Sîrîrî Kaareta Eꞌmaiꞌnon Pedro Nîmenukaꞌpî 3:1-22
3 Mîrîrî warantî nîrî amîrîꞌnîkon wîriꞌsanyamîꞌ tînyo kenankon panamauya. Anyokon maimu yawîrî eꞌtî. Yai pra Paapa epuꞌnen pe pra anyokon wanî, tîîse ayeserukon wenai eesenumenka ya, Paapa maimu epuꞌtîiya, mîîkîrîya innape ikupî. Tîîse morî pe ayeserukon neken eraꞌma tîuya wenai, yarakkîrî Paapa maimu pîꞌ eeseurîma yuꞌse awanî pepîn.
2 Maasa pra inkamoroya ayeserukon eraꞌma morî pe, îꞌ rî imakuiꞌpî kupîyaꞌnîkon pra awanîkon. Moropai innape Paapa namayaꞌnîkon eraꞌma toꞌya.
3 Mîrîrî yeꞌnen morî pe, emaꞌnon pe awanîkon tuwai pra eꞌtî. Moropai apuꞌpaikon tîkinai, moropai ouro ke, epeꞌke taatariꞌkuꞌtîi, aponkon morî puꞌkuru tekaꞌmai teekonekai pra eꞌtî.
4 Tîîse morî pe aweꞌtoꞌkon nîsi ayewankon yaꞌ. Maasa pra mîrîrî îꞌ pensa aataretîꞌkaton pepîn. Mîrîrî yeꞌnen eranmîra moropai tîîwanmîra awanîkon yuwatî. Mîrîrî warantî ayeserukon wanî wenai kureꞌne tîwakîri pe Paapaya akupîkon.
5 Maasa pra pena penaronkon wîriꞌsanyamîꞌ Paapa yapurînenan nurîꞌtî ekonekapîtîꞌpî eranmîra tîwanîkonpa moropai tîîwanmîra tîwanîkonpa. Mîrîrî yeꞌnen inkamoro eꞌpîtîꞌpî tînyokon maimu yawîrî,
6 pena Sara nurîꞌtî eꞌpîtîꞌpî mîrîrî warantî. Tînyo Abraão nurîꞌtî maimu yawîrî awanîꞌpî. Mîrîrî yeꞌnen esaꞌpîtîꞌpîiya tepotorî pe, inama tîuya yeꞌnen. Mîrîrî warantî ikupîyaꞌnîkon ya anyokon yarakkîrî, moriya mîîkîrî Sara payanîꞌsan pe awanîkon. Iwarantî awanîkon morî ayeserukon wanî ya, moropai innape ikupîyaꞌnîkon wenai, teesewankonoꞌmai pra aakoꞌmamîkon.
Tînoꞌpî Kenankon Panamaiya
7 Tarîpai amîrîꞌnîkon warayoꞌkon tînoꞌpî kenankon panamauya sîrîrî, anoꞌpîkon yarakkîrî aakoꞌmantoꞌkon pîꞌ. Epuꞌtîyaꞌnîkon eꞌpai man inkamoro wanî aꞌtuꞌmîra panpîꞌ, amîrîꞌnîkon warantî pra. Mîrîrî yeꞌnen morî pe anoꞌpîkon koꞌmannîpîyaꞌnîkon eꞌpai man. Maasa pra tarakkîrî ipatîkarî aakoꞌmantoꞌkon tîrî Paapaya saꞌnîrî, amîrî pia, anoꞌpî pia, ituꞌse tîwanî yeꞌnen. Mîrîrî yeꞌnen anoꞌpîkon yapurî yeꞌka pe, morî pe mîîkîrî koꞌmannîꞌtî, îꞌ pensa eepîremakon yai aweꞌmanenpakon namai.
Morî Kupî Wenai Umoronkon Epuꞌtî
8 Sîrîrî eseurîmatoꞌ yaretîꞌkauya sîrîrî. Tauya apîꞌnîkon tamîꞌnawîrî siꞌma eesenumenkatoꞌkon eꞌpai awanî tiwin. Moropai ayonpakon wanî ya, tîmoron epuꞌnen mîîkîrî kaisarî amoronkon epuꞌtîyaꞌnîkon eꞌpai awanî. Moropai ayonpakon yarakkîrî tîweꞌsaꞌnamai eꞌtî. Moropai aꞌnokoꞌpîkon pe eseraꞌmatî. Moropai tiaronkon yentai tîweꞌkuꞌse pra eꞌtî.
9 Mîrîrî yeꞌnen anîꞌya imakuiꞌpî kupî ya awinîkîiꞌnîkon, mîîkîrî winîkîi imakuiꞌpî tîkuꞌse pra eꞌtî. Apîꞌnîkon teeseurîmasen wanî ya, iwinîkîi imakuiꞌpî teeseurîmai pra eꞌtî. Tîîse imakuiꞌpî pe awinîkîiꞌnîkon eseurîmaꞌpî maimu miakanmatî morî ke. Maasa pra Paapaya ayannoꞌpîkon arepakonpa morî ke.
10 Innape awanî epuꞌtîꞌnîkon, maasa pra mîrîrî warantî Paapa maimu eꞌmenukasaꞌya taasaꞌ yeꞌnen. See warantî taasaiꞌya:Anîꞌ wanî ya, morî pe tîîkoꞌmantoꞌ yuꞌse taatausinpai,mîîkîrîya morî pe teeseurîma yuwa eꞌpai awanî,imakuiꞌpî pe eeseurîma namai.Moropai mîîkîrî eseurîma eꞌpai pra awanîseruꞌyeꞌ pe, tiaronkon yenkuꞌtî pîꞌ.
11 Mîrîrî yeꞌka imakuiꞌpî winîpaieepe eꞌpai awanî.Tîîse morî îꞌ yuꞌse Paapa wanî nekenkupîiya eꞌpai awanî.Tîîwanmîra aakoꞌmamîyuwaiya eꞌpai awanî.Moropai teesiyuꞌpîꞌse pra aakoꞌmamîyuwaiya eꞌpai awanî.
12 Maasa pra inkamoro yeꞌka yaironkonkoneka pîꞌ Uyepotorîkon koꞌmamîtîwîrî wei kaisarî,moropai tîwîrî toꞌ epîrematoꞌeta pîꞌ aakoꞌmamî.Tîîse Uyepotorîkon ekoreꞌmasaꞌ koꞌmamîimakuiꞌpî kuꞌnenan winîkîi,
taasaꞌ Paapa maimu eꞌmenukasaꞌya man.
13 Morî ankuꞌpai awanîkon wenai, awinîkîiꞌnîkon anîꞌya imakuiꞌpî kupî eꞌpainon? Anîꞌya ikupî pepîn tiwin kin.
14 Mîîwîni pra awanî ya, kureꞌne taatausinpai eꞌpai awanîkon morî ayeserukon wenai aweꞌtarumaꞌtîkon tanne. Maasa pra Paapaya arepakon morî ke.Mîrîrî yeꞌnen atausinpatî,atarumaꞌtînenkon pîꞌ eranneꞌ pe pra eꞌtî,teesiꞌnîꞌse pra eꞌtî.
15 Tîîse Cristo nama pîꞌ akoꞌmantî ayewankon yaꞌ, moropai itenyaꞌ eeturumakatî tîwîrî ayepotorîkon pe aweꞌtoꞌpe. Moropai tîwîrî tepuꞌse akoꞌmantî, îꞌ kaiꞌma Paapa winîpai morî yapisî pîꞌ nîmîkîyaꞌnîkon anepuꞌpai pemonkon eꞌtoꞌ ekaremekîkonpa.
16 Mîrîrî yeꞌnen sîrîrî kuꞌtî morî pe, tiaronkon yentai aweꞌkupîkon yeꞌka pe pra. Morî pe eeseurîmakon eesewankonoꞌmatoꞌkon epuꞌtîyakon namai ayewankon yaꞌ. Mîrîrî warantî apîꞌnîkon teeseurîmasen wanî ya, mîîkîrî eppepî, maasa pra ayeserukon eraꞌma tîuyaꞌnîkon wenai, morî pe ayeserukon wanî Cristo pemonkono pe awanîkon yeꞌnen.
17 Mîrîrî morî kupîyaꞌnîkon wenai aweꞌtarumaꞌtîkon ya, morî pe panpîꞌ awanî. Imakuiꞌpî kuꞌsaꞌyaꞌnîkon wenai aweꞌtarumaꞌtîtoꞌkon yentai awanî, aweꞌtarumaꞌtîkon yuꞌse Paapa wanî ya.
18 Maasa pra mîrîrî warantî Cristo eꞌtarumaꞌtîꞌpî tîîsaꞌmanta yai amîrîꞌnîkon ton pe. Aasaꞌmantaꞌpî tiwin iteꞌka tamîꞌnawîronkon ton pe imakuiꞌpî toꞌ nîkupîꞌpî wenai. Maasa eraꞌmatî. Mîîkîrî morî teken kuꞌnen saꞌmantaꞌpî uurîꞌnîkon, yairî pra tîweꞌsanon, imakuiꞌpî kuꞌnenan ton pe. Aasaꞌmantaꞌpî uurîꞌnîkon yarîpa kaiꞌma Paapa pia. Mîîkîrî wîꞌpî toꞌya tarî, pemonkon pe awanî tanne, tîîse aasaꞌmantasaꞌ tîpo Paapaya amenan pe itekaton koꞌmantoꞌpe ikupîꞌpî.
19 Moropai mîîkîrî wîtîꞌpî itekare ekaremeꞌse itekatonoꞌpî pe siꞌma. Manniꞌkan pemonkonyamîꞌ eꞌtîꞌkaꞌsan yekatonoꞌpî pîꞌ ekaremekîꞌpîiya.
20 Manniꞌkan inkamoro eꞌtîꞌkaꞌsan yekatonoꞌsan pena innape Paapa maimu yawîrî esiꞌsan pepîn teuren, Paapaya toꞌ nîmîkîꞌpî innape tîkupî toꞌya pena tîkanau ton koneka pîꞌ, Noé nurîꞌtî koꞌmamî yai. Tîîse innape ikupî toꞌya pîn. Tuꞌkankon pepîn pemonkonyamîꞌya eseurîwîꞌne miaꞌ pona tîîmoꞌtaiꞌnîkonya neken innape ikupîꞌpî. Moropai inkamoro eꞌpîikaꞌtîꞌpî kureꞌnan tuna winîpai.
21 Mîrîrî tuna wanî esenpatakonantoꞌ pîꞌ teeseurîmasen pe. Sîrîrî esenpatakonatoꞌ wanî pepîn nura upiꞌpîkon pîꞌ tîweꞌsen ronatoꞌpe, tîîse imakuiꞌpî uyeserurîꞌpîkon rumakatoꞌpe awanî. Tîîwanmîra imakuiꞌpî unkupîꞌpîkon kuꞌsaꞌ Paapaya epuꞌtîꞌnîkon, Jesus Cristo pîmîꞌsaꞌkaꞌpîiya wenai.
22 Mîîkîrî yanuꞌnîpîꞌpî Paapaya kaꞌ pona. Moropai eereutasaꞌ wanî Paapa meruntîri winî. Mîîkîrî wanî tamîꞌnawîronkon inserîyamîꞌ esaꞌ pe ipîkku pe tîweꞌsanon moropai meruntî ke tîweꞌsanon esaꞌ pe aakoꞌmamî kaꞌ po.
