Sîrîrî Kaareta Eꞌmaiꞌnon Pedro Nîmenukaꞌpî 5:1-14
5 Tarîpai manniꞌkan soosi esaꞌ pe tîweꞌsanon panamauya sîrîrî. Maasa pra uurî nîrî wanî mîrîrî warantî soosi esaꞌ pe. Uurîya Cristoya tîmoron epuꞌtî eraꞌmaꞌpî itarumaꞌtî toꞌya yai. Moropai îꞌ pensa aaipî yai, tamîꞌnawîronkonya eraꞌma, îꞌ kaiꞌma ipîkku pe yapurî Paapaya. Uurî nîrî yapurîiya pe man apokonpe.
2 Mîrîrî yeꞌnen morî pe aapiaꞌnîkon Paapa nîtîrîꞌsan ipemonkonoyamîꞌ koꞌmannîꞌtî, manniꞌ carneiroyamîꞌ koꞌmannîꞌnenya tekînon koꞌmannîpî warantî. Mîrîrî kuꞌtî morî pe ituꞌse Paapa eꞌtoꞌ yawîrî. Mîrîrî kîꞌkuꞌtî eekoreꞌmakon koreꞌta pairî. Moropai mîrîrî pîꞌ kîsenyakaꞌmatî tîniru yuꞌse awanîkon pîꞌ pra tîîse toꞌ pîꞌ esenyakaꞌmatî kureꞌne toꞌ anpîikaꞌtîpai awanîkon yeꞌnen.
3 Inkamoro aapiaꞌnîkon Paapa nîrumakaꞌsan yentai tîweꞌse pra eesenyakaꞌmatî. Tîîse morî ayeserukon eraꞌma toꞌya wenai, awarantîꞌnîkon eꞌpai toꞌ eꞌtoꞌpe, inkamoro koꞌmannîꞌtî.
4 Mîrîrî warantî îꞌ pensa kureꞌnan tiaronkon yentainon uyesaꞌkon iipî yai, mîîkîrî nîtîrî morî puꞌkuru yapisîyaꞌnîkon kupî sîrîrî îꞌ pensa aataretîꞌka ton pe pra. Aakoꞌmamî tîwîrî morî pe ipatîkarî.
5 Tarîpai amîrîꞌnîkon maasaron panpîꞌ panamauya sîrîrî. Ayentaiꞌnîkon tîweꞌsanon aꞌyekeꞌtonon panpîꞌ kuꞌtî ayesaꞌkon pe, inkamoro maimu yawîrî ikuꞌtî. Moropai mîî pe pra eꞌtî, tiaronkon yentai tîweꞌkuꞌse pra. Maasa pra Paapa maimu eꞌmenukasaꞌya taasaꞌ man:Mîî pe tîweꞌsanon wanî Paapa yeyaton pe.Tîîse manniꞌkan mîîpankon pepîn pîikaꞌtî Paapaya
taasaꞌ man.
6 Mîrîrî yeꞌnen mîî pe tîweꞌse pra eꞌtî, ayepotorîkon pe Paapa kuꞌtî, imaimu yawîrî aakoꞌmamîkonpa moropai ipîkku pe amîrîꞌnîkon yapurîtoꞌpeiya, îꞌ pensa tînkuꞌneꞌtîꞌpî weiyu yai.
7 Moropai tamîꞌnawîrî kureꞌne eesenumenkatoꞌkon mîrîrî rumakatî Paapa yenyaꞌ, maasa pra mîîkîrîya neken tamîꞌnawîrî ikoneka amîrîꞌnîkon ton pe.
8 Mîrîrî yeꞌnen tîwarî eꞌtî moropai teetîꞌnînse eꞌtî, ayeserukon tepuꞌse. Maasa pra ayeyatonkon Makui moro man akanaimîꞌtîkon pîꞌ, manniꞌ kaikusiya tîkamo kanaimîꞌtî warantî. Akanaimîꞌtîiyaꞌnîkon ayapisîkonpa.
9 Tîîse meruntî ke eꞌtî. Innape Paapa kupî pîꞌ akoꞌmantî, îꞌ pensa Makui erepamî yai itentai awanîkonpa. Maasa pra tiwinsaronkon pepîn amîrîꞌnîkon, pata kaisarî ayonpakon innape Jesus kuꞌnenan eꞌtarumaꞌtî koꞌmannîpî awarantîꞌnîkon.
10 Tîîse amoronkon epuꞌtîyaꞌnîkon eꞌpai awanî mararî. Moropai mîrîrî tîpo morî pe Paapaya akonekakon. Ameruntîrikon tîrîiya meruntî ke awanîkonpa, innape tîkupî pîꞌ aakoꞌmamîkonpa. Manniꞌ Paapa kureꞌne morî pe tîweꞌtoꞌ tîînen moropai amîrîꞌnîkon yannotîponya ipatîkarî morî yaꞌ aakoꞌmamîkonpa, Jesus Cristo piawon pe awanîkon yeꞌnen.
11 Mîîkîrî Paapa meruntî puꞌkuru, ipatîkaron tamîꞌnawîronkon esaꞌ pe tîweꞌsen yapurîpaiꞌnîkon man. Mîrîrî warantî eꞌpai awanî.
12 Sîrîrî kaareta menukauya sîrîrî Silasya upîikaꞌtî tanne. Maasa pra mîîkîrî uyonpa wanî yairî puꞌkuru tîweꞌsen pe. Sîrîrî kaareta ke, anausipapai wanî sîrîrî. Tauya sîrîrî, innape uurîꞌnîkon pîikaꞌtî Paapaya, morî pe tîweꞌtoꞌ yawîrî. Mîrîrî yeꞌnen innape ikuꞌtî, apîikaꞌtîiya nîmîkî pîꞌ akoꞌmantî.
13 Moropai innape Jesus kuꞌnenan Paapa nîmenkaꞌsan “Babilônia” ponkonya tîmaimukon yarima sîrîrî. Moropai uyonpa, Marcosya tîmaimu yarima nîrî.
14 Mîrîrî yeꞌnen tauya tiaronkon ayonpakon yarakkîrî seꞌ yenya pîꞌ taatapiꞌse eꞌtî.
Mîrîrî warantî tamîꞌnawîrî manniꞌkan Cristo pemonkono pe tîweꞌsanon pia tîwanmîn wanî yuꞌse wai.
