Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 7:1-40
7 Tarîpai uyekaranmapotoꞌyaꞌnîkon pîꞌ ayeurîmauyaꞌnîkon sîrîrî. Inna seruꞌ pepîn warayoꞌ noꞌpîta pra awanî ya, morî pe awanî.
2 Tîîse tuꞌke imakuiꞌpî kuꞌtoꞌ moro awanî. Mîrîrî namai, seꞌ tapairî wîriꞌsanyamîꞌ yarakkîrî awanî namai, warayoꞌ noꞌpîta eꞌpai awanî, aakoꞌmantoꞌpe tînoꞌpî yarakkîrî. Moropai mîrîrî warantî nîrî wîriꞌ etinyoma eꞌpai awanî tînyo yarakkîrî aakoꞌmantoꞌpe.
3 7:3,4 Mîrîrî yeꞌnen warayoꞌ inoꞌpîtaꞌpî koꞌmamî eꞌpai awanî morî pe tînoꞌpî yarakkîrî. Mîrîrî yeꞌnen warayoꞌya —Unoꞌpî yarakkîrî eꞌpai pra wai —taa eserîke pra awanî. Maasa pra imîrî pe awanî yeꞌnen. Mîrîrî warantî nîrî wîriꞌya —Unyo yarakkîrî eꞌpai pra wai —taa eserîke pra awanî. Maasa pra imîrî pe awanî yeꞌnen.
4 Eraꞌmakî 7:3
5 Mîrîrî yeꞌnen inkamoro etîꞌnînma pepîn tînyo yarakkîrî moropai tînoꞌpî yarakkîrî, —Ayarakkîrî eꞌpai pra wai —tîkai pra. Tîîse saꞌnîrî tîweꞌtoꞌkon mîꞌpannîpî eꞌpai awanî, ituꞌse tîwanîkon ya. Inkamoro eseta eꞌpai awanî tîweiyukon ton tîkuꞌneꞌtîi teepîremakon pîꞌ taatapisîkonpa. Mîrîrî ikuꞌsaꞌ tîuyaꞌnîkon tîpo, inîꞌrî morî pe toꞌ ena tînoꞌpî yarakkîrî. Maasa pra yapîtanîpî toꞌya eserîke pra awanî ya, Makuiya imakuiꞌpî kupî toꞌya emapuꞌtî. Mîrîrî namai saꞌnîrî toꞌ ena eꞌpai awanî, tînoꞌpî yarakkîrî.
6 Mîrîrî warantî esenumenkatoꞌ pîꞌ tauya sîrîrî, ikupîkonpa ayaipontîuyaꞌnîkon pepîn.
7 Uurî pia morî pe awanî, tamîꞌnawîronkon wanî ya uurî warantî, inoꞌpî ton pra. Teuren tîîse tiwin pîꞌ eꞌnî tanne, Paapaya uyeserukon ton tîîsaꞌ mîrîrî. Noꞌpîtantoꞌ yeseru ton tîrîiya tiaronkon pia moropai inoꞌpî pra koꞌmannî yeseru ton tîrîiya tiaronkon pia.
8 Tarîpai eseurîma sîrîrî maasaronkon inoꞌpî pînon pîꞌ, moropai inyo isaꞌmantaꞌsan pîꞌ. Tauya, morî pe awanî eꞌpainon tîînoꞌpîtai pra aakoꞌmamîkon ya, uurî warantî.
9 Tîîse yapîtanîpîyaꞌnîkon eserîke pra awanîkon ya, moriya anoꞌpîtatî. Maasa pra morî pe awanî aanoꞌpîtakon ya, pînîn pîꞌ aakoꞌmamîkon yentai, anoꞌpîkon yarakkîrî aakoꞌmamîkonpa.
10 Tarîpai eseurîma sîrîrî manniꞌkan inoꞌpîtaꞌsan pîꞌ moropai etinyomaꞌsan pîꞌ. Sîrîrî tauya manniꞌ uwinîpainon pepîn tîîse Uyepotorîkon winîpainon unkupîkon ton pe inekaremekîꞌpî.
11 Wîriꞌ etinyomaꞌpîya tînyo rumaka eserîke pra awanî. Irumakasaiꞌya ya, tiwinsarî aakoꞌmamî eꞌpai awanî, tiaron yarakkîrî tîweꞌse pra. Mîîwîni pra awanî ya, tînyo yarakkîrî tîîkoꞌmantoꞌpe etinaꞌpaka eꞌpai awanî. Moropai warayoꞌ inoꞌpîtaꞌpîya tînoꞌpî rumaka eserîke pra awanî.
12 Tarîpai tauya sîrîrî tiaronkon pîꞌ. Uyepotorîkonya taasaꞌ pra man tarî tîwanî yai, tîîse uurîya taa sîrîrî. Manniꞌ warayoꞌ innape Jesus kuꞌnen, mîîkîrî noꞌpî wanî ya innape Jesus kuꞌnen pe pra, tîîse morî pe toꞌ koꞌmamî ya saꞌnîrî, inyoya irumaka eserîke pra awanî.
13 Moropai wîriꞌ innape Jesus kuꞌnen, inyo wanî ya innape Jesus kuꞌnen pe pra, tîîse inkamoro koꞌmamî ya morî pe, inoꞌpîya irumaka eserîke pra awanî.
14 Maasa pra mîîkîrî warayoꞌ innape Jesus kuꞌnen pepîn mîîkîrî pîrema Paapaya innape Jesus kuꞌnen pe inoꞌpî wanî wenai. Moropai tiaron warayoꞌ innape Jesus kuꞌnen mîîkîrî noꞌpî wanî innape Jesus kuꞌnen pe pra. Tîîse Paapaya inoꞌpî pîrema, innape Jesus kuꞌnen pe inyo wanî wenai. Tîîse mîrîrî warantî pra awanî ya, morî pe mîîkîrî munkîyamîꞌ wanî pepîn Paapa yarakkîrî, ipemonkono pe pra toꞌ wanî yeꞌnen. Tîîse tîpemonkono pe inyo wanî wenai, Paapaya toꞌ pîrema, toꞌ koꞌmannîpîiya morî pe.
15 Mîrîrî yeꞌka pe pra awanî ya, mîîkîrî warayoꞌ innape Jesus kuꞌnen pepîn wanî ya, ikoꞌmanpai pra innape Jesus kuꞌnen tînoꞌpî yarakkîrî, moropai wîriꞌ innape Jesus kuꞌnen pepîn wanî ya, ikoꞌmanpai pra tînyo innape Jesus kuꞌnen yarakkîrî, moriya tîwî eepaꞌka. Mîrîrî warantî eepaꞌkaꞌpî ya, îꞌ waniꞌ pra man. Yarakkîrî puꞌkuru aakoꞌmamî eꞌpai pra awanî. Maasa pra uurîꞌnîkon yannoꞌpî Paapaya morî pe koꞌmannîtoꞌpe tîîwanmîra, tînoꞌpî ke, tînyo ke.
16 Tîîse innape Jesus kupîiya pra tîîse, yarakkîrî aakoꞌmamî ya, îꞌ pensa innape Jesus kupî anyoya epuꞌtîya pra nai. Yai pra innape ikupîiya awenai. Moropai warayoꞌ îꞌ pensa innape Jesus kupî mîîkîrî anoꞌpîya epuꞌtîya pra nîrî nai. Yai pra innape ikupîiya awenai. Mîrîrî yeꞌnen ayuꞌse awanî ya, yarakkîrî akoꞌmankî.
Paapa Maimu Yawîrî Neken
Ayeserukon Miakanmatî
17 Akaisarîꞌnîkon tiwin pîꞌ siꞌma mîrîrî Uyepotorîkon nîtîrîꞌpî aapiaꞌnîkon yawîrî ikupî pîꞌ akoꞌmantî. Moropai oꞌnon yeꞌka pe awanîꞌpîkon pena Paapaya ayannokon yai, mîrîrî warantî akoꞌmantî. Mîrîrî pîꞌ tamîꞌnawîronkon yenupaꞌpîuya soosikon kaisarî.
18 Mîrîrî yeꞌnen anîꞌ wanî ya, Judeuyamîꞌ yeseru yawîrî tîmere piꞌpî pottî yaꞌtîtîpon wanî ya innape Jesus kupîiya rawîrî, mîrîrî warantî rî aakoꞌmamî eꞌpai awanî, Judeu pe aweꞌtoꞌ tenonse pra. Mîrîrî warantî nîrî anîꞌ wanî ya, Judeuyamîꞌ yeseru yawîrî pra Paapaya tanno rawîrî, mîrîrî warantî aakoꞌmamî eꞌpai awanî, tîmere piꞌpî pottî taꞌtîi pra.
19 Maasa pra mîrîrî yeꞌkaya îꞌ kupî pepîn mîîtoꞌpe. Judeuyamîꞌ yeseru yaꞌ awanî kaꞌrî, kaane, tîîse îꞌ eꞌpai awanî innape Paapa maimu yawîrî aakoꞌmamî eꞌpai awanî.
20 Mîrîrî yeꞌnen tiwin pîꞌ siꞌma oꞌnon yeꞌka pe awanîꞌpîkon pena Paapaya ayannokon yai, mîrîrî yawîrî akoꞌmantî.
21 Pena Paapaya ayanno ya, toꞌ poitîrî pe kin aweꞌsaꞌ pra nan? Moriya akoꞌmankî toꞌ poitîrî pe. Îꞌ waniꞌ awanî pepîn. Tîîse îꞌ pensa toꞌ poitîrî pe pra eenatoꞌ weiyu erepamî ya, moriya epaꞌkakî.
22 Maasa pra tesaꞌ kenankon inkamoro yanno Uyepotorîkonya ya, tarîpai inkamoro wanî Paapa pia itesaꞌ pra. Maasa pra Paapaya toꞌ moꞌkasaꞌ yeꞌnen, imakuiꞌpî piapai. Mîrîrî warantî tesaꞌ kenankon pepînon wanî mîrîrî Paapa pia ipoitîrî pe.
23 Maasa pra tamîꞌnawîronkon amîrîꞌnîkon yeꞌmasaꞌ Paapaya sîrîrî, seꞌ kaisarî. Mîrîrî yeꞌnen Paapa maimu yawîrî akoꞌmantî imîrî pe awanîkon yeꞌnen, tiaron pemonkono pe pra.
24 Mîrîrî yeꞌnen uyonpayamîꞌ, tiwin pîꞌ siꞌma akaisarîꞌnîkon oꞌnon yeꞌka pe awanîꞌpîkon ayannoꞌpîkon Paapaya yai, mîrîrî yawîrî akoꞌmantî.
Inyo Isaꞌmantaꞌsan Pîꞌ Moropai Maasaronkon Pîꞌ Paulo Eseurîma
25 Tarîpai tauya sîrîrî maasaronkon pîꞌ. Uyepotorîkon winîpainon pepîn tîîse uurî esenumenkatoꞌ sîrîrî. Tîîse innape eseurîmatoꞌ kupîyaꞌnîkon eserîke awanîkon, maasa pra yairî tîweꞌsen ukuꞌsaꞌ Uyepotorîkonya, tîꞌnokoꞌpî pe uyeraꞌmasaiꞌya wenai.
26 Mîrîrî yeꞌnen uurî esenumenkatoꞌ wanî warayoꞌ koꞌmamî eꞌpai awanî, tîwanî manniꞌ warantî. Maasa pra koꞌmannîtoꞌ wanî saꞌme mîîtoꞌpe.
27 Tîîse amîrî wanî ya tînoꞌpî ke, anoꞌpî yarakkîrî teeturumakai pra eꞌkî. Tîîse inoꞌpî pra awanî ya, moriya akoꞌmankî inoꞌpî pra.
28 Tîîse aanoꞌpîtasaꞌ ya, mîrîrî wanî pepîn imakuiꞌpî pe. Moropai maasaron wîriꞌ etinyoma ya, mîrîrî nîrî wanî pepîn imakuiꞌpî pe. Tauya sîrîrî maasa pra amîrîꞌnîkon anpîikaꞌtîpai wanî yeꞌnen, saꞌme inoꞌpîtaꞌsan koꞌmantoꞌ yeseru wanî yeꞌnen, mîrîrî warantî ayeserukon wanî namai.
29 Uyonpayamîꞌ îꞌ ankapai eꞌtoꞌ pîꞌ tauya sîrîrî. Tîîkoꞌmanse puꞌkuru pra koꞌmannîtoꞌ ataretîꞌka pe man. Mîrîrî yeꞌnen tînoꞌpî ke awanîkon ya, mîîkîrî pîꞌ neken kîsenumenkatî. —Paapa pataꞌseꞌ ton pra man —tîkai pra eꞌtî.
30 Moropai esewankonoꞌmantoꞌ erepansaꞌ ya uponaꞌnîkon, mîrîrî pîꞌ neken kîsenumenkatî. Moropai aatausinpatoꞌkon erepansaꞌ ya, ipîkku pe mîrîrî pîꞌ neken kîsenumenkatî. Maasa pra ipatîkarî aakoꞌmamî pepîn. Moropai ayemannekon ton yenna pîꞌ kîsenumenkai ipîkku pe. Maasa pra mîrîrîkon wanî taataretîꞌkasen pe.
31 Mîrîrî yeꞌnen ipîkku pe tamîꞌnawîrî sîrîrî pata yemanne pîꞌ kîsenumenkatî. Maasa pra tamîꞌnawîron sîrîrî pata po tîweꞌsanon ataretîꞌka kupî sîrîrî. Mîrîrî yeꞌnen ipîkku pe Paapa yapurî pîꞌ koꞌmanpaiꞌnîkon.
32 Tuꞌkan esenumenkantoꞌ winîpai amîrîꞌnîkon anpîikaꞌtîpai wanî sîrîrî. Mîrîrî yeꞌnen warayoꞌ inoꞌpî ton pîn mîîkîrî esenumenka Uyepotorîkon ton pe teesenyakaꞌma pîꞌ maasa pra anapurîpai tîwanî yeꞌnen.
33 Tîîse warayoꞌ tînoꞌpî kenan esenumenkatoꞌ wanî tuꞌke, sîrîrî non po tîîkoꞌmantoꞌ yeseru pîꞌ. Mîrîrî kupîiya, maasa pra tînoꞌpî anapurîpai tîwanî yeꞌnen.
34 Mîrîrî yeꞌnen mîîkîrî esenumenkatoꞌ wanî asakîꞌne kaisarî. Eesenumenka tarî tîîkoꞌmantoꞌ yeseru pîꞌ moropai eesenumenka Uyepotorîkon ton pe eesenyakaꞌmapai tîwanî pîꞌ. Mîrîrî warantî nîrî wîriꞌsanyamîꞌ wanî. Manniꞌkan inyo isaꞌmantaꞌsan moropai inyo pînon, inkamoro esenumenka Uyepotorîkon ton pe teesenyakaꞌmakon pîꞌ, tiaron pîꞌ teesenumenkai pra. Mîrîrî yeꞌnen tamîꞌnawîrî toꞌ eturumaka Uyepotorîkon yenyaꞌ eesenyakaꞌmatoꞌ kupîkonpa. Tîîse manniꞌkan wîriꞌsanyamîꞌ tînyo kenankon inkamoro esenumenka sîrîrî pata po tîîkoꞌmantoꞌkon yeseru pîꞌ. Maasa pra tînyokon anapurîpai tîwanîkon yeꞌnen.
35 Mîrîrî warantî tauya sîrîrî amîrîꞌnîkon pîꞌ maasa pra amîrîꞌnîkon anpîikaꞌtîpai wanî yeꞌnen. —Sîrîrî warantî ikuꞌtî —tauya pepîn. Tîîse yairon kupîyaꞌnîkon yuꞌse wanî. Moropai Uyepotorîkon esenyakaꞌmatoꞌ kupîkonpa itenyaꞌ eeturumakakon yuꞌse wanî, tuꞌke teesenumenkai pra.
36 Taawasirî pîꞌ —Ayarakkîrî uunoꞌpîta —taasaꞌ warayoꞌya tîpo, aakoꞌmamî ya inoꞌpî pe pra moropai mîrîrî pîꞌ eesenumenka yairî pra tîwanî pîꞌ, maasa pra taasaꞌ tîuya yawîrî ikupîiya pepîn. Moropai kureꞌne eesenumenka ya tawasirî yarakkîrî tîwanî pîꞌ, aanoꞌpîta eꞌpai awanî. Maasa pra yapîtanîpîiya yentai awanî yeꞌnen. Mîrîrî kupîiya ya, imakuiꞌpî pe awanî pepîn. Morî pe awanî, aanoꞌpîta ya.
37 Tîîse tawasirî yarakkîrî tîwanî pîꞌ eesenumenka pra awanî ya, inoꞌpîtapai pra tîwanî yeꞌnen, îꞌ waniꞌ awanî pepîn, tamîꞌnawîrî yapîtanîpîiya ya. Imakuiꞌpî kupîiya pepîn mîrîrî.
38 Tarîpai manniꞌ tîînoꞌpîtasen noꞌpîta ya, imakuiꞌpî pe awanî pepîn, tîîse morî pe awanî. Moropai manniꞌ tîînoꞌpîtasen pepîn koꞌmamî ya inoꞌpî pra, îꞌ waniꞌ awanî pepîn nîrî. Mîrîrî wanî morî pe panpîꞌ, maasa pra inoꞌpî ton pra awanî yeꞌnen.
39 Aꞌkî, wîriꞌ tînyo kenan koꞌmamî eꞌpai awanî tînyo yarakkîrî, enen tînyo wanî pîkîrî tîrumakai pra. Tîîse tiaron pensa tînyo saꞌmantasaꞌ tîpo, mîîkîrî eturumaka tiwinsarî, inyo pra. Mîîkîrî koꞌmamî ituꞌse tîwanî pîkîrî. Etinyomapai tîwanî ya, eetinyoma eꞌpai awanî, innape Jesus kuꞌnen yarakkîrî.
40 Tîîse uurî pia eetinyoma pra awanî ya, morî pe panpîꞌ aakoꞌmamî eꞌpainon mîrîrî warantî rî. Sîrîrî uurî esenumenkatoꞌ neken pepîn, tîîse uurî pia mîrîrî warantî nîrî Morî Yekaton Wannî esenumenka.
