Sîrîrî Kaareta Eꞌmaiꞌnon João Nîmenukaꞌpî 5:1-21
5 Anîꞌya innape Paapa nîmenkaꞌpî pe Jesus wanî kupî ya, mîîkîrî wanî Paapa munkî pe. Uyunkon Paapa saꞌnama anîꞌya ya, Paapa munkîyamîꞌ saꞌnamaiya nîrî tamîꞌnawîrî.
2 Mîrîrî yeꞌnen Paapa saꞌnama ya, moropai imaimu yawîrî koꞌmannî ya, —Uurî Paapa munkîyamîꞌ saꞌnamanen —taꞌnîkon, seruꞌyeꞌ pe pra.
3 Maasa pra innape Paapa saꞌnama ya, imaimu yawîrî tamîꞌnawîron kupî pîꞌ koꞌmannî. Paapa maimu pîꞌ esetaꞌkakon pepîn, —Uyetaꞌkanen —taa pepîn Paapa maimu pîꞌ.
4 Paapa munkî pe eꞌnî. Mîrîrî yeꞌnen uyeserukon wanî pepîn imakuiꞌpî kuꞌnenan yeseru warantî. Paapaya ukupîkon meruntî ke, imakuiꞌpî kuꞌnen yeseru warainon kupî pîꞌ koꞌmannî namai. Innape Jesus kupî pîꞌ koꞌmannî yeꞌnen, sîrîrî non pon imakuiꞌpî yentai eꞌnî.
5 Anîꞌ wanî sîrîrî non po tîweꞌsen imakuiꞌpî yentai ekaremekîuya apîꞌnîkon. Innape Paapa munmu pe Jesus wanî kuꞌnenan, inkamoro wanî imakuiꞌpî yentai.
Jesus Cristo pîꞌ Ekaremeꞌnenan
6 Paapa nîmenkaꞌpî, Jesus pîꞌ eseurîma mîrîrî. Mîîkîrî puꞌkuru iipîꞌpî sîrîrî non pona, eesenpatakonaꞌpî tuna kata. Moropai teesenyakaꞌmatoꞌ kupî pîꞌ tîîkoꞌmamî tîpo, mîîkîrî puꞌkuru saꞌmantaꞌpî uurîꞌnîkon ton pe. Mîîkîrî, eesenpatakonaꞌpî manniꞌ, mîîkîrî saꞌmantaꞌpî nîrî uurîꞌnîkon ton pe. Tîmînî kamoꞌpîiya. Innape puꞌkuru awanî epuꞌtîꞌnîkon, maasa pra Morî Yekaton Wannîya ekaremekî, mîîkîrî Morî Yekaton Wannî, seruꞌyeꞌ pepîn.
7 5:7,8 —Innape Paapa munmu pe Jesus wanî —taa Morî Yekaton Wannîya uyewankon yaꞌ. Moropai innape awanî epuꞌtî uurîꞌnîkonya îꞌ kaiꞌma eesenpatakonaꞌpî wenai, moropai îꞌ kaiꞌma aasaꞌmantaꞌpî wenai. Eseurîwîꞌne toꞌ wanî innape awanî ekaremeꞌnenan. Eseurîwîꞌne toꞌ wanî tîîse seꞌ kaisarî ekaremekî toꞌya, tiaron pe rî pepîn.
8 Eraꞌmakî 5:7
9 Îꞌ rî pîꞌ pemonkonyamîꞌ eseurîma ya, seꞌ kaisarî, mîrîrî pîꞌ uurîꞌnîkonya taa: —Innape awanî toꞌ eseurîmaꞌpî. Aꞌkî, tuꞌke toꞌ tîîse seꞌ kaisarî ekaremekî toꞌya eraꞌmakî —taa. Moriya Paapa eseurîmaꞌpî kuꞌpaiꞌnîkon innape, pemonkonyamîꞌ yentainon mîîkîrî mîîtoꞌpe. Moropai taꞌpî Paapaya. —Unmu puꞌkuru mîseniꞌ warayoꞌ —taꞌpîiya.
Tînmu pîꞌ eeseurîma mîrîrî.
10 —Innape Paapa kupî pîꞌ wai —kaiꞌma esenumenkan ya uyewankon yaꞌ, innape awanî epuꞌtî uurîꞌnîkonya Paapa eseurîmaꞌpî tînmu pîꞌ. Anîꞌya innape Paapa eseurîmaꞌpî kupî pra awanî ya —Seruꞌyeꞌ pe Paapa wanî —taiya. Maasa pra Paapa nekaremekîꞌpî tînmu yekare kupîiya pra awanî innape.
11 Paapaya ipatîkarî enen koꞌmannîtoꞌ ton tîrîꞌpî uurîꞌnîkon pia. Mîrîrî enen koꞌmannîtoꞌ eporî inmu pia, innape ikupî wenai. Mîrîrî itekare Paapa nekaremekîꞌpî.
12 Paapa munmu yapisîtîpon koꞌmamî nîrî ipatîkarî Paapa pia. Tîîse Paapa munmu yapisîtîpon pepîn koꞌmamî pepîn ipatîkarî Paapa pia.
Ipatîkarî Enen Koꞌmannîtoꞌ
13 Mîrîrî ekaremeꞌnen pe sîrîrî kaareta menukauya aapiaꞌnîkon, innape Paapa munmu kuꞌnenan pia. Imenukauya ipatîkarî Paapa pia aakoꞌmantoꞌkon ton esaꞌ pe awanîkon epuꞌtîkonpa.
14 Îꞌ rî esatî ya ituꞌse Paapa eꞌtoꞌ yawîrî, tîwakîri pe eseurîmantoꞌ etaiya. Mîrîrî yeꞌnen eranneꞌ pe pra ituꞌse eꞌnîtoꞌ esatî ipîꞌ.
15 Ituꞌse Paapa eꞌtoꞌ yawîrî esatî ya, innape umaimukon etaiya epuꞌtî. Moropai innape unesatîꞌpîkon tîrîiya epuꞌtî nîrî.
16 5:16,17 Yairî pra eꞌnîtoꞌ wanî imakuiꞌpî pe Paapa pia tamîꞌnawîrî. Moro awanî imakuiꞌpî anîꞌya ikupî ya Paapaya ikupî pepîn tîîwanmîra. Moropai awanî imakuiꞌpî, mîrîrî yeꞌka kupî yai ekaremekî ya Paapa pîꞌ tîîwanmîra ikupîiya. Mîrîrî yeꞌka imakuiꞌpî kupî tiaronya eraꞌmayaꞌnîkon ya, ipîꞌ meseurîmatîi Paapa yarakkîrî. Mepîrematîi. Paapa pîꞌ mesatîi ipatîkarî tîîpia mîîkîrî koꞌmantoꞌ ton tîîtoꞌpeiya. Tîîse imakuiꞌpî moro man tiaron. Mîrîrî yeꞌka kupî anîꞌya ya, Paapaya ikupî pepîn tîîwanmîra. Mîrîrî yeꞌka kupîtîpon koꞌmamî pe man ipatîkarî apoꞌ yaꞌ. Mîrîrî yeꞌka kupîtîpon pîꞌ meseurîmatîi Paapa yarakkîrî tauya pepîn.
17 Eraꞌmakî 5:16
18 Paapa munkî pe tîweꞌsen koꞌmamî pepîn imakuiꞌpî kupî pîꞌ. Mîrîrî epuꞌtî uurîꞌnîkonya. Paapa munmuya ikoꞌmannîpî morî pe. Moropai makuiya yapisî eserîke pra awanî.
19 Paapa munkî pe eꞌnî epuꞌtî mîrîrî. Tîîse imakuiꞌpî kupî pîꞌ tîîkoꞌmansenon wanî makui poitîrî pe tamîꞌnawîrî.
20 —Paapa munmu iipîꞌpî sîrîrî non pona, seruꞌ pepîn. Innape awanî —taa uurîꞌnîkonya. Epuꞌnen tîrîꞌpîiya uyewankon yaꞌ Paapa epuꞌtoꞌpe, yairon pe awanî. Moropai mîîkîrî yairon pia eꞌnî maasa pra inmuya upîikaꞌtîꞌpîkon. Paapa pe puꞌkuru mîîkîrî wanî. Moropai tîîpia ipatîkarî koꞌmannîtoꞌpe emapuꞌtînen pe mîîkîrî wanî.
21 Unmukuyamîꞌ, îꞌ rî kîsapurîtî Paapa pe tîkuꞌse.
