Sîrîrî Kaareta Eꞌmaiꞌnon Paulo Nîmenukaꞌpî Timóteo Pia 1:1-20
1 Uurî Pauloya sîrîrî kaareta menuka sîrîrî aapia, Timóteo. Uurî wanî Cristo naipontîꞌpî pe maasa pra Upîikaꞌtînenkon Paapaya taꞌpî upîꞌ, moropai Cristo Jesus unnîmîkîkonya nîrî taꞌpî upîꞌ: —Atîkî umaimu ekaremeꞌse. Mîrîrî yeꞌnen uurî wanî Cristo naipontîꞌpî pe.
2 Timóteo, amîrî wanî unmu pe puꞌkuru, maasa pra innape Cristo kupîꞌpîya uurî wenai.
Apona epîrema sîrîrî. Tauya Paapa, Uyunkon pîꞌ, moropai Cristo Jesus uyepotorîkon pîꞌ nîrî: —Tamîꞌnawîron morî pe aweꞌtoꞌkon ke Timóteo repatî. Moropai aꞌnokoꞌpîkon pe eraꞌmatî, moropai tîwanmîn tîîtî iipia —tauya.
Yairon Pepîn Esenupantoꞌ Pîꞌ Paulo Eseurîma
3 Pena eseꞌmaꞌtî pe Macedônia pona taꞌpîuya apîꞌ: —Tarî Éfeso po akoꞌmankî. Moro manniꞌkan yairon pepîn ke toꞌ yenupa toꞌya, inkamoro pîꞌ mîkai inîꞌrî toꞌ yenupa toꞌya namai.
4 Taꞌpîuya manniꞌ warantî tauya sîrîrî inîꞌrî, mîkai inkamoro pîꞌ penaronkon tîtamokon yekare rîꞌpî pîꞌ toꞌ yenupa toꞌya namai, toꞌ eseꞌkon rîꞌpî pîꞌ toꞌ esenupa namai. Maasa pra Paapa yeseru epuꞌtoꞌpe toꞌya, innape ikuꞌtoꞌpe toꞌya, toꞌ pîikaꞌtî toꞌya pra awanî. Tîîse toꞌ esiyuꞌpîꞌtoꞌpe neken toꞌ yenupa toꞌya.
5 Tîîse apanamauya see warantî: innape Cristo yekare yairon kuꞌtoꞌpe toꞌya inkamoro yenupakî. Moropai mîrîrî kupî toꞌya ya, imakuiꞌpî ton pra siꞌma, yairî toꞌ koꞌmamî ya, neꞌneꞌ pe tewankon tîkuꞌse pra, inîꞌ panpîꞌ Paapa yapurî toꞌya, moropai innape puꞌkuru tonpakon saꞌnama toꞌya.
6 Tîîse mîrîrî winîpai tiaronkon, inkamoro yonpayamîꞌ atarimaꞌpî, yairon Cristo yekare kupî toꞌya pepîn innape. Moropai toꞌ eseurîma koꞌmannîpî îꞌ pe pra rî.
7 Maasa pra epuꞌtîiꞌma pra toꞌ eseurîma, tînepuꞌtîkon pe pra. Tîîse epuꞌnen pe tîweꞌkuꞌse toꞌ eseurîma teuren, tîîse epuꞌtî toꞌya pepîn. Mîîwîni tîîse toꞌ anenupapai toꞌ wanî Moisés nurîꞌtîya yenupantoꞌ pîꞌ.
8 Mîrîrî Moisés nurîꞌtîya yenupantoꞌ epuꞌtîꞌnîkon man yairon pe puꞌkuru. Mîrîrî yeꞌnen pemonkonyamîꞌ yenupa ya, morî pe awanî, tîîse yapurî epuꞌtîꞌnîkon ya.
9 Mîrîrî epuꞌtîꞌnîkon eꞌpai awanî, Moisés nurîꞌtî pîꞌ Paapaya ekaremekîꞌpî morîkon yenupatoꞌpe pra, tîîse imakuiꞌsan yenupatoꞌpe. Inkamoro Moisés nurîꞌtîya yenupantoꞌ puremeꞌnenan yenupatoꞌpe, moropai Paapa maimu pîinamanenan pepîn yenupatoꞌpe, Paapa namanenan pepîn yenupatoꞌpe, moropai Paapa wakîri pe pra tîweꞌsanon, imakuiꞌpî kupî pîꞌ tîîkoꞌmansenon yenupatoꞌpe, moropai manniꞌkan innape Paapa moro awanî kuꞌnenan pepîn yenupatoꞌpe, moropai pemonkonyamîꞌ, tîyunkon, tîsankon wîînenan yenupatoꞌpe, ekaremekîꞌpîiya.
10 Moropai tiaron noꞌpî, tînyo yarakkîrî tîweꞌsanon, moropai warayoꞌ yarakkîrî taasaꞌsenon nura kuꞌnenan moropai nura kuꞌnenan oꞌmaꞌkon yarakkîrî taasaꞌsenon yenupatoꞌpe, moropai tîweꞌrepatoꞌkon ton pemonkon yamaꞌrunpanenan yenupatoꞌpe, seruꞌyeꞌkon yenupatoꞌpe, moropai tamîꞌnawîron mîrîrî yeꞌka Paapa maimu, yairon esenupantoꞌ yawîrî pra kuꞌnenan yenupatoꞌpe ekaremekîꞌpî Paapaya Moisés nurîꞌtî pîꞌ.
11 Sîrîrî itekare Moisés nurîꞌtîya yenupantoꞌ tauya manniꞌ wanî sîrîrî Jesus Cristo maimu ke panamantoꞌpe. Sîrîrî ekaremeꞌtoꞌpeuya taꞌpî Paapaya. Morî amenan itekare, morî puꞌkuru Paapa, unapurîkon winîpainon sîrîrî.
Uurîꞌnîkon Eraꞌma Paapaya Tîꞌnokoꞌpî
12 Moropai —Morî pe man —tauya Uyepotorîkon Jesus Cristo pîꞌ. Maasa pra meruntî tîrîꞌpîiya uupia. Moropai tîmaimu rumakauya pepîn epuꞌtîꞌpîiya. Mîrîrî yeꞌnen ukupîꞌpîiya esenyakaꞌmatoꞌpe tîmîrî ton pe.
13 Tîîse pena eseurîmapîtîꞌpî imakuiꞌpî pe Jesus winîkîi. Moropai ipemonkonoyamîꞌ tarumaꞌtîpîtîꞌpîuya. Moropai ekoreꞌmapîtîꞌpî toꞌ winîkîi. Mîîwîni tîîse uyeraꞌmaꞌpî Cristoya tîꞌnokoꞌpî pe. Maasa pra pena mîrîrî imakuiꞌpî kuꞌpîtîꞌpîuya epuꞌtîuya pra awanî yeꞌnen. Maasa pra innape ikupîuya pîn.
14 Mîîwîni tîîse urepaꞌpî Uyepotorîkonya kureꞌne morî pe tîweꞌtoꞌ ton ke. Mîrîrî yeꞌnen Cristo kupîuya innape tarîpai, moropai yapurîuya ipemonkono pe wanî yeꞌnen.
15 Sîrîrî panamantoꞌ wanî yairon pe puꞌkuru. Mîrîrî yeꞌnen tamîꞌnawîronkonya innape ikupî eserîke awanî. Tauya see warantî: —Jesus Cristo erepamîꞌpî sîrîrî pata pona imakuiꞌpî kuꞌnenan pîikaꞌtîi. Aꞌkî, inkamoro imakuiꞌpî kuꞌnenan yentai, imakuiꞌpî kupîtîpon pe uurî wanî.
16 Tîîse uurî, imakuiꞌsan yentainon eraꞌmaꞌpî Cristoya tîꞌnokoꞌpî pe. Tîwî ukupîiya pra awanîꞌpî. Mîrîrî warantî tamîꞌnawîronkon pemonkonyamîꞌ kupîiya pepîn tîwî. Tîꞌnokoꞌpî pe uyeraꞌmaꞌpî Cristoya warantî, tiaronkon nîrî eraꞌmaiya tîꞌnokoꞌpî pe. Mîrîrî epuꞌtî manniꞌkanya, maasa innape ikupîtonkonya. Moropai ipatîkarî enen tîîkoꞌmantoꞌkon ton eporî toꞌya.
17 Mîrîrî yeꞌnen epîrema sîrîrî. —Paapa, tamîꞌnawîronkon esaꞌ pe awanî ipatîkarî. Aasaꞌmanta ton pepîn amîrî. Eeseraꞌmaton pepîn amîrî. Amîrî neken wanî Paapa pe. Ayapurî pemonkonyamîꞌya moropai ipîkku pe awanî ekaremekî toꞌya ipatîkarî, amém —tauya Paapa pîꞌ.
18 Moriya Timóteo, mîrîrî taꞌpîuya mîkupîi apîꞌ eseurîmaꞌsan Paapa maimu ekaremeꞌnenanya taasaꞌ yawîrî. Meruntî ke eꞌkî, Makui yentai awanîpa.
19 Innape ikupî pîꞌ akoꞌmankî. Moropai morî kupî pîꞌ akoꞌmankî, neꞌneꞌ pe ayewan wanî namai. Maasa pra tiaronkonya ikupî pepîn mîrîrî warantî. Tîîse yairon pepîn kupî pîꞌ toꞌ koꞌmamî. Mîrîrî ke neꞌneꞌ pe tewankon kupî toꞌya. Mîrîrî yeꞌnen innape ikupî toꞌya pepîn tarîpai. Tîîse yairon pepîn kupî toꞌya innape.
20 Mîrîrî warantî Paapa winîkîi imakuiꞌpî pe teeseurîmasanon Himeneu, Alexandre. Inkamoro rumakaꞌpîuya Makui yenyaꞌ, toꞌ eꞌtarumaꞌtîtoꞌpe, mîrîrî warantî imakuiꞌpî pe Paapa winîkîi teeseurîmakon pîꞌ toꞌ koꞌmamî namai.
