Sîrîrî Kaareta Eꞌmaiꞌnon Paulo Nîmenukaꞌpî Tessalônica Ponkon Pia 3:1-13
3 Amîrîꞌnîkon aneraꞌmapai anna wanî kureꞌne yapîtanîpî annaya yentai awanî. Mîrîrî yeꞌnen anna esenumenkaꞌpî uurî eꞌnîmî tiwinsarî Atena cidaderî po.
2 Moropai uyonpakon Timóteo yarimaꞌpî annaya aapiaꞌnîkon. Mîîkîrî esenyakaꞌmaꞌpî anna pokonpe Paapa maimu itekare ekaremekî pîꞌ, Uyepotorîkon Jesus Cristo pîꞌ teeseurîmasen. Mîîkîrî yaipontîꞌpî annaya amîrîꞌnîkon yausinpai moropai apîikaꞌtîiꞌnîkon innape ikuꞌtoꞌyaꞌnîkon pîꞌ.
3 Maasa pra aweꞌtarumaꞌtîkon wenai innape ikupîyaꞌnîkon pra awanîkon namai. Amîrîꞌnîkonya epuꞌtî îꞌ kaiꞌma ituꞌse Paapa eꞌtoꞌ yawîrî eꞌtarumaꞌtîn.
4 Amîrîꞌnîkon koreꞌta anna wanî yai, mîrîrî ekaremekîꞌpî annaya apîꞌnîkon eꞌtarumaꞌtîn kupî. Mîrîrî yeꞌnen epuꞌtîyaꞌnîkon mîrîrî yeꞌka eꞌkupî yai akoreꞌtaꞌnîkon.
5 Oꞌnon yeꞌka pe aakoꞌmamîkon epuꞌtîuya pra wanîꞌpî. Mîrîrî yapîtanîpîuya eserîke pra awanîꞌpî. Mîrîrî yeꞌnen Timóteo yarimaꞌpîuya ayekarekon epuꞌse attîtoꞌpe, innape Jesus kupî pîꞌ aakoꞌmamîkon epuꞌse attîtoꞌpe. Makui, uyekaꞌnunkanenkonya atarumaꞌtîsaꞌkon wenai irumakaꞌpîyaꞌnîkon kaiꞌma esenumenkaꞌpî. Mîrîrî wenai îꞌ pe pra rî anna esenyakaꞌmatoꞌ kupîyaꞌnîkon kaiꞌma wanîꞌpî.
Toꞌ Yekare Enepîꞌpî Timóteoya Paulo Pia.
6 Tîîse Timóteo erepansaꞌ wanîꞌpî Tessalônica cidaderî poi. Mîîkîrîya ayekarekon enesaꞌ wanîꞌpî morî pe, îꞌ kaiꞌma innape ikupî pîꞌ aakoꞌmamîkon yekare. Moropai îꞌ kaiꞌma eetîꞌnokoꞌmakon mîrîrî ekaremekîꞌpîiya. Moropai anna pîꞌ awenpenatapîtîkon anna aneraꞌmapai awanîkon yeꞌnen. Mîrîrî warantî amîrîꞌnîkon aneraꞌmapai anna wanîꞌpî.
7 Mîrîrî yeꞌnen uyonpayamîꞌ, anna eꞌtarumaꞌtî yeꞌka pe ayekarekon etasaꞌ annaya wenai, anna atausinpa amîrîꞌnîkon pîꞌ. Maasa pra innape ikuꞌtoꞌyakon wenai, anna atausinpan pîꞌ man.
8 Mîrîrî yeꞌnen, innape ikupî pîꞌ aakoꞌmamîkon etasauꞌya wenai anna koꞌmamî sîrîrî taatausinpai. Mîrîrî warantî ikupî pîꞌ aakoꞌmamîkon ya uyepotorîkon ton pe, anna koꞌmamî taatausinpai.
9 Mîrîrî yeꞌnen awenaiꞌnîkon anna atausinpa yeꞌnen —Morî pe man —taa annaya Paapa pîꞌ.
10 Mîrîrî warantî anna epîremapîtî wei kaisarî moropai ewaron kaisarî kureꞌne teesekaꞌnunkai. Maasa pra amîrîꞌnîkon aneraꞌmapai anna wanî ayenupatoꞌkonpe annaya. Inîꞌ panpîꞌ innape ikuꞌtoꞌyaꞌnîkon eꞌtoꞌpe yairî.
11 Uyunkon Paapaya moropai Uyepotorîkon Jesus Cristoya anna yeꞌmarî ton ekaremekî yuꞌse anna wanî, amîrîꞌnîkon eraꞌmapîꞌse anna wîtîtoꞌpe.
12 Inîꞌrî ituꞌse wanî Uyepotorîkonya inîꞌ panpîꞌ aweꞌsaꞌnamatoꞌkon ton tîrî yuꞌse wanî, îꞌ kaiꞌma tamîꞌnawîronkon saꞌnamatoꞌyaꞌnîkon eꞌtoꞌpe. Mîrîrî aweꞌsaꞌnamatoꞌkon wanî kureꞌne îꞌ kaiꞌma kureꞌne asaꞌnamaꞌpîkon annaya warantî yuꞌse anna wanî.
13 Moropai ameruntîrikon ton tîrî Paapaya yuꞌse anna wanî, morî pe awanîkonpa, imakuiꞌpî ton pra awanîkonpa Jesus Cristo iipî yai, tamîꞌnawîronkon tîpemonkonoyamîꞌ pokonpe aaipî yai.
