Sîrîrî Kaareta Eꞌmaiꞌnon Paulo Nîmenukaꞌpî Tessalônica Ponkon Pia 1:1-10
1 Uurî Pauloya sîrîrî kaareta menuka sîrîrî Silas moropai Timóteo pokon pe tîîse uupia toꞌ tîîse. Sîrîrî kaareta yarimauya sîrîrî aapiaꞌnîkon uyonpayamîꞌ, Tessalônica ponkon. Amîrîꞌnîkon Uyunkon Paapa moropai Uyepotorîkon Jesus Cristo pemonkono pe tîweꞌsanon pia yarimauya sîrîrî.
Morî pe Paapa eꞌtoꞌ wanî aapiaꞌnîkon yuꞌse anna man. Moropai tîwanmîra aweꞌtoꞌkon ke arepaiyaꞌnîkon yuꞌse anna man.
Tessalônica Ponkon Koꞌmantoꞌ Pîꞌ Paulo Eseurîma
2 Tîwîrî rî taapîtî annaya Paapa pîꞌ: —Morî pe man, Paapa, inkamoro Tessalônica ponkon ayapurînenan wenai. Amîrîꞌnîkon pona anna epîrema koꞌmannîpî.
3 Taa annaya Paapa Uyunkon pîꞌ: —Inkamoro esenyakaꞌma koꞌmannîpî innape akuꞌsaꞌ tîuyaꞌnîkon yeꞌnen. Mararî pra toꞌ esenyakaꞌma amîrî ton pe, asaꞌnama tîuyaꞌnîkon yeꞌnen. Moropai Uyepotorîkon Jesus Cristo iipî nîmîkî pîꞌ toꞌ koꞌmamî teesetaꞌkai pra, Paapa. Morî pe man —taa annaya sîrîrî Paapa pîꞌ, apîꞌnîkon anna enpenata yeꞌnen.
4 Uyonpayamîꞌ, Paapa nîsaꞌnamakon, amîrîꞌnîkon menkaꞌpî Paapaya tîmîrî ton pe epuꞌtî pîꞌ anna man.
5 Maasa pra itekare ekaremekî annaya yai, meruntî ke ekaremekîꞌpî annaya anna maimu ke neken pra, tîîse Morî Yekaton Wannîya anna meruntîri ton tîrîꞌpî, innape ikupîkonpa, yairî awanî epuꞌtîkonpa. Îꞌ kaiꞌma anna koꞌmamîꞌpî akoreꞌtaꞌnîkon anna wanî yai, epuꞌtî pîꞌ naatîi. Amîrîꞌnîkon pîikaꞌtî ton pe anna koꞌmamîꞌpî.
6 Mîrîrî yai anna yeseru eraꞌmasaꞌyaꞌnîkon yeꞌnen, mîrîrî warantî aakoꞌmamîkon piaꞌtîꞌpî anna yeseru kupî pîꞌ, moropai Uyepotorîkon Jesus yeseru kupî pîꞌ nîrî. Mîrîrî warantî itekare yapisîꞌpîyaꞌnîkon moropai mîrîrî wenai kureꞌne aweꞌtarumaꞌtîꞌpîkon. Mîîwîni tîîse aatausinpatoꞌkon ton tîîpîtîꞌpî Morî Yekaton Wannîya.
7 Mîrîrî yeꞌnen amîrîꞌnîkon koꞌmamî warantî ikoꞌmanpai tamîꞌnawîronkon Paapa pemonkonoyamîꞌ enaꞌpî, Macedônia pata ponkon moropai Grécia pata ponkon.
8 Maasa pra amîrîꞌnîkon wenai Paapa maimu etasaꞌ Grécia pata ponkonya moropai Macedônia pata ponkonya. Moropai inîꞌ panpîꞌ pata kaisaronkonya etasaꞌ îꞌ kaiꞌma innape Paapa kupîꞌpîyaꞌnîkon yekare etaꞌpî toꞌya. Mîrîrî warantî ayekarekon epuꞌtî tamîꞌnawîronkonya annaya ekaremekî pra tîîse.
9 Maasa pra mîrîrî ekaremekî pîꞌ toꞌ koꞌmamî amîrîꞌnîkon pîꞌ. Îꞌ kaiꞌma anna yapisîꞌpîyaꞌnîkon morî pe, moropai îꞌ kaiꞌma miaꞌ ke ikonekasaꞌ anapurîkon ton pe rumakaꞌpîyaꞌnîkon, Paapa yapurîkonpa. Moropai îꞌ kaiꞌma Yairon, Paapa Tîîkoꞌmansen poitîrî pe eenaꞌpîkon ekaremekî pîꞌ toꞌ koꞌmamî.
10 Moropai îꞌ kaiꞌma Paapa munmu ennaꞌpotoꞌ kaꞌ poi nîmîkî pîꞌ awanîkon ekaremekî pîꞌ toꞌ koꞌmamî. Mîîkîrî munmu, iniꞌmîꞌsaꞌkaꞌpî saꞌmantaꞌsan koreꞌtapai, mîîkîrî Jesus wanî Upîikaꞌtînenkon pe. Manniꞌ wei yai, pemonkonyamîꞌ yenumî tîuya yai, uurîꞌnîkon yenumîiya pepîn upîikaꞌtîsaiꞌyaꞌnîkon yeꞌnen.
