Sîrîrî Kaareta Eꞌmaiꞌnon Paulo Nîmenukaꞌpî Tessalônica Ponkon Pia 4:1-18
4 Tarîpai uyonpayamîꞌ, îꞌ kaiꞌma ayeserukon eꞌpai awanî pîꞌ ayenupaꞌpîkon annaya Paapa wakîri pe awanîkonpa epuꞌtîyaꞌnîkon. Moropai morî pe aakoꞌmamîkon mîrîrî warantî. Mîrîrî yeꞌnen esatî annaya sîrîrî moropai apanamakon annaya sîrîrî Uyepotorîkon Jesus maimu pe, mîrîrî kupî pîꞌ akoꞌmantî.
2 Maasa pra ayenupaꞌpîkon annaya Uyepotorîkon Jesus maimu pe. Mîrîrî epuꞌnenan amîrîꞌnîkon.
3 Morî pe aakoꞌmamîkon yuꞌse Paapa wanî. Morî pe awanîkonpa tamîꞌnawîrî imakuiꞌpî ton pra tiaronkon wîriꞌsanyamîꞌ yarakkîrî tîweꞌse pra, tiaronkon warayoꞌkon yarakkîrî tîweꞌse pra.
4 Tiwin pîꞌ siꞌma amîrîꞌnîkon esenumenka eꞌpai awanî aanoꞌpîtakonpa tiwinan neken wîriꞌ yarakkîrî, morî pe, Paapa wakîri pe awanîkonpa. Moropai nura pe pra aakoꞌmamîkon, ayonpayamîꞌ wakîri pe nîrî awanîkonpa.
5 Tuꞌkankon wîriꞌsanyamîꞌ yarakkîrî tîweꞌse pra, tuꞌkankon warayoꞌkon yarakkîrî tîweꞌse pra, Paapa epuꞌnenan pepînya ikupî manniꞌ warantî pra aakoꞌmamîkon yuꞌse Paapa wanî.
6 Mîrîrî warantî ayonpakon winîkîi imakuiꞌpî kupîyaꞌnîkon yuꞌse pra Paapa wanî, toꞌ noꞌpîtonon yarakkîrî tîweꞌse pra. Mîrîrî taꞌpîuya pena apîꞌnîkon inîꞌrî tauya sîrîrî. Mîrîrî yeꞌka kuꞌnenan tarumaꞌtî Uyepotorîkonya pe man.
7 Maasa pra Paapaya uyannosaꞌkon pra man mîrîrî yeꞌka kuꞌtoꞌpe. Tîîse uyannoꞌpîiyaꞌnîkon morî pe koꞌmannîtoꞌpe imakuiꞌpî ton pra.
8 Mîrîrî yeꞌnen anîꞌya sîrîrî esenupantoꞌ yewanmîrî ya, pemonkonya yenupantoꞌ yewanmîrîiya pepîn, tîîse Paapaya yenupantoꞌ yewanmîrîiya, manniꞌ Paapa amîrîꞌnîkon repanen Morî Yekaton Wannî ke. Mîrîrî yeꞌnen mîrîrî yeꞌka kuꞌnenan tarumaꞌtîiya pe man.
9 Inîꞌrî amîrîꞌnîkon pia kaareta anmenukapai pra wai, aweꞌsaꞌnamatoꞌkon pîꞌ teeseurîmasen. Maasa pra Paapaya ayenupaꞌpîkon yawîrî ikupî pîꞌ aakoꞌmamîkon yeꞌnen, îꞌ kaiꞌma tiaronkon saꞌnamayaꞌnîkon yeꞌnen.
10 Mîrîrî aweꞌsaꞌnamatoꞌkon ke tiaronkon saꞌnamayaꞌnîkon Macedônia pata po. Mîrîrî yeꞌnen tauya uyonpayamîꞌ, mîrîrî kupî pîꞌ akoꞌmantî inîꞌ panpîꞌ.
11 Tîîwanmîra aakoꞌmamîkon yuwatî. Eesenyakaꞌmatoꞌkon pîꞌ morî pe eꞌtî, tiaronkon esenyakaꞌmatoꞌ yaꞌ teewonpîꞌse pra. Tîîse teesenyakaꞌmai neken eporîyaꞌnîkon, tiaronkon pîꞌ îꞌ esatî pîꞌ tîweꞌse pra. Pena mîrîrî taꞌpî annaya yawîrî akoꞌmantî.
12 Mîrîrî warantî ikupîyaꞌnîkon ya, tiaronkon innape Paapa kuꞌnenan pepînya ayeserukon eraꞌma. Mîrîrî wenai ayapurîkon toꞌya. Moropai mîrîrî warantî ikupîyaꞌnîkon ya, ayekkarikon ton eporîyaꞌnîkon aawarîrîꞌnîkon tiaronkon pîꞌ tesaꞌse pra.
Uyepotorîkon Iiꞌtoꞌ Yekare Pîꞌ Eeseurîma.
13 Uyonpayamîꞌ, isaꞌmantaꞌsan yekare pîꞌ anna eseurîma sîrîrî yairî awanî epuꞌtîkonpa. Îꞌ kaiꞌma manniꞌkan isaꞌmantaꞌsan wanî kupî ekaremekîuya, maasa pra teesewankonoꞌmai awanîkon namai. Manniꞌkan innape Paapa kuꞌnenan pepîn, saꞌmantaꞌsan eꞌmîꞌsaꞌka pe pra tîweꞌkuꞌsanon esewankonoꞌma warantî awanîkon namai ekaremekîuya sîrîrî.
14 Tîîse uurîꞌnîkon innape Jesus saꞌmantaꞌpî kuꞌnenan moropai aweꞌmîꞌsaꞌkaꞌpî kuꞌnenan. Mîrîrî warantî innape Paapaya Jesus enepî epuꞌtîꞌnîkon. Manniꞌkan innape ikuꞌnenan saꞌmantasaꞌ pokonpe aaipî epuꞌtîꞌnîkon.
15 Uyepotorîkonya taasaꞌ yawîrî apîꞌnîkon taa annaya sîrîrî see warantî: Uyepotorîkon iiꞌtoꞌ weiyu yai, uurîꞌnîkon enen tîweꞌsanon wîtî pepîn iipia, isaꞌmantaꞌsan rawîrî. Tîîse isaꞌmantaꞌsan wîtî eꞌmaiꞌ pe.
16 Maasa pra Uyepotorîkon iipî yai, imaimu eta kupî sîrîrî moropai inserîyamîꞌ yepotorî eꞌmaiꞌnon maimu eta moropai Paapa waiyi eta kupî sîrîrî. Mîrîrî yai inkamoro innape Jesus Cristo kuꞌnenan saꞌmantaꞌsan pîmîꞌsaꞌkaiya kupî tîponaya eꞌmaiꞌ pe.
17 Mîrîrî tîpo inkamoro yeꞌmaꞌpî pîꞌ uurîꞌnîkon enen tîweꞌsanon eseporî kupî sîrîrî toꞌ pokonpe eꞌnîtoꞌpeꞌnîkon katupuru po. Mîrîrî yai toꞌ pokonpe eseponîꞌnîkon kupî sîrîrî Uyepotorîkon pokonpe. Moropai mîrîrî tîpo ipatîkarî koꞌmannî kupî sîrîrî yarakkîrî.
18 Mîrîrî yeꞌnen sîrîrî tauya manniꞌ pîꞌ taatausinpai eꞌtî. Meruntî ke eꞌtî. Tiaronkon meruntîtannîꞌtî teesewankonoꞌmai toꞌ wanî namai isaꞌmantaꞌsan yekare pîꞌ.
