Sîrîrî Kaareta Eꞌmaiꞌnon João Nîmenukaꞌpî 4:1-21
4 Aapiaꞌnîkon pemonkon erepansaꞌ ya moropai —Morî Yekaton Wannî maimu pe uuiꞌsaꞌ sîrîrî amîrîꞌnîkon yenupai —taiya ya, innape imaimu kîꞌkuꞌtî, mîrîrî warantî taiya yeꞌnen. Tîîse maasa, esenumenkanpaiꞌnîkon yenupatoiꞌya pîꞌ, innape Paapa winîpainon epuꞌtoꞌpe. Maasa pra mararonkon pepîn Paapa maimu ekaremeꞌnenan pe tîwanî seruꞌyeꞌ pe toꞌ wanî. Pata poro toꞌ asarî arinîke.
2 Mîîkîrî pemonkonya taa ya: —Jesus wanî Paapa nîmenkaꞌpî pe, mîîkîrî esenpoꞌpî pemonkon pe —taiya ya, Paapa maimu pe taiya mîrîrî. —Innape Morî Yekaton Wannî maimu pe —taayaꞌnîkon. Mîrîrî warantî eesenumenkakon.
3 Tîîse mîrîrî warantî Jesus pîꞌ eeseurîma pra awanî ya, Paapa maimu pe eeseurîma pepîn. Tîîse Cristo yeyatonon maimu pe eeseurîma. Pena etaꞌpîyaꞌnîkon Cristo yeyaton iipî kupî sîrîrî. Aasîrî tuꞌke pemonkonyamîꞌ esenumenka mîîkîrî esenumenka warantî.
4 Unmukuyamîꞌ, Paapa pemonkono pe awanîkon. Eesenkuꞌtîsaꞌkon pepîn toꞌ maimu wenai. Mîrîrî warantî awanî maasa pra Paapa koꞌmamî ayewankon yaꞌ. Moropai Paapa wanî imakuiꞌpî kuꞌnenan yewankon koꞌmannîꞌnen yentai.
5 Inkamoro imakuiꞌpî kuꞌnenan. Mîrîrî yeꞌnen toꞌ eseurîma teesenumenkatoꞌkon yawîrî. Moropai mîrîrî wenai, imakuiꞌpî kuꞌnenanya toꞌ eseurîma eta tîwakîrikon pe.
6 Tîîse uurîꞌnîkon Paapa munkîyamîꞌ. Paapa epuꞌnenya anna eseurîma eta tîwakîri pe. Tîîse Paapa pemonkonoyamîꞌ pepînya anna eseurîma eta pepîn. Mîrîrî wenai eesepuꞌtî anîꞌ yewan yaꞌ Morî Yekaton Wannî koꞌmamî moropai anîꞌ yewan yaꞌ yenkuꞌtînen koꞌmamî.
Pemonkonyamîꞌ Saꞌnamanen Paapa
7 Uyonpayamîꞌ, asaꞌnamauyaꞌnîkon kureꞌne. Eseꞌ yuꞌse eꞌnîpaiꞌnîkon maasa pra Paapa wanî uyonpakon saꞌnama emapuꞌtînen pe. Moropai mîîkîrî tonpa saꞌnamanen pe Paapa munmu wanî, moropai Paapa epuꞌnen pe mîîkîrî wanî.
8 Tonpa saꞌnamanen pepîn wanî Paapa epuꞌnen pe pra, maasa pra Paapaya tamîꞌnawîronkon saꞌnama. Mîrîrî warantî iteseru wanî.
9 Paapaya tiwinan tînmu yarimaꞌpî sîrîrî non pona aasaꞌmantatoꞌpe, ipatîkarî uurîꞌnîkon koꞌmantoꞌpe iipia. Mîrîrî yeꞌnen taꞌnîkon: —Innape Paapaya usaꞌnamakon —taꞌnîkon.
10 See warantî Paapaya usaꞌnamaꞌpîkon, uurîꞌnîkonya tîîsaꞌnama wenai pra. Mîîwîni tîîse tîîwarîrî usaꞌnamaꞌpîiyaꞌnîkon. Moropai tînmu yarimaꞌpîiya aasaꞌmantatoꞌpe imakuiꞌpî unkupîꞌpîkon yeꞌmapa kaiꞌma. Mîrîrî yeꞌnen îꞌ kaiꞌma uyonpakon saꞌnaman epuꞌtîꞌnîkon.
11 Uyonpayamîꞌ, mîrîrî warantî Paapaya usaꞌnamaꞌpîkon kureꞌne. Mîrîrî yeꞌnen ipemonkono pe, uyonpakon saꞌnamapaiꞌnîkon.
12 Anîꞌya Paapa eraꞌma pra awanîꞌpî sîrîrî tîpose. Tîîse uyonpakon saꞌnama uurîꞌnîkonya ya, Paapa koꞌmamî uyewankon yaꞌ. Moropai innape isaꞌnama uurîꞌnîkonya. Moropai uyeserukon eraꞌma tiaronkonya, Paapa yeseru pe awanî warantî.
13 Paapaya tekaton yarimaꞌpî uyewankon yaꞌ. Mîrîrî yeꞌnen uurîꞌnîkon koꞌmamî iipia epuꞌtî, moropai aakoꞌmamî uyewankon yaꞌ epuꞌtî.
14 Uyunkon, Paapaya tînmu yarimaꞌpî tamîꞌnawîronkon pîikaꞌtînen pe aweꞌtoꞌpe. Mîîkîrî inmu eraꞌmaꞌpî annaya. Moropai mîîkîrî yekare ekaremekî pinunpa annaya tamîꞌnawîronkon pîꞌ.
15 Anîꞌya taa ya: —Innape Jesus wanî Paapa munmu pe —taiya ya, Paapa koꞌmamî itewan yaꞌ. Moropai mîîkîrî koꞌmamî Paapa pia.
16 Moropai Paapaya usaꞌnamakon epuꞌtî —Innape uurîꞌnîkon saꞌnamaiya —taꞌnîkon.
Tamîꞌnawîronkon yuꞌse Paapa wanî. Iteseru pe awanî. Tamîꞌnawîronkon saꞌnamanen koꞌmamî Paapa pia. Moropai Paapa koꞌmamî itewan yaꞌ.
17 Tarî sîrîrî non po Cristo warantî koꞌmannî, imakuiꞌpî kupî pra, uyonpa tîîsaꞌnamai. Mîrîrî yeꞌnen eranneꞌ pe pra eꞌnî. Imakuiꞌpî kuꞌnenan tarumaꞌtî Paapaya yai, uurî tarumaꞌtîiya pepîn, taꞌnîkon. Mîrîrî yeꞌnen inîꞌ panpîꞌ Paapa yuꞌse eꞌnî.
18 Paapa yuꞌse eꞌnî ya, eranneꞌ pe pra eꞌnî. Tîîse imakuiꞌpî kuꞌnenan tarumaꞌtîiya ya, uurî tarumaꞌtîiya kaiꞌma esenumenkan ya, kureꞌne Paapa yuꞌse eꞌnî pepîn. Tîîse innape Paapa yuꞌse eꞌnî ya, eranneꞌ pe eꞌnîtoꞌ ataretîꞌka.
19 Paapa yuꞌse pra eꞌpîtî tanne, uurîꞌnîkon yuꞌse awanîꞌpî. Mîrîrî yeꞌnen ituꞌse eꞌnî sîrîrî. Moropai ipemonkonoyamîꞌ yuꞌse eꞌnî.
20 Tîîse anîꞌya, tewanma pe tonpa kuꞌnenya taa: —Paapa yuꞌsan uurî —taiya ya, seruꞌyeꞌ pe awanî. Maasa pra wei kaisarî tonpa eraꞌma tîuya yeꞌka pe isaꞌnamaiya pepîn. Oꞌnon yeꞌka pe Paapa saꞌnamaiya eꞌpainon, eraꞌmaiya pra tîîse?
21 Moropai Paapaya taꞌpî upîꞌnîkon: —Uurî yuꞌse awanîkon ya, ayonpakon nîrî yuꞌse eꞌtî —taꞌpîiya.
