Sîrîrî Kaareta Eꞌmaiꞌnon Pedro Nîmenukaꞌpî 1:1-25
1 Uurî Pedro, Jesus Cristo naipontîꞌpî. Sîrîrî kaareta menukauya aapiaꞌnîkon Paapa pemonkonoyamîꞌ pîraiꞌpî tîîkoꞌmansenon apatakon yaꞌ pra, kaꞌran pe awanîkon manniꞌ pia. Manniꞌkan Ponto pata po awanîkon mannan pia, moropai Galácia pata po awanîkon mannan pia, Capadócia pata po awanîkon mannan pia, Ásia pata po awanîkon mannan pia, moropai Bitínia pata po awanîkon mannan pia imenukauya sîrîrî.
2 Amîrîꞌnîkon wanî Paapa, Uyunkon nîmenkaꞌsan pe, îꞌ kupî tîuya pîꞌ teesenumenka yawîrî. Moropai Morî Yekaton Wannî wenai, ipemonkono pe puꞌkuru, morî pe awanîkonpa amenkaꞌpîiyaꞌnîkon. Uyepotorîkon Jesus Cristo maimu yawîrî aakoꞌmamîkonpa amoꞌkaꞌpîiyaꞌnîkon, mîîkîrî mînî iniꞌkamoꞌpî wenai, imakuiꞌpî yapai imoꞌkasaꞌ pe awanîkonpa.
Uyonpayamîꞌ, inîꞌ panpîꞌ morî pe tîweꞌtoꞌ tîrî Paapaya yuꞌse wai epeꞌmîra, moropai tîwanmîra eꞌnîtoꞌ tîrîiya yuꞌse wai aapiaꞌnîkon.
Pedroya Toꞌ Yenpenatanîpî
Ipatîkarî Koꞌmannîtoꞌ Nîmîꞌnen Pe Eꞌnî
3 Paapa, Uyepotorîkon Jesus Cristo yun, yapurîpaiꞌnîkon, kureꞌne uurîꞌnîkon iꞌnokoꞌmasaiꞌya wenai. Isaꞌmantaꞌsan koreꞌtapai Jesus Cristo pîmîꞌsaꞌka tîuya yai tîîsaꞌmantatoꞌ ke ineꞌmaꞌpî yapisîꞌpîiya tîwakîri pe. Mîrîrî yeꞌnen uurîꞌnîkon esenpo emapuꞌtîꞌpîiya tînmuku pe eꞌnîtoꞌpe. Tarîpai innape tîpemonkonoyamîꞌ pia Paapa nîtîrî yapisî kupî sîrîrî. Mîrîrî yeꞌnen iwinîpainon yapisî nîmîkî pîꞌ koꞌmannî sîrîrî.
4 Amîrîꞌnîkon ton pe mîrîrî koneka koꞌmannîpîiya kaꞌ po. Îꞌ pensa tîîtîpansen pe pra, îꞌ pensa aamaꞌta ton pe pra, moropai îꞌ pensa aataretîꞌka neporî ton pe pra man miarî.
5 Moropai sîrîrî non po awanîkon tanne, amîrîꞌnîkon koꞌmannîpîiya nîrî tîmeruntîri yai. Tamîꞌnawîron ataretîꞌka pîkîrî aakoꞌmannîpîiyaꞌnîkon, tîîpia aakoꞌmamîkonpa, innape ikupîyaꞌnîkon wenai. Moropai mîrîrî yai tamîꞌnawîronkonya eraꞌma, îꞌ kaiꞌma morî pe inkonekaꞌpî wanî, tamîꞌnawîrî aweꞌtoꞌ yawîrî.
6 Mîrîrî pîꞌ taatausinpai puꞌkuru awanîkon eꞌpai awanî teuren, eꞌtarumaꞌtîntoꞌ iipî tanne. Yairî maꞌre awanîkon tiaron pensa, maasa pra tuꞌkan eꞌtarumaꞌtîntoꞌ siꞌtaꞌnon iipî amîrîꞌnîkon tarumaꞌtînen ton.
7 Mîrîrî tuꞌkan eꞌtarumaꞌtîntoꞌ iipî, yairî innape ikupîyaꞌnîkon epuꞌtoꞌpe. Maasa eraꞌmatî. Ouro yekaꞌma toꞌya apoꞌ yaꞌ teken ouro pe awanî epuꞌtîkonpa. Aaramî pra awanî ya, innape ouro pe awanî epuꞌtî toꞌya. Mîrîrî warantî innape ikupî pîꞌ aakoꞌmamîkon aweꞌtarumaꞌtîkon yeꞌka pe. Mîrîrî amîrîꞌnîkonya innape ikuꞌtoꞌ wanî ouro tîweꞌtîꞌkasen yentai tîweꞌtîꞌkasen pe pra awanî yeꞌnen. Mîrîrî yeꞌnen ayonpaiyaꞌnîkon aweꞌtarumaꞌtîtoꞌkon ke innape ikupî pîꞌ aakoꞌmamîkonpa. Moropai amîrîꞌnîkonya eꞌtarumaꞌtîntoꞌ yapîtanîꞌsaꞌ tîpo, Paapaya taa kupî sîrîrî apîꞌnîkon: —Morî pe puꞌkuru man —taiya Jesus Cristo iiꞌtoꞌ weiyu eseposaꞌ yai. Mîrîrî yai tamîꞌnawîronkonya eraꞌma emapuꞌtîiya îꞌ kaiꞌma morî pe, ipîkku pe akupîꞌpîiyaꞌnîkon.
8 Mîîkîrî Paapa eraꞌmanen pe pra awanîkon, tîîse yapurî koꞌmannîpî amîrîꞌnîkonya. Maasa eraꞌmayaꞌnîkon yeꞌka pe pra, innape Cristo kupî pîꞌ aakoꞌmamîkon yeꞌnen, aatausinpakon koꞌmannîpî mararî pra. Oꞌnon yeꞌka pe ekaremekî yentai aatausinpatoꞌkon wanî.
9 Maasa pra morî pe eꞌtoꞌ yawîrî amîrîꞌnîkon koneka yaretîꞌkaiya kupî sîrîrî, tîwarantî awanîkonpa. Moropai apataꞌseꞌkon tîrîiya kupî sîrîrî tîîpia aakoꞌmamîkonpa. Tamîꞌnawîrî mîrîrî kupîiya innape Cristo kupîꞌpîyaꞌnîkon wenai.
10 1:10,11 Mîrîrî eꞌpîikaꞌtîntoꞌ anepuꞌpai penaronkon profetayamîꞌ nurîꞌtî wanîꞌpî. Mîrîrî yeꞌnen kureꞌne yuwaꞌpî toꞌya. Inkamoroya taꞌpî: —Îꞌ yeꞌka see mîrîrî Paapa nîtîrî eꞌpîikaꞌtîntoꞌ? Îꞌ pensa yarimaiya kupî sîrîrî? Mîrîrî eꞌpîikaꞌtîntoꞌ yekare ekaremekîꞌpî toꞌya pena, tîîse morî pe epuꞌtîiꞌma pra. Tîîse Morî Yekaton Wannîya ekaremekîꞌpî toꞌ pîꞌ, îꞌ pensa mîrîrî eꞌkupî. —Maasa aweꞌkupî Cristo eꞌtarumaꞌtî eꞌpai awanî. Moropai mîrîrî tîpo teeyatonon yentai eenasaꞌ yai, ipîkku pe ikupî Paapaya —taꞌpîiya.
11 Eraꞌmakî 1:10
12 Inkamoro penaronkon tîmaimu ekaremeꞌnenan pîꞌ sîrîrî anetaꞌpîkon ekaremekîꞌpî Paapaya pena. Paapaya taꞌpî: —Amîrîꞌnîkon ton pe aweꞌkupî pepîn, tîîse manniꞌkan maasaronkon ton pe aweꞌkupî pe man —taꞌpîiya toꞌ pîꞌ. Mîrîrî yeꞌnen manniꞌkan itekare ekaremeꞌnenanya ekaremeꞌsaꞌ sîrîrî apîꞌnîkon tarîpai. Inkamoroya ekaremekîꞌpî apîꞌnîkon kaꞌ poinon, Morî Yekaton Wannî, Paapa narimaꞌpî meruntîri yai. Sîrîrî eꞌpîikaꞌtîntoꞌ yekare wanî morî pe puꞌkuru, mîrîrî anepuꞌpai nîrî inserîyamîꞌ wanî.
Paapaya Uyannokon Imakuiꞌpî Ton Pra Eꞌnîtoꞌpe
13 Mîrîrî epuꞌtîyaꞌnîkon yeꞌnen, aka, tîwarî eꞌtî, aawarîrîꞌnîkon etîꞌnînmatî, ayeserukon epuꞌnenan pe. Moropai tamîꞌnawîrî morî pe Paapaya akupîkon nîmîkî pîꞌ aakoꞌmamîkon, îꞌ pensa Cristo iipî weiyu yaino ton pe.
14 Paapa munkî pe awanîkon yeꞌnen, imaimu yawîrî akoꞌmantî. Pena imakuiꞌpî yuꞌse aweꞌtoꞌkon yawîrî aakoꞌmanpîtîꞌpîkon, maasa pra îꞌ kaiꞌma aakoꞌmamîkon yuꞌse Paapa wanî epuꞌtîyaꞌnîkon pra awanîꞌpî. Tîîse epuꞌtîyaꞌnîkon tarîpai, mîrîrî yeꞌnen mîrîrî warantî pra akoꞌmantî. Imakuiꞌpî yuꞌse tîweꞌse pra akoꞌmantî.
15 Morî pe eꞌtî, maasa pra morî pe puꞌkuru Paapa wanî, imakuiꞌpî ton pra. Mîîkîrî rî amîrîꞌnîkon yannotîpon warantî eꞌtî. Imakuiꞌpî winîpai atarimatî moropai tamîꞌnawîrî îꞌ kupîyaꞌnîkon kaisarî morî kuꞌtî.
16 Mîrîrî warantî Paapa maimu eꞌmenukasaꞌya taa:—Imakuiꞌpî winîpai atarimatî,imakuiꞌpî winîpai atarimasaꞌ pe uukoꞌmamî warantî.Morî pe eꞌtî, morî pe puꞌkuru tîweꞌsen pe uukoꞌmamî warantî
—taa Paapaya.
17 Eepîremakon ya, Paapa esaꞌnenan amîrîꞌnîkon ayunkon pe. Manniꞌ Paapa wanî yairî, yairî pra tamîꞌnawîronkon koꞌmantoꞌ wanî ekaremeꞌnen pe, anîꞌ tîmenkai pra. Toꞌ nîkupîꞌpî yakoꞌmenkaiya tiwin pîꞌ toꞌ kaisarî. Mîrîrî yeꞌnen tîwarî eꞌtî, mîîkîrî namatî aakoꞌmamîkon pîkîrî.
18 Maasa pra pena aakoꞌmanpîtîꞌpîkon ayeserukon yarakkîrî, îꞌ kaiꞌma penaronkon atamokonya ayenupaꞌpîkon yawîrî. Mîrîrî aakoꞌmantoꞌkon wanîꞌpî îꞌ pe pra rî. Tîîse epuꞌtîyaꞌnîkon yeꞌmasaꞌkon pe awanîkon mîrîrî ayeserukon winîpai, manniꞌ epeꞌke aataretîꞌkasen pepîn. Mîrîrî ke ayeꞌmasaꞌyaꞌnîkon, ouro ke moropai prata ke pra, taataretîꞌkasen ke pra.
19 Tîîse amîrîꞌnîkon wanî yeꞌmasaꞌkon pe moropai imoꞌkasaꞌkon pe morî puꞌkuru Jesus Cristo mînî ke. Mîîkîrî wanî carneiro, Paapa pia toꞌ nîtîrî warantî tîweꞌsen pe. Îꞌ rî imaꞌtîkî ton pra tîweꞌsen pe awanî, imakuiꞌpî ton pra.
20 Mîîkîrî wanî pena Paapa nîmenkaꞌpî pe sîrîrî non pona yarimapa, maasa sîrîrî pata koneka tîuya rawîrî. Moropai mîîkîrî yenpoꞌpîiya amen pata ataretîꞌka rawîrî, amîrîꞌnîkon pîikaꞌtînen ton pe.
21 Mîîkîrî wenai amîrîꞌnîkonya Paapa yapurî. Innape ikupîyaꞌnîkon manniꞌ Cristo pîmîꞌsaꞌkaꞌtîpon, tamîꞌnawîron yentai ikupîtîpon. Mîrîrî warantî innape ikupîyaꞌnîkon moropai îꞌ tîrîuya taꞌpî Paapaya yapisîyaꞌnîkon nîmîkî pîꞌ aakoꞌmamîkon.
22 Tarîpai amîrîꞌnîkon wanî yairon Paapa maimu yawîrî. Mîrîrî wenai imakuiꞌpî ayeserukon rumakasaꞌyaꞌnîkon. Mîrîrî yeꞌnen seruꞌyeꞌ pe pra ayonpakon, manniꞌkan innape Jesus kuꞌnenan, saꞌnamayaꞌnîkon kureꞌne. Mîrîrî warantî aweꞌsaꞌnamatoꞌkon yuwatî inîꞌ panpîꞌ, tamîꞌnawîrî ayewankon ke.
23 Maasa pra mîîkîrî Paapa îꞌ pensa aasaꞌmanta ton pepînya amîrîꞌnîkon esenpo emapuꞌtîꞌpî, tînmuku pe awanîkonpa. Oꞌnon yeꞌka pe ikupîꞌpîiya? Ayunkon tîîsaꞌmantasen wenai pra tîîse innape imaimu kupîyaꞌnîkon wenai, Paapaya ikupîꞌpî. Mîrîrî imaimu wanî ipatîkarî enen koꞌmannîtoꞌ ton tîînen pe, aataretîꞌka pepîn.
24 Mîrîrî warantî Paapa maimu eꞌmenukasaꞌya taa:Tamîꞌnawîronkon pemonkonyamîꞌ wanîparîꞌ keren po tîweꞌsen warantî.Moropai inkamoro eseraꞌma morî pemîrîrî parîꞌ yariꞌku warantî.Tîîse tiwin wei parîꞌ aꞌpiꞌta moropai yariꞌku eꞌsoroka.Mîrîrî warantî toꞌ wanî, tîîsaꞌmantatonkon pe.
25 Tîîse Uyepotorîkon maimu wanîipatîkarî tîîkoꞌmansen pe,
taasaꞌ Paapa maimu eꞌmenukasaꞌya. Mîrîrî ekaremekîꞌpî toꞌya etaꞌpîyaꞌnîkon sîrîrî itekare Paapa maimu.
