Sîrîrî Kaareta Eꞌmaiꞌnon Paulo Nîmenukaꞌpî Timóteo Pia 5:1-25
5 Timóteo, aꞌyekeꞌtonon pe tîweꞌsanon yarakkîrî eeseurîma ya, morî pe eseurîmakî. Toꞌ panamakî ayun warantî toꞌ tîkuꞌse. Toꞌ panamakî meruntî ke, toꞌ maimu tîyuꞌse pra. Moropai maasaronkon warayoꞌkon yarakkîrî eeseurîma ya, toꞌ yarakkîrî eseurîmakî morî pe nîrî. Inkamoro kuꞌkî ayakonon warantî.
2 Moropai wîriꞌsanyamîꞌ nîrî, noꞌsantonon yarakkîrî eeseurîma ya, eseurîmakî morî pe. Inkamoro kuꞌkî asanon warantî, toꞌ panamakî. Moropai wîriꞌsanyamîꞌ maasaronkon moropai tînyo kenankon yarakkîrî eeseurîma ya nîrî, morî pe eseurîmakî. Inkamoro kuꞌkî awîrîsitonon warantî toꞌ panamakî. Îꞌ kaiꞌma toꞌ winîkîi imakuiꞌpî pe teesenumenkai pra toꞌ panamakî.
3 Moropai wîriꞌsanyamîꞌ inyo isaꞌmantaꞌsan pîikaꞌtîyaꞌnîkon yuꞌse wai, inkamoro ipîikaꞌtînen ton pînon.
4 Tîîse manniꞌkan inyo isaꞌmantaꞌsan tînmuku kenankon, tîpayan kenankon, inkamoro yeꞌka pîikaꞌtîya eserîke pra nai. Maasa pra toꞌ munkîyamîꞌya, toꞌ payanyamîꞌya toꞌ pîikaꞌtî eꞌpai awanî. Mîrîrî kupî toꞌya ya, tîyunkonya tarentanîpîꞌpîkon miakanma toꞌya, tîsankon koꞌmannîpî pîꞌ. Mîrîrî wanî morî pe Paapa pia.
5 Tîîse tiaronkon inyo isaꞌmantaꞌsan inmuku, ipayan ton pînon wanî tiwinsarî, ipîikaꞌtînen pra. Inkamoro pîikaꞌtîyaꞌnîkon eꞌpai awanî. Toꞌ yeseru wanî morî pe. Paapa pîꞌ tîîkoꞌmantoꞌ ton esatî pîꞌ aakoꞌmamî. Eepîrema wei kaisarî moropai ewaron kaisarî tîpîikaꞌtîtoꞌpe Paapaya kaiꞌma.
6 Tîîse tiaron inyo isaꞌmantaꞌpî nîrî wanî tîweꞌpîikaꞌtîtoꞌ yuꞌse pra. Maasa pra ituꞌse tîweꞌtoꞌ yawîrî ikupîiya sîrîrî pata yeseru pîꞌ aatausinpa kureꞌne. Tîweꞌpîikaꞌtîtoꞌ ton esatîiya pepîn Paapa pîꞌ. Mîrîrî yeꞌnen Paapaya mîîkîrî eraꞌma îꞌ pe pra rî. Isaꞌmantaꞌpî warantî eraꞌma Paapaya teuren, enen rî eesepuꞌtî tanne.
7 Mîrîrî yeꞌnen kaꞌkî, Timóteo, toꞌ pîꞌ îꞌ kaiꞌma toꞌ nîkupî ton pe taꞌpîuya ikuꞌtoꞌpe toꞌya. Mîrîrî yawîrî ikupî toꞌya ya, morî pe awanî toꞌ winîkîi anîꞌ eseurîma pepîn.
8 Tîîse anîꞌya tonpakon pîikaꞌtî pra awanî ya, tewîꞌ tawonkon pîikaꞌtî pra awanî ya, imakuiꞌpî pe awanî. Teuren Paapa yapurînen pe eꞌnî taa tanne, ikupîiya pra awanî. Mîrîrî yeꞌnen mîîkîrî wanî Paapa epuꞌnenan pepîn yeseru yentai imakuiꞌpî pe.
9 Inkamoro inyo isaꞌmantaꞌsan noꞌsantonon saꞌne eseꞌkon mîmenukai kaareta pona, Timóteo, toꞌ pîikaꞌtîtoꞌpe soosi tawonkonya. Manniꞌkan 60 konoꞌ yentainon ikono pîꞌ tîweꞌsanon. Manniꞌkan tiwin iteꞌka etiyomaꞌsan eturumakasaꞌ inyo pra.
10 Inkamoro epuꞌtî tamîꞌnawîronkonya morî kupî pîꞌ tîweꞌsanon pe. Morî pe tînmukukon panamatîpon pe, moropai tiaronkon pemonkonyamîꞌ teerepansenon yapiꞌnenan pe moropai Jesus nîmoꞌkaꞌsan pîikaꞌtînen, toꞌ puu ronanen pe awanî teserukon ta. Moropai tîpakkoriꞌtasanon pîikaꞌtînen pe moropai tamîꞌnawîron morî kuꞌnen pe awanî epuꞌtî toꞌya. Inkamoro yeꞌka eseꞌkon mîmenukai.
11 Tîîse manniꞌkan tiaronkon inyo isaꞌmantaꞌsan maasa toꞌ tîîse, inkamoro yeꞌkakon eseꞌkon kîꞌtîrîi kaareta pona. Maasa pra inkamoro esenumenka inîꞌrî niyotapai tîwanîkon pîꞌ. Mîrîrî yeꞌnen Cristo ton pe esenyakaꞌmapai tîweꞌtoꞌkon yentai, niyotapai toꞌ ena.
12 Mîrîrî warantî awanî yeꞌnen, ikupîuya taꞌpî tîuya Paapa pîꞌ kupî toꞌya pepîn. Mîrîrî wanî morî pe pra.
13 Inkamoro yeꞌka wanî ya, mîrîrî warantî imakuiꞌpî pe awanî. Toꞌ asarî koꞌmannîpî wîttîkon kaisarî enyaꞌne pe tîwanîkon yeꞌnen. Moropai inkamoro esenupa inîꞌ panpîꞌ imakuiꞌpî pîꞌ. Eseurîmaikî pe toꞌ wanî, teeseurîma pîꞌ tîîkoꞌmansen tînepuꞌtî pepîn pîꞌ, eseurîmanpai pra tîîse.
14 Mîrîrî yeꞌnen inkamoro yeꞌka inyo isaꞌmantaꞌsan, maasaronkon niyota yuꞌse wanî sîrîrî, tînmuku ke toꞌ eꞌtoꞌpe, moropai tewîꞌkon koꞌmannîꞌnen pe toꞌ eꞌtoꞌpe. Mîrîrî warantî toꞌ wanî ya, imakuiꞌpîya toꞌ tarumaꞌtî pepîn. Moropai uwinîkîiꞌnîkon uyeyatonkon eseurîma pepîn.
15 Tîîse tiaronkon inyo isaꞌmantaꞌsan wîriꞌsanyamîꞌ atarimasaꞌ man ukoreꞌtapaiꞌnîkon, Makui yeseru kupîkonpa.
16 Tîîse wîriꞌ, innape Jesus kuꞌnen yewîꞌ ta, tonpa, inyo isaꞌmantaꞌpî wanî ya, mîîkîrî pîikaꞌtî eꞌpai awanî. Moropai tonpa pîikaꞌtîiya yeꞌnen, soosi tawonkonya mîîkîrî pîikaꞌtî pepîn. Tîîse anîꞌ itonpa ton pîn, tiwinsaron saꞌne pîikaꞌtî soosi tawonkonya.
17 Innape Jesus kuꞌnenanya soosi esaꞌ pe tîweꞌsanon nama eꞌpai awanî. Moropai mîîkîrî pîikaꞌtî toꞌya eꞌpai awanî, iipia tîntîrîkon ke. Maasa pra inkamoro esenyakaꞌma morî pe itekare ekaremekî pîꞌ, moropai innape Jesus kuꞌnenan yenupa pîꞌ. Mîrîrî yeꞌnen îꞌ tîrî toꞌya eꞌpai awanî kureꞌne panpîꞌ toꞌ pia.
18 Maasa pra Paapa maimuya taasaꞌ man see warantî:—Anîꞌ esenyakaꞌma ya, tekîn paaka yarakkîrî,mîîkîrîya inta yewaꞌtî eꞌpai pra man,tekkari yonpaiya namai.Tîîse teesenyakaꞌma tanne,tîwî tekkari yonpatoꞌpeiyaituꞌse tîwanî pîkîrî.
Moropai inîꞌrî taiya see warantî:—Teesenyakaꞌmasenya teesenyakaꞌmaꞌpî yepeꞌpî yapisî eꞌpai awanî.
Mîrîrî warantî soosi esaꞌ pe tîweꞌsanonya yapisî eꞌpai awanî nîrî.
19 Timóteo, soosi esanon winîkîi teeseurîmasen wanî ya, imaimu kîsetai. Tîîse asakîꞌnankon eseurîwîꞌnankon eseurîma ya, inkamoro maimu etakî morî pe. Mîrîrî wanî ya innape, moriya ikonekakî.
20 Mîrîrî yeꞌnen inkamoro imakuiꞌpî kupîtîponkon panamakî tamîꞌnawîronkonya eta tanne. Mîrîrî wenai imakuiꞌpî ankuꞌpai pra eranneꞌ pe toꞌ yonpayamîꞌ eꞌtoꞌpe.
21 Paapaya eta tanne, moropai Jesus Cristoya eta tanne, moropai inserîyamîꞌ Paapa nîmenkaꞌsanya eta tanne, taa pîꞌ uukoꞌmanpîtî apîꞌ, tamîꞌnawîrî ikuꞌkî tauya manniꞌ esenupantoꞌ kuꞌkî yairî. Inkamoro panamakî tiwin pîꞌ toꞌ tîîse seꞌ kaisarî, eꞌsentai pra.
22 Moropai tauya apîꞌ, kaꞌneꞌ pe teesemiꞌtapai uyepotorîkon esenyakaꞌmatoꞌ kuꞌnen ton kîꞌtîrîi iteseru epuꞌtîiꞌma pra. Soosi esaꞌ pe aweꞌtoꞌpe ayenya kîꞌtîrîi ipuꞌpai pona, iteseru epuꞌtîya pra awanî tanne. Yai pra imakuiꞌpî iteseru wanî. Mîrîrî yeꞌnen —Mîîkîrî morî —tawon pe awanî, imakuiꞌpî pe awanî tanne. Mîrîrî wenai imakuiꞌpî pe awanî, mîîkîrî wanî kaisarî. Mîrîrî warantî awanî namai, iteseru eraꞌmakî morî pe epuꞌtîpa. Moropai aawarîrî eseraꞌmakî, morî pe awanîpa.
23 Moropai tauya apîꞌ, teken puꞌkuru tuna enîrî pîꞌ kakoꞌmamîi, tîîse vinho nîrî, mararî neken menîrîi, priꞌya aakoꞌmamîpa, neꞌneꞌ pe ayewan wanî namai. Maasa pra priꞌya pra eꞌkoi amîrî tuꞌke iteꞌka.
24 Tiaronkon pemonkonyamîꞌ nîkupîꞌpî imakuiꞌpî teeseraꞌmasen aronne, ikupî toꞌya eraꞌmasaꞌ yeꞌnen. Moropai mîrîrî wenai toꞌ eꞌtarumaꞌtî, Paapaya toꞌ tarumaꞌtî rawîrî. Tîîse tiaronkon nîkupîꞌpî eseraꞌma pepîn aronne, maasa pra ikupî toꞌya eraꞌmasaꞌ pra awanî yeꞌnen. Tîîse maasa panpîꞌ eeseraꞌma, Paapaya toꞌ tarumaꞌtîtoꞌ weiyu eseposaꞌ yai.
25 Mîrîrî warantî nîrî morî kupî pîꞌ tîweꞌsen yeseru eseraꞌma aronne, tuꞌkankonya eraꞌma. Tîîse tiaronkonya ikupî amaꞌ pe. Morî kupî toꞌya, eeseraꞌma pra tîîse. Tîîse maasa panpîꞌ eeseraꞌma toꞌ nîkupîꞌpî.
