Sîrîrî Kaareta Eꞌmaiꞌnon Paulo Nîmenukaꞌpî Timóteo Pia 6:1-21
6 Tîkaraiwarîkon yentai toꞌ poitîrîtonon wanî eꞌpai pra awanî. Tîîse tamîꞌnawîrî toꞌ maimu yawîrî toꞌ wanî eꞌpai awanî. Maasa pra inkamoro wanî toꞌ namanenan pe. Mîrîrî warantî ikupî eꞌpai man, inkamoro yeseru wenai anîꞌ eseurîma namai imakuiꞌpî pe Paapa winîkîi, moropai imaimu esenupantoꞌ winîkîi.
2 Moropai manniꞌkan Paapa yapurînen pe tîweꞌsanon toꞌ karaiwarîyamîꞌ, inkamoro poitîrîyamîꞌya taa eꞌpai pra awanî: —Uurî Paapa yapurînen moropai ukaraiwarî nîrî Paapa yapurînen nîrî, mîrîrî yeꞌnen anna wanî eꞌwarantî, eꞌkaisarî. Mîrîrî yeꞌnen inamauya pepîn —taiya eꞌpai pra awanî. Tîîse eesenyakaꞌma eꞌpai awanî morî pe panpîꞌ mîîkîrî ton pe. Maasa pra mîîkîrî ikaraiwarî wanî innape Jesus kuꞌnen pe, mîîkîrî tîpoitîrî pîikaꞌtînen pe. Mîrîrî wenai morî pe panpîꞌ eesenyakaꞌma eꞌpai awanî, mîîkîrî ton pe, manniꞌ insaꞌnamaꞌpî. Timóteo, mîrîrî warantî ikupî pîꞌ toꞌ koꞌmantoꞌpe, makai toꞌ pîꞌ.
Yairon Pepîn Pîꞌ Paulo Eseurîma
Moropai Ipîkku Pe Eꞌnîtoꞌ Pîꞌ Eeseurîma
3 Tîîse tiaronkonya tiaron pe toꞌ yenupa ya, inkamoroya yairî Uyepotorîkon Jesus Cristo maimu wanî kupî pepîn. Maasa pra yairî pra teserukon wanî yeꞌnen.
4 Inkamoro pemonkonyamîꞌ wanî mîrîrî warantî, toꞌ anenupapai mîî pe tîwanîkon yeꞌnen. Tîîse îꞌ epuꞌnenan pepîn inkamoro. Tonpakon yuꞌpîꞌpai toꞌ wanî. Tîmaimukon wenai inkamoro esiyuꞌpîtî, moropai toꞌ ekoreꞌma tuꞌka mîrîrî wenai. Mîrîrî warantî toꞌ eꞌtoꞌya toꞌ kinmuwatoꞌ enepî, toꞌ eꞌmuꞌtunpatoꞌ enepî. Mîrîrî yeꞌnen tonpakon maimu kupî toꞌya pepîn innape.
5 Mîrîrî yeꞌnen inkamoro yeꞌka wanî pepîn morî pe, tonpakon yarakkîrî teesiyuꞌpîꞌtoꞌkon wenai. Toꞌ esenumenkatoꞌ yaꞌ morî ton pra awanî. Inkamoro esenumenka mîrîrî: —Paapa esenyakaꞌmatoꞌ pîꞌ eꞌnî yeꞌnen ipîkku pe enantoꞌ —kaiꞌma.
6 Tîîse Paapa yeseru kuꞌtoꞌya ipîkku pe pemonkon kupî. Imaimu yawîrî koꞌmannî ya, ipîkku pe eꞌnî, îꞌ rî see Paapa winîpainon yapisî pîꞌ —Morî pe man —taa ya, moropai —Inîꞌ panpîꞌ yuꞌse wai —tîkai pra yapisî ya.
7 Îꞌ kin enepîꞌpî uurîꞌnîkonya esenpon yai sîrîrî non pona? Îꞌ eneꞌsaꞌ pra man. Tarîpai îꞌ yarî uurîꞌnîkonya kupî sîrîrî non poi? Îꞌ rî yarî pepîn.
8 Mîrîrî yeꞌnen tauya, uyekkarikon wanî ya, moropai uponkon wanî ya, mîrîrî pîꞌ taatausinpai eꞌnîpaiꞌnîkon, itesaꞌ pe eꞌnî yeꞌnen.
9 Maasa pra ipîkku pe eꞌpai tîweꞌsanonkon wanî ya, inkamoro yeꞌkakon enan pîꞌ man imakuiꞌpî yaꞌ. Tîîse mîrîrî ituꞌse tîweꞌtoꞌkon eporî toꞌya yai, mîrîrîya toꞌ tarumaꞌtî.
10 Maasa pra sîrîrî non po kureꞌne temannekon pîꞌ teesenumenkasanonya kureꞌne mîrîrî yapurî. Tîîse mîrîrî wanî mîrîrî tamîꞌnawîron imakuiꞌpî parakon pe. Mîrîrî yuꞌse tîwanîkon wenai tiaronkon esenumî innape Paapa kuꞌtoꞌ tîuyaꞌnîkon winîpai. Mîrîrî yeꞌnen toꞌ eꞌtarumaꞌtî kureꞌne.
Timóteo Panama Pauloya
11 Tîîse amîrî, Timóteo, Paapa pemonkono pe tîweꞌsen. Mîrîrî yeꞌnen tuꞌkan mîrîrî yeꞌkakon yuꞌse tîweꞌsanon kaisarî kasi. Tîîse yairî ikuꞌkî ituꞌse Paapa eꞌtoꞌ yawîrî. Innape ikupîiꞌma, tiaronkon iꞌnokoꞌmakî. Moropai apona teerepansen yapîtanîꞌkî, imakuiꞌpî tîkuꞌse pra. Morî pe tiaronkon yarakkîrî eꞌkî, teekoreꞌmasen pe pra.
12 Meruntî kupî pîꞌ akoꞌmankî innape ikupîiꞌma. Mîrîrî wenai innape eporîya ipatîkarî enen aakoꞌmantoꞌ ton. Mîrîrî ton pe Paapaya amîrî menkaꞌpî, manniꞌ yai, innape ikupîya ekaremekîꞌpîya yai, tuꞌkankonya ayeraꞌma tanne.
13 Tamîꞌnawîron koꞌmantoꞌ ton tîînen Paapaya eta tanne, moropai manniꞌ Jesus Cristo eseurîmaꞌpî Pôncio Pilatos nurîꞌtî rawîrî siꞌma, mîîkîrîya eta tanne, sîrîrîpe tauya apîꞌ.
14 —Ikuꞌkî —taꞌpîuya kupîya yuꞌse wanî sîrîrî. Mîrîrî kupî pîꞌ akoꞌmankî tîwî tîkuꞌse pra, imakuiꞌpî pe awinîkîi tiaronkon eseurîma namai. Ikupî pîꞌ akoꞌmankî Uyepotorîkon Jesus Cristo ennaꞌpotoꞌ weiyu erepamî pîkîrî.
15 Paapaya ikupî kupî sîrîrî maasa pra iweiyu kuꞌneꞌtîsaꞌ tîuya yeꞌnen.Manniꞌ Paapa morî moropai tiwinsaron ipîkku,ipîkkukon reiyamîꞌ yentainonmoropai uyesaꞌkon pe tîweꞌsanon yentainon mîîkîrî.
16 Mîîkîrî neken wanî ipatîkarî tîîkoꞌmansen peaasaꞌmanta ton pe pra aakoꞌmamî.Mîîkîrî koꞌmantoꞌ wanî morî pe,aꞌka pe puꞌkuru, imakuiꞌpî ton pra.Mîrîrî yeꞌnen imakuiꞌpî pe siꞌmaiipia erepannî eserîke pra awanî.Anîꞌya Paapa eraꞌmasaꞌ pra man.Mîrîrî yeꞌnen sîrîrî warantî siꞌma eraꞌma pepîn.Mîîkîrî neken yapurî eꞌpai awanî, taapaiꞌnîkon.Meruntî ke aakoꞌmamî ipatîkarî!Mîrîrî warantî awanî!
17 Sîrîrî pata po ipîkku pe yemanne ke tîweꞌsanon pîꞌ mîkai, Timóteo. Mîî pe tîwanîkon kaiꞌma toꞌ wanî namai. Moropai temannekon ataretîꞌka pepîn kaiꞌma toꞌ wanî namai, maasa pra mîrîrî wanî taataretîꞌkasen pe. Tîîse mîkai toꞌ pîꞌ Paapa neken yapurîtoꞌpe toꞌya. Maasa pra mîîkîrî wanî taataretîꞌkasen pe pra. Tîîse mîîkîrî wanî tamîꞌnawîron esaꞌ pe. Mîîkîrîya itîrî uurîꞌnîkon pia, tuꞌke ituꞌse eꞌnî pîkîrî, atausinpantoꞌpe.
18 Morî kupî pîꞌ toꞌ koꞌmantoꞌpe, mîkai toꞌ pîꞌ, mararî pra tiaronkon pîikaꞌtîtoꞌpe toꞌya. Moropai tîwakîrikon pe, îꞌ rî temannekon yonpa tîîtoꞌpe toꞌya mîkai.
19 Mîrîrî warantî ikupî toꞌya ya, maasa mîrîrî yentai yapisî toꞌya, taataretîꞌkasen pepîn. Moropai enen tîîkoꞌmantoꞌkon ton eporî toꞌya ipatîkarî.
20 Timóteo, ikuꞌkî taꞌpî yawîrî, ikupî pîꞌ akoꞌmankî tinyakaꞌmapîꞌse pra. Tiaronkon eseurîmatoꞌ ituꞌse Paapa eꞌtoꞌ yawîrî pra teeseurîmasen maimu kîsetai. Maasa pra epuꞌnen pe toꞌ eꞌkuꞌsaꞌkon eseyuꞌpîtî ya, toꞌ eseurîmatoꞌ wanî îꞌ pe pra rî, mîî pe neken toꞌ wanî.
21 Inkamoro esenkuꞌtîꞌpî kureꞌne morî pe teesenumenkakon kaiꞌma, mîrîrî yeꞌnen innape Paapa yapurî toꞌya pepîn. Mîrîrî warantî inkamoro atarimaꞌpî Paapa piapai aminke, innape ikupî tîuyaꞌnîkon warantî pra.
Aponaꞌnîkon epîrema sîrîrî. Tauya Paapa pîꞌ. —Tamîꞌnawîron morî pe aweꞌtoꞌ ke toꞌ repakî —tauya Paapa pîꞌ.
