Sîrîrî Kaareta Eꞌmaiꞌnon João Nîmenukaꞌpî 2:1-29
2 Unmukuyamîꞌ, sîrîrî kaareta menukauya aapiaꞌnîkon imakuiꞌpî kupîyaꞌnîkon namai. Tîîse imakuiꞌpî kupîyaꞌnîkon ya, uurîꞌnîkon ton pe Jesus eseurîma Uyunkon Paapa yarakkîrî umakuyikon yaretîꞌkapa. Mîîkîrî Jesus Cristo, yairî puꞌkuru tîweꞌsen.
2 Moropai imakuiꞌpî wenai uurîꞌnîkon pîꞌ Paapa ekoreꞌmatoꞌ yiꞌnîpîꞌpî Jesusya tîîsaꞌmanta ke. Moropai mîrîrî yai umakuyikon yepeꞌ pe neken Jesus saꞌmantasaꞌ pra man. Tîîse tamîꞌnawîronkon pemonkonyamîꞌ nîkupîꞌpî imakuiꞌpî yepeꞌ pe aasaꞌmantaꞌpî.
3 Moropai Jesus nekaremekîꞌpî yawîrî koꞌmannî ya, innape ikuꞌnen pe eꞌnî epuꞌtî.
4 —Innape Jesus kuꞌnen uurî —taa ya, inekaremekîꞌpî yawîrî pra siꞌma, seruꞌyeꞌ pe eꞌnî. Yairon maimu wanî pepîn uyewankon yaꞌ.
5 Tîîse imaimu yawîrî anîꞌrî wanî ya, innape Paapa saꞌnamaiya tewan ke. Mîrîrî warantî ipemonkono pe eꞌnî epuꞌtîꞌnîkon.
6 —Paapa piawon uurî —kaiꞌma anîꞌ eseurîma ya, morî pe aakoꞌmamî yuꞌse Paapa wanî, Cristo koꞌmamî warantî.
Cristo Nekaremekîꞌpî Unkupîkon Ton
7 Uyonpayamîꞌ, pena Cristo pemonkonoyamîꞌ pe eenakon yai, tiwinan Paapa nekaremekîꞌpî ayeserukon ton pe etaꞌpîyaꞌnîkon. Mîrîrî ekaremeꞌnen pe sîrîrî kaareta menukauya aapiaꞌnîkon. Amenan ekaremekîuya pepîn, tîîse penaron.
8 Mîîwîni tîîse amenan pe imenukauya aapiaꞌnîkon. Amenan pe Cristoya ekaremekîꞌpî moropai amenan warantî etaꞌpîyaꞌnîkon. Pata erenmapî pe, ewaron yaꞌ uneraꞌmaꞌpîkon mararî eraꞌma morî pe panpîꞌ. Mîrîrî warantî unepuꞌtîꞌpîkon Cristo iipî rawîrî epuꞌtî tarîpai morî pe panpîꞌ.
9 —Aꞌka yaꞌ ikoꞌmankoi uurî, morî yaꞌ —taawon pemonkon wanî ya, tîîse mîrîrî tanne tonpa kupîiya tewanma pe, mîîkîrî koꞌmamî ewaron ta, imakuiꞌpî yaꞌ, sîrîrî tîpose.
10 Tîîse tonpa saꞌnamanen koꞌmamî aꞌka yaꞌ, morî yaꞌ. Imakuiꞌpî yaꞌ aatareꞌmo pepîn.
11 Tîîse tewanma pe tonpa kuꞌnen koꞌmannî pîꞌ man ewaron ta aminke Paapa pîꞌ. Ewaron ta aasarî teseru kupî pîꞌ tîîse oꞌnon pata tuutî epuꞌtîiya pra awanî, maasa pra enkaruꞌnan warantî awanî, ewaron wenai. Teꞌmarî ton eraꞌmaiya pepîn.
12 Unmukuyamîꞌ, seeniꞌ kaareta menukauya aapiaꞌnîkon.Maasa pra imakuiꞌpî ankupîꞌpîkon kupîꞌpî Paapaya tîîwanmîrauurîꞌnîkon ton pe, tînmu nîkupîꞌpî wenai.
13 Moropai aꞌyekeꞌtonon pia nîrî sîrîrî kaareta menukauya,Jesus epuꞌnenan pe awanîkon yeꞌnen,manniꞌ Paapa piawon mîîkîrî Jesus,pena tamîꞌnawîron koneka Paapaya rawîrî.Moropai amenankon panpîꞌ warayoꞌkon pia nîrî,sîrîrî kaareta menukauya,Makui yentainon pe eenaꞌpîkon yeꞌnen.
14 Moropai moreyamîꞌ pia imenukauya,uyunkon, Paapa epuꞌnenan pe awanîkon yeꞌnen.Aꞌyekeꞌtonon pia nîrî imenukauya,Jesus epuꞌnenan pe awanîkon yeꞌnen, manniꞌ Paapa piawon,pena tamîꞌnawîron koneka Paapaya rawîrî.Moropai amenankon panpîꞌ warayoꞌkon pia imenukauya,meruntî ke awanîkon yeꞌnen.Paapa maimu koꞌmannî pîꞌ man ayewankon yaꞌ.Moropai eenaꞌpîkon Makui yentaino pe.
Sîrîrî Non Po Tîîkoꞌmansanon Yeseru Yuꞌse Pra Eꞌnî
15 2:15,16 Tiaronkonya Paapa saꞌnama pra awanî. Iteyaton pe toꞌ wanî. Imakuiꞌpî ituꞌse tîweꞌtoꞌkon pîꞌ toꞌ esekaꞌnunka. Moropai îꞌ rî tîneraꞌmakon anapiꞌpai toꞌ wanî. Moropai mararon pepîn temannekon wenai, mîî pe toꞌ wanî. Uyunkon piapainon pepîn toꞌ yeseru. Paapa saꞌnamanenan pepîn yeseru pe awanî. Toꞌ yeseru kîꞌkuꞌtî awakîrikon pe. Toꞌ yemanne yuꞌse pra eꞌtî.
16 Eraꞌmakî 2:15
17 Moropai tamîꞌnawîronkon imakuiꞌpî kuꞌnenan moropai îꞌ yuꞌse toꞌ eꞌtoꞌ ataretîꞌka. Tîîse ituꞌse Paapa eꞌtoꞌ yawîrî tîîkoꞌmansen koꞌmamî ipatîkarî Paapa pia kaꞌ po.
Cristo Yeyatonon
18 Unmukuyamîꞌ, sîrîrî non pona Cristo ennaꞌpo kupî sîrîrî. Moropai aminke pra aaiꞌtoꞌ eseporî tanne, iteyaton iipî kaiꞌma itekare etaꞌpîyaꞌnîkon. Aasîrî Cristo yeyatonon esenposaꞌ man, arinîke. Mîrîrî yeꞌnen kaꞌneꞌ pe Cristo ennaꞌpo epuꞌtîꞌnîkon.
19 Pena, ukoreꞌtaꞌnîkon inkamoro Cristo yeyatonon wanîꞌpî. Tîîse toꞌ wîtîꞌpî ukoreꞌtapaiꞌnîkon. Mîrîrî warantî ukaisarîꞌnîkon pe pra toꞌ wanî epuꞌtîkon. Maasa pra ukaisarîꞌnîkon pe toꞌ eꞌsaꞌ ya, toꞌ wîtîꞌpî pepîn eꞌpainon ukoreꞌtapaiꞌnîkon. Tîîse toꞌ wîtîꞌpî.
20 Tîîse mîrîrî warantî pra amîrîꞌnîkon wanî. Maasa pra Morî Yekaton Wannî ewomîꞌpî ayewankon yaꞌ innape Cristo kupîyaꞌnîkon yai. Moropai imaimu innarî epuꞌtîyaꞌnîkon.
21 Innarî epuꞌnenan pepîn amîrîꞌnîkon, tauya pra wai. Mîrîrî taatoꞌpeuya kaiꞌma imenukauya pra wai. Tîîse seeniꞌ kaareta menukauya aapiaꞌnîkon maasa pra innarî epuꞌtîyaꞌnîkon yeꞌnen. Moropai seruꞌyeꞌ pe eseurîmakoi wanî pepîn yairon ekaremeꞌnen pe. Epuꞌnenan amîrîꞌnîkon.
22 Anîꞌ wanî seruꞌyeꞌ pe ekaremekîuya sîrîrî. Seruꞌyeꞌ manniꞌ pemonkon Jesus wanî Paapa nîmenkaꞌpî pepîn taawon. Mîîkîrî wanî Cristo yeyaton pe. Uyunkon Paapa epuꞌtîiya pra awanî. Moropai inmu Jesus epuꞌtîiya pra awanî.
23 —Paapa munmu epuꞌtîuya pra wai. Unepuꞌtî pepîn mîîkîrî —taawon wanî ya, Uyunkon Paapa wanî pepîn iipia. —Tîîse Paapa munmu yapurînen uurî. Ipemonkono uurî —taawon pia Uyunkon Paapa koꞌmamî.
24 Pena innape Jesus kupîꞌpîyaꞌnîkon Paapa maimu etaꞌpîyaꞌnîkon yai. Ayewankon yaꞌ anetaꞌpîkon koꞌmannîꞌnen pe eꞌtî. Ayewankon yaꞌ anetaꞌpîkon Paapa maimu koꞌmamî ya, Paapa munmu pia aakoꞌmamîkon moropai Uyunkon pia.
25 Mîrîrî warantî pena Jesusya taꞌpî upîꞌnîkon: —Kaꞌ po aakoꞌmamîkon ipatîkarî enen —taꞌpîiya.
26 Tiaronkon wanî amîrîꞌnîkon anenkuꞌtîpai. Mîrîrî yeꞌnen seeniꞌ kaareta menuka pîꞌ wai aapiaꞌnîkon eesenkuꞌtîkon namai.
27 Morî Yekaton Wannî, Jesus naipontîꞌpî ayewankon yaꞌ tauya manniꞌ, mîîkîrî koꞌmamî ayewankon yaꞌ. Tamîꞌnawîron pîꞌ ayenupaiyaꞌnîkon. Yairon puꞌkuru Mîîkîrî, seruꞌyeꞌ pepîn. Tiaronya ayenupakon eꞌpai pra man. Morî Yekaton Wannîya ayenupaꞌpîkon yawîrî Jesus pia akoꞌmantî.
Paapa Munkîyamîꞌ
28 Tarîpai unmukuyamîꞌ, Jesus pia akoꞌmantî. Mîrîrî warantî koꞌmannî ya, Jesus nama pepîn eerepamî yai, moropai unkupîꞌpîkon wenai eppeꞌnî pepîn, aaipî yai.
29 Yairon pe puꞌkuru Paapa wanî epuꞌtîyaꞌnîkon. Mîrîrî yeꞌnen yairon kupî pîꞌ koꞌmannî ya, inmuku pe eꞌnî. Mîrîrî nîrî epuꞌtîyaꞌnîkon.
