Sîrîrî Kaareta Eꞌmaiꞌnon Paulo Nîmenukaꞌpî Timóteo Pia 3:1-16
3 Tarîpai eseurîma sîrîrî soosi esaꞌ pe tîweꞌsen yeseru pîꞌ. Sîrîrî wanî yairon pe puꞌkuru. Anîꞌ esenumenka ya, soosi esaꞌ pe eꞌpai, mîrîrî morî esenyakaꞌmatoꞌ yuꞌse mîîkîrî wanî.
2 Mîrîrî yeꞌnen mîîkîrî yeseru eꞌpai awanî morî pe, tiaronkon eseurîma namai imakuiꞌpî pe iwinîkîi. Mîîkîrî eꞌpai awanî tiwin tînoꞌpî yarakkîrî tîweꞌsen pe, tiaron yarakkîrî pra. Tîîwarîrî eetîꞌnînma eꞌpai awanî, teseru epuꞌnen pe. Moropai mîîkîrî eꞌpai awanî tamîꞌnawîronkon nînama pe, yairî iteseru wanî wenai. Moropai mîîkîrî yeseru eꞌpai awanî pemonkonyamîꞌ teerepansenon tîîpia yapiꞌnen pe morî pe. Moropai mîîkîrîya pemonkonyamîꞌ yenupa eꞌpai awanî morî pe.
3 Mîîkîrî eꞌpai awanî kureꞌne maiꞌ enîꞌnen pe pra, teetînsen pe pra. Moropai mîîkîrî eꞌpai awanî tonpa yarakkîrî teekoreꞌmasen pe pra. Tîîse mîîkîrî eꞌpai awanî tamîꞌnawîronkon yarakkîrî morî pe tîweꞌsen pe. Moropai mîîkîrî eꞌpai awanî teesiyuꞌpîꞌsen pe pra tonpa yarakkîrî, îꞌ rî etasaꞌ tîuya pîꞌ. Mîîkîrî eꞌpai awanî kureꞌne tîniru yuꞌse teesekaꞌnunkasen pe pra.
4 Tîîse mîîkîrî eꞌpai awanî morî pe, tîpemonkonoyamîꞌ koꞌmannîpî epuꞌnen pe. Mîrîrî wenai morî pe tînmukuyamîꞌ panamaiya eꞌpai awanî. Mîrîrî warantî iteseru wanî wenai, inmukuyamîꞌya inama, îꞌ taiya ya toꞌ pîꞌ.
5 Maasa pra anîꞌ wanî ya, tînmukuyamîꞌ koꞌmannîꞌnen pe pra, îꞌ kaiꞌma see mîîkîrîya Paapa pemonkonoyamîꞌ koꞌmannîpî eꞌpainon? Mîrîrî yeꞌnen morî pe iteseru eraꞌmakî.
6 Amenan pe innape Jesus kupîtîpon pepîn menkakî, soosi esaꞌ pe. Maasa pra amenan menkaya ya, mîîkîrî atapurî eꞌpainon. Tiaron yentai eꞌpai tîwanî pîꞌ mîî pe awanî. Mîrîrî wenai mîîkîrî tarumaꞌtî Paapaya. Mîrîrî warantî Makui atapurîꞌpî pena. Moropai Paapaya yenumîꞌpî. Mîrîrî warantî awanî namai, amenan pe innape Jesus kupîtîpon kîꞌtîrîi soosi esaꞌ pe.
7 Mîrîrî yeꞌnen morî pe iteseru eraꞌmakî. Innape Jesus kuꞌnenan pepînya inama eꞌpai awanî, imakuiꞌpî pe iwinîkîi toꞌ eseurîma namai. Maasa pra imakuiꞌpî pe iteseru wanî ya, imakuiꞌpî pe toꞌ eseurîma. Moropai mîîkîrî ena Makui yenyaꞌ. Teseru kuꞌtoꞌpeiya Makuiya yenkuꞌtî. Mîrîrî namai, morî iteseru wanî wenai, innape Jesus kuꞌnenan pepînya inama eꞌpai awanî.
Soosi Esaꞌ Tîweꞌsen Pîikaꞌtînen Yeseru Pîꞌ
Paulo Eseurîma
8 Mîrîrî warantî nîrî soosi esaꞌ pe tîweꞌsen pîikaꞌtînen yeseru eꞌpai awanî nîrî morî pe. Yairî mîîkîrî eseurîma eꞌpai awanî seꞌ tapairî pra. Kureꞌne maiꞌ enîꞌnen pe pra eꞌpai awanî. Îꞌ rî tamaꞌrunpai tîweꞌsen pe pra, kureꞌne ituꞌse tîwanî yeꞌnen.
9 Tîîse innape Cristo yekare kupî pîꞌ toꞌ koꞌmamî eꞌpai awanî. Mîrîrî itekare, unepuꞌtîkon pepîn ekaremekîꞌpî Paapaya. Innape ikupî pîꞌ toꞌ koꞌmamî eꞌpai awanî, morî pe tewankon wanî epuꞌtîiꞌma, neꞌneꞌ ton pîn, morî tîkuꞌse.
10 Mîrîrî yeꞌnen morî pe toꞌ yeseru eraꞌmakî, Timóteo. Innape yairî toꞌ yeseru wanî ya, inkamoro mîkupîi soosi esanon pîikaꞌtînenan pe.
11 Wîriꞌsanyamîꞌ nîrî esenumenka eꞌpai awanî morî pe. Kureꞌne teeseurîmasen pe pra seꞌ tapairî tiaronkon winîkîi. Moropai tîîwarîrîꞌnîkon toꞌ etîꞌnînma eꞌpai awanî. Tamîꞌnawîrî îꞌ kupî tîuya ya, ikupîiya eꞌpai awanî yairî tiaronkon tenkuꞌtîi pra.
12 Mîîkîrî soosi esanon pîikaꞌtînen noꞌpî eꞌpai awanî tiwin. Mîîkîrî soosi esanon pîikaꞌtînenya tînmukuyamîꞌ koꞌmannî pîꞌ eꞌpai awanî morî pe. Moropai tewîꞌ tawonkon nîrî koꞌmannîpîiya eꞌpai awanî.
13 Mîrîrî warantî inkamoro soosi esanon pîikaꞌtînenan esenyakaꞌmatoꞌ wanî ya, morî pe tiaronkonya toꞌ yeseru eraꞌma yairî toꞌ wanî. Mîrîrî wenai toꞌ nama toꞌya. Mîrîrî yeꞌnen inîꞌ panpîꞌ meruntî ke inkamoro soosi esanon pîikaꞌtînenan eseurîma emapuꞌtî toꞌya Jesus Cristo yekare pîꞌ.
Pena Epuꞌsaꞌ Pepîn Pîꞌ Paulo Eseurîma
14 Sîrîrî kaareta menukauya aapia, Timóteo, innape Jesus kuꞌnenan yeseru pîꞌ teeseurîmasen. Mîrîrî pîꞌ eseurîmai itîîpai wai miarî aapia.
15 Tîîse erepamî pra uukoꞌmamî ya, mîrîrî kaaretaya taasaꞌ wenai, epuꞌtîya îꞌ kaiꞌma uurîꞌnîkonya ikupî soosi ta. Uurîꞌnîkon wanî Paapa pemonkono pe, manniꞌ Paapa, enen tîîkoꞌmansen soosirî pe. Uurîꞌnîkon wanî imaimu yawîrî tîîkoꞌmansenon pe. Uurîꞌnîkon wanî innape yairon kuꞌnenan pe, tiaronkon pemonkonyamîꞌya yairon epuꞌtoꞌpe.
16 Unapurîkon esepuꞌtî pepîn Paapaya yenpo pîkîrî. Unapurîkon wanî uyenupanenkon pe îꞌ kaiꞌma koꞌmannî ituꞌse Paapa eꞌtoꞌ yawîrî. Maasa pra unapurîkon wanî tiwinan pîꞌ teeseurîmasen pe see warantî:Mîîkîrî esenpoꞌpî pemonkon pemoropai mîîkîrî pîꞌ Morî Yekaton Wannî eseurîmaꞌpî.—Imakuiꞌpî ton pîn mîîkîrî —taꞌpîiya ipîꞌ.Moropai mîîkîrî eraꞌmaꞌpî inserîyamîꞌya.Moropai mîîkîrî yekare ekaremekîꞌpî pemonkonyamîꞌyatuꞌkankon Paapa epuꞌnenan pepîn pîꞌ,pata kaisaronkon pîꞌ.Moropai mîîkîrî yekare eta tîuyaꞌnîkon yai,innape ikupîꞌpî toꞌya.Moropai mîrîrî tîpo, Paapaya kaꞌ pona yarîꞌpî.Mîîkîrî wanî unapurîkon pe ipîkku pe.
