Sîrîrî Kaareta Eꞌmaiꞌnon Paulo Nîmenukaꞌpî Timóteo Pia 2:1-15
2 Eseurîma sîrîrî ayeserukon ton pîꞌ, îꞌ kaiꞌma soosi ta awanîkon ya ikupîkonpa. Eꞌmaiꞌ pe puꞌkuru eepîremakon yuꞌse wanî sîrîrî. Îꞌ ituꞌse aweꞌtoꞌkon esatî Paapa pîꞌ, mîrîrî tîîsaiꞌya pîꞌ —Morî pe man, Paapa —kaꞌtî. Moropai epîrematî tamîꞌnawîronkon pemonkonyamîꞌ pona.
2 Epîrematî pata esaꞌ pe tîweꞌsanon reiyamîꞌ pona, tamîꞌnawîron ipîkku pe tîweꞌsanon pona epîrematî morî pe koꞌmannîtoꞌpe. Tîîwanmîra koꞌmannîtoꞌpe, ituꞌse Paapa eꞌtoꞌ yawîrî uyeserukon eꞌtoꞌpe, toꞌ pona epîrematî.
3 Mîrîrî warantî ikupîꞌnîkon ya, morî pe awanî. Paapa, Upîikaꞌtînenkon wakîri pe awanî.
4 Maasa pra Paapa wanî tamîꞌnawîronkon anpîikaꞌtîpai, moropai imaimu wanî yairon pe epuꞌtî toꞌya nîrî yuꞌse awanî.
5 Maasa pra Paapa tiwinan,tiaron iwarainon ton pra awanî.Moropai pemonkon nîrî moro wanî tiwin,morî pe Paapa yarakkîrî uurîꞌnîkon ena emapuꞌtînen,iteseꞌ Jesus Cristo mîîkîrî.
6 Mîîkîrî rî eꞌtîrîꞌpî tîîwarîrî tîîsaꞌmantapatamîꞌnawîronkon pîikaꞌtîpa kaiꞌma.Mîrîrî yeꞌnen mîîkîrî saꞌmantatoꞌekaremekîꞌpî Paapaya,manniꞌ tînkuꞌneꞌtîꞌpî weiyu yai,tamîꞌnawîronkon nepuꞌtî ton pe.Mîrîrî wenai Paapa wanîtamîꞌnawîronkon anpîikaꞌtîpai epuꞌtoꞌpe toꞌya.
7 Uurî wanî yarimasaꞌ pe, Paapa narimaꞌpî pe Judeuyamîꞌ pepîn yenupanen pe, amenan itekare, yairon innape ikuꞌtoꞌ yekare ekaremeꞌnen pe. Inna pîꞌ rî eseurîma sîrîrî, seruꞌyeꞌ pe wanî pepîn sîrîrî.
8 Mîrîrî yeꞌnen tamîꞌnawîronkon warayoꞌkon epîrema yuꞌse wai pata kaisarî. Imakuiꞌpî tîkuꞌse pra toꞌ epîrema yuꞌse wai. Moropai tonpakon pîꞌ teekoreꞌmai pra toꞌ epîrema yuꞌse wai. Tonpakon yarakkîrî teesiyuꞌpîꞌse pra toꞌ epîrema yuꞌse wai.
9 Wîriꞌsanyamîꞌ nîrî koꞌmamî yuꞌse wanî morî pe teepontîi tîponkon yaꞌ, mîîpankon warantî tîwanîkonpa pra. Maasa pra inkamoro mîîpankon wanî morî pe teepontîi, epeꞌkeꞌkon tîponkon yaꞌ. Moropai toꞌ atakina tîpuꞌpaikon yariꞌkutî toꞌya ouro ke, pérola ke emaꞌnon pe teeseraꞌmakonpa.
10 Mîrîrî warantî pra ikupî wîriꞌsanyamîꞌya yuꞌse wai. Toꞌ pon wenai pra tîîse toꞌ yeseru wenai, tiaronkonya epuꞌtoꞌpe, morî pe toꞌ koꞌmamî. Moropai morî pe tiaronkon yarakkîrî toꞌ yeseru wanî yuꞌse wai. Morî pe toꞌ koꞌmamî eꞌpai awanî, Paapa yapurînenan pe tîwanîkon yeꞌnen.
11 Moropai wîriꞌsanyamîꞌ Paapa maimu pîꞌ toꞌ esenupatoꞌpe yuꞌse wai, moo siꞌma, mîî pe pra.
12 Tîîse tauya, warayoꞌkon yenupa wîriꞌsanyamîꞌya yuꞌse pra wai, toꞌ yentai toꞌ wanî namai. Tîîse wîriꞌsanyamîꞌ yuꞌse wai soosi ta moo.
13 Maasa pra Adão nurîꞌtî konekaꞌpî Paapaya eꞌmaiꞌ pe. Mîîkîrî tîpo Eva nurîꞌtî konekaꞌpîiya.
14 Moropai Adão yenkuꞌtîsaꞌ Makuiya pra man, tîîse mîîkîrî wîriꞌ yenkuꞌtîꞌpîiya. Moropai imakuiꞌpî kupîꞌpî wîriꞌya Paapa maimu yawîrî pra.
15 Tîîse inkamoro pîikaꞌtî Paapaya imakuiꞌpî yapai, tîmoronkon epuꞌtî toꞌya tîîse tînmukukon yenpo tîuyaꞌnîkon ya. Innape ikupî pîꞌ toꞌ koꞌmamî ya, toꞌ pîikaꞌtîiya. Morî pe toꞌ koꞌmamî ya moropai tiaronkon saꞌnama pîꞌ toꞌ koꞌmamî ya, toꞌ pîikaꞌtîiya.
