Sîrîrî Kaareta Eꞌmaiꞌnon Paulo Nîmenukaꞌpî Tessalônica Ponkon Pia 2:1-20
2 Uyonpayamîꞌ, akoreꞌtaꞌnîkon anna wanî yai, anna esenyakaꞌmaꞌpî eꞌsaꞌ pra man îꞌ pe pra rî. Mîrîrî epuꞌtî pîꞌ naatîi.
2 Akoreꞌtaꞌnîkon anna erepamî rawîrî, anna eꞌtarumaꞌtîꞌpî epuꞌnenan amîrîꞌnîkon Filípos cidaderî po. Miarî inkamoro Filípos ponkon eseurîmaꞌpî îri pe anna winîkîi. Mîîwîni tîîse anna erepamîꞌpî aapiaꞌnîkon, moropai Paapa winîpainon itekare ekaremekîꞌpî annaya apîꞌnîkon. Maasa pra Paapaya anna meruntîtannîpîꞌpî.
3 Esenkuꞌtîꞌsan pe pra anna wanî. Innape ekaremekîꞌpî annaya apîꞌnîkon imakuiꞌpî ankuꞌpai pra awinîkîiꞌnîkon. Moropai amîrîꞌnîkon anenkuꞌtîpai pra anna wanî.
4 Tîîse ituꞌse Paapa eꞌtoꞌ yawîrî anna eseurîma. Maasa pra tîmaimu ekaremeꞌtoꞌpe annaya taꞌpîiya, maasa pra yairî ikupî annaya epuꞌtîꞌpîiya. Sîrîrî itekare ekaremeꞌsaꞌ annaya pra man pemonkonyamîꞌ yapurî pe, tîîse ekaremekî annaya Paapa yapurî annaya yeꞌnen. Manniꞌ Paapa anna esenumenkatoꞌ epuꞌnen.
5 Mîrîrî anna eseurîmatoꞌ epuꞌnenan amîrîꞌnîkon. Morî pe amîrîꞌnîkon yausinpatoꞌpe anna eseurîmasaꞌ pra man. Îꞌ yuꞌse anna wanî wenai anna eseurîmasaꞌ pra man. Tîniru yuꞌse anna wanî wenai anna eseurîmasaꞌ pra man. Mîrîrî epuꞌtî pîꞌ Paapa man tamîꞌnawîrî.
6 Moropai anna eseurîmatoꞌ wenai amîrîꞌnîkonya moropai tiaronkonya anna yapurî eꞌpai pra man.
7 Tîîse anna wanî Cristo naipontîꞌsan pe. Mîrîrî yeꞌnen îꞌ rî esatî annaya eꞌpainon apîꞌnîkon tîîse sîrîrî tîpose îꞌ esaꞌsaꞌ annaya pra man, akoreꞌtaꞌnîkon anna wanî yai. Tîîse anna wanîꞌpî eranmîra akoreꞌtaꞌnîkon manniꞌ wîriꞌ tînmuku kenanya tînmukuyamîꞌ saꞌnama morî pe. Mîrîrî warantî anna wanîꞌpî amîrîꞌnîkon pokonpe.
8 Amîrîꞌnîkon saꞌnama pîꞌ anna man kureꞌne. Mîrîrî yeꞌnen itekare Paapa winîpainon ekaremekîꞌpî annaya apîꞌnîkon. Moropai inîꞌ panpîꞌ ikupîꞌpî annaya. Ituꞌse anna eꞌtoꞌ tîkuꞌse pra anna koꞌmamîꞌpî. Amîrîꞌnîkon pîikaꞌtîpîtîꞌpî annaya, kureꞌne asaꞌnamakon annaya yeꞌnen.
9 Uyonpayamîꞌ, akoreꞌtaꞌnîkon itekare Paapa winîpainon ekaremeꞌpîtî annaya yai, anna esenyakaꞌmapîtîꞌpî kureꞌne. Wei kaisarî moropai ewaron kaisarî anna yekkari yepeꞌ ton pîꞌ, amîrîꞌnîkon winîpai anna yekkari ton esatî annaya namai. Mîrîrî epuꞌtî pîꞌ naatîi.
10 Amîrîꞌnîkon innape Jesus kuꞌnenan winîkîi anna koꞌmamîꞌpî yeseru epuꞌtî pîꞌ naatîi. Morî pe anna koꞌmamîꞌpî yairî. Mîrîrî yeꞌnen anîꞌ eseurîma eserîke pra awanî anna winîkîi. Mîrîrî epuꞌtî pîꞌ naatîi tamîꞌnawîrî moropai Paapaya nîrî epuꞌtî pîꞌ man.
11 Moropai epuꞌtî pîꞌ naatîi îꞌ kaiꞌma tiwin pîꞌ awanîkon tanne, amîrîꞌnîkon panamaꞌpî annaya, manniꞌ warayoꞌya tînmukuyamîꞌ panama warantî.
12 Ituꞌse Paapa eꞌtoꞌ yawîrî aakoꞌmamîkonpa apanamaꞌpîkon annaya. Moropai ameruntîtannîpîꞌpîkon annaya innape ikuꞌtoꞌyaꞌnîkon rumaka namai. Moropai kureꞌne ayekaꞌnunkaꞌpîkon annaya Paapa wakîri pe ayeserukon enatoꞌpe, manniꞌ Paapa uurîꞌnîkon yannotîpon tîpemonkono pe eꞌnîtoꞌpe moropai ipîkku pe tîweꞌtoꞌ yarakkîrî koꞌmannîtoꞌpe, morî aꞌka ta.
13 —Morî pe man —taa annaya Paapa pîꞌ, maasa pra akoreꞌtaꞌnîkon anna wanî yai, anna nekaremekîꞌpî itekare kupîꞌpîyaꞌnîkon innape. Mîrîrî kuꞌsaꞌyaꞌnîkon pra awanî anna maimu pe, tîîse apîꞌnîkon Paapaya taasaꞌ warantî ikupîꞌpîyaꞌnîkon. Seruꞌ pepîn, mîrîrî Paapa maimu puꞌkuru wanî, innape man. Mîrîrî yeꞌnen Paapa esenyakaꞌma koꞌmannîpî amîrîꞌnîkon innape tîkupîtîponkon yewan yaꞌ.
14 Uyonpayamîꞌ, ayonpakonya amîrîꞌnîkon tarumaꞌtîꞌpî. Mîrîrî warantî Judeuyamîꞌya tonpakon innape Jesus kuꞌnenan, Paapa pemonkonoyamîꞌ tarumaꞌtîꞌpî nîrî. Mîrîrî eꞌkupîꞌpî miarî manniꞌ Judéia pata po amîrîꞌnîkon koreꞌta aweꞌkupî warantî.
15 Inkamoro Judeuyamîꞌya Uyepotorîkon Jesus wîꞌpî moropai penaronkon Paapa maimu ekaremeꞌnenan profetayamîꞌ nurîꞌtîyamîꞌ wîꞌpî nîrî. Inkamoroya rî anna tarumaꞌtîꞌpî. Paapa wakîri pe pra inkamoro nîkupîꞌpî wanî. Iteyaton pe toꞌ wanî, moropai pemonkonyamîꞌ yeyaton pe nîrî toꞌ wanî.
16 Mîrîrî yeꞌnen inkamoroya itekare eꞌpîikaꞌtîntoꞌ yekare ekaremekî annaya yuꞌse pra toꞌ wanî Judeuyamîꞌ pepîn pîꞌ. Mîrîrî tînkupîkon imakuiꞌpî wenai, inîꞌ panpîꞌ ikupî pîꞌ toꞌ koꞌmamî Paapa esetaꞌka pîkîrî. Mîrîrî yeꞌnen Paapaya toꞌ yenumî pe man apoꞌ yaꞌ.
Tessalônica Cidaderî Pona Itîîpai Paulo Wanî.
17 Uyonpayamîꞌ, mararî anna koꞌmamî akoreꞌtapaiꞌnîkon tuutîi. Tîîse aminke anna wanî pîꞌ tîwî akupîkon annaya pra man. Anna esenumenkatoꞌ man amîrîꞌnîkon yarakkîrî moropai anna enpenatan pîꞌ man apîꞌnîkon. Mîrîrî yeꞌnen itîîpai anna wanî sîrîrî, kureꞌne amîrîꞌnîkon aneraꞌmapai anna wanî yeꞌnen.
18 Ennaꞌpopai anna wanîꞌpî akoreꞌtaꞌnîkon inîꞌrî. Moropai uurî wanîꞌpî ennaꞌpopai. Mîrîrî yeꞌnen tuꞌke iteꞌka ennaꞌpo yuwaꞌpîuya tîîse sîrîrî tîpose Makuiya umanenpapîtîꞌpî ennaꞌpo namai.
19 Amîrîꞌnîkon aneraꞌmapai anna wanî kureꞌne maasa pra amîrîꞌnîkon nîrî wanî anna atausinpatoꞌpe tiaronkon innape ikupîtîponkon koreꞌta. Uyepotorîkon Jesus iipî yai, anna atausinpa kupî sîrîrî, maasa pra innape Jesus kupîꞌpîyaꞌnîkon ekaremekî annaya wenai.
20 Mîrîrî yeꞌnen amîrîꞌnîkon yapurî annaya, anna atausinpatoꞌpe awanîkon yeꞌnen.
