Sîrîrî Kaareta Eꞌmaiꞌnon Pedro Nîmenukaꞌpî 4:1-19
4 Mîrîrî yeꞌnen Cristoya tîmoron epuꞌtîꞌpî tarî pemonkon pe tîwanî yai. Mîrîrî warantî amoronkon epuꞌtîkonpa apîtatî, Cristoya tîmoron epuꞌtîꞌpî warantî. Maasa pra anîꞌya tîmoron epuꞌsaꞌ ya, mîîkîrî wanî pepîn imakuiꞌpî ankuꞌpai, itentai imakuiꞌpî wanî pepîn inîꞌrî.
2 Mîrîrî yeꞌnen sîrîrî pata pai aakoꞌmamî tarî ituꞌse Paapa eꞌtoꞌ yawîrî, ituꞌse tîweꞌtoꞌ yawîrî pra.
3 Maasa pra pena kureꞌne aakoꞌmanpîtîꞌpîkon îꞌ pe pra rî imakuiꞌpî kupî pîꞌ, manniꞌkan Paapa epuꞌnenan pepînya ikupî koꞌmannîpî warantî. Mîrîrî yai aakoꞌmamîꞌpîkon seꞌ tapairî wîriꞌsanyamîꞌ yarakkîrî, ituꞌse apunkon eꞌtoꞌ kupî pîꞌ. Kureꞌne awukukon maiꞌ enîrî pîꞌ awanîꞌpîkon, eesiyuꞌpîtîkon pîꞌ aakoꞌmamîꞌpîkon, moropai eetîmîkon pîꞌ aakoꞌmamîꞌpîkon. Moropai nura pîꞌ aakoꞌmamîꞌpîkon, miaꞌ ke ikonekasaꞌ yapurî yeꞌka pe.
4 Tarîpai manniꞌkan Paapa epuꞌnenan pepîn wanî kureꞌne teesenumenkai apîꞌnîkon. Moropai inkamoro eseurîma apîꞌnîkon imakuiꞌpî pe, maasa pra inîꞌ tînkupîkon kupîyaꞌnîkon pra awanîkon wenai.
5 Tîîse maasa inkamoroya tînkupîꞌpîkon ekaremekî kupî sîrîrî Paapa pîꞌ, tamîꞌnawîronkon enenankonya moropai isaꞌmantaꞌsanya ekaremekî. Moropai inkamoro yenumîiya kupî sîrîrî toꞌ nîkupîꞌpîkon wenai.
6 Mîrîrî yeꞌnen sîrîrî Cristo yekare esekaremekîꞌpî. Tamîꞌnawîronkonya etaꞌpî. Isaꞌmantaꞌsanya nîrî etaꞌpî. Inkamoro saꞌmantaꞌpî, tamîꞌnawîronkon pemonkonyamîꞌ saꞌmanta warantî, imakuiꞌpî tînkupîꞌpîkon wenai. Mîîwîni tîîse toꞌ yekaton koꞌmamî enen ipatîkarî, manniꞌ Paapa ipatîkarî tîîkoꞌmansen warantî, innape ikuꞌsaꞌ toꞌya ya.
7 Tîîse tamîꞌnawîron ataretîꞌkatoꞌ man aminke pra. Mîrîrî yeꞌnen amîrîꞌnîkon eꞌpai man morî pe ayeserukon tepuꞌse, teetîꞌnînmai, eepîremakonpa.
8 Tamîꞌnawîron îꞌ yentai tiaronkon yarakkîrî aweꞌsaꞌnamakon eꞌpai awanî. Maasa pra anîꞌ saꞌnaman ya, uwinîkîiꞌnîkon imakuiꞌpî inkupîꞌpî kupî uuwanmîraꞌnîkon.
9 Moropai tiaronkon teerepansenon yapiꞌnen pe eꞌtî awakîrikon pe, teekoreꞌmai pra.
10 Moropai morî pe eesenyakaꞌmatoꞌkon pe aapiaꞌnîkon tiwin pîꞌ siꞌma, Paapa nîrumakaꞌpî yapurîyaꞌnîkon yuwatî. Mîrîrî yapurî wenai morî pe awanî, tiaronkon pîikaꞌtîyaꞌnîkon, ituꞌse Paapa eꞌtoꞌ yawîrî.
11 Anîꞌ wanî ya itekare ekaremeꞌnen pe mîîkîrîya ekaremekî eꞌpai awanî, morî pe Paapaya tîmaimu puꞌkuru ekaremekî warantî. Moropai anîꞌ wanî ya tiaronkon pîikaꞌtî pîꞌ tîweꞌsen pe, mîîkîrîya toꞌ pîikaꞌtî eꞌpai awanî, tîmeruntîri Paapa nîtîrîꞌpî ke. Mîrîrî kuꞌtî. Mîrîrî kupîyaꞌnîkon wenai, Paapa yapurîtoꞌpe tiaronkonya Uyepotorîkon Jesus Cristo wenai. Manniꞌ Paapa morî puꞌkuru tîweꞌtoꞌ pîꞌ yapurî tamîꞌnawîronkon eꞌpai awanî. Moropai imeruntîri puꞌkuru, ikîꞌpî ton pîn pîꞌ yapurî eꞌpai man. Mîrîrî warantî eꞌpai man.
Innape Jesus Kupî Wenai Eꞌtarumaꞌtîn
12 Uyonpayamîꞌ uwakîrikon puꞌkuru, tauya sîrîrî apîꞌnîkon. Kureꞌne yairî maꞌre teesenumenkai pra eꞌtî awinîkîiꞌnîkon tuiꞌsen pîꞌ, îꞌ kaiꞌma amoronkon epuꞌtîyaꞌnîkon manniꞌ pîꞌ. Mîrîrî wanî pepîn anepuꞌtîkon pe pra tîîse epuꞌnenan amîrîꞌnîkon.
13 Tîîse tenyaka ya taatausinpai eꞌtî aweꞌtarumaꞌtîtoꞌkon pîꞌ. Maasa pra Cristo eꞌtarumaꞌtîꞌpî warantî aweꞌtarumaꞌtîkon mîrîrî. Mîrîrî yeꞌnen îꞌ pensa aaipî yai, kureꞌne aatausinpakon, morî pe, meruntî ke awanî eraꞌmayaꞌnîkon pîꞌ.
14 Amîrîꞌnîkon wanî taatausinpai teuren, amuꞌtunpasaꞌkon tanne, Cristo yapurînen pe awanîkon wenai. Maasa pra mîrîrî wenai epuꞌtîyaꞌnîkon morî puꞌkuru Paapa winîpainon Yekaton Wannî koꞌmamî aapiaꞌnîkon.
15 Aweꞌtarumaꞌtîkon ya, aweꞌtarumaꞌtîkon eꞌpai awanî Cristo yapurîyaꞌnîkon wenai. Tiaronkon wîîsaꞌyaꞌnîkon wenai pra, moropai amaꞌ pe aweꞌsaꞌkon wenai pra, moropai îꞌ rî imakuiꞌpî kuꞌsaꞌyaꞌnîkon wenai pra, moropai tiaronkon koꞌmantoꞌ pîꞌ eeseurîmakon wenai pra.
16 Tîîse amîrîꞌnîkon eꞌtarumaꞌtî ya, innape Jesus kupîyaꞌnîkon wenai. Mîrîrî pîꞌ tîweppeꞌse pra eꞌtî. Tîîse kureꞌne Paapa yapurîtî, maasa pra ayesatîkon toꞌya yeꞌnen, Cristo piawon pe tîweꞌsanon taa toꞌya pîꞌ. Teesewankonoꞌmai pra eꞌtî.
17 Maasa pra îꞌ kaiꞌma tiwin pîꞌ siꞌma unkupîꞌpîkon eraꞌmatoꞌ weiyu erepamî kupî sîrîrî. Eꞌmaiꞌ pe manniꞌkan Paapa yapurînenanya tînkupîꞌpîkon eraꞌma kupî sîrîrî. Mîrîrî eꞌkupî ya uurîꞌnîkon yarakkîrî, itentai aweꞌkupî sîrîrî manniꞌkan Paapa maimu kuꞌnenan pepîn yarakkîrî. Toꞌ eꞌpîikaꞌtî pepîn tiwin kin.
18 Mîrîrî warantî Paapa maimu eꞌmenukasaꞌya taasaꞌ man:Saꞌme awanî morîkon yentai imakuiꞌpî ena namai,toꞌ eꞌtarumaꞌtî tîrî Paapaya ya,îꞌ kaiꞌma inîꞌ panpîꞌ Paapa maimu yawîronkon pepîneꞌtarumaꞌtî eꞌpai awanî?Moropai imakuiꞌpî kuꞌnenaneꞌtarumaꞌtî eꞌpai awanî nîrî, kureꞌne
taasaꞌ Paapa maimuya man.
19 Mîrîrî yeꞌnen manniꞌkan tîmoronkon epuꞌnenan maasa pra ituꞌse Paapa wanî wenai, morî kupî toꞌya wenai, inkamoro eturumaka eꞌpai awanî Paapa tîkupîtîponkon pia, manniꞌ îꞌ taꞌpî tîuya yawîrî kuꞌnen tîwîrî. Mîîkîrî pia toꞌ eturumaka eꞌpai awanî. Moropai morî kupî pîꞌ toꞌ koꞌmamî eꞌpai awanî tîrumakai pra.
