Sîrîrî Kaareta Eꞌmaiꞌnon Kaareta Paulo Nîmenukaꞌpî Coríntio Ponkon Pia 8:1-13
8 Tarîpai eseurîmatoꞌ moꞌtanîpîuya sîrîrî. Eseurîma sîrîrî miaꞌ ke ikonekasaꞌ pia toꞌ nîtîrîꞌpî entamoꞌkantoꞌ yanî eserîke awanî pîꞌ, kaane kaꞌrî. Mîrîrî pîꞌ taayaꞌnîkon manniꞌ warantî, tamîꞌnawîrî uurîꞌnîkon, innape ikuꞌnenanya epuꞌtî pîꞌ man, innape ikuꞌnenan pepînya epuꞌtî yentai. Miaꞌ ke ikonekasaꞌ nama pepîn. Mîrîrî yeꞌnen toꞌ nîtîrîꞌpî entamoꞌkantoꞌ yanî ya, îꞌ waniꞌ awanî pepîn, imakuiꞌpî pe awanî pepîn. Tîîse mîrîrî esenumenkantoꞌ wanî pîikaꞌtîton pe pra, tîîse mîî pe uurîꞌnîkon kuꞌnen pe. Tîîse morî pe panpîꞌ eꞌsaꞌnaman yeseru wanî mîrîrî, tiaronkon pîikaꞌtîtoꞌpe, maasa pra toꞌ saꞌnama wenai.
2 Anîꞌ esenumenka ya, îꞌ epuꞌnen pe tîwanî kaiꞌma, tîîse tamîꞌnawîrî epuꞌtîiya pepîn, îꞌ anepuꞌpai tîwanî.
3 Tîîse anîꞌ Paapa yapurînen wanî ya, innape epuꞌtîiya, îꞌ kaiꞌma tîîkoꞌmamî tonpakon yarakkîrî. Moropai mîrîrî eraꞌma Paapaya tîwakîri pe.
4 Mîrîrî yeꞌnen mîrîrî entamoꞌkantoꞌ miaꞌ ke ikonekasaꞌ pia toꞌ nîtîrîꞌpî yanî pîꞌ apanamauyaꞌnîkon sîrîrî. Mîrîrî miaꞌ ke ikonekasaꞌ wanî anîꞌ pe pra rî epuꞌtî man. Tîîkoꞌmansen pe pra awanî. Tîîse tiwinan moro awanî, Paapa neken epuꞌtî man.
5 Tîîse taa toꞌya, tuꞌke paapayamîꞌ wanî, kaꞌ po tîweꞌsanon moropai non po tîweꞌsanon. Moropai tuꞌke yepotorî wannîyamîꞌ wanî taa toꞌya, tîîse toꞌ esenkuꞌtîsaꞌ.
6 Tîîse uurîꞌnîkon pia Paapa wanî epuꞌtî man tiwinan neken. Mîîkîrî wanî uyunkon pe moropai mîîkîrîya tamîꞌnawîron konekaꞌpî. Mîrîrî yeꞌnen mîîkîrî ton pe uurîꞌnîkon koꞌmamî. Moropai epuꞌtî man tiwin Uyepotorîkon wanî, mîîkîrî Jesus Cristo. Moropai mîîkîrî wenai tamîꞌnawîron ekonekaꞌpî. Mîrîrî yeꞌnen mîîkîrî wenai uurîꞌnîkon koꞌmamî sîrîrî.
7 Tîîse tamîꞌnawîronkon innape ikuꞌnenanya mîrîrî epuꞌtî pra awanî. Tiaronkon esenumenka sîrîrî tîpose penaroꞌ teserukon pîꞌ. Entamoꞌkantoꞌ wanî mîîkîrî miaꞌ ke ikonekasaꞌ pia itîîsaꞌ pe yapurîtoꞌpe kaiꞌma toꞌ esenumenka. —Mîrîrî yeꞌnen entamoꞌkantoꞌ yanîuya ya, mîrîrî yapurîuya imakuiꞌpî pe —taa toꞌya. Mîrîrî wenai neꞌneꞌ pe toꞌ esenumenkatoꞌ kupîiya, maasa pra imakuiꞌpî pe awanî kaiꞌma, yanî toꞌya yeꞌnen.
8 Tîîse uurîꞌnîkon pia entamoꞌkantoꞌ wenai pra Paapaya uurîꞌnîkon yapisî. Yansaꞌnîkon ya, mîrîrî yansaꞌ wenai morî panpîꞌ eꞌnî pepîn Paapa pia. Moropai yansaꞌ pra awanî ya, mîrîrî warantî rî morî panpîꞌ eꞌnî pepîn.
9 Mîîwîni tîîse, tîwarî eꞌtî mîrîrî yansaꞌyaꞌnîkon pîꞌ, yansaꞌyaꞌnîkon pra awanîkon pîꞌ. Teesenumenkatoꞌkon yawîrî pra, imakuiꞌpî yaꞌ tiaronkon aꞌtuꞌmîra tîweꞌsanon ena emapuꞌtîyaꞌnîkon namai, tîwarî eꞌtî.
10 Anîꞌ wanî ya aꞌtuꞌmîra tîweꞌsen, mîîkîrîya amîrîya îꞌ kupî eraꞌma, îꞌ waniꞌ awanî pepîn kaiꞌma ikuꞌsaꞌya epuꞌtîiꞌma. Mîrîrî yeꞌnen mîîkîrî wanî awarantî ankuꞌpai, miaꞌ ke ikonekasaꞌ pia toꞌ nîtîrîꞌpî ananpai awanî.
11 Mîrîrî warantî mîîkîrî ayonpa aꞌtuꞌmîra tîweꞌsen atakaꞌma emapuꞌtîya. Îꞌ wanî yairî, îꞌ wanî yairî pra epuꞌtîiya pra eena ikupîya. Manniꞌ ayonpa, imîrî ton pe Cristo saꞌmantasaꞌ tanne, imakuiꞌpî yaꞌ eena emapuꞌtîya.
12 Sîrîrî warantî mîrîrî yanî ayonpaya emapuꞌtîya, yairî pra awanî kaiꞌma teesenumenka yeꞌka pe, moropai mîrîrî wenai, neꞌneꞌ pe eesenumenkatoꞌ kupî pîꞌ aakoꞌmamî ya, moriya imakuiꞌpî kupîya mîrîrî Cristo winîkîi.
13 Moriya uurî pia mîrîrî entamoꞌkantoꞌ wenai, imakuiꞌpî yaꞌ uyonpa ena emapuꞌtîuya ya, inîꞌrî mîrîrî yeꞌka pîꞌ entamoꞌka pepîn, imakuiꞌpî kupî uyonpaya emapuꞌtîuya namai.
