warantî Paapa maimu eꞌmenukasaꞌya taasaꞌ:—Mîîkîrî warayoꞌ imakuiꞌpî kupîtîponoꞌpî yenpaꞌkatî akoreꞌtapaiꞌnîkon
—taasaiꞌya. Mîrîrî yeꞌnen mîrîrî warantî ikuꞌtî.
13 Eraꞌmakî 5:12
