Sîrîrî Kaareta Eꞌmaiꞌnon João Nîmenukaꞌpî 3:1-24
3 Aꞌkî, uurîꞌnîkon saꞌnama uyunkon Paapaya kureꞌne. Innape awanî epuꞌtîꞌnîkon, tînmukukon pe ukuꞌsaiꞌyaꞌnîkon yeꞌnen. Moropai innape inmuku pe eꞌnî. Paapa epuꞌnenan pepîn imakuiꞌsanya epuꞌtî pra awanî inmuku pe eꞌnî, maasa pra Paapa epuꞌtî toꞌya pra awanî.
2 Uyonpayamîꞌ, sîrîrî Paapa munkî pe eꞌnî. Îꞌ warantî enan kupî sîrîrî kaꞌ po, ekaremekîiya pra Paapa wanî. Tîîse inîꞌrî Jesus erepamî yai, eraꞌmaꞌnîkon îꞌ yeꞌka pe awanî. Mîrîrî warantî Jesus eraꞌma wenai, iwarantî enan kupî sîrîrî, eraꞌma yai.
3 Innape mîrîrî warantî Jesusya ukupîkon teerepamî yai kaiꞌma esenumenkan ya, imakuiꞌpî rumaka, morî pe eꞌnîtoꞌpe morî pe Jesus wanî warantî.
4 Imakuiꞌpî kupî pîꞌ anîꞌrî koꞌmamî ya, Paapa maimu yawîrî pra aakoꞌmamî nîrî. Tiwinan uyeserukon mîrîrî, imakuiꞌpî kupî pîꞌ koꞌmannîtoꞌ moropai Paapa maimu yawîrî pra koꞌmannîtoꞌ.
5 Moropai Jesus iipîꞌpî sîrîrî non pona imakuiꞌpî unkupîꞌpîkon moꞌkai. Mîrîrî epuꞌtî pîꞌ naatîi. Moropai Jesus pia imakuiꞌpî ton pra awanî.
6 Mîrîrî yeꞌnen Jesus pia tîîkoꞌmansen koꞌmamî pepîn imakuiꞌpî kupî pîꞌ. Mîrîrî imakuiꞌpî kupî pîꞌ anîꞌ koꞌmamî ya, Jesus epuꞌnen pe pra awanî. Moropai Jesus eraꞌmanen pe pra awanî.
7 Unmukuyamîꞌ, morî kupî pîꞌ tîîkoꞌmansen wanî morî pe, morî pe Cristo wanî warantî. Mîrîrî warantî pra awanî kaiꞌma tiaronya ayenkuꞌtîkon kîꞌtîîtî.
8 Imakuiꞌpî kupî pîꞌ tîîkoꞌmansen wanî makui poitîrî pe. Makui wanîꞌpî imakuiꞌpî kupî pîꞌ pena tamîꞌnawîron koneka Paapaya yai. Moropai ikupî pîꞌ aakoꞌmamî sîrîrî tîpose. Paapa munmu erepamîꞌpî sîrîrî non pona makui esenyakaꞌmaꞌpî pemonkonyamîꞌ pîꞌ yarankai.
9 Uyunkon pe Paapa wanî ya, imakuiꞌpî kupî pîꞌ koꞌmannî pepîn. Enen tîîkoꞌmantoꞌ tîrîꞌpî Paapaya uukoꞌmantoꞌkon ton pe, tîwarantî koꞌmannîtoꞌpe kaiꞌma. Mîrîrî yeꞌnen imakuiꞌpî kupî pîꞌ koꞌmannî pepîn, inmuku pe eꞌnî yeꞌnen.
10 Morî kupî pîꞌ tîîkoꞌmansen pepîn wanî pepîn Paapa munkî pe. Moropai tonpa saꞌnamanen pepîn wanî pepîn Paapa munkî pe nîrî. Mîrîrî warantî anîꞌkan wanî Paapa munkî pe moropai anîꞌkan wanî makui munkî pe esepuꞌtî.
Eseꞌ Yuꞌse Akoꞌmantî
11 Eseꞌ yuꞌse akoꞌmantî kaiꞌma itekare etaꞌpîyaꞌnîkon innape Jesus kupîyaꞌnîkon yai.
12 Penaroꞌ Caim nurîꞌtî wanîꞌpî makui pemonkono pe. Moropai takon wîꞌpîiya. Mîîkîrî warantî kakoꞌmamîtî. Îꞌ waniꞌ awanî yeꞌnen takon wîꞌpî Caimya? Morî kuꞌnen pe takon wanî yeꞌnen, iwîꞌpîiya maasa pra Caim wanîꞌpî imakuiꞌpî kuꞌnen pe.
13 Mîrîrî yeꞌnen imakuiꞌpî kuꞌnenanya tewanmakon pe akupîkon pîꞌ teesiꞌnîꞌse pra eꞌtî.
14 Innape Jesus kupî rawîrî isaꞌmantaꞌsan warantî eꞌnîꞌpî Paapa winîkîi. Tarîpai enen eꞌnî iwinîkîi. Mîrîrî epuꞌtî ipemonkonoyamîꞌ saꞌnama yeꞌnen. Tonpa saꞌnamanen pepîn koꞌmamî isaꞌmantaꞌpî warantî Paapa winîkîi, enen awanî pepîn.
15 Moropai tewanma tonpa kuꞌnen wanî tonpa wîînen warantî. Moropai tonpa wîînen wanî ipatîkarî Paapa pia aakoꞌmantoꞌ ton pra. Mîrîrî epuꞌtî pîꞌ naatîi.
16 Îꞌ kaiꞌma uyonpakon saꞌnaman epuꞌtîꞌnîkon, maasa pra Cristoya usaꞌnamaꞌpîkon kureꞌne. Uurîꞌnîkon ton pe enen tîîkoꞌmantoꞌ tîrîꞌpîiya. Aasaꞌmantaꞌpî uurîꞌnîkon ton pe. Mîrîrî warantî ipemonkonoyamîꞌ uyonpakon pîikaꞌtîtoꞌpe kaiꞌma saꞌmantan ya, îꞌ waniꞌ pra awanî. Saꞌmantanpaiꞌnîkon.
17 Tekkari ke, temanne ke anîꞌ wanî ya, yai pra îꞌ ton pra tonpa wanî eraꞌmaiya, tîîse tîꞌnokoꞌpî pe pra, Paapa saꞌnamaiya pra awanî mîrîrî.
18 Unmukuyamîꞌ, yai pra uyonpakon saꞌnama umaimukon ke neken. —Asaꞌnama pîꞌ wai —taa tanne, ipîikaꞌtî pra awanî. Mîrîrî warantî pra eꞌnîpaiꞌnîkon. Innape uyonpakon saꞌnamanpaiꞌnîkon unkupîkon ke, seruꞌ pe pra.
19 3:19,20 Mîrîrî warantî koꞌmannî ya, innape yairon pe eꞌnî epuꞌtî. Moropai Paapa maimu yawîron pepîn uurî kaiꞌma esenumenkan ya, uyewankon ya, mîîwîni tîîse esiꞌnîꞌnî pepîn Paapa pîꞌ. Maasa pra esenumenkantoꞌ uyewankon yentai Paapa wanî moropai tamîꞌnawîron epuꞌtîiya moropai uyapisîiyaꞌnîkon.
20 Eraꞌmakî 3:19
21 Uyonpayamîꞌ, imakuiꞌpî unkupîꞌpîkon uyewankon yawon rona pîꞌ Paapa man. Tamîꞌnawîrî tîîwanmîra ikupî pîꞌ man kaiꞌma esenumenkan ya uyewankon yaꞌ, eranneꞌ pe pra eꞌnî mîrîrî Paapa pîꞌ.
22 Moropai ituꞌse eꞌnîtoꞌ esatî Paapa pîꞌ moropai itîrîiya, maasa pra imaimu yawîrî eꞌnî, moropai iwakîri pe tîweꞌsen kupî pîꞌ koꞌmannî.
23 Moropai innape tînmu Jesus Cristo kupî uurîꞌnîkonya yuꞌse Paapa wanî moropai uyonpakon saꞌnama yuꞌse awanî. Mîrîrî Jesus nekaremekîꞌpî unkupîkon pe.
24 Moropai inekaremekîꞌpî yawîrî tîîkoꞌmansen koꞌmamî Paapa pia moropai Paapa koꞌmamî nîrî iipia. Morî Yekaton Wannî yarimaꞌpî Paapaya uyewankon yaꞌ. Mîrîrî yeꞌnen uupiaꞌnîkon Paapa koꞌmamî epuꞌtî.
