Sîrîrî Kaareta Eꞌmaiꞌnon João Nîmenukaꞌpî 1:1-10
1 Kaareta menuka annaya sîrîrî, Jesus Cristo, koꞌmannîtoꞌ tîînen yekare ekaremeꞌnen. Tamîꞌnawîron koneka Paapaya pra tîîse Cristo wanîꞌpî iipia. Sîrîrî non po tîwanî yai, Cristo eseurîma etapîtîꞌpî annaya. Eraꞌmaꞌpî annaya anna yenu ke puꞌkuru. Mîrîrî yai îꞌ kaiꞌma Cristo koꞌmantoꞌ eraꞌmapîtîꞌpî annaya. Moropai Cristo yapîpîtîꞌpî annaya anna yenya ke. Mîîkîrî puꞌkuru Paapa nekaremekîꞌpî, enen koꞌmannîtoꞌ tîînen.
2 Mîîkîrî koꞌmannîtoꞌ tîînen erepamîꞌpî sîrîrî non pona. Eraꞌmaꞌpî annaya. Ipatîkarî koꞌmannîtoꞌ tîînen eraꞌmaꞌpî annaya. Innape awanî taa annaya tamîꞌnawîronkon pîꞌ. Mîîkîrî ekaremekî annaya sîrîrî apîꞌnîkon. Pena pata pai Cristo koꞌmanpîtîꞌpî Paapa yarakkîrî. Mîrîrî tîpo eerepamîꞌpî anna koreꞌta.
3 Anna neraꞌmaꞌpî, imaimu anna netaꞌpî tauya manniꞌ, mîîkîrî ekaremekî annaya apîꞌnîkon innape ikupîkonpa, annaya ikupîꞌpî warantî. Mîrîrî wenai morî pe aakoꞌmamîkon anna yarakkîrî anna wanîyakon pe. Moropai Paapa yarakkîrî morî pe koꞌmannî iwanîyakon, moropai inmu Jesus Cristo wanîyakon pe koꞌmannî nîrî.
4 Seeniꞌ kaareta menukauya aapiaꞌnîkon anna atausinpa kaisarî aatausinpakonpa aweꞌtoꞌ yawîrî Paapa nîkonekaꞌpî pîꞌ.
Aꞌka pe Paapa Wanî
5 Aꞌkî, aꞌka wanî mararon ewaron ton pra. Mîrîrî warantî Paapa wanî aꞌka pe puꞌkuru, maasa pra imakuiꞌpî ton pra tîwanî yeꞌnen. Mîîkîrî wanî morî pe puꞌkuru ewaron ton pra. Mîrîrî ekaremekîꞌpî Cristoya anna pîꞌ pena. Mîrîrî ekaremekî annaya sîrîrî, apîꞌnîkon nîrî.
6 Morî pe koꞌmannî pîꞌ wai Paapa yarakkîrî taꞌnîkon yeꞌka pe, imakuiꞌpî kupî pîꞌ koꞌmannî ya, seruꞌyeꞌ pe eseurîman moropai yairon maimu yawîrî koꞌmannî pepîn. Tîîse ewaron ta koꞌmannî.
7 Tîîse aꞌka yaꞌ Paapa koꞌmamî warantî morî pe koꞌmannî ya, imaimu yawîrî, koꞌmannî morî pe uyonpakon yarakkîrî, îꞌ waniꞌ pra. Moropai tamîꞌnawîron imakuiꞌpî unkuꞌpîtîkon rona Paapaya, tînmu Jesus mînî wenai.
8 Tîîse taꞌnîkon ya: —Imakuiꞌpî kupîtîpon pepîn uurî. Morî uurî —taꞌnîkon ya, uuwarîrîꞌnîkon esenkuꞌtîn. Moropai yairon maimu wanî pepîn uyewankon yaꞌ.
9 Tîîse Paapa pîꞌ imakuiꞌpî unkupîꞌpîkon ekaremekîꞌnîkon ya, tîîwanmîra ikupîiya, taasaꞌ tîuya yawîrî, maasa pra yairî tîwanî yeꞌnen. Moropai yairon pepîn uyeserukon ronaiya, tîpîꞌ ekaremekî yai, uyewankon yaꞌ aakoꞌmamî namai.
10 Tamîꞌnawîronkonya imakuiꞌpî kuꞌsaꞌ taasaꞌ Paapaya man. Tîîse taꞌnîkon ya: —Imakuiꞌpî unkupîꞌpî ton pîn —taꞌnîkon ya, Paapa wanî seruꞌyeꞌ pe kaiꞌma ekaremekîꞌnîkon. Mîrîrî yeꞌnen Paapa maimu wanî pepîn uyewankon yaꞌ.
