Sîrîrî Kaareta Eꞌmaiꞌnon Paulo Nîmenukaꞌpî Timóteo Pia 4:1-16
4 Morî Yekaton Wannî eseurîmaꞌpî aronne see warantî: —Maasa panpîꞌ sîrîrî pata ataretîꞌka winîkîi tiaronkon Paapa yapurînenanya yapurî pepîn kupî sîrîrî, irumaka toꞌya kupî sîrîrî. Mîrîrî yai tiaronkon Makui poitîrîtonon nenkuꞌtîꞌsan maimu eta toꞌya. Mîrîrî pîꞌ “inna” taa toꞌya —taꞌpî Morî Yekaton Wannîya.
2 Inkamoro warayoꞌkon wanî Makui poitîrîtonon nenkuꞌtîꞌsan pe. Mîrîrî yeꞌnen seruꞌyeꞌ pe toꞌ wanî. Mîrîrî seruꞌyeꞌ pe tîweꞌtoꞌkon epuꞌtî toꞌya pepîn tewankon yaꞌ, maasa pra kureꞌne ikupî pîꞌ toꞌ koꞌmamî.
3 Inkamoro warayoꞌkonya taa: —Noꞌpîtan wanî morî pe pra —taa toꞌya. —Moropai yekkari wanî yonpatoꞌ wanî morî pe pra —taa toꞌya. Tîîse mîrîrî Paapa nîkupîꞌpî uyekkarikon pe wanî morî pe enaꞌtoꞌpe. —Morî pe man —taa eꞌpai awanî, uurîꞌnîkon innape Paapa kuꞌnenanya enaꞌtoꞌpe, uurîꞌnîkon yairon epuꞌnenanya.
4 Maasa pra Paapa nîkupîꞌpî wanî morî pe. Yewanmîrîꞌnîkon eꞌpai pra awanî. Tîîse yapisî eꞌpai awanî morî pe. —Morî pe man —taa eꞌpai awanî.
5 Maasa pra Paapa pia morî pe awanî taasaiꞌya yeꞌnen, teepîremai yapisî yeꞌnen.
Yairon Jesus Cristo Poitîrî Pîꞌ Paulo Eseurîma
6 Mîrîrî pîꞌ uyonpakon innape Jesus kuꞌnenan panamaya ya, morî pe ikupîya mîrîrî. Mîrîrî warantî ikupîya ya, Jesus poitîrî pe puꞌkuru awanî. Moropai inîꞌ panpîꞌ amîrî ena meruntî ke, mîrîrî yairon esenupantoꞌ kupîya wenai innape, moropai mîrîrî yawîrî aakoꞌmamî wenai.
7 Tîîse tauya apîꞌ, penaronkon tîtamokon yekarerîꞌpî pîꞌ teeseurîmasanon eseurîma kîsetai. Maasa pra toꞌ eseurîmatoꞌ wanî Paapaya taasaꞌ yawîrî pra, seꞌ tapairî toꞌ eseurîma koꞌmannîpî. Mîrîrî yeꞌnen mîrîrî yeꞌka kîsetai. Tîîse morî kupî pîꞌ akoꞌmankî. Inîꞌ panpîꞌ eesenupa pîꞌ akoꞌmankî, ituꞌse Paapa eꞌtoꞌ yawîrî awanîpa.
8 Anîꞌ esenupa ya, îꞌ rî amîiꞌne yanunpîtî pîꞌ mîîkîrî esenupa eꞌpainon meruntî ke tîwanîpa. Mîrîrî yeꞌnen teesenyakaꞌmatoꞌ konekaiya morî pe. Tîîse mîrîrî yentai morî pe awanî, morî kupî pîꞌ aakoꞌmamî ya, ituꞌse Paapa eꞌtoꞌ yawîrî. Maasa pra mîîkîrî koꞌmamî sîrîrî morî pe, moropai sîrîrî tîîkoꞌmamî yentai, maasa aakoꞌmamî ipatîkarî Paapa pia.
9 Sîrîrî esenupantoꞌ wanî yairon pe puꞌkuru. Mîrîrî kupî eserîke awanî innape tamîꞌnawîrî uyewankon ke.
10 Mîrîrî ton pe uurîꞌnîkon esenyakaꞌma sîrîrî umoronkon tepuꞌse kureꞌne, maasa pra anîꞌ pe Paapa wanî epuꞌtîꞌnîkon man, mîîkîrî enen tîîkoꞌmansen. Mîîkîrî tamîꞌnawîronkon pemonkonyamîꞌ pîikaꞌtîton moropai innape tîkuꞌnenan pîikaꞌtînen epuꞌtîꞌnîkon man.
11 Mîrîrî yeꞌnen mîrîrî kaꞌkî toꞌ pîꞌ moropai toꞌ yenupakî.
12 Timóteo, amîrî wanî maasaron pe tîweꞌsen pe. Mîîwîni tîîse tamîꞌnawîronkonya ayeseru eraꞌmatoꞌpe ikuꞌkî. Mîrîrî kupîya wenai apîinamatoꞌpe toꞌya. Mîrîrî wenai innape Jesus kuꞌnenanya ayeseru eraꞌmatoꞌpe eeseurîmatoꞌ wenai, ayeseru wenai, tiaronkon saꞌnamaya wenai, innape Paapa kupîya wenai, nura pe pra ayeseru wanî wenai epuꞌtoꞌpe toꞌya.
13 Timóteo, innape Jesus kuꞌnenan emurukuntîꞌsanya eta tanne, Paapa maimu erenka pîꞌ aakoꞌmamî yuꞌse wai, miarî ya erepamî pîkîrî. Mîrîrî Paapa maimu ke toꞌ yenupa pîꞌ, toꞌ panama pîꞌ akoꞌmankî.
14 Ankupî pe Paapa nekaremekîꞌpî kîꞌkupîi aawanmîra. Maasa pra aapia epuꞌnen tîrîꞌpîiya ikupîpa. Pena manniꞌkan Paapa maimu ekaremeꞌnenanya ekaremekîꞌpî, soosi esanon epîrema yai apuꞌpai pona tenyakon tîtîse, Paapa esenyakaꞌmatoꞌ kupîpa. Mîrîrî yai taꞌpî toꞌya: —Amîrî menkasaꞌ Paapaya tîmîrî ton pe eesenyakaꞌmapa.
15 Mîrîrî yeꞌnen mîrîrî kupî pîꞌ akoꞌmankî. Mîrîrî kupî pîꞌ aakoꞌmamî ya, morî pe panpîꞌ ayeseru eraꞌma tamîꞌnawîronkonya.
16 Ayeseru epuꞌnen pe eꞌkî, moropai eesenupatoꞌ epuꞌnen pe nîrî. Mîrîrî kupî pîꞌ aakoꞌmamî ya aweꞌpîikaꞌtî. Moropai ayeseru eraꞌmatîponkon moropai etatîponkon nîrî pîikaꞌtîya.
